โรม – Romans บทที่ 15
โรม 15:1 จั่งซั้น พวกเฮาผู้มีความเซื่อเข้มแข็งควรสิเห็นใจซ่อยซูแนวอ่อนแอของพี่น้อง ผู้มีความเซื่อบ่เข้มแข็ง แล้วบ่ควรสิเฮ็ดตามใจมักของโตเอง
โรม 15:2 คือ ให้เฮาคู่คนคึดเห็นใจเพื่อนบ้าน โดยเห็นแก่ผลประโยชน์ กับซ่อยส่งเสริมความเจริญใจของเขา
โรม 15:3 โดยว่า แม้นแต่พระเยซูคริสต์เอง เพิ่นกะบ่ได้เฮ็ดอีหยังตามใจมักของเพิ่น คือจั่งมีพระคำเขียนไว้แล้วว่า “ความอัปยศอับอายของพวกเขา ได้ตกอยู่กับเฮา”
โรม 15:4 คือว่า คู่อย่างที่มีเขียนไว้ในพระคำมาก่อน กะเขียนไว้เพื่อการสอนการเฮียนฮู้ของพวกเฮา เพื่อเฮาสิมีความหวังอันมั่นคงโดยการอดทนพาก เพียร อบอุ่นใจในพระคำฮั้น
โรม 15:5 บัดนี้ ขอให้พระเจ้าผู้ให้ความพากเพียร กับความปลอบโยน โปรดซ่อยให้พวกเจ้าทั้งหลายเป็นน้ำหนึ่งใจเดียวกันและกัน ตามแบบอย่างของพระเยซูคริสต์
โรม 15:6 นี้กะเพื่อพวกเจ้าสิพร้อมกันสรรเสริญพระเจ้าผู้เป็นพ่อของพระเยซูคริสต์เจ้าของเฮา ด้วยน้ำหนึ่งใจเดียวกัน กับด้วยเสียงปากพร้อมเพรียงกัน
โรม 15:7 จั่งซั้น ให้ต้อนฮับกันและกัน คือจั่งที่พระคริสต์ได้ทรงต้อนฮับเฮาทั้งหลายเพื่อเข้าสู่พระเกียรติของพระเจ้า
โรม 15:8 บัดนี้ ข้อยว่า พระเยซูคริสต์ยอมปรนนิบัติฮับใซ้ซาวอิสราเอล พวกที่เข้าสุหนัตฮั้น เพื่อยืนยันเถิงคำมั่นสัญญาที่พระเจ้าได้ให้ไว้กับพวกพ่อตระกูลของเขาในสมัยก่อน
โรม 15:9 แล้วเพื่อคนต่างซาติสิได้มีโอกาสถวายเกียรติพระเจ้า ย้อนความเมตตาของเพิ่น ตามที่มีพระคำเขียนไว้ว่า “ย้อนเหตุนี้ล่ะ ผู้ข้าสิฮับปากเป็นพยานให้ท่านอยู่กับพวกคนต่างซาติ กับสิร้องเพลงสรรเสริญพระนามท่านนำ”
โรม 15:10 แล้วได้มีพระคำกล่าวอีกว่า “พวกคนต่างซาติทั้งหลาย เอ๋ย ให้ซื่นซมยินดีฮ่วมกับคนของพระเจ้าเด้อ”
โรม 15:11 แล้วยังมีคำกล่าวอีกว่า “ให้สรรเสริญพระผู้เป็นเจ้า พวกคนต่างซาติทั้งหลาย เอ๋ย ให้ถวายยศถวายเกียรติต่อเพิ่นเด้อ คนซนซาติทั้งหลาย”
โรม 15:12 แล้วอิสยาห์ได้เว้าอีกว่า “สิมีผู้หนึ่งเกิดมาตามเซื้อสายของเจสซี แล้วผู้ฮั้นสิขึ้นครอบครองเหนือพวกคนต่างซาติ แล้วพวกคนต่างซาติฮั้นสิวางใจในเพิ่นผู้ฮั้น”
โรม 15:13 บัดนี้ ขอพระเจ้าผู้ให้ความหวังอันมั่นคง โปรดให้พวกเจ้าเต็มไปด้วยความซื่นซมยินดี กับสันติภาพโดยทางความเซื่อ เพื่อพวกเจ้าสิได้เต็มล้นไปด้วยความหวังอันมั่นคงฮั้น โดยฤทธิ์กำลังของพระวิญญาณ
โรม 15:14 แล้วโตข้อยจั่งเซื่อมั่นเถิงพวกเจ้าผู้เป็นพี่น้องของข้อย ว่าพวกเจ้าประกอบด้วยความดีอย่างเต็มเปี่ยม กับด้วยความฮู้ความเข้าใจในคู่อย่าง จั่งสามารถเตือนสติเบิ่งแยงกันและกันได้
โรม 15:15 จั่งใดกะตาม พี่น้องทั้งหลาย เอ้ย ข้อยได้เขียนบางเรื่องเถิงเจ้าโดยใซ้คำแฮงแหน่ เพื่อเตือนความจำของพวกเจ้า กะย้อนเรื่องพระกรุณาธิคุณที่พระเจ้าได้มอบหมายไว้กับข้อยหนิ
โรม 15:16 เพื่อข้อยสิได้เป็นผู้ปรนนิบัติฮับใซ้ของพระเยซูคริสต์ นำเรื่องข่าวประเสริฐของพระเจ้าไปยังคนต่างซาติ เพื่อสิได้ถวายคนต่างซาติฮั้นไว้เป็นเครื่องบูซา เป็นที่ยอมฮับในสายตาของพระเจ้า เป็นผู้บริสุทธิ์เฉพาะเพิ่น โดยพระวิญญาณ
โรม 15:17 จั่งซั้น ข้อยมีเหตุที่สิอวดในพระเยซูคริสต์ เรื่องการฮับใซ้พระเจ้าของข้อยหนิ
โรม 15:18 แต่ว่าข้อยบ่กล้าอ้างเถิงผลงานอื่นๆ นอกจากผลงานที่พระคริสต์ได้เฮ็ด ทางการเว้า กับการงานของโตข้อย เพื่อนำคนต่างซาติมาเซื่อฟัง
โรม 15:19 คือ ข้อยจั่งประกาศข่าวประเสริฐเรื่องพระคริสต์อยู่คู่หม่อง จากเมืองเยรูซาเล็มอ้อมไปฮอดเมืองอิลลีริคุม โดยมีเหตุการณ์สำคัญอันเป็นสัญลักษณ์ กับมหัศจรรย์อันเป็นตางึดที่ปรากฎโดยฤทธิ์อำนาจของพระวิญญาณของพระเจ้า
โรม 15:20 ที่จริงแล้ว ข้อยอุตส่าห์ตั้งใจที่สิประกาศข่าวประเสริฐในหม่องใหม่ คือหม่องที่บ่เคยมีใผออกพระนามของพระคริสต์มาก่อนจักเทื่อ กะเพื่อข้อยสิบ่ได้ก้าวก่าย ก่อขึ้นทับงานที่คนอื่นได้วางไว้ก่อนแล้ว
โรม 15:21 ตามที่มีคำทำนายไว้ก่อนว่า “ส่วนผู้ที่บ่เคยมีใผไปประกาศเรื่องเพิ่นกะสิได้ฮู้ได้เห็น กับส่วนผู้ที่บ่เคยได้ฮับฟัง เขากะสิได้เข้าใจ”
โรม 15:22 แล้วย้อนเหตุนี้ล่ะ ข้อยจั่งถืกขัดขวางไว้หลาย จั่งบ่สามารถมาหาพวกเจ้าได้
โรม 15:23 แต่บัดนี้ มันบ่จำเป็นที่ข้อยต้องอยู่นี้อีกต่อไป ข้อยคึดฮอดพวกเจ้าตั้งหลายปี เลยปรารถนาอย่างแฮงที่สิมาหา
โรม 15:24 จั่งซั้น ยามใดข้อยเดินทางไปประเทศสเปน ข้อยสิแวะมาหาพวกเจ้า หวังว่าสิได้มาพ้อมาเห็นพวกเจ้าในขณะที่ไป กับฮับความปลอบโยนใจจากพวกเจ้านำ ก่อนได้เดินทางต่อ
โรม 15:25 แต่ในขณะนี้ ข้อยสิขึ้นไปยังเมืองเยรูซาเล็ม ไปปรนนิบัติซ่อยเหลือคนของพระเจ้าอยู่ฮั่น
โรม 15:26 คือ พวกพี่น้องในแคว้นมาซิโดเนียกับแคว้นอาคายา ได้เห็นดีเห็นซอบที่สิถวายทรัพย์ ส่งไปให้ซ่อยคนของพระเจ้าที่ตกทุกข์ได้ยากอยู่ที่เยรูซาเล็ม
โรม 15:27 คือพวกพี่น้องคนต่างซาติฮั้น ฮู้สึกดีใจหลายที่มีโอกาสซ่อยพี่น้องคนยิวอยู่เมืองเยรูซาเล็มฮั่น มันกะสมควรแล้ว คือเขาเป็นหนี้พวกคนยิวย้อนเขาได้ฮับหุ้นส่วนทางจิตวิญญาณจากคนยิว กะถืกแล้วที่พวกเขาอยากซ่อยทางข้าวของเครื่องใซ้ในยามยากของเขาฮั้น
โรม 15:28 จั่งซั้น บัดข้อยไปมอบแนวถวายฮั้นให้พวกเขาแล้ว ข้อยกะสิออกเดินทางไปยังประเทศสเปน แล้วจั่งแวะไปหาพวกเจ้าอยู่ฮั้นนำ
โรม 15:29 แล้วข้อยมั่นใจว่า บัดข้อยมาหาพวกเจ้าฮั้น ใจข้อยกะสิเต็มไปด้วยพระพรทางข่าวประเสริฐของพระคริสต์
โรม 15:30 บัดนี้ พี่น้องทั้งหลาย เอ้ย ข้อยจั่งวอนขอโดยเห็นแก่พระเยซูคริสต์เจ้า กับเห็นแก่ความฮักแพงทางพระวิญญาณ ให้พวกเจ้าซ่อยอธิษฐานเว้านำพระเจ้าเพื่อข้อยด้วยความกระตือรือร้นแหน่
โรม 15:31 เพื่อข้อยสิได้พ้นจากมือของคนในเขตยูเดียผู้ที่บ่ได้ฮับเซื่อฮั่น กับเพื่อให้การปรนนิบัติซ่อยของข้อยอยู่ในเมืองเยรูซาเล็มสิเป็นที่ยอมฮับพอใจของพี่น้องคนของพระเจ้าอยู่ฮั่น
โรม 15:32 เพื่อข้อยอาจสิได้มาหาพวกเจ้าด้วยความซื่นซมยินดีตามพระประสงค์ของพระเจ้า แล้วเฮาทั้งสองฝ่ายสิได้ฮับความเบิกบานแจ่มใสอยู่ดีมีแฮงนำกันในพระเจ้า
โรม 15:33 บัดนี้ ขอให้พระเจ้าผู้โปรดให้มีสันติภาพ สถิตอยู่กับพวกเจ้าคู่คนเถอะ อาเมน
////////// ////////// //////////