โรม – Romans บทที่ 8

โรม 8:1 จั่งซั้น บัดนี้บ่มีการกล่าวโทษสำหรับคนทั้งหลายที่อยู่ในพระเยซูคริสต์ ซึ่งบ่ได้ดำเนินซีวิตตามฝ่ายเนื้อหนัง แต่ได้ดำเนินซีวิตตามการทรงนำของพระวิญญาณ

โรม 8:2 ย้อนว่า กฎของพระวิญญาณซึ่งเป็นซีวิตในพระเยซูคริสต์ ได้เฮ็ดให้ข้อยพ้นจากกฎของบาปกับความตาย 

โรม 8:3 โดยว่า แนวที่กฎบัญญัติบ่สามารถเฮ็ดได้ ย้อนว่าเนื้อหนังอ่อนกำลัง พระเจ้าเลยเฮ็ดได้โดยใซ้พระบุตรของเพิ่นลงมาสวมสภาพคือจั่งมนุษย์ผู้เป็นบาป เพื่อสิไถ่เขาออกจากสภาพบาปฮั้น โดยฮับเป็นโทษบาปในเนื้อหนังของเพิ่น**

โรม 8:4 เพื่อความซอบธรรมของกฎบัญญัติฮั้นสิได้สำเร็จในพวกคนเฮา ผู้ที่บ่ได้ใซ้ซีวิตตามเนื้อหนัง แต่ตามการทรงนำของพระวิญญาณ

โรม 8:5 ย้อนว่า ผู้คนทั้งหลายที่ใซ้ซีวิตตามเนื้อหนังกะได้ปักใจในแนวของเนื้อหนัง แต่ผู้คนทั้งหลายที่ใซ้ซีวิตตามการทรงนำของพระวิญญาณกะปักใจในแนวของพระวิญญาณ

โรม 8:6 ด้วยว่า ใจที่จดจ่ออยู่กับสิ่งฝ่ายเนื้อหนังฮั้น กะเป็นการจดจ่ออยู่กับความตาย แต่ใจที่จดจ่ออยู่กับสิ่งฝ่ายพระวิญญาณ กะเป็นการจดจ่ออยู่กับซีวิต กับสันติภาพ

โรม 8:7 โดยว่า ใจที่จดจ่ออยู่กับสิ่งฝ่ายเนื้อหนังกะเป็นปฏิปักษ์ต่อต้านพระเจ้า ย้อนว่ามันบ่ยอมอยู่ใต้กฎบัญญัติของพระเจ้า แล้วบ่อาจอยู่ใต้กฎบัญญัติฮั้นได้เลย

โรม 8:8 จั่งซั้น ผู้ที่อยู่ฝ่ายเนื้อหนังสิเป็นที่ซอบของพระเจ้าบ่ได้เลย

โรม 8:9 แต่ว่า คั่นพระวิญญาณของพระเจ้าสถิตอยู่ในโตเจ้า เจ้ากะบ่ได้อยู่ฝ่ายเนื้อหนังแล้ว แต่อยู่ฝ่ายพระวิญญาณ แต่บัดนี้คั่นผู้ใดบ่มีพระวิญญาณของพระคริสต์สถิตอยู่ ผู้ฮั้นกะบ่แม่นคนของพระเจ้า 

โรม 8:10 แล้วคั่นพระคริสต์อยู่ในโตเจ้าแล้ว แม้นแต่ร่างกายเป็นของตายย้อนบาป จิตวิญญาณของเจ้ามีซีวิตย้อนความซอบธรรม

โรม 8:11 แต่ว่า คั่นพระวิญญาณของเพิ่นผู้ที่บันดาลให้พระเยซูเป็นขึ้นมาจากตาย ได้สถิตอยู่ในเจ้าแล้ว พระเจ้าผู้ที่บันดาลให้พระคริสต์เป็นขึ้นมาจากตายฮั้น สิโปรดให้กายอนิจจังของเจ้ามีซีวิตโดยพระวิญญาณของเพิ่น ผู้ที่สถิตอยู่ในโตเจ้าฮั้น

โรม 8:12 จั่งซั้น พี่น้องทั้งหลาย เอ้ย พวกเฮากะเป็นหนี้อยู่ แต่บ่แม่นเป็นหนี้ฝ่ายเนื้อหนัง ที่สิต้องใซ้ซีวิตตามเนื้อหนังฮั่น 

โรม 8:13 คือ คั่นพวกเจ้าใซ้ซีวิตตามเนื้อหนังฮั้น เจ้ากะสิตายไป แต่คั่นเจ้าประหารซีวิตฝ่ายเนื้อหนังโดยทางพระวิญญาณ เจ้ากะสิมีซีวิตอยู่ได้

โรม 8:14 คือ ผู้หนึ่งผู้ใดที่อยู่ด้วยการทรงนำของพระ¬วิญญาณของพระเจ้า ผู้ฮั้นเป็นลูกของพระเจ้า

โรม 8:15 คือ พวกเจ้าบ่ได้ฮับวิญญาณของการเป็นทาส จั่งสู่ความตกใจหย้านอีก แต่ได้ฮับพระวิญญาณ ผู้เพิ่นให้สิทธิ์เป็นลูกคีงๆ ของพระเจ้าซึ่งสามารถเอิ้นเพิ่นว่า “อีพ่อๆ เอ้ย”

โรม 8:16 แล้วพระวิญญาณฮั้นเองเป็นพยานกันกับจิตวิญญาณของพวกเฮา ว่าพวกเฮาทั้งหลายได้เป็นลูกๆ ของพระเจ้าแล้ว 

โรม 8:17 แล้วคั่นได้เป็นลูกๆ ของพระเจ้า หมายความว่าเฮามีส่วนฮ่วมในกรรมสิทธิ์ของเพิ่น คือมีกรรมสิทธิ์ฮ่วมกันกับพระคริสต์ แล้วคั่นพวกเฮาทนความทุกข์ลำบากด้วยกันกับพระคริสต์ พวกเฮากะสิได้มีส่วนฮ่วมในพระสิริอันรุ่งเรืองของเพิ่นนำ

โรม 8:18 คือ ข้อยถือว่า ความทุกข์ลำบากในปัจจุบันนี้ บ่สามารถที่สิเปรียบเทียบกับพระสิริอันรุ่งเรืองฮั้นที่สิเปิดเผยในพวกเฮาในอนาคต 

โรม 8:19 ด้วยว่า สิ่งธรรมซาติทั้งปวงที่พระเจ้าได้สร้าง พวมคองถ้าจนกว่าลูกๆ ของพระเจ้าได้ฮับการเปิดเผย 

โรม 8:20 โดยว่า สิ่งธรรมซาติแนวที่พระเจ้าได้สร้าง ต้องเสื่อมสภาพเดิมสู่สภาพอนิจจังย้อนการสาปแซ่ง บ่แม่นด้วยการสมัคร แต่เป็นไปตามพระประสงค์ที่พระเจ้าได้กำหนดไว้ในการสาปแซ่งฮั้น ด้วยความหวังดี

โรม 8:21 แล้วแนวธรรมซาติที่พระเจ้าได้สร้าง เพิ่นกะสิกอบกู้ออกจากการตกเป็นทาสของสภาพอนิจจังฮั่น เข้าสู่เสรีภาพของลูกๆ ของพระเจ้าซึ่งประกอบด้วยพระสิริอันรุ่งเรือง

โรม 8:22 คือ พวกเฮาฮู้อยู่แล้วว่า แนวธรรมซาติที่พระเจ้าได้สร้างฮั้น พวมสิคร่ำครวญฮ่วมกัน ด้วยความเจ็บปวดปานแม่สิออกลูกฮอดคู่มื้อนี้

โรม 8:23 บ่แม่นแต่สิ่งธรรมซาติฮั้น แต่พวกคนเฮาทั้งหลายนำ ที่ได้ฮับพระวิญญาณเป็นผลแรก แม้นแต่พวกเฮาเองกะยังคร่ำครวญคอยถ้าผลสำเร็จในการฮับสภาพเป็นลูกคีงๆ ของพระเจ้า คือคอยถ้าด้วยความตื่นเต้นการเข้าสู่สภาพอมตะฮั้น บัดเพิ่นสิลงมาฮับเอาพวกเฮาไว้ไปอยู่นำเพิ่นฮั่น 

โรม 8:24 คือว่า พวกเฮาได้รอดย้อนความหวังอันมั่นคง แต่ความหวังในแนวที่เฮามองเห็นได้ กะบ่แม่นความหวังอีหลี คือใผแหน่สิอาศัยความหวังในแนวที่เขามองเห็นต่อหน้าได้แล้วซั่น 

โรม 8:25 แต่ว่า คั่นพวกเฮาคอยถ้าด้วยความ หวังในแนวที่ตาเฮายังบ่ทันเห็น เฮาจั่งสิคอยถ้าด้วยความหมั่นเพียร

โรม 8:26 ในทำนองเดียวกันพระวิญญาณซ่อยพวกเฮาในความอ่อนแอ ตอนเฮาบ่จักว่าควรสิอธิษฐานแบบใด คือพระวิญญาณเองอ้อนวอนแทนเฮา ด้วยการคร่ำครวญซึ่งเหลือที่สิเว้าเป็นคำได้

โรม 8:27 แล้วพระเจ้าผู้เพิ่นที่วิจัยหัวใจมนุษย์ หยั่งฮู้ความหมายของพระวิญญาณ ย้อนว่าพระวิญญาณได้วอนขอเพื่อคนของพระเจ้าทั้งหลาย ตามพระประสงค์อันเป็นที่ซอบของพระเจ้า 

โรม 8:28 แล้วเฮาฮู้กันว่า พระเจ้าเพิ่นให้เมิ้ดคู่แนวประสานกันให้เกิดผลอันดีในคู่อย่างสำหรับผู้ที่ฮักเพิ่น คือให้ผู้ที่เพิ่นได้เอิ้นได้เซิญมาฮั้น ตามพระประสงค์อันดีงามของเพิ่น

โรม 8:29 โดยว่า ผู้หนึ่งผู้ใดที่เพิ่นได้ฮู้จักไว้ก่อนฮั้น เพิ่นมีแผนการอันดีไว้ ให้เขาเปลี่ยนสภาพใหม่ ให้ตามลักษณะภาพคือจั่งพระบุตรของเพิ่น เพื่อพระบุตรฮั้นสิได้เป็นใหญ่เป็นบุตรหัวปีอยู่นำพวกพี่น้องทั้งหลาย 

โรม 8:30 หลายกว่าฮั้นอีก ผู้คนทั้งหลายที่เพิ่นได้ตั้งแผนการไว้ให้ก่อนแล้วฮั้น เพิ่นกะได้เอิ้นได้เซิญมานำ แล้วผู้คนที่เพิ่นได้เอิ้นได้เซิญมาแล้วฮั้น เพิ่นกะได้โปรดให้เขาเป็นผู้ซอบธรรมอันถืกต้อง แล้วผู้ที่เพิ่นได้โปรดให้เป็นผู้ซอบธรรมอันถืกต้องแล้วฮั้น เพิ่นกะยังโปรดให้เข้ามีหุ้นส่วนในพระสิริอันรุ่งเรืองของเพิ่นนำ 

โรม 8:31 คั่นเป็นจั่งซั้นแล้ว เฮาสิว่าจั่งใดดี คือคั่นพระเจ้าอยู่ฝ่ายเฮาแล้ว แม่นใผสิขัดขวางต่อต้านสู้เฮาได้ 

โรม 8:32 คือพระเจ้าผู้เพิ่นที่บ่ได้หวงแหนพระบุตรของเพิ่นไว้ แต่ได้มอบไว้เพื่อให้คนเฮาทั้งหลายแล้ว คั่นเป็นจั่งซั้น พระเจ้าเพิ่นสิบ่มอบสิ่งสารพัดอื่นๆ ให้คนเฮาทั้งหลายนำกัน พร้อมกับพระบุตรของเพิ่นบ่แม่นบ้อ 

โรม 8:33 บัดนี้ คั่นเป็นจั่งซั้นแล้ว แม่นใผแหน่สิสามารถฟ้องร้องใส่พวกเฮาได้ ผู้ที่พระเจ้าได้เลือกรับรองไว้แล้วฮั้น ย้อนพระเจ้าเองถือว่าเฮาเป็นคนซอบธรรมถืกต้องแล้ว

โรม 8:34 แม่นใผมีสิทธิ์ฟ้องร้องกล่าวโทษใส่ได้ คือพระคริสต์ได้ตายเป็นโทษแทนคนเฮาแล้ว เอ่อ ยิ่งกว่าฮั้นอีก เพิ่นได้เป็นขึ้นมาจากตายแล้ว ดำรงอยู่เบื้องขวาของพระเจ้า เป็นผู้ไกล่เกลี่ย วอนขอต่อพระเจ้าเพื่อคนเฮาทั้งหลาย 

โรม 8:35 คั่นจั่งซั้นแล้ว แม่นใผสิสามารถเฮ็ดให้คนเฮาทั้งหลายถืกตัดขาดจากความฮักของพระคริสต์ให้ได้ สิเป็นความยากลำบากกะดี หรือความทุกข์กะดี หรือการข่มเหงเบียดเบียนกะดี หรือการขาดอาหารการกินกะดี หรือการขาดเสื้อผ้าหน้าแพรกะดี หรือการถืกอันตรายโพยภัยกะดี หรือคมดาบกะดี 

โรม 8:36 ตามที่เขียนไว้แล้วว่า “ผู้ข้าทั้งหลายจั่งถืกประหารเมิ้ดมื้อเมิ้นเว็น ย้อนเห็นแก่พระเจ้า นับว่าพวกเฮาเป็นคือแกะที่สินำเอาไปฆ่า” 

โรม 8:37 บ่มีดอก ในเหตุการณ์ทั้งเมิ้ดแนวหมู่นี้ พวกเฮามีซัยซนะยิ่งกว่าผู้พิชิตโดยทางพระเยซูคริสต์ ผู้เพิ่นได้ฮักแพงพวกเฮาทั้งหลาย 

โรม 8:38 จั่งซั้น ข้อยมีความมั่นใจว่า แม้นแต่ความตายกะดี หรือซีวิตกะดี หรือเทวทูตกะดี หรือศักดิเทพผู้มีบรรดาศักดิ์กะดี หรือฤทธิ์เดชทั้งหลายกะดี หรือแนวที่มีอยู่ในปัจจุบันคู่มื้อนี้กะดี หรือแนวที่สิมาในอนาคตกะดี 

โรม 8:39 หรือที่สูงกะดี หรือที่ลึกกะดี หรือแนวอื่นๆ ใดๆ ที่ได้ถืกสร้างแล้วกะดี คือแนวหมู่นี้สิบ่สามารถเฮ็ดให้พวกเฮาทั้งหลายถืกตัดขาดจากความฮักของพระเจ้า ซึ่งมีอยู่ในพระเยซูคริสต์เจ้าของเฮาได้
////////// ////////// //////////