โรม – Romans บทที่ 6

โรม 6:1 คั่นเป็นจั่งซั้นแล้ว เฮาสิว่าจั่งใด เฮาควรสิเฮ็ดบาปต่อไปคือเก่าอีก เพื่อพระคุณสิได้ปรากฎแฮงหลายขึ้นบ้อ 

โรม 6:2 เป็นไปบ่ได้เลย คือพวกเฮาผู้ที่ตายต่อบาปแล้ว สิใซ้ซีวิตอยู่ในบาปต่อไปอีกเฮ็ดหยัง 

โรม 6:3 คือ พวกเจ้าบ่ฮู้กันบ้อ ว่าผู้ใดที่ฮับการเข้ามีส่วนฮ่วม**ในพระเยซูคริสต์แล้ว กะได้ฮับการเข้ามีส่วนฮ่วมในการตายของเพิ่น

โรม 6:4 จั่งซั้น คนเฮาที่อยู่ในพระเยซูคริสต์ได้ถืกฝังไว้ เข้ามีส่วนฮ่วมในการตายนำเพิ่น แล้วการที่พระคริสต์ได้เป็นขึ้นมาจากตายฮั้น กะได้โดยเดชพระสิริของพระเจ้าผู้เป็นพ่อ จั่งซั้น พวกเฮาควรสิดำเนินตามซีวิตใหม่ฮั้นนำ

โรม 6:5 คือ คั่นพวกเฮาได้ถืกฝังมีส่วนฮ่วมในการตายในแบบเดียวกันกับเพิ่นแล้ว เฮากะสิเป็นขึ้นมาจากตายในแบบเดียวกันกับเพิ่นคือกัน

โรม 6:6 คือเฮาฮู้ว่า คนเก่าของเฮาได้ถืกขึงไว้เทิงหลักประหารนำเพิ่นแล้ว เพื่อโตเก่าที่เฮ็ดบาปฮั่นสิเมิ้ดสิ้นไป เพื่อพวกเฮาบ่ต้องเป็นขี้ข้าของบาปอีกต่อไปเลย

โรม 6:7 คือ ผู้ที่ตายไปแล้ว กะได้ฮับการปลดปล่อยจากอำนาจของบาป

โรม 6:8 บัดนี้ คั่นเฮาได้ตายกับพระคริสต์แล้ว เฮามั่นใจว่า เฮาสิมีซีวิตดำรงอยู่กับเพิ่นนำ

โรม 6:9 โดยฮู้ว่า พระคริสต์ผู้ที่เป็นขึ้นมาจากตายแล้ว กะสิบ่ตายอีกต่อไป กะย้อนความตายฮั้นบ่มีอำนาจเหนือเพิ่นอีกเลย 

โรม 6:10 คือว่า การที่พระเยซูตายฮั้น เพิ่นกะตายเพื่อบาปของพวกเฮาเพียงเทื่อเดียว แต่ที่เพิ่นมีซีวิตดำรงอยู่นี้ เพิ่นกะมีซีวิตอยู่เพื่อพระเจ้า 

โรม 6:11 แล้วในทำนองเดียวกัน ให้พวกเจ้าถือว่า โตเองได้ตายต่อบาปแล้วเด้อ แต่มีซีวิตอยู่เพื่อพระเจ้า โดยในพระเยซูคริสต์เจ้าของพวกเฮา 

โรม 6:12 จั่งซั้น อย่าให้อำนาจของบาปครอบงำกายอนิจจังที่ต้องตายของเจ้าเด้อ ที่ว่าสิต้องเซื่อฟังตามตัณหาของมันฮั้น 

โรม 6:13 กับอย่ายอมปล่อยอวัยวะของโตเจ้าไว้เป็นเครื่องมือของบาป เพื่อเฮ็ดแนวบ่ถืกบ่แม่นของมัน แต่ให้มอบโตของเจ้าไว้ให้พระเจ้า คือจั่งคนที่เป็นขึ้นมาจากตาย เข้าสู่ซีวิตใหม่แล้ว กับให้มอบอวัยวะของโตเจ้าไว้เป็นเครื่องมือเฮ็ดแนวถืกแนวแม่นย้อนเห็นแก่พระเจ้า 

โรม 6:14 คือบาปบ่มีอำนาจปกครองเหนือเจ้าต่อไปอีก ย้อนว่าเจ้าบ่ได้อยู่ใต้กฎบัญญัติ แต่อยู่ใต้ฮ่มพระคุณพระเจ้า 

โรม 6:15 คั่นบ่ซั้นสิว่าจั่งใดดี สิเฮ็ดบาปย้อนว่าเฮาบ่ได้อยู่ภายใต้กฎบัญญัติซั้นบ้อ แต่อยู่ใต้ฮ่มพระคุณฮั้น บ่ได้เลย 

โรม 6:16 พวกเจ้าบ่ฮู้บ้อว่า บัดยามเจ้ายอมเซื่อฟังนายผู้ใด เจ้ากะยอมเป็นทาสของนายผู้ที่เจ้าเซื่อฟังฮั้น บ่ว่าสิเซื่อฟังบาปซึ่งนำไปสู่ความตาย หรือเซื่อฟังความซอบธรรมที่นำไปสู่ซีวิต 

โรม 6:17 แต่ว่า ขอบคุณพระเจ้าที่ว่า แต่ก่อนพวกเจ้าเป็นทาสของบาป แต่บัดนี้พวกเจ้าได้เซื่อฟังหลักคำสอนจากใจจริง ที่นำมาให้เจ้าแล้วฮั้น 

โรม 6:18 แล้วบัดนี้ โดยที่ว่าพวกเจ้าได้ฮับการปลดปล่อยให้พ้นจากการเป็นทาสของบาปแล้ว พวกเจ้ากะกลายเป็นทาสฮับใซ้ของความซอบธรรม 

โรม 6:19 ที่ข้อยเว้าหนิ ข้อยกะเว้าอย่างคนธรรมดาซื่อๆ ย้อนพวกเจ้ากะยังอ่อนกำลังย้อนเนื้อหนัง คือแต่ก่อนพวกเจ้าเคยปล่อยอวัยวะของโตเจ้าให้เป็นทาสของแนวสกปรกโสมม ซึ่งเป็นแนวซั่วซ้อนแนวซั่ว แต่บัดนี้ให้พวกเจ้าใซ้อวัยวะของโตเจ้า ให้เป็นทาสฮับใซ้ของความซอบธรรมเด้อ กะเพื่อเห็นแก่ความบริสุทธิ์ 

โรม 6:20 ย้อนว่า ตอนพวกเจ้าเป็นทาสของบาปฮั้น พวกเจ้ากะยังปล่อยโตเละเทะไป คือบ่ได้อยู่ในการครอบครองของความซอบธรรม 

โรม 6:21 ตอนฮั้น ซีวิตของพวกเจ้าได้ผลประโยชน์ดีอีหยัง ในแนวเป็นตาอายที่พวกเจ้าเคยเฮ็ดมา ซึ่งปลายทางของการเฮ็ดแนวฮั้นเข้าสู่ความตาย 

โรม 6:22 แต่เดี๋ยวนี้ พวกเจ้าได้พ้นจากการเป็นทาสของบาป มาเป็นผู้ฮับใซ้ของพระเจ้าแล้ว มีผลซีวิตในทางบริสุทธิ์ แล้วในที่สุดสิได้เข้าสู่ซีวิตนิรันดร์ฮั้น 

โรม 6:23 โดยว่า ค่าจ้างของการเฮ็ดบาปคือความตาย แต่ซีวิตที่พระเจ้าประทานให้ฮั้น คือซีวิตนิรันดร์ในพระเยซูคริสต์เจ้าของเฮา
////////// ////////// //////////