กิจการ – Acts บทที่ 8

กิจการ 8:1 แล้วเซาโลนี้กะเห็นดีเห็นซอบที่พวกเขาได้ฆ่าสเทเฟน ในหว่างฮั้นได้เกิดการข่มเหงกลุ่มผู้เซื่ออย่างใหญ่ในเมืองเยรูซาเล็ม พวกลูกศิษย์ทั้งเมิ้ดฮั้นจั่งกระจายออกไป ทั่วแถวยูเดียกับแถวสะมาเรีย เหลือแต่พวกทูตพิเศษที่ยังอยู่ฮั้น

กิจการ 8:2 แล้วพวกคนที่นับถือยำเกรงพระเจ้าได้เอาศพของสเทเฟนออกไปฝัง แล้วจั่งคร่ำครวญฮ้องไห้เสียใจหลายนำลาว

กิจการ 8:3 ส่วนเซาโลฮั้นได้ทำลายกลุ่มผู้เซื่ออย่างสาหัส จั่งได้บุกเข้าไปในคู่บ้านคู่เฮือนลากทั้งซายกับญิงออกมาเอาไปคุมขังไว้ในคุก

กิจการ 8:4 แล้วในขณะฮั้น ฝ่ายพวกลูกศิษย์ที่ถืกกระจัดกระจาย จั่งได้ออกไปประกาศพระคำของพระเจ้าอยู่คู่หม่อง

กิจการ 8:5 ส่วนฟีลิปกะลงไปเมืองสะมาเรีย แล้วได้ประกาศเรื่องพระคริสต์ให้พวกเขา

กิจการ 8:6 แล้วคนหลวงหลายอยู่ฮั้น พร้อมกันฟังถ้อยคำที่ฟีลิปได้ประกาศอยู่ฮั้น พร้อมได้ยินได้เห็นเหตุการณ์มหัศจรรย์ที่ลาวได้เฮ็ด

กิจการ 8:7 คือมีวิญญาณโสมมหลายโตที่สิงอยู่ในคนหลายคน ได้พากันฮ้องเสียงดังแล้วออกมาจากคนหมู่ฮั้นที่เคยถืกสิง กับคนที่เป็นโรคภัยไข้เจ็บ เป็นอัมพาต กับเป็นง่อยกะเซาดีกับหม่อง

กิจการ 8:8 จั่งเกิดความซื่นซมยินดีงอย่างใหญ่ในเมืองฮั้น

กิจการ 8:9 แต่ว่ามีซายคนหนึ่งในเมืองฮั้น ซื่อซีโมน คนผู้นี้เคยเฮ็ดเวทมนตร์มาก่อน จั่งได้พาซาวสะมาเรียหลงไหลกลคาถาของเขา เขาจั่งยกโตเองว่าเป็นผู้สำคัญ

กิจการ 8:10 เมิ้ดคู่คนอยู่ฮั่นทั้งผู้ใหญ่ผู้น้อยกะเอาใจใส่ในการฟังคนฮั้น จั่งเว้าว่า “ซายคนนี้มีฤทธิ์อำนาจมาจากพระเจ้า”

กิจการ 8:11 คนอยู่ฮั้นจั่งนับถือเขาย้อนว่าเขาทึ่งใจในเวทมนตร์กลอุบายของเขามาแต่โดนแล้ว

กิจการ 8:12 แต่บัดฟีลิปได้ประกาศเรื่องแผ่นดินของพระเจ้า กับพระนามของพระเยซูคริสต์ คนหลวงหลายกะได้เซื่อ กับฮับการจุ่มน้ำทั้งผู้ซายกับแม่ญิง

กิจการ 8:13 ส่วนซีโมนกะเซื่อนำ บัดฮับการจุ่มน้ำแล้วกะได้ติดตามฟีลิปไป ทั้งทึ่งใจเป็นตางึดในเหตุการณ์มหัศจรรย์กับ เครื่องหมายอันสำคัญต่างๆ ที่เห็นเกิดขึ้นทางฟีลิปฮั่น

กิจการ 8:14 บัดพอพวกทูตพิเศษที่อยู่ในเมืองเยรูซาเล็มได้ยินว่าซาวสะมาเรียได้ฮับพระคำของพระเจ้าแล้ว จั่งได้ส่งเปโตรกับยอห์นไปหาเขา

กิจการ 8:15 บัดพวกเขาลงไปฮอดแล้ว กะอธิษฐานวอนขอเพื่อให้คนอยู่ฮั้นฮับพระวิญญาณ

กิจการ 8:16 คือตอนฮั้นพระวิญญาณยังบ่ทันลงมาประทับอยู่นำพวกเขา เป็นแต่ว่าเขาได้ฮับการจุ่มน้ำในพระนามของพระเยซูคริสต์เจ้าท่อฮั้น

กิจการ 8:17 แล้วบัดเปโตรกับยอห์นวางมือเทิงเขาแล้ว พระวิญญาณกะลงมาประทับอยู่นำพวกเขา

กิจการ 8:18 บัดซีโมนเห็นว่า คนหมู่ฮั้นได้ฮับพระวิญญาณโดยการวางมือของพวกทูตพิเศษ จั่งเอาเงินมาเสนอให้พวกลาว

กิจการ 8:19 กับเว้าว่า “ให้แบ่งฤทธิ์อำนาจนี้ให้ข้อยนำเด้อ เพื่อว่าบัดข้อยสิวางมือใส่ผู้ใด ผู้ฮั้นกะสิได้ฮับพระวิญญาณคือกัน”

กิจการ 8:20 แต่ส่วนเปโตรจั่งบอกซีโมนว่า “ขอให้เงินของเจ้าพินาศไปพร้อมกับเจ้าเด้อ ย้อนเจ้าคึดว่าสิสามารถซื้อเอาของขวัญของพระเจ้าได้โดยเงินทอง

กิจการ 8:21 “เจ้าบ่มีสิทธิ์มีส่วนในกิจการนี้ดอก ย้อนว่าจิตใจของเจ้าบ่ซื่อตรงในสายตาของพระเจ้าเลย

กิจการ 8:22 จั่งซั้น ให้กลับใจใหม่จากการซั่วร้ายของเจ้าเด้อ อธิษฐานวอนขอพระเจ้า ห่าลางเทื่อเพิ่นสิโปรดยกโทษย้อนความนึกคึดในใจของเจ้าฮั่น

กิจการ 8:23 คือเฮาฮู้เห็นว่า เจ้าตกอยู่ในบ่วงแฮ้วเต็มไปด้วยความขมขื่น ถืกมัดไว้ด้วยความเลวทราม”

กิจการ 8:24 ฝ่ายซีโมนจั่งตอบว่า “ขอให้เจ้าอธิษฐานวอนขอต่อพระผู้เป็นเจ้าเผื่อข้อยแหน่ท้อน เพื่อเหตุการณ์แนวหมู่นี้ที่เจ้าเว้าหนิ สิบ่ได้ตกใส่โตข้อย”

กิจการ 8:25 บัดพวกทูตพิเศษได้เป็นพยานกับประกาศพระคำของพระผู้เป็นเจ้าแล้ว กะได้หลบเมือเมืองเยรูซาเล็ม กับได้ประกาศข่าวประเสริฐตามหมู่บ้านต่างๆ ของซาวสะมาเรีย

กิจการ 8:26 แล้วมีเทวทูตของพระผู้เป็นเจ้า ได้สั่งฟีลิปว่า “ให้ลุกขึ้นออกไปทางทิศใต้ตามเส้นทางจากเมืองเยรูซาเล็มที่ลงไปเมืองกาซา ซึ่งเป็นทางเปลี่ยว”

กิจการ 8:27 ฟีลิปกะเลยลุกขึ้นไป แล้วนี่แน่ะ ได้มีซายเอธิโอเปียคนหนึ่งเป็นขันที ซึ่งเป็นเจ้าหน้าที่อันดับสูงของพระนางคานดาสี พระราชินีของซาวเอธิโอเปีย กับเป็นนายคลังทรัพย์ทั้งเมิ้ดของพระราชินีฮั้น ได้มานมัสการพระเจ้าในเมืองเยรูซาเล็ม

กิจการ 8:28 ตอนกำลังนั่งรถม้าเมือบ้านเมือง ขันทีพวมอ่านพระคำในหนังสืออิสยาห์ผู้เป็นปากเป็นเสียงของพระเจ้า

กิจการ 8:29 บัดนี้ พระวิญญาณสั่งฟีลิปว่า “ให้เข้าไปใกล้ๆ รถม้าฮั่นเด้อ”

กิจการ 8:30 แล้วฟีลิปจั่งแล่นเข้าไปใกล้รถม้าฮั้น ลาวกะได้ยินขันทีคนฮั้นอ่านพระคำในหนังสืออิสยาห์ฯ จั่งถามว่า “หม่องที่เจ้าอ่านฮั้นเจ้าเข้าใจอยู่บ้อ”

กิจการ 8:31 ขันทีตอบว่า “สิเข้าใจได้จั่งใดคั่นบ่มีใผอธิบายให้ฟัง” ลาวเลยเซิญฟีลิปขึ้นนั่งนำลาว

กิจการ 8:32 พระคำตอนที่ขันทีอ่านอยู่ฮั้น มีว่า “ผู้ฮั้นได้ถืกนำออกไปปานแกะถืกจูงไปฆ่า แล้วคือจั่งแกะน้อยที่มิดอยู่ต่อหน้าผู้ที่สิตัดขนมันส่ำใด ผู้ฮั้นกะบ่ได้ปากอีหยังส่ำฮั้น

กิจการ 8:33 ในยามที่ท่านผู้ฮั้นถืกเหยียดหยามอันเป็นตาอายฮั้น ท่านกะบ่ได้ฮับความยุติธรรมเลย แล้วใผแหน่สิเว้าเถิงลูกหลานของท่านปันฟังได้ ย้อนว่าซีวิตของท่านถืกตัดขาดออกจากแผ่นดินโลกไปแล้ว”

กิจการ 8:34 อ่านแล้วขันทีจั่งถามฟีลิปว่า “ซ่อยอธิบายให้ข้อยแหน่ ผู้เป็นปากเป็นเสียงของพระเจ้าเว้าจั่งซี้เล็งเถิงผู้ใดหนิ เล็งเถิงโตเขาเองบ้อ หรือเล็งเถิงผู้อื่นๆ”

กิจการ 8:35 บัดนี้ ฟีลิปจั่งอธิบายเรื่องตามพระคำข้อหมู่ฮั้น แล้วจังประกาศเรื่องพระเยซูให้ลาว

กิจการ 8:36 แล้วบัดพวมเดินทางไปกะมาฮอดหม่องมีน้ำ ขันทีจั่งบอกว่า “นี่แน่ะ มีน้ำอยู่ มีอีหยังขัดข้องแหน่ ที่ข้อยสิบ่ฮับการจุ่มน้ำเลย”

กิจการ 8:37 แล้วฟีลิปจั่งเว้าว่า “คั่นเจ้าได้ฮับเซื่ออย่างเต็มใจเจ้ากะฮับได้โลดแล้ว” ขันทีจั่งตอบว่า “ข้อยเซื่ออีหลีว่า พระเยซูคริสต์เป็นพระบุตรของพระเจ้าฮั้นเอง”

กิจการ 8:38 บัดนี้ ขันทีจั่งสั่งให้รถม้าจอด กับคนทั้งสองได้ลงน้ำทั้งฟีลิปกับขันทีผู้ฮั้น ฟีลิปกะเลยให้การจุ่มน้ำให้กับลาว

กิจการ 8:39 พอบัดขึ้นจากน้ำแล้ว พระวิญญาณของพระผู้เป็นเจ้าได้ฮับเอาฟีลิปไป ขันทีฮั้นกะเลยบ่ได้เห็นเขาอีก จั่งเดินทางต่อไปโดยความยินดีสรรเสริญพระเจ้า

กิจการ 8:40 ส่วนฟิลิปกะได้พ้ออยู่เมืองอัชโดด บัดเดินทางผ่านไป เขาได้ประกาศข่าวประเสริฐในคู่เมืองจนมาฮอดเมืองซีซารียา
////////// ////////// //////////