กิจการ – Acts บทที่ 7

กิจการ 7:1 บัดนี้ ผู้นำเครื่องถวายผู้สูงสุดจั่งถามว่า “เรื่องนี้แม่นอีหลีบ้อ”

กิจการ 7:2 แล้วส่วนสเทเฟนจั่งตอบว่า “พวกพี่น้องท่านผู้มีเกียรติ กับท่านผู้อาวุโส ขอฟังผู้ข้าเว้าก่อนเถอะ พระเจ้าผู้ประกอบด้วยพระสิริอันรุ่งโรจน์ได้ปรากฏเพิ่นเองแก่ปู่ทวดอับราฮัม พ่อตระกูลของพวกเฮา ตอนที่ลาวยังอยู่ในประเทศเมโสโปเตเมีย ก่อนสิไปอาศัยอยู่ในเมืองฮาราน

กิจการ 7:3 “กับได้เว้ากับลาวว่า ‘ให้เจ้าออกไปจากประเทศของเจ้า กับจากญาติพี่น้องของเจ้า ไปยังแผ่นดินที่เฮาสิซี้แจงให้เจ้าฮู้จัก”

กิจการ 7:4 ลาวเลยออกจากแผ่นดินของซาวเคลเดีย ไปอาศัยอยู่เมืองฮาราน แล้วบัดพอพ่อของลาวตาย พระเจ้าได้ยกย้ายลาวออกจากฮั่น มาอยู่แผ่นดินนี้ที่พวกท่านอาศัยอยู่ในปัจจุบัน

กิจการ 7:5 แต่ตอนฮั้น พระเจ้าบ่ทันโปรดให้ลาวมีกรรมสิทธิ์ในแผ่นดินเป็นมรดก แม้นแต่ดินหม่องที่ตีนของลาวได้เหยียบกะบ่ให้เลย แล้วเถิงตอนที่ลาวยังบ่ทันมีลูก พระเจ้าได้สัญญาไว้กับลาวว่าสิให้แผ่นดินนี้เป็นกรรมสิทธิ์ กับให้เป็นกรรมสิทธิ์ของเซื้อสายของลาวต่อๆ กันมา

กิจการ 7:6 แล้วพระเจ้าได้เว้าจั่งซี้ว่า ย้อนว่าเซื้อสายของลาวสิไปอาศัยอยู่ในดินแดนอื่น แล้วคนอยู่ฮั้นสินำเขาไปสู่การเป็นทาสใซ้ ข่มเหงเขาเป็นเวลาฮอดสี่ร้อยปี

กิจการ 7:7 ‘แล้วแผ่นดินที่พวกเขาสิตกเป็นทาสใซ้ฮั่น’ พระเจ้าเว้าว่า ‘เฮากะสิพิพากษาลงโทษ แล้วต่อมา หลังจากเขาสิอพยพออกมา เขาสิปรนนิบัติฮับใซ้เฮาอยู่ดินแดนหม่องนี่”

กิจการ 7:8 แล้วพระเจ้าได้ตั้งคำมั่นสัญญาเถิงเรื่องการเข้าสุหนัตไว้กับอับราฮัม แล้วบัดพอลาวได้ลูกซายซื่อว่า อิสอัค จั่งได้เฮ็ดการเข้าสุหนัตให้เขาตอนอายุได้แปดมื้อ แล้วอิสอัคได้ลูกซายซื่อว่า ยาโคบ แล้วยาโคบได้ลูกซายสิบสองคน ซึ่งเป็นพ่อตระกูลของพวกเฮา

กิจการ 7:9 แล้วฝ่ายพวกพ่อตระกูลฮั้น เขาคึดอิจฉาโยเซฟ จั่งขายลาวเข้าไปทางประเทศอียิปต์ แต่พระเจ้าได้สถิตอยู่กับลาว

กิจการ 7:10 จั่งได้โปรดซ่อยโยเซฟให้วิดความเดือดฮ้อนอันยากลำบากทั้งเมิ้ด กับได้ให้เขาเป็นที่ฮักแพงกับมีสติปัญญาในสายตาของฟาโรห์ ผู้เป็นกษัตริย์ของประเทศอียิปต์ฮั่น ฟาโรห์จั่งแต่งตั้งโยเซฟให้เป็นหัวหน้าปกครองประเทศอียิปต์ ฮวมทั้งพระราชวังทั้งเมิ้ดของเพิ่น

กิจการ 7:11 อยู่มาได้เกิดมีการแห้งแล้งอึดอยากหมากหิวอย่างแฮงฮอดทั่วแผ่นดินอียิปต์ พร้อมทั้งแผ่นดินคานาอันนำ มีความลำบากเดือดฮ้อนหลาย บัดนี้พวกพ่อตระกูลของพวกเฮาหาแนวสิกินกะบ่มีเลย

กิจการ 7:12 แต่บัดพอยาโคบได้ยินว่ามีข้าวอยู่ในประเทศอียิปต์ จั่งใซ้ลูกๆ ของลาว คือพวกพ่อตระกูลของพวกเฮา ออกเดินทางไปยังประเทศอียิปต์ เป็นเทื่อตำอิด

กิจการ 7:13 แล้วเทื่อที่สอง โยเซฟกะเปิดเผยโตให้พี่น้องฮู้จักว่าแม่นใผ กับได้แนะนำให้ฟาโรห์ฮู้จักพวกอ้ายเจ้าของนำ

กิจการ 7:14 ส่วนโยเซฟจั่งได้ฝากความเซิญยาโคบผู้เป็นพ่อ กับญาติพี่น้องทางพวกอ้ายให้มาหาลาว ทั้งเมิ้ดกะมีเจ็ดสิบห้าคน

กิจการ 7:15 ยาโคบเลยลงไปประเทศอียิปต์ แล้วลาวได้ตายอยู่ฮั้น พร้อมพวกพ่อตระกูลของพวกเฮาตามอายุขัย

กิจการ 7:16 แล้วมีคนได้นำเอาศพเขาหามออกไปเมี้ยนไว้ในเมืองเซเคม ในอุโมงค์ที่พ่ออับราฮัมได้ซื้อไว้เป็นเงินจำนวนหนึ่ง จากพวกลูกซายของฮาโมร์ผู้เป็นพ่อของเซเคม

กิจการ 7:17 แล้วอยู่มาบัดใกล้สิฮอดยามเวลาที่พระเจ้าเว้าไว้กับอับราฮัมในคํามั่นสัญญาฮั่น จำนวนคนอิสราเอลได้ทวีหลายขึ้นในประเทศอียิปต์

กิจการ 7:18 จั่งฮอดสมัยของกษัตริย์อีกองค์หนึ่ง เป็นกษัตริย์องค์ใหม่ที่บ่ฮู้จักกันกับโยเซฟ

กิจการ 7:19 แล้วกษัตริย์องค์ฮั้นได้เอาเปรียบพวกพ่อตระกูลของพวกเฮาโดยใซ้อุบายเล่ห์เหลี่ยม บังคับให้พ่อแม่โผดถิ้มลูกน้อยให้ตาย

กิจการ 7:20 โมเสสได้เกิดมาในหหว่างฮั้น เป็นเด็กน้อยที่งดงามเป็นตาฮักหลาย(ในสายตาพระเจ้า) ได้ฮับการเลี้ยงในบ้านพ่อแม่ฮอดสามเดือน

กิจการ 7:21 แล้วบัดพอเด็กน้อยโมเสสต้องถืกโผดถิ้มออกไป ลูกสาวของฟาโรห์จั่งฮับมาเลี้ยงไว้ปานเป็นลูกซายของนางเอง

กิจการ 7:22 แล้วโมเสสจั่งได้เฮียนฮู้ในวิซาการคู่อย่างของซาวอียิปต์ เก่งหลายในทางความเว้ากับในกิจการต่างๆ

กิจการ 7:23 บัดโมเสสอายุได้ฮอดสี่สิบปีเต็มแล้ว ใจลาวคึดอยากไปเยี่ยมยามญาติพี่น้องของลาว คือซนซาติอิสราเอลฮั้น

กิจการ 7:24 บัดพอลาวเห็นคนอิสราเอลผู้หนึ่งถืกข่มเหงตีโดยมือของคนอียิปต์คนหนึ่ง ลาวเลยเข้าไปซ่อยตีชาวอียิปต์คนฮั้นเถิงตาย

กิจการ 7:25 ลาวคึดว่าญาติพี่น้องคือสิเข้าใจว่า พระเจ้าสิซ่อยพวกเขาให้รอดพ้นจากการเป็นทาสได้โดยมือของลาว แต่กลับเป็นว่าเขากะบ่เข้าใจแนวฮั้นเลย

กิจการ 7:26 บัดฮอดเซ้ามื้อใหม่ โมเสสได้เข้าไปหาพวกเขาอีก เห็นคนอิสราเอลสองคนพวมผิดกันอยู่ กะเลยอยากซ่อยเขาให้คืนดีกันอีก จั่งเว้าว่า “หมู่พวกเอ้ย เจ้าผู้เป็นพี่น้องกัน เป็นหยังคือผิดกันแนวนี้”

กิจการ 7:27 ฝ่ายคนผู้ที่หาเรื่องผิดใส่กันฮั้น จั่งซุกโมเสสออกไปเว้าว่า “แม่นใผแต่งตั้งเจ้าให้เป็นผู้ครอบครองกับผู้พิพากษาเหนือพวกเฮา

กิจการ 7:28 เจ้าสิฆ่าเฮาคือจั่งได้ฆ่าซาวอียิปต์คนฮั้นมื้อวานนี้บ้อ”

กิจการ 7:29 บัดพอโมเสสได้ยินคำเว้าฮั้น จั่งเตลิดหนีออกไปแฝงโตเป็นคนต่างแดนต่างถิ่นอยู่แผ่นดินมีเดียน เป็นหม่องที่ลาวเอาเมียได้ลูกซายสองคน

กิจการ 7:30 สี่สิบปีผ่านมาแล้ว เทวทูตของพระผู้เป็นเจ้า ได้มาปรากฏต่อหน้าโมเสสในแปวไฟอยู่พุ่มไม้พุ่มหนึ่ง ในถิ่นแห้งแล้งหม่องภูเขาซีนาย

กิจการ 7:31 บัดโมเสสเห็นกะแปลกใจเป็นตางึดกับแนวประหลาดฮั้น บัดเข้าไปเบิ่งใกล้ๆ กะมีเสียง(อย่างผู้มีอํานาจ)ของพระผู้เป็นเจ้าเว้ากับลาว

กิจการ 7:32 บอกว่า “เฮาหนิเป็นพระเจ้าของพวกพ่อตระกูลของเจ้า เป็นพระเจ้าของอับราฮัม เป็นพระเจ้าของอิสอัค กับเป็นพระเจ้าของยาโคบนำ” โมเสสจั่งเกิดหย้านหลายจนโตสั่น เลยบ่กล้าแนมเบิ่ง

กิจการ 7:33 ส่วนพระผู้เป็นเจ้าจั่งเว้ากับโมเสสว่า “ให้เจ้าปดเกิบของเจ้าเด้อ ย้อนว่าหม่องที่เจ้ายืนอยู่หนิเป็นหม่องศักดิสิทธิ์บริสุทธิ์

กิจการ 7:34 เฮาได้เห็นความทุกข์ยากลำบากของซนซาติของเฮา ที่อยู่ในประเทศอียิปต์แล้ว คือเฮาได้ยินเสียงคร่ำครวญของเขา เฮาจั่งลงมาเพื่อสิโปรดเขาให้รอดพ้น หิมาแม่ะ บัดนี้เฮาสิใซ้เจ้าไปประเทศอียิปต์เด้อ”

กิจการ 7:35 สเทเฟนเว้าต่ออีกว่า “โมเสสผู้นี้ที่ถืกเขาปฏิเสธว่า ‘ใผแต่งตั้งเจ้าให้เป็นผู้ครอบครองกับผู้พิพากษาพวกเฮาหนิ’ แม่นผู้นี้ล่ะ ที่พระเจ้าได้ใซ้มา เป็นทั้งผู้ครอบครองกับผู้ซ่อยให้รอดพ้นโดยมือของเทวทูตองค์ฮั้นที่ได้ปรากฏต่อหน้าลาวในพุ่มไม้ฮั่น

กิจการ 7:36 แม่นโมเสสคนนี้ล่ะ ที่ได้นำพวกเขาอพยพออกมาให้รอดพ้นจากการเป็นทาสในแผ่นดินอียิปต์ โดยได้เฮ็ดเหตุการณ์มหัศจรรย์ใหญ่ กับเครื่องหมายอันสำคัญต่างๆ ในแผ่นดินฮั้น กับในทะเลแดง กับในถิ่นแห้งแล้งนำ เป็นเวลาสี่สิบปี

กิจการ 7:37 “คือแม่นโมเสสคนนี้ล่ะ ที่เคยบอกซนซาติอิสราเอลว่า ‘พระผู้เป็นเจ้า ผู้เป็นพระเจ้าของเจ้า สิแต่งตั้งผู้เป็นปากเป็นเสียงผู้หนึ่งออกจากพี่น้องของเจ้าคือจั่งเฮาหนิ แล้วพวกเจ้าสิฟังผู้ฮั้น”

กิจการ 7:38 โมเสสผู้นี้ล่ะ ได้อยู่ในกลุ่มคนของพระเจ้าในถิ่นแห้งแล้งนำกันกับเทวทูตของพระผู้เป็นเจ้าฮั้น ที่ได้เว้ากับลาวอยู่ภูเขาซีนาย กับลาวได้อยู่กับพวกพ่อตระกูลของพวกเฮา แม่นลาวเองที่ได้ฮับมอบพระคำอันประกอบด้วยซีวิตฮั้น กะเพื่อให้ไว้กับพวกเฮาทั้งหลาย

กิจการ 7:39 ซึ่งพวกพ่อตระกูลของพวกเฮาบ่ยอมเซื่อฟัง แต่ได้ปฏิเสธผลักออกไป แล้วเขาจั่งมีใจคึดอยากหลบไปอยู่แผ่นดินอียิปต์อีก

กิจการ 7:40 “จั่งได้สั่งอาโรนว่า ‘ให้เจ้าเฮ็ดพระขึ้นมาให้พวกเฮาเด้อ เพื่อสินำหน้าพวกเฮาไป ส่วนโมเสสผู้ที่ได้พาเฮาออกจากประเทศอียิปต์ฮั้น พวกเฮาบ่จักว่าลาวเป็นอีหยังไปแล้ว’

กิจการ 7:41 “แล้วในตอนฮั้น พวกเขาได้เฮ็ดฮูปงัวน้อยขึ้นมา แล้วกะเอาเครื่องถวายมาบูซาฮูปงัวน้อยฮั่น แล้วกะพากันเลี้ยงฉลองดีอกดีใจนำแนวที่เขาได้เฮ็ดขึ้นมาโดยมือของเขาเอง

กิจการ 7:42 “แล้วพระเจ้าจั่งหันหลังใส่ ปล่อยให้พวกเขาไปนบไปไหว้คู่แนวอยู่เทิงท้องฟ้าตามใจมัก ซึ่งเป็นไปตามที่มีเขียนไว้ในหนังสือของผู้เป็นปากเป็นเสียงว่า ‘โอ ไทอิสราเอลเอ้ย พวกเจ้าเคยได้เอาสัตว์กับแนวอื่นๆ มาถวายบูซาเฮาบ้อ ตอนอยู่ในถิ่นแห้งแล้งสี่สิบปีฮั้น

กิจการ 7:43 “เอ้อ แท้จริงแล้วพวกเจ้าได้นำเอาวิหารของโมเลคฮั้นไปนำ กับได้เอาฮูปดาวของเรฟานไปนำ แม่นพวกฮูปเคารพที่พวกเจ้าได้เฮ็ดขึ้นมาเพื่อกราบไหว้ จั่งซั้นเฮาสิปล่อยให้พวกเจ้าตกเป็นเซลยเลยเมืองบาบิโลนออกไปอีก‘

กิจการ 7:44 “พ่อตระกูลของพวกเฮา บัดอยู่ในถิ่นแห้งแล้งฮั้น ได้มีวิหารเคลื่อนที่ซึ่งเป็นตามแบบอย่างที่พระเจ้าได้บอกโมเสสเฮ็ด เป็นหลักฐานพยานว่าพระเจ้าสถิตอยู่นำ

กิจการ 7:45 ซึ่งพวกพ่อตระกูลของเฮาที่ถ่ายทอดกันมา ได้ขนไปนำบัดตามโยซูวาไป ตอนได้เข้ายึดเอาแผ่นดินของคนต่างซนซาติ ที่พระเจ้าได้ขับไล่ออกไปต่อหน้าพวกพ่อตระกูลของพวกเฮา แล้วจั่งมีสืบๆ มาฮอดสมัยกษัตริย์ดาวิด

กิจการ 7:46 ซึ่งกษัตริย์ดาวิดฮั้น เป็นที่ซอบต่อหน้าพระเจ้า กับลาวปรารถนาที่สิสร้างพระวิหารเป็นที่พักอาศัยสำหรับพระเจ้าของยาโคบ

กิจการ 7:47 แต่ว่ากษัตริย์ซาโลมอนได้สร้างพระวิหารสำหรับพระเจ้า

กิจการ 7:48 จั่งใดกะตาม พระผู้สูงสุดบ่ได้ประทับอยู่ในพระวิหารที่เฮ็ดไว้โดยมือคน ตามที่ผู้เป็นปากเป็นเสียงของพระเจ้าได้กล่าวไว้ว่า

กิจการ 7:49 “สวรรค์เป็นบัลลังก์ของเฮา กับแผ่นดินโลกเป็นที่พักเท้าของเฮา จั่งซั้น เจ้าสิสร้างวิหารแบบใดให้เฮาอยู่ หรือว่าสิสร้างอีหยังพอเป็นที่พักแรมของเฮาได้

กิจการ 7:50 คือมือของเฮาได้เฮ็ดแนวหมู่นี้เมิ้ดคู่อย่างแล้ว บ่แม่นบ้อ’

กิจการ 7:51 “โอ เจ้าคนซาติคอแข็ง ใจดื้อ หูตึงเอ้ย พวกเจ้าต่อต้านพระวิญญาณของพระเจ้าอยู่เสมอ พวกพ่อตระกูลของเจ้าเคยเฮ็ดจั่งใด พวกเจ้ากะได้เฮ็ดจั่งซั้นคือกัน

กิจการ 7:52 มีใผในพวกผู้เป็นปากเป็นเสียงของพระเจ้าที่พวกพ่อตระกูลของพวกเจ้าบ่ได้ข่มเหง ทั้งได้ฆ่าถิ้มผู้ที่ทำนายเถิงการลงมาขององค์พระผู้โปรดผู้ยุติธรรมฮั้น แม่นองค์ผู้ฮั้นล่ะที่พวกเจ้าได้ทรยศฆ่าถิ้มแล้ว

กิจการ 7:53 ซี่งพวกเจ้าได้ฮับกฎบัญญัติของพระเจ้าจากหมู่เทวทูต แต่บ่ได้ฮักษาเลย”

กิจการ 7:54 บัดพวกเขาได้ยินแนวจั่งซั้น กะฮู้สึกบาดใจหลาย จั่งกัดแข้วกัดคางใส่สเทเฟน

กิจการ 7:55 แต่ส่วนสเทเฟนฮั่น ซึ่งประกอบด้วยพระวิญญาณ ได้เหลียวขึ้นจ้องเบิ่งเทิงฟ้าสวรรค์ เห็นพระสิริอันรุ่งโรจน์ของพระเจ้า กับเห็นพระเยซูพวมยืนอยู่เบื้องขวาของพระเจ้า

กิจการ 7:56 แล้วลาวเว้าว่า “นี่แน่ะ ข้อยเห็นท้องฟ้าแหวกออก กับเห็นบุตรมนุษย์ยืนอยู่เบื้องขวาของพระเจ้า”

กิจการ 7:57 บัดนี้ พวกเขากะฮ้องขึ้นเสียงดัง พร้อมอุดหูไว้ พากันแล่นเข้าไปจับเอาสเทเฟน

กิจการ 7:58 แล้วจั่งขับไล่ลาวออกนอกเมือง เอาหินดึกใส่ให้ตาย แล้วฝ่ายพวกคนที่เฮ็ดใส่สเทเฟนฮั้น ได้ถอดเสื้อนอกวางลงทางหน้าซายหนุ่มคนหนึ่งซื่อว่าเซาโล

กิจการ 7:59 แล้วเขาจั่งเอาหินดึกใส่สเทเฟน ตอนลาวพวมอ้อนวอนต่อพระเจ้าว่า “ข้าแต่พระเยซูเจ้าเอ้ย ขอโปรดฮับเอาจิตวิญญาณของผู้ข้าแหน่เด้อ”

กิจการ 7:60 แล้วสเทเฟนจั่งคุกเข่าลงฮ้องเสียงดังว่า “พระองค์เจ้าข้า ขอโปรดอย่าโทษเขาย้อนบาปนี้” พอเว้าจั่งซี้แล้วลาวกะล่วงหลับไป
////////// ////////// //////////