กิจการ – Acts บทที่ 5

กิจการ 5:1 แต่มีซายอีกคนหนึ่งซื่อ อานาเนีย กับเมียเขาซื่อว่า สัปฟีรา ได้ขายที่ดินแปลงหนึ่งคือกัน

กิจการ 5:2 แล้วซายผู้ฮั้นได้เก็บส่วนหนึ่งของราคาที่ดินฮั้นไว้ ซึ่งเมียเขากะฮ่วมฮู้นำกัน ส่วนหนึ่งของเงินฮั้นเขาเอามาวางลงไว้อยู่ทางหน้าพวกทูตพิเศษคือกัน

กิจการ 5:3 ส่วนเปโตรจั่งถามเขาว่า “อานาเนียเอ้ย เป็นหยังซาตานจั่งให้ใจเจ้าเต็มไปด้วยการขี้ตัวะ เพื่อให้ตัวะพระวิญญาณ ซึ่งเจ้าได้เก็บเอาส่วนหนึ่งของราคาที่ดินฮั้นไว้เพื่อโตเอง

กิจการ 5:4 ก่อนสิขายที่ดินแปลงฮั้น มันกะยังเป็นของเจ้าแม่นบ่ล่ะ บัดขายแล้วเงินฮั้นกะยังอยู่ในอำนาจของเจ้าที่สิเฮ็ดอีหยังกะได้บ่แม่นบ้อ แล้วเป็นหยังเจ้าคึดในใจแบบนี้ คือเจ้าบ่ได้วางแผนการที่สิตัวะคนซื่อๆ แต่ได้ตัวะฮอดพระเจ้า”

กิจการ 5:5 แล้วบัดอานาเนียได้ยินคำเว้าฮั้น กะล้มลงใจขาดตายกับหม่อง แล้วคู่คนที่ได้ยินเรื่องนี้กะพากันตกใจหย้านอย่างใหญ่

กิจการ 5:6 บัดนี้ พวกคนหนุ่มกะลุกขึ้นห่อศพของเขาไว้ แล้วหามเอาไปฝัง

กิจการ 5:7 หลังจากฮั่นประมาณสามซั่วโมง เมียของเขาจั่งเข้าไป โดยยังบ่ฮู้เถิงเหตุการณ์ที่เกิดขึ้นกับผัว

กิจการ 5:8 ส่วนเปโตรเลยถามนางว่า “บอกเฮาเบิ่งดู เจ้าขายที่ดินได้ราคาท่อฮั้นบ้อ” นางจั่งตอบว่า “ค่ะ ได้ท่อฮั้นค่ะ”

กิจการ 5:9 เปโตรจั่งถามนางว่า “เป็นหยังพวกเจ้าได้พร้อมใจกันทดลองพระวิญญาณของพระผู้เป็นเจ้า นี่แน่ะ ตีนของคนผู้ที่ฝังศพผัวของเจ้ากะอยู่ฝักตูแล้วๆ เขาสิหามศพของเจ้าออกไปนำ”

กิจการ 5:10 แล้วในหว่างฮั้นพอดี นางกะล้มลงตายอยู่ทางตีนของเปโตร พอดีพวกคนหนุ่มได้เข้ามาเห็นว่าญิงฮั้นตายแล้ว จั่งได้หามศพออกไปฝังไว้ข้างผัวของนาง

กิจการ 5:11 แล้วคู่คนในกลุ่มผู้เซื่อฮั้นได้เกิดหย้านอย่างใหญ่ พร้อมทั้งเมิ้ดคู่คนที่ได้ยินเถิงเหตุการณ์นี้

กิจการ 5:12 แล้วมีเครื่องหมายอันสำคัญ กับเหตุการณ์มหัศจรรย์หลายอันหลายแนว ได้เกิดขึ้นในหมู่ประซาซนโดยผ่านมือของพวกทูตพิเศษ… (แล้วพวกเขาเมิ้ดคู่คนได้เป็นน้ำเหนึ่งใจเดียวกัน ฮ่วมกันอยู่ดาดฟ้าระเบียงของซาโลมอน

กิจการ 5:13 ส่วนคนอื่นๆ อยู่ภายนอก บ่กล้าที่สิเข้ามาฮ่วมนำพวกเขา แต่ว่าฝ่ายประซาซนได้เคารพยกย่องพวกเขาอย่างสูง

กิจการ 5:14 แล้วได้มีจำนวนคนเพิ่มทวีขึ้นในพระผู้เป็นเจ้า เป็นคนหลวงหลายทั้งซายทั้งญิง)

กิจการ 5:15 จนกว่าพวกเขาได้พากันหามคนเจ็บป่วยออกมาข้างทาง วางลงเทิงสาดกับเทิงแคร่ เพื่อว่าแม้นแต่บัดเปโตรย่างผ่านไป อย่างน้อยเงาของลาวอาจสิถืกผู้ลางคน

กิจการ 5:16 แล้วมีคนหลวงหลายได้ออกมาจากเมืองต่างๆ ที่อยู่อ้อมแอ้มเมืองเยรูซาเล็ม พาคนป่วยออกมา พร้อมกับคนที่มีผีโสมมเข้าก่อกวน แล้วเขาทั้งหลายได้เซาเป็นดีเมิ้ดคู่คน

กิจการ 5:17 ส่วนผู้นำเครื่องถวายผู้สูงสุด พร้อมทั้งพรรคพวกของเขา (คือพวกคณะสะดูสี) จั่งมีใจฮ้อนฮนเต็มไปด้วยความโกรธแค้น

กิจการ 5:18 พวกเขาเลยพากันจับพวกทูตพิเศษ จองจำขังไว้ในคุกหลวง

กิจการ 5:19 แต่ในตอนกลางคืนฮั่น มีเทวทูตองค์หนึ่งของพระผู้เป็นเจ้าได้มาไขฝักตูคุกออก แล้วได้พาทูตพิเศษออกไป พร้อมบอกเขาว่า

กิจการ 5:20 “ให้เข้าไปยืนอยู่ในพระวิหารเด้อ แล้วให้ประกาศถ้อยคำทั้งเมิ้ดเถิงเรื่องซีวิตใหม่นี้ ให้พวกคนอยู่ฮั้นฟังเด้อ”

กิจการ 5:21 แล้วบัดพอทูตพิเศษได้ยินแนวฮั้น เข้าเลยเข้าไปสอนอยู่ในพระวิหารแต่เซ้า แล้วผู้นำเครื่องถวายผู้สูงสุดได้เข้ามาฮ่วมกับพรรคพวกของเขา ได้เอิ้นประซุมสภา พร้อมกับคณะผู้เฒ่าผู้แก่ของสภาของซนซาติอิสราเอลทั้งเมิ้ด แล้วจั่งใซ้เจ้าหน้าไปเอาทูตพิเศษออกมาจากคุกฮั้น

กิจการ 5:22 แต่บัดพอพวกเจ้าหน้าที่ประจำพระวิหารไปฮอดคุกแล้ว เขาบ่ได้พ้อทูตพิเศษอยู่ในฮั้นเลย จั่งหลบไปรายงานโต

กิจการ 5:23 ว่า “พวกข้อย พอไปฮอดคุกกะเห็นว่าปิดไว้อย่างมั่นคงดี กับพวกยามกะยืนเฝ้าอยู่หน้าฝักตูฮั่น แต่พอเปิดฝักตูแล้วกะบ่เห็นไผอยู่ข้างใน”

กิจการ 5:24 แล้วบัดผู้นำเครื่องถวายผู้สูงสุด กับหัวหน้าฮักษาการในพระวิหาร พร้อมทั้งคณะหัวหน้าผู้นำเครื่องถวาย ได้ยินคำนี้ กะเกิดการสงสัยเรื่องของทูตพิเศษฮั้น ว่าอาจสิมีอีหยังเกิดขึ้นต่อไปอีก

กิจการ 5:25 แล้วกะมีคนหนึ่งมาบอกเขาว่า “นี่แน่ะ ผู้ซายหมู่ฮั้น ผู้ที่พวกเจ้าได้สั่งให้ขังไว้ในคุก พวมยืนอยู่ในพระวิหาร สอนประซาซนอยู่ฮั้น”

กิจการ 5:26 แล้วหัวหน้าฮักษาการในพระวิหาร พร้อมกับพวกเจ้าหน้าที่ประจำพระวิหารได้ไปค่อยเว้าค่อยจาพาพวกทูตพิเศษออกมาโดยบ่ได้ใซ้ความรุนแรง ย้อนเขาหย้านว่าอาจสิถืก ประซาซนเกิดบ่พอใจเอาหินดึกใส่เขา

กิจการ 5:27 แล้วพอพวกเขาพาทูตพิเศษออกมาแล้วกะให้ยืนอยู่ต่อหน้ากลุ่มสภา ผู้นำเครื่องถวายผู้สูงสุดเลยสอบถามทูตพิเศษ

กิจการ 5:28 ว่า “เฮาได้ห้ามพวกเจ้าไว้พอแฮงแล้วบ่แม่นบ้อ ว่าบ่ให้สอนออกซื่อผู้ฮั้นอีกเลย แล้วนี่แน่ะ คำสอนของพวกเจ้าได้แพร่หลายเต็มไปฮอดทั่วเมืองเยรูซาเล็มแล้ว พร้อมทั้งอยากให้เลือดของผู้ฮั้นตกอยู่กับพวกเฮา”

กิจการ 5:29 ส่วนเปโตรกับทูตพิเศษผู้อื่นๆ ตอบพร้อมกันว่า “พวกเฮาควรเซื่อฟังพระเจ้าแทนที่สิเซื่อฟังคน

กิจการ 5:30 คือพระเจ้าของพวกพ่อตระกูลของไทเฮาได้บันดาลให้พระเยซูเป็นขึ้นมาจากตายแล้ว แม่นผู้ที่พวกเจ้าได้สังหารโดยขึงไว้เทิงหลักไม้ฮั้น

กิจการ 5:31 คือพระเจ้าได้แต่งตั้งเจิมพระองค์นี้ไว้ให้อยู่เบื้องขวาของเพิ่น ให้เป็นจอมราซา กับเป็นองค์พระผู้โปรดให้รอดพ้น เพื่อสิให้ซนซาติอิสราเอลกลับใจใหม่ เข้ามาฮับการให้อภัยโทษความผิดบาปของเขา

กิจการ 5:32 แล้วพวกเฮาได้เป็นหลักฐานพยานของเพิ่นเถิงเหตุการณ์แนวหมู่นี้ พร้อมทั้งองค์พระวิญญาณที่พระเจ้าได้มอบให้คู่คนที่เซื่อฟังพระองค์ฮั้นกะเป็นพยานนำ”

กิจการ 5:33 บัดพวกเขาได้ยินแนวฮั้นแล้ว กะซูนใจแฮง จั่งฮ่วมหาทางสิฆ่าพวกทูตพิเศษถิ้ม

กิจการ 5:34 แต่มีคนหนึ่งซื่อ กามาลิเอล เป็นพวกคณะฟาริสี กับเป็นธรรมาจารย์ทางกฎบัญญัตินำ จั่งเป็นที่นับถือของประซาซน ได้ยืนขึ้นในสภาแล้วสั่งให้เอาพวกทูตพิเศษออกไปทางนอกก่อน

กิจการ 5:35 แล้วลาวจั่งเว้าให้ที่ประซุมฟังว่า “ท่านซายอิสราเอลเอ้ย ระวังให้ดีเด้อ ที่พวกท่านคึดสิเฮ็ดใส่พวกซายหมู่นี้

กิจการ 5:36 คือแต่ก่อนเคยมีคนหนึ่งซื่อ ธุดาส อวดตั้งโตว่าเป็นผู้สำคัญ จั่งมีผู้ซายติดตามเขาไปประมาณสี่ร้อยคน แต่ว่าธุดาสฮั้นถืกฆ่าถิ้ม คนทั้งหลายที่ได้เซื่อฟังเขากะกระจัดกระจายออกไป

กิจการ 5:37 แล้วอยู่มาหลังจากผู้นี้กะมีอีกคนหนึ่งซื่อ ยูดาส เป็นไทกาลิลี ได้โด่งดังขึ้นในตอนจดบัญชีสำมะโนครัว จั่งมีหลายคนติดตามโตเขาไป แต่ผู้ฮั้นกะพินาศคือกัน แล้วพวกคนทั้งหลายที่ได้เซื่อฟังเขากะกระจัดกระจายออกไป

กิจการ 5:38 สรุปแล้วข้อยว่า ให้ปล่อยคนพวกนี้ไว้ก่อนให้ไปตามเรื่องราวของเขาเองเด้อ อย่าเฮ็ดหยังใส่เขาเลย ย้อนว่าคั่นถ้อยคำหรือการงานนี้มาจากคนซื่อๆ มันกะสิเมิ้ดไปเอง

กิจการ 5:39 แต่ว่า คั่นมันมาจากพระเจ้า พวกเจ้าสิปราบบ่ได้เลย หย้านว่า ดีบ่ดีพวกเจ้าสิกลับตั้งโตเป็นศัตรูต่อพระเจ้าเลยซ้ำ”

กิจการ 5:40 ฟังแล้วพวกเขาจั่งเห็นนำลาว จั่งได้เอิ้นพวกทูตพิเศษเข้ามาอีก พอเฆี่ยนตีแล้ว ได้สั่งไว้บ่ให้เว้าออกซื่อของพระเยซูอีก แล้วจั่งปล่อยเขาไป

กิจการ 5:41 พวกทูตพิเศษจั่งออกจากสภาฮั้นไป มีความปิติยินดี ฮู่สึกโตเองว่าเป็นเกียรติอย่างสูงที่มีโอกาสฮับการลบหลู่ดูหมิ่นเพื่อพระนามของเพิ่น

กิจการ 5:42 แล้วพวกเขาได้สอนกับได้ประกาศข่าวประเสริฐของพระเยซูคริสต์คู่มื้อๆ บ่ได้ขาด ทั้งอยู่ในพระวิหารกับตามบ้านตามเฮือนนำ
////////// ////////// //////////