กิจการ – Acts บทที่ 15

กิจการ 15:1 แล้วมีซาวยิวผู้ลางคนลงมาจากแคว้นยูเดีย ได้แอบเข้าไปสอนพวกพี่น้องว่า “คั่นบ่เฮ็ดสุหนัตตามจารีตของโมเสส เจ้าสิรอดพ้นบ่ได้เลย”

กิจการ 15:2 จั่งซั้น พอเปาโลกับบารนาบัสได้โต้แย้งไล่เลียงกันกับพวกยิวหมู่ฮั้นบ่แม่นน้อย บัดนี้พี่น้องอยู่ฮั่นตกลงกันว่า สิให้เปาโลกับบารนาบัส พร้อมกับพี่น้องผู้ลางคนอยู่ฮั่น ขึ้นไปเมืองเยรูซาเล็มไปหารือกันกับพวกทูตพิเศษกับพวกหลักผู้ใหญ่ในเรื่องนี้

กิจการ 15:3 จั่งซั้น บัดกลุ่มผู้เซื่อได้จัดส่งพวกลาวออกไป แล้วบัดพวมผ่านแคว้นฟีนิเซียกับแคว้นสะมาเรีย พวกลาวได้เว้าเรื่องที่คนต่างชาติได้กลับใจใหม่ฮับเซื่อนำ จั่งเฮ็ดให้พวกพี่น้องอยู่ฮั่นเกิดการดีอกดีใจอย่างใหญ่

กิจการ 15:4 แล้วบัดมาฮอดเมืองเยรูซาเล็ม กลุ่มผู้เซื่ออยู่ฮั่นกับพวกทูตพิเศษพร้อมกับพวกผู้หลักผู้ใหญ่ ได้ต้อนฮับพวกลาวอย่างดี แล้วพวกลาวจั่งเว้าสู่พี่น้องอยู่เมืองเยรูซาเล็มฟังเถิงคู่แนวที่พระเจ้าได้เฮ็ดผ่านมือพวกลาว

กิจการ 15:5 แต่ได้มีพวกคณะฟาริสีผู้ลางคนที่ได้ฮับเซื่อได้เว้าขึ้นว่า “พวกคนต่างซาติฮั้นจำเป็นต้องเข้าสุหนัตนำ กับสั่งให้เขาปฎิบัติตามกฎบัญญัติของโมเสสนำ

กิจการ 15:6 ฝ่ายพวกทูตพิเศษกับพวกผู้หลักผู้ใหญ่ จั่งได้มาฮ่วมปรึกษาพิจารณากันในเรื่องฮั้น

กิจการ 15:7 แล้วหลังจากปรึกษาหารือกันหลายแล้ว เปโตรจั่งยืนขึ้นเว้ากับพวกเขาว่า “เจ้าพี่น้องทั้งหลาย พวกเจ้าฮู้กันว่า พระเจ้าได้เลือกเอาข้อยออกจากพวกเฮา เพื่อพวกคนต่างซาติสิได้ฮับฟังเรื่องข่าวประเสริฐแล้วเซื่อ โดยทางการประกาศของข้อยหนิ

กิจการ 15:8 จั่งซั้น พระเจ้าผู้เพิ่นที่ฮู้จักจิตใจของคน ได้ฮับฮู้ในพวกคนต่างซาติคือกัน โดยโปรดมอบพระวิญญาณไว้อยู่กับพวกเขาคือจั่งได้โปรดมอบไว้ให้อยู่กับพวกเฮา

กิจการ 15:9 แล้วพระเจ้าจั่งถือว่าพวกเฮาทั้งสองฝ่ายบ่ได้แตกต่างกันเลย จั่งได้ซำระใจเขาให้บริสุทธิ์โดยความเซื่อคือกัน

กิจการ 15:10 จั่งซั้น เป็นหยังพวกเจ้าคึดอยากลองใจพระเจ้าบัดหนิ โดยการวางแอกใส่คอของพวกลูกศิษย์ฮั้น ขณะที่พวกพ่อตระกูลของเฮาหรือว่าพวกเฮาเองกะดี บ่สามารถที่สิฮับแบกได้

กิจการ 15:11 แต่พวกเฮาเซื่อว่า เฮาเองกะสิรอดพ้นโดยพระกรุณาธิคุณของพระเยซูคริสต์เจ้า คือจั่งพวกเขา บ่มีการแตกต่างกัน”

กิจการ 15:12 บัดนี้ พวกคนอยู่ฮั่นกะมิดลง แล้วจั่งฟังบารนาบัสกับเปาโลรายงานเถิงเครื่องหมายอันสำคัญกับเหตุการณ์มหัศจรรย์ต่างๆ ที่พระเจ้าได้เฮ็ดผ่านทางโตเขาตอนอยู่นำพวกคนต่างซาติฮั้น

กิจการ 15:13 หลังจากเว้าจบแล้ว ยากอบจั่งเว้าว่า “เจ้าพี่น้องทั้งหลาย ให้ฟังข้อยเว้าหนิเด้อ

กิจการ 15:14 “คือซีโมนเปโตรได้บอกแล้วว่า พระเจ้าได้ไปเยี่ยมยามคนต่างซาติแล้ว เพื่อสิเลือกเอาคนกลุ่มหนึ่งออกมาจากพวกเขาเพื่อพระนามของเพิ่นเอง

กิจการ 15:15 แล้วนี้กะเป็นไปตามคำทำนายของผู้เป็นปากเป็นเสียงฯ ที่มีเขียนไว้ว่า

กิจการ 15:16 ‘หลังจากนี้เฮาสิกลับมาอีก แล้วสิสร้างวิหารของกษัตริย์ดาวิดอันที่พังลงแล้วให้ขึ้นมาใหม่ เอ้อ เฮาสิก่อมันขึ้นมาอีกให้ดีคือเก่า

กิจการ 15:17 เพื่อมนุษยโลกผู้ที่ยังอยู่ฮั้น สิได้มีโอกาสแสวงหาพระผู้เป็นเจ้านำ คือพวกคนต่างซาติทั้งปวงฮั้น ผู้ที่เอิ้นซื่อตามพระนามของเฮา พระผู้เป็นเจ้าเพิ่นสิเฮ็ดเมิ้ดคู่แนวตามที่เพิ่นได้กล่าวไว้ฮั้น’

กิจการ 15:18 “คือพระเจ้าฮู้จักดีในกิจการทั้งเมิ้ดของเพิ่นตั้งแต่อดีตกาลสร้างโลกมา

กิจการ 15:19 “จั่งซั้น ข้อยคึดเห็นว่า พวกเฮาบ่ควรสิสร้างปัญหายุ่งยากแนวนี้ใส่คนต่างซาติ ผู้ที่หันมาหาพระเจ้าแล้วฮั่น

กิจการ 15:20 “แต่ว่า เฮาควรสิเขียนหนังสือฝากไปฮอดเขา แนะนำว่า ควรสิยกเว้นจากแนวกินที่ถวายให้ฮูปเคารพ กับจากการเล่นซู้ล่วงประเวณี กับจากการกินซี้นสัตว์ที่ถืกฮัดคอตาย พร้อมทั้งเว้นจากการกินเลือด แค่นี้เอง

กิจการ 15:21 “คือตั้งแต่โบราณกาลมา พระคำหนังสือโมเสสเคยได้ฮับการอ่านในเมิ้ดคู่เมืองที่มีคนประกาศเถิงลาวอยู่ในศาลาธรรม ในคู่วันสะบาโตมื้อหยุดพักฮั้น”

กิจการ 15:22 บัดฟังแล้ว พวกทูตพิเศษกับพวกผู้หลักผู้ใหญ่ พร้อมทั้งคู่คนในกลุ่มผู้เซื่ออยู่ฮั่น เห็นดีเห็นซอบที่สิเลือกผู้ลางคนในพวกเขาส่งไปเมืองอันทิโอก ไปกับเปาโลกับบารนาบัส แล้วกะมี ยูดาสที่มีซื่ออีกว่าบารซับบาส กับสิลาส ซึ่งสองคนนี้มีบทบาทสำคัญในพวกพี่น้อง

กิจการ 15:23 แล้วเขาได้เขียนจดหมายฝากให้ถือไปว่า “ทูตพิเศษกับผู้หลักผู้ใหญ่ พร้อมทั้งพี่น้องทั้งหลายในกลุ่มผู้เซื่ออยู่ทางนี้ จั่งขอฝากความคึดฮอดมายังพวกเจ้า พี่น้องในพระเจ้าคนต่างซาติที่อยู่เมืองอันทิโอก อยู่แคว้นซีเรีย กับอยู่แคว้นซีลีเซีย

กิจการ 15:24 เนื่องจากว่าพวกเฮาได้ยินเถิงผู้ลางคนในพวกเฮาอยู่ทางนี้ ได้ออกไปหาพวกเจ้าแล้วได้เว้าลางแนวที่เฮ็ดให้พวกเจ้าปั่นป่วนใจโดยคำสอนว่า ‘เจ้าต้องเข้าสุหนัตกับฮักษากฎบัญญัตินำจั่งสิรอดพ้นได้’ แต่ว่าพวกฮั้นบ่ได้ฮับอนุญาตหรือคำสั่งใดๆ จากพวกเฮาแนวฮั้นเลย

กิจการ 15:25 จั่งซั้น พวกเฮาจั่งพร้อมใจ เห็นดีเห็นซอบ ที่สิใซ้ผู้ลางคนที่เฮาเลือกไว้ ให้มาหาพวกเจ้าพร้อมกับบารนาบัสกับเปาโล ผู้เป็นที่ฮักแพงในพระเจ้าของพวกเฮา

กิจการ 15:26 เป็นผู้ที่ได้อุทิศซีวิตของเขา เสี่ยงภัยเพื่อพระนามของพระเยซูคริสต์เจ้าของเฮามาแล้ว

กิจการ 15:27 จั่งซั้น พวกเฮาอยู่ทางนี้จั่งใซ้ยูดาสกับสิลาสมา เป็นผู้สิยืนยันข้อความที่เฮาได้ปรึกษาหารือตกลงกันไว้ จั่งให้พวกเจ้าฟังเสียงจากปากของเขาโดยตรง

กิจการ 15:28 ย้อนว่าทั้งพระวิญญาณพร้อมทั้งพวกไทเฮา กะเห็นสมควรที่สิบ่วางภาระหนักหนาอีหยังแนวนี้ใส่พวกเจ้า เว้นไว้แต่ข้อเล็กๆ น้อยๆ แนวหมู่ฮั้นที่จำเป็นต่อไปนี้

กิจการ 15:29 คือว่าพวกเจ้าควรสิงดการกินอาหารที่เขาได้บูซาให้ฮูปเคารพ กับเลือด กับซี้นสัตว์ที่ถืกฮัดคอตาย กับการเล่นซู้ล่วงประเวณี คั่นพวกเจ้าฮักษาโตไว้จากแนวหมู่นี้กะสิเป็นการดีแล้ว ขอให้อยู่ดีมีแฮงเด้อ”

กิจการ 15:30 บัดลาจากกันแล้ว คนหมู่ฮั้นกะเดินทางไปเมืองอันทิโอก แล้วบัดได้เอิ้นหมู่พี่น้องมาโฮมกันแล้ว จั่งมอบจดหมายฉบับฮั้นให้

กิจการ 15:31 พอแต่ได้อ่านแล้ว ต่างคนต่างกะดีอกดีใจในคำปลอบโยนหนุนใจฮั้น

กิจการ 15:32 ฝ่ายยูดาสกับสิลาสฮั้น ซึ่งเขาเองเป็นผู้พยากรณ์ของพระเจ้านำ จั่งได้เว้าคำหนุนใจให้พวกพี่น้องต่ออีกหลายแนวให้มีกำลังใจขึ้น

กิจการ 15:33 บัดเขาพักเซาเมื่อยอยู่ฮั่นจักหน่อยแล้ว พวกพี่น้องกะส่งเขาออกไป จั่งฝากพรสันติภาพไปยังพวกทูตพิเศษในเมืองเยรูซาเล็ม

กิจการ 15:34 แต่ว่า ส่วนสิลาสฮั้น ลาวเห็นดีที่สิอยู่ฮั่นต่อไปอีก

กิจการ 15:35 แล้วฝ่ายเปาโลกับบารนาบัส เขากะอยู่ในเมืองอันทิโอกต่อไปคือกัน จั่งได้สอนกับประกาศพระคำของพระเจ้าให้กับคนอื่นๆ อีกหลายคนนำ

กิจการ 15:36 แล้วต่อมาอีกหลายมื้อ เปาโลจั่งเว้ากับบารนาบัสว่า “ให้เฮาย้อนกลับไปยามพวกพี่น้องในคู่เมืองหม่องที่เฮาเคยประกาศพระคำของพระเจ้าแล้วเถอะ ไปคอยเบิ่งว่าพวกเขาเป็นจั่งใด”

กิจการ 15:37 บัดนี้ ฝ่ายบารนาบัสคึดอยากพายอห์น ผู้มีซื่ออีกว่า มาระโก ไปนำ

กิจการ 15:38 แต่เปาโลบ่เห็นสมควรที่สิพายอห์นไปนำ ย้อนว่าคราวก่อนฮั้นโตเขาได้ปะถิ้มทูตทั้งสองฮั้นไว้ในแคว้นปัมฟีเลีย หนีปะเมือบ้านแทนที่สิเฮ็ดการงานนำกัน

กิจการ 15:39 แล้วได้เกิดมีการขัดแย้งกันอย่างใหญ่ในเรื่องนี้ เลยต้องแยกกันไปคนละทาง บารนาบัสจั่งพายอห์น-มาระโกฮั้น ลงเฮือไปเกาะไซปรัส

กิจการ 15:40 แต่เปาโลลาวได้เลือกเอานายสิลาสไปนำลาว แล้วพวกพี่น้องได้ฝากเขาทั้งสองไว้ในฮ่มพระกรุณาธิคุณของพระเจ้าก่อนที่ออกไป

กิจการ 15:41 แล้วลาวจั่งออกไปฮอดทั่วแคว้นซีเรีย กับแคว้นซีลีเซีย ไปหนุนน้ำใจกลุ่มผู้เซื่อต่างๆ ให้แข็งแฮงขึ้น
////////// ////////// //////////