กิจการ – Acts บทที่ 14

กิจการ 14:1 บัดนี้ มันเป็นไปที่ว่า ในเมืองอิโคนียูม เปาโลกับบารนาบัสได้เข้าไปในศาลาธรรมของพวกยิว แล้วจั่งประกาศตามที่เคย เถิงมีคนหลวงหลายได้ฮับเซื่อ ทั้งพวกยิวพร้อมทั้งพวกคนกรีกนำ 

กิจการ 14:2 แต่พวกยิวที่บ่เซื่อกะยุแหย่คนต่างชาติให้เกิดมีใจคึดปองร้ายต่อพวกพี่น้อง

กิจการ 14:3 ฝ่ายเปาโลกับบารนาบัสกะอยู่ฮั่นโดนเติบ จั่งประกาศในพระนามของพระผู้เป็นเจ้าโดยความกล้าหาญ แล้วเพิ่นได้สนับสนุนการประกาศเรื่องพระคุณของเพิ่น โดยโปรดให้มีเครื่อง หมายอันสำคัญกับเหตุการณ์มหัศจรรย์ปรากฏโดยมือของเขา

กิจการ 14:4 แต่ไทเมืองฮั้นกะแตกออกเป็นสองพรรคสองพวก ฝ่ายหนึ่งเข้าข้างพวกคนยิว กับอีกฝ่ายหนึ่งกะเข้าข้างพวกทูตพิเศษฮั้น

กิจการ 14:5 บัดนี้ พวกคนต่างชาติกับพวกยิวที่อยู่ฝ่ายต่อต้าน พร้อมทั้งพวกผู้หลักผู้ใหญ่ของคนยิวฮั้น ได้สมคบคึดกันว่าสิโจมตีเฮ็ดแนวทารุณใส่เปาโลกับบารนาบัส ทั้งสิดึกหินใส่เขาให้ตาย 

กิจการ 14:6 แต่เปาโลกับบารนาบัสได้ฮู้โตก่อน จั่งหนีออกไปประกาศอยู่เมืองลิสตรา กับเมืองเดอร์บี พร้อมทั้งแถวซนบทที่อยู่อ้อมแอ้มฮั่น ในแคว้นลิคาโอเนีย

กิจการ 14:7 แล้วเขากะได้ประกาศข่าวประเสริฐอยู่ฮั่นต่อไป

กิจการ 14:8 ในเมืองลิสตราฮั้นมีซายเป็นง่อยผู้หนึ่ง ใซ้ตีนบ่ได้เลยย้อนพิการมาแต่ท้องแม่ บ่เคยย่างไปจักบาทก้าวเลย

กิจการ 14:9 ซายง่อยผู้ฮั้นได้ฟังเปาโลเว้า เปาโลจั่งจ้องเบิ่งโตเขา สังเกตว่าใจเขามีความเซื่ออยากเซาเป็นง่อยฮั้น 

กิจการ 14:10 บัดนี้ เปาโลจั่งฮ้องเสียงดังขึ้นมาสั่งว่า “ให้เจ้าลุกขึ้นยืนตรงเด้อ” แล้วเขาจั่งโดดขึ้นย่างเลย 

กิจการ 14:11 แล้วบัดพอพวกคนอยู่ฮั่นเห็นแนวที่เปาโลได้เฮ็ด จั่งพากันฮ้องขึ้นมาเป็นภาษาลิคาโอเนียว่า “พวกเทพเจ้าได้ลงมาแปลงโตเป็นคนอยู่นำเฮาแล้ว”

กิจการ 14:12 เขาจั่งเอิ้นบารนาบัสว่า “พระเทพซุส” กับเอิ้นเปาโลว่า “พระเทพเฮอร์เมส” ย้อนเปาโลเป็นผู้นำในการเว้า 

กิจการ 14:13 บัดนี้ผู้นำเครื่องถวายประจำพระเทพซุส ที่มีศาลาของซุสตั้งอยู่แถวหน้าฝักตูเมือง ได้จูงงัวกับถือพวงมาลัยมายังฝักตูเมือง ตั้งใจว่าสิถวายเครื่องบูซาพร้อมกับประซาซน 

กิจการ 14:14 แต่บัดพวกทูตพิเศษบารนาบัสกับเปาโลได้ยินจั่งซั้น เขาจั่งฉีกเสื้อผ้าเจ้าของ แล่นเข้าไปหว่างกลางคนพวกฮั่น แล้วจั่งฮ้องออกเสียงดัง

กิจการ 14:15 ว่า “พวกซายเอ้ย เป็นหยังเจ้าจั่งเฮ็ดแนวนี้ เฮากะเป็นคนธรรมดาคือจั่งพวกเจ้าเด้อ เฮามาประกาศให้พวกเจ้ากลับจากแนวหมู่นี้ที่บ่มีประโยชน์ ให้มาหาพระเจ้าผู้เที่ยงแท้ผู้เพิ่นดำรงอยู่ ที่เพิ่นได้บันดาลสร้างฟ้าสวรรค์กับแผ่นดินโลก พร้อมทั้งทะเลกับเมิ้ดคู่อันที่มีอยู่ในฮั้น

กิจการ 14:16 ซึ่งในสมัยก่อนๆ เพิ่นได้ปล่อยพวกคนต่างซาติให้ใซ้ซีวิตตามใจมักของเขา

กิจการ 14:17 จั่งใดกะตาม เพิ่นบ่ได้ปะถิ้มคนเฮาไว้ โดยขาดหลักฐานพิสูจน์เถิงเพิ่น คือเพิ่นได้เฮ็ดแนวดีงามให้คนเฮา โดยได้โปรดให้มีฝนตกจากท้องฟ้าให้เกิดพืชผลตามฤดูกาล เพื่อคนเฮาทั้งหลายสิได้อิ่มอกอิ่มใจด้วยข้าวปลาอาหาร กับด้วยความยินดี”

กิจการ 14:18 เถิงแม้นทูตพิเศษได้เว้าแนวจั่งซี้แล้ว ยังเกือบบ่สามารถห้ามประซาซนไว้ บ่ให้เฮ็ดการบูซาถวายต่อพวกลาวฮั้น

กิจการ 14:19 แต่มีพวกยิวผู้ลางคนที่มาจากเมืองอันทิโอก กับเมืองอิโคนียูม ได้ซักซวนประซาซนอยู่ฮั้นให้เอาหินดึกใส่เปาโล แล้วลากออกไปถิ้มอยู่นอกเมือง จั่งคึดว่าลาวตายไปแล้ว

กิจการ 14:20 จั่งใดกะตาม พวกลูกศิษย์ได้ยืนอ้อมโตลาวไว้ ลาวกะเลยลุกขึ้นกลับเข้าไปในเมือง บัดฮอดมื้ออื่นมาลาวจั่งออกไปกับบารนาบัสไปยังเมืองเดอร์บี

กิจการ 14:21 แล้วบัดพวกลาวได้ประกาศข่าวประเสริฐในเมืองเดอร์บีฮั้น ทั้งได้สอนคนหลวงหลายนำ จั่งได้ลบเมือเมืองลิสตรา เมืองอิโคนียูม กับเมืองอันทิโอกอีก

กิจการ 14:22 แล้วจั่งส่งเสริมกำลังใจของหมู่ลูกศิษย์ หนุนน้ำใจเขาให้ดำรงอยู่ในความเซื่ออย่างมั่นคง จั่งบอกกันไว้ว่า “พวกผู้เซื่อเฮาต้องทนต่อความยากลำบากหลายในการเข้าแผ่นดินของพระเจ้า”

กิจการ 14:23 แล้วบัดเปาโลกับบารนาบัสได้แต่งตั้งหมู่ผู้เบิ่งแยงไว้ในกลุ่มผู้เซื่ออยู่คู่หม่อง กับได้ตุ้มโฮมอธิษฐานพร้อมทั้งอดข้าวแล้ว ลาวทั้งสองได้มอบกลุ่มผู้เซื่อคู่กลุ่มไว้กับพระผู้เป็นเจ้า ผู้เพิ่นที่พวกเขาได้เซื่อวางใจฮั้น

กิจการ 14:24 แล้วหลังจากเขาได้เดินทางผ่านแคว้นปิสิเดียกะได้มาฮอดแคว้นปัมฟีเลีย

กิจการ 14:25 แล้วบัดพอเขาได้ประกาศพระคำในเมืองเปอร์กาแล้ว เขาจั่งลงไปเมืองอัททาลิยา 

กิจการ 14:26 แล้วจากหม่องฮั้น เขาได้ลงเฮือใบแล่นไปทางเมืองอันทิโอก เป็นเมืองที่เขาได้ฮับการมอบหมายไว้ในพระกรุณาธิคุณของพระเจ้า เพื่อการงานฮั้นที่เขาได้เฮ็ดให้สำเร็จแล้ว 

กิจการ 14:27 บัดฮอดแล้วเขาได้เอิ้นกลุ่มผู้เซื่อมาโฮมกัน กับได้เว้าสู่ฟังเมิ้ดคู่แนวที่พระเจ้าได้เฮ็ดผ่านโตเขา กับที่ว่าเพิ่นได้เปิดฝักตูแห่งความเซื่อไว้ให้พวกคนต่างซาตินำ

กิจการ 14:28 แล้วเขาทั้งสองจั่งได้พักอยู่กับพวกลูกศิษย์อยู่ฮั่น เป็นเวลาโดนนาน
////////// ////////// //////////