กิจการ – Acts บทที่ 13

กิจการ 13:1 บัดนี้ ในกลุ่มผู้เซื่อในเมืองอันทิโอก มีผู้เป็นปากเป็นเสียงกับผู้สอนผู้ลางคน คือ บารนาบัส กับสิเมโอนที่เอิ้นว่านิเกอร์ กับลูสิอัสซาวเมืองไซรีน กับมานาเอนผู้ที่ใหญ่โตขึ้นมานำกันกับเจ้าเมืองเฮโรด กับเซาโล 

กิจการ 13:2 บัดคนหมู่ฮั้นพวมปรนนิบัติฮับใซ้พระผู้เป็นเจ้า กับถือศีลอดข้าวอยู่ พระวิญญาณได้เว้ากับเขาว่า “ให้เอาบารนาบัสกับเซาโลออกไว้เพื่อการงานแนวที่เฮาได้เอิ้นได้เลือกเขา”

กิจการ 13:3 หลังจากอดข้าวกับอธิษฐานจบแล้ว หมู่พวกเขากะได้วางมือใส่บารนาบัสกับเซาโลแล้วได้ใซ้เขาออกไป

กิจการ 13:4 แล้วโดยการนำพาของพระวิญญาณ เขาทั้งสองได้ลงไปเมืองเซลูเคียแล้วจั่งแล่นเฮือใบจากฮั่นไปเกาะไซปรัส

กิจการ 13:5 บัดฮอดเมืองซาลามิสแล้ว พวกเขาได้ประกาศพระคำของพระเจ้าในศาลาธรรมของพวกยิว แล้ว ยอห์น-มาระโก ได้ไปนำ เป็นผู้ซ่อยเขา

กิจการ 13:6 บัดได้เลาะไปทั่วเกาะแล้ว เขาจั่งไปยังเมืองปาโฟส ในเมืองฮั้นเขาได้พ้อคนหนึ่งที่เป็นพ่อมดหมอผี กับเป็นผู้ทำนายเทียมเท็จ ซึ่งเป็นคนยิวซื่อ บารเยซู

กิจการ 13:7 คนผู้นี้อยู่กับผู้ว่าราชการเมืองซื่อว่า เสอร์จีอัสเปาโล ผู้นี้เป็นคนฉลาดรอบคอบ จั่งได้เซิญบารนาบัสกับเซาโลมา ต้องการอยากฟังพระคำของพระเจ้า

กิจการ 13:8 แต่เอลีมาส ผู้เป็นพ่อมดหมอผี (ซื่อจริงแปลว่าจั่งซั้น) ได้ต่อต้านบารนาบัสกับเซาโล ย้อนบ่อยากให้ผู้ว่าเซื่อ

กิจการ 13:9 บัดนี้ เซาโล (ที่ชื่อว่าเปาโล) ซึ่งประกอบด้วยพระวิญญาณ ได้เพ่งตาจ้องใส่เอลีมาส

กิจการ 13:10 แล้วเว้าว่า “โอ เจ้าผู้เต็มไปด้วยกลอุบายกับเล่ห์เหลี่ยมอันร้ายกาจคู่อย่าง เจ้าผู้เป็นลูกของพญามารแท้ๆ เป็นศัตรู ต่อต้านทางซอบธรรมคู่แนว มื้อใดเจ้าสิเซาบิดเบือนทางซื่อตรงของพระผู้เป็นเจ้า

กิจการ 13:11 แล้วบัดนี้ นี่แน่ะ มือของพระผู้เป็นเจ้าได้จับบายเจ้า แต่นี้ไปเจ้าสิตาบอดบ่เห็นฮุ่งเลย จนฮอดยามเวลาที่กำหนดไว้” แล้วในหว่างฮั้นพอดี มีเงามืดปกคลุมเอลีมาสไว้ เขาจั่งงมซาวไปซาวมาหาคนจูงมือเขา

กิจการ 13:12 บัดผู้ว่าได้เห็นเหตุการณ์ที่เกิดขึ้นฮั้น จั่งฮับเซื่ออยู่กับหม่อง ทึ่งใจในหลักคำสอนของพระผู้เป็นเจ้า

กิจการ 13:13 แล้วบัดนี้ เปาโลกับหมู่พวกของเขากะได้ลงเฮือแล่นออกจากเมืองปาโฟส ไปยังเมืองเปอร์กาในแคว้นปัมฟีเลีย แล้วส่วนยอห์นฮั้นกะได้แยกจากหมู่พวก ลบเมือเมืองเยรูซาเล็ม

กิจการ 13:14 แต่บัดพวกฮั้นเดินทางจากเมืองเปอร์กาไปแล้ว ได้ไปฮอดเมืองอันทิโอกในแคว้นปิสิเดีย พวกเขาได้เข้าไปนั่งลงในศาลาธรรม เป็นมื้อหยุดพักวันสะบาโต

กิจการ 13:15 แล้วบัดอ่านกฎบัญญัติของโมเสส กับคำของผู้เป็นปากเป็นเสียงของพระเจ้าแล้ว คณะบริหารของศาลาธรรมจั่งใซ้คนไปเซิญเปาโลกับบารนาบัสว่า “ท่านพี่น้องเอ้ย คั่นท่านมีคำหนุนน้ำใจพี่น้องคนอยู่นี่ กะเซิญแบ่งปันให้เถอะ”

กิจการ 13:16 บัดนี้ เปาโลจั่งยืนขึ้น โบกมือแล้วตั้งต้นเว้าว่า “ท่านผู้ที่เป็นซนซาติอิสราเอลกับเจ้าทั้งหลายผู้ที่ยำเกรงพระเจ้า กรุณาฟังเอาเถอะ

กิจการ 13:17 “คือ พระเจ้าของซนซาติอิสราเอลหนิ ได้เลือกพวกพ่อตระกูลของพวกเฮาไว้ กับได้อวยพรเขาให้เจริญแม้นแต่ตอนยังเป็นคนต่างแดนในประเทศอียิปต์ แล้วเพิ่นจั่งได้นำหน้าเขาออกมาจากประเทศฮั้นโดยมือของเพิ่นที่ประกอบด้วยฤทธิ์กำลัง

กิจการ 13:18 แล้วเพิ่นได้ทนเอาต่อพฤติกรรมอันบ่ดีของเขา ในถิ่นแห้งแล้งเป็นเวลาประมาณสี่สิบปี

กิจการ 13:19 แล้วบัดเพิ่นได้กวาดล้างคนเจ็ดซนซาติออกจากแผ่นดินคานาอันแล้ว เพิ่นได้แบ่งปันแผ่นดินฮั้นให้พวกเขาโดยการยกให้เป็นมรดก

กิจการ 13:20 อยู่มา พระเจ้าได้ให้พวกเขามีพวกผู้วินิจฉัย เป็นซ่วงเวลาประมาณ สี่ร้อยห้าสิบปี จนฮอดสมัยที่ซามูเอลได้เป็นผู้เป็นปากเป็นเสียงของพระเจ้า

กิจการ 13:21 หลังจากฮั้นมา พวกเขาคึดอยากได้กษัตริย์ พระเจ้ากะเลยให้ ซาอูล ลูกซายของคีช จากเผ่าเบนยามิน ให้เป็นกษัตริย์ครบสี่สิบปี

กิจการ 13:22 บัดปลดซาอูลออกแล้ว พระเจ้าได้ตั้งดาวิดขึ้นเป็นกษัตริย์ของพวกเขา ซึ่งพระเจ้าออกคำพยานเถิงดาวิดว่า “เฮาได้พ้อดาวิด ลูกซายของเจสซี เป็นคนที่สิเฮ็ดตามใจมักของเฮา แล้วเฮ็ดตามจุดประสงค์ของเฮาให้เมิ้ด”

กิจการ 13:23 แล้วจากเซื้อสายของดาวิดนี้เอง พระเจ้าได้โปรดให้พระผู้โปรดของซนซาติอิสราเอลเกิดมา ซึ่งเป็นไปตามคำมั่นสัญญาของเพิ่น แม่นพระเยซูคริสต์นี้เอง

กิจการ 13:24 แล้วก่อนที่เพิ่นมาฮั้น โยฮันได้ตั้งต้นประกาศให้ประซาซนอิสราเอลทั้งเมิ้ด ฮับจุ่มน้ำแสดงการกลับใจใหม่

กิจการ 13:25 แล้วบัดโยฮันใกล้สิแล้วการงานของลาว ลาวจั่งถามคนว่า “พวกเจ้าคึดว่าข้อยหนิแม่นผู้ใด ข้อยบ่แม่นเพิ่นผู้ฮั้นดอก แต่นี่แน่ะ สิมีเพิ่นผู้หนึ่งมาตอนหลังข้อย ซึ่งโตข้อยเองดีบ่พอที่สิแก้สายเกิบให้เพิ่นเลย”

กิจการ 13:26 พี่น้องทั้งหลาย เอ้ย ผู้เป็นลูกหลานตามเซื้อสายของพ่ออับราฮัม พร้อมกับผู้ใดในพวกเจ้าที่ยำเกรงพระเจ้า ข่าวดีเรื่องความรอดพ้นนี้ได้ส่งมายังพวกเจ้าแล้ว

กิจการ 13:27 คือฝ่ายซาวเมืองเยรูซาเล็มกับคณะผู้นำของเขาฮั้น เนื่องจากว่าเขาบ่ได้ฮู้จักกับพระเจ้า กับบ่เข้าใจคำพยากรณ์ของพวกผู้เป็นปากเป็นเสียงของเพิ่นฮั้น ซึ่งเขาเคยอ่านกันในคู่มื้อหยุดพักวันสะบาโต พวกนี้จั่งได้เฮ็ดให้คำพยากรณ์ฮั้นสำเร็จ โดยได้ลงโทษเพิ่นจั่งฮอดฆ่าเลย

กิจการ 13:28 เถิงแม้นว่าเขาบ่ได้เห็นความผิดแนวใดในเพิ่นที่สมควรสิประหารให้ตาย พวกเขากะยังขอร้องปีลาตให้ขึงประหารเพิ่น

กิจการ 13:29 แล้วบัดเขาเฮ็ดตามคำพยากรณ์ฮั้นจนสำเร็จเมิ้ดตามที่มีเขียนไว้เรื่องเพิ่น เขาจั่งเอาศพของเพิ่นลงจากหลักไม้ไปเมี้ยนไว้ในอุโมงค์

กิจการ 13:30 แต่ว่าพระเจ้าได้โปรดให้เพิ่นเป็นขึ้นมาจากตาย

กิจการ 13:31 แล้วมีคนหลวงหลายได้พ้อได้เห็นเพิ่นเป็นเวลาหลายมื้อ จากแคว้นกาลิลีไปฮอดเมืองเยรูซาเล็ม ซึ่งบัดนี้คนหมู่ฮั้นได้เป็นหลักฐานพยานยืนยัน เถิงความจริงเรื่องเพิ่นเพื่อคนทั้งหลาย

กิจการ 13:32 แล้วบัดนี้ พวกเฮาจั่งป่าวประกาศเรื่องข่าวประเสริฐนี้ให้พวกเจ้า ซึ่งเป็นตามคำมั่นสัญญาที่พระเจ้าให้ไว้กับพวกพ่อตระกูลของเฮาฮั้น

กิจการ 13:33 พระเจ้าได้เฮ็ดให้คำทำนายฮั้นสำเร็จแล้ว ให้พวกเฮาผู้เป็นลูกหลานของคนหมู่ฮั้น โดยว่าเพิ่นได้โปรดให้พระเยซูเป็นขึ้นมาจากตายแล้ว คือจั่งที่มีคำทำนายเขียนไว้ในหนังสือสดุดีบทที่สองว่า “เจ้าเป็นบุตรโทนของเฮา แม่นมื้อนี้ล่ะเฮาสิให้การเกิดให้เจ้า”

กิจการ 13:34 การที่พระเจ้าได้ให้พระเยซูเป็นขึ้นมาจากตายฮั้น จั่งบ่มีการกลับไปสู่แดนเปื่อยเน่าอีกเลย พระเจ้าจั่งสัญญาไว้อย่างแน่นอนอีกว่า “เฮาสิเมตตาเจ้าตามที่เฮาได้สัญญาไว้กับดาวิดฮั้น”

กิจการ 13:35 แล้วเพิ่นได้ลงไว้ในสดุดีอีกบทหนึ่งว่า “พระเจ้าสิบ่ยอมให้องค์บริสุทธิ์ของเพิ่นเห็นการเปื่อยเน่าเลย”

กิจการ 13:36 โดยว่า ส่วนกษัตริย์ดาวิดฮั้น หลังจากลาวปฏิบัติหน้าที่ในการปกครองซนซาติของลาวตามพระประสงค์ของพระเจ้า แล้วลาวกะล่วงหลับไป ได้ถืกเมี้ยนไว้กับพวกพ่อตระกูลของลาว แล้วได้เข้าสู่การเปื่อยเน่า

กิจการ 13:37 แต่ว่า เพิ่นผู้ที่พระเจ้าได้โปรดให้เป็นขึ้นมาจากตายฮั้น บ่ได้พ้อได้เห็นการเปื่อยเน่าเลย

กิจการ 13:38 จั่งซั้น พี่น้องทั้งหลายเอ้ย ขอให้เข้าใจว่า โดยทางผู้ซายผู้นี้เอง พวกเฮาได้ประกาศการให้อภัยยกโทษบาปให้พวกเจ้าฟัง

กิจการ 13:39 แล้วโดยเพิ่นผู้ฮั้น คู่คนที่ฮับเซื่อสิพ้นโทษจากคู่อย่าง จั่งได้เป็นผู้ซอบธรรมต่อหน้าพระเจ้าได้ ซึ่งพวกเจ้าบ่สามารถเป็นผู้ซอบธรรมได้โดยทางกฎบัญญัติของโมเสสฮั้น

กิจการ 13:40 จั่งซั้น ระวังให้ดีเด้อ หย้านว่าเหตุร้ายที่พวกผู้เป็นปากเป็นเสียงได้กล่าวเถิงฮั้นสิตกใส่พวกเจ้า

กิจการ 13:41 ที่ว่า “นี่แน่ะ เจ้าผู้ที่มักลบหลู่หมิ่นประมาท ให้แปลกใจแล้วตกสู่ความพินาศเด้อ คือว่า เฮาพวมเฮ็ดเหตุการณ์ใหญ่แนวหนึ่งในยุคสมัยของเจ้า เป็นเหตุการณ์ที่ว่า แม้นแต่สิมีคนมาป่าวประกาศให้แล้ว พวกเจ้าสิบ่ยอมเซื่อเลย'”

กิจการ 13:42 บัดพวกยิวได้ออกไปจากศาลาธรรมแล้ว พวกคนต่างซาติอยู่ฮั้นกะอ้อนวอนอยากให้ประกาศถ้อยคำฮั้นปันเขาฟังอีก ในมื้อหยุดพักวันสะบาโตสัปดาห์หน้า

กิจการ 13:43 บัดการประซุมเลิกแล้ว พวกยิวหลายคนพร้อมกับคนอื่นๆ ที่เข้าความเซื่อนำคนยิว ซึ่งยำเกรงพระเจ้าได้ติดตามเปาโลกับบารนาบัสออกไป เขาทั้งสองจั่งหนุนน้ำใจซวนหมู่พวกเขาให้ตั้งมั่นอยู่ในพระกรุณาธิคุณของพระเจ้าต่อๆ ไป

กิจการ 13:44 บัดมื้อหยุดพักวันสะบาโตสัปดาห์หน้ามาฮอดแล้ว คนเกือบเมิ้ดเมืองได้ออกมาตุ้มโฮมกัน เพื่อฮับฟังพระคำของพระเจ้า

กิจการ 13:45 แต่บัดพวกยิวเห็นคนหลวงหลายฮั้น กะเกิดเต็มไปด้วยความอิจฉาริษยา ได้เว้าคัดค้านถ้อยคำของเปาโล ฮอดการโต้แย้งกับการสบประมาทนำ

กิจการ 13:46 แล้วเปาโลกับบารนาบัสเกิดมีใจกล้าขึ้นมาได้เว้าว่า “จำเป็นแล้วที่สิต้องป่าวประกาศพระคำของพระเจ้านี้ให้พวกยิวเจ้าฟังก่อน แต่ในกรณีที่พวกเจ้าปัดออกบ่ยอมฟัง จั่งได้ตัดสินว่าโตเองบ่สมควรที่สิได้ซีวิตนิรันดร์เลย นี่แน่ะ บัดนี้พวกเฮาสิมุ่งหน้าออกไปหาคนต่างซาติเป็นการดีกว่า 

กิจการ 13:47 คือพระผู้เป็นเจ้าเองได้สั่งเฮาไว้จั่งซี้แล้วว่า “เฮาได้ตั้งเจ้าไว้ ให้เป็นแสงสว่างให้คนต่างซาติ เพื่อเจ้าสิเป็นเหตุให้คนทั้งหลายได้ความรอดพ้นฮอดสุดปลายแผ่นดินโลก” 

กิจการ 13:48 แล้วบัดคนต่างซาติได้ยินจั่งซั้น กะเกิดมีความยินดีอย่างใหญ่ จั่งได้ยกย่องสรรเสริญพระคำของพระผู้เป็นเจ้า แล้วคนทั้งหลายที่เห็นดีเห็นซอบที่สิเลือกฮับเอาซีวิตนิรันดร์ กะได้เซื่อ 

กิจการ 13:49 แล้วพระคำของพระผู้เป็นเจ้าได้แพร่ออกไปตลอดฮอดทั่วเมิ้ดเขตแดนฮั้น

กิจการ 13:50 แต่พวกยิวอยู่ฮั้นได้ปลุกระดมยุยงพวกแม่ญิงสูงศักดิ์ของเมือง ที่นับถือพระเจ้า พร้อมกับพวกผู้ซายที่เป็นผู้หลักผู้ใหญ่ในเมืองฮั้น พวกเขาจั่งได้เคี่ยวเข็ญไล่เปาโลกับบารนาบัสออกจากเขตเมืองของเขา 

กิจการ 13:51 ฝ่ายเปาโลกับบารนาบัส จั่งปัดฝุ่นออกจากเกิบของเขาเพื่อแสดงการประท้วง แล้วกะไปทางเขตเมืองอิโคนียูม 

กิจการ 13:52 ฝ่ายพวกลูกศิษย์ฮั่นกะเต็มไปด้วยความดีอกดีใจ แล้วประกอบด้วยพระวิญญาณนำ
////////// ////////// //////////