กิจการ – Acts บทที่ 12

กิจการ 12:1 แล้วตอนฮั้นกษัตริย์เฮโรด(อากริปปา) ได้ลงมือเฮ็ดแนวร้ายกาจใส่ผู้ลางคนในกลุ่มผู้เซื่อ 

กิจการ 12:2 แล้วเฮโรดได้สั่งฆ่ายากอบอ้ายของยอห์น โดยดาบ

กิจการ 12:3 บัดเห็นว่าการฮั้นเป็นที่ซอบใจของพวกยิว เฮโรดกะสั่งจับเปโตรนำ (นี่กะเป็นในซ่วงมื้อเทศกาลขนมปังที่บ่มีเซื้อฟูในงานฉลองกู้ซาติ)

กิจการ 12:4 บัดเฮโรดสั่งจับเปโตรแล้ว จั่งให้คุมขังไว้ในคุก แล้วได้มอบไว้กับกลุ่มทหารสี่กลุ่มให้เฝ้าไว้ ตั้งใจว่าบัดเมิ้ดงานเทศกาลฉลองการกู้ซาติแล้ว สิออกมามอบไว้ในมือของประซาซน

กิจการ 12:5 จั่งซั้น เปโตรเลยถืกคุมขังไว้ในคุกอย่างดี แต่ว่ากลุ่มผู้เซื่อได้อธิษฐานวอนขอต่อพระเจ้าเพื่อเปโตร 

กิจการ 12:6 แต่เปโตรนอนหลับอยู่ในคืนก่อนที่เฮโรดสิเอาเขาออกมาฮั้น ได้นอนอยู่ระหว่างทหารสองคน มีโซ่สองเส้นล่ามไว้ กับมียามเฝ้าอยู่หน้าฝักตูคุกนำ

กิจการ 12:7 แล้วนี่แน่ะ มีเทวทูตของพระผู้เป็นเจ้ามาปรากฏ กับมีแสงสว่างส่องเข้ามาในคุก เทวทูตองค์ฮั้นจั่งตบที่สีข้างเปโตรปลุกให้ตื่นแล้วว่า “ให้ลุกขึ้นไวๆ เด้อ” แล้วโซ่ฮั้นกะเลยหลุดตกออกจากมือของลาว 

กิจการ 12:8 แล้วเทวทูตองค์ฮั้นจั่งสั่งเปโตรว่า “ให้เตรียมโตคาดแอวไว้กับใส่เกิบเด้อ” เปโตรกะเลยเฮ็ดตาม แล้วเทวทูตจั่งสั่งเปโตรว่า “ให้ใส่เสื้อนอกแล้วตามเฮามาเด้อ”

กิจการ 12:9 เปโตรจั่งตามเทวทูตออกไป แต่ยังบ่ฮู้ว่าการที่เทวทูตเฮ็ดฮั้นเป็นความจริง คึดว่าเจ้าของพวมฝันซื่อๆ 

กิจการ 12:10 บัดออกไปพ้นกลุ่มทหารยามด่านที่หนึ่งกับที่สองแล้ว กะมาเถิงฝักตูเหล็กเป็นทางเข้าไปในเมือง ฝักตูฮั้นกะเลยเปิดเอาเองให้เขาทั้งสองผ่าน เขาจั่งย่างออกไปผ่านหนทางเส้นหนึ่ง แล้วในหว่างฮั้นพอดี เทวทูตได้จากลาวไป

กิจการ 12:11 บัดเปโตรฮู้เมื่อโตแล้วลาวจั่งเว้าว่า “บัดนี้ผู้ข้าฮู้แน่แล้วว่า พระผู้เป็นเจ้าได้ใซ้เทวทูตของเพิ่นมาซ่อยผู้ข้าให้รอดพ้นจากมือของเฮโรด กับจากการมุ่งร้ายของพวกยิวนำ” 

กิจการ 12:12 บัดเปโตรได้พิจารณาเหตุการณ์ฮั้นแล้ว ลาวได้คึดสิไปบ้านของมารีย์ผู้เป็นแม่ของยอห์นผู้มีซื่ออีกว่า มาระโก หม่องฮั่นมีพี่น้องหลายคนโฮมกันอธิษฐานวอนขออยู่

กิจการ 12:13 บัดเปโตรเคาะฝักตูฮั้ว มีญิงสาวคนหนึ่งซื่อ โรดา ได้มาเพื่อสิเปิดฝักตู

กิจการ 12:14 พอนางจำเสียงของเปโตรได้ นางบ่ได้เปิดฝักตูให้ย้อนดีใจแฮง แต่ได้แล่นเข้าไปบอกพี่น้องว่า เปโตรยืนอยู่หน้าฝักตูแล้ว 

กิจการ 12:15 แต่พวกคนอยู่ฮั้นจั่งเว้ากับนางว่า “เจ้าเป็นบ้าแล้ว” แต่นางได้ยืนยันว่ามีอีหลี พวกเขาจั่งว่า “บ่แม่นเทวทูตของเขาบ้อ” 

กิจการ 12:16 ส่วนเปโตรกะยังยืนเคาะฝักตูอยู่ บัดคนออกไปเปิดฝักตูได้เห็นโตจริง พวกเขากะเป็นตางึดหลาย 

กิจการ 12:17 แต่เปโตรโบกมือให้เขามิดลง จั่งเว้าเรื่องให้พวกเขาฟังว่า พระผู้เป็นเจ้าได้ใซ้เทวทูตนำเขาออกจากคุกแนวได แล้วเทวทูตได้สั่งให้เขาไปบอกเรื่องนี้ให้ยากอบกับพวกพี่น้องให้ฮู้จักนำ แล้วเทวทูตจั่งออกไปหม่องอื่น

กิจการ 12:18 บัดมาฮอดแจ้งแล้ว พวกกลุ่มทหารกะเกิดวุ่นวายบ่แม่นน้อย ที่ว่าเปโตรไปอยู่ใส 

กิจการ 12:19 แล้วบัดเฮโรดซอกหาโตเปโตรบ่พ้อ จั่งสอบสวนพวกทหารยามกับสั่งให้ประหารพวกเขาเสีย แล้วเฮโรดได้ออกจากแคว้นยูเดีย ลงไปพักอยู่เมืองซีซารียา

กิจการ 12:20 คือเฮโรดบ่พอใจหลายต่อซาวเมืองไทระ กับซาวเมืองไซดอน แต่พวกซาวเมืองฮั้นได้พากันมาเฝ้าเฮโรด คือพวกเขาได้เฮ็ดเป็นหมู่กันกับกรมวังของกษัตริย์ซื่อว่า บลัสทัส กะเลยขอคืนดีกันกับเฮโรด ย้อนว่าเมืองพวกเขาต้องขึ้นอาศัยอยู่กับแผ่นดินของกษัตริย์เฮโรดเพื่ออาหารการกิน

กิจการ 12:21 บัดฮอดมื้อที่นัดไว้ เฮโรดได้นุ่งเครื่องกษัตริย์ นั่งบัลลังก์ แล้วได้กล่าวประกาศให้ประซาซนฟัง 

กิจการ 12:22 แล้วประซาซนจั่งพร้อมกันฮ้องว่า “นี้เป็นเสียงของพระเจ้าองค์หนึ่ง บ่แม่นเสียงคน” 

กิจการ 12:23 แล้วในหว่างฮั้นพอดี เทวทูตของพระผู้เป็นเจ้าเฮ็ดให้เฮโรดเกิดเป็นโรคฮ้ายแฮง ย้อนเพิ่นบ่ได้ถวายเกียรติพระเจ้า เลยมีหนอนกัดกินโตเฮโรดเถิงตาย 

กิจการ 12:24 แต่พระคำของพระเจ้ากะยังแผ่ออกไปเจริญขึ้นหลาย 

กิจการ 12:25 ฝ่ายบารนาบัสกับเซาโล บัดได้เฮ็ดการงานของพระเจ้าสำเร็จแล้ว กะเลยกลับไปเมืองเยรูซาเล็ม แล้วจั่งพายอห์นผู้มีซื่ออีกว่า มาระโก ไปนำ
////////// ////////// //////////