กิจการ – Acts บทที่ 11

กิจการ 11:1 ฝ่ายพวกทูตพิเศษกับหมู่พี่น้องทั้งหลายที่อยู่ในแคว้นยูเดียได้ยินว่า คนต่างซาติได้ฮับเอาพระคำของพระเจ้าคือกัน

กิจการ 11:2 บัดเปโตรขึ้นมาฮอดเมืองเยรูซาเล็มแล้ว พวกที่ถือสุหนัต(คือซาวยิว)จั่งต่อว่าโต้แย้งกับลาว

กิจการ 11:3 ว่า “เจ้าไปหาคนต่างซาติผู้ที่บ่ได้ถือสุหนัต กับได้กินฮ่วมกับเขาเนาะ”

กิจการ 11:4 แต่ส่วนเปโตรลาวได้อธิบายให้เขาฟังตั้งแต่ต้นตามลำดับ

กิจการ 11:5 ว่า “บัดข้อยพวมอธิษฐานอยู่ในเมืองยัฟฟากะเลยเซือบๆ ฝันไป เห็นนิมิตอย่างหนึ่ง คือได้เห็นแนวหนึ่งคือจั่งผ้าสี่เหลี่ยมผืนใหญ่ๆ ผูกไว้ทั้งสี่แจถืกหย่อนลงมาจากสวรรค์มายังข้อยหนิ

กิจการ 11:6 ข้อยจั่งพิจารณาจ้องเบิ่งฮั้น เห็นสัตว์บกสี่ตีนของโลกนี้ สัตว์ป่า สัตว์ เลื้อยคลาน กับนกที่บินอยู่เทิงท้องฟ้า 

กิจการ 11:7 แล้วข้อยได้ยินเสียงของผู้มีอำนาจเว้ากับข้อยว่า “เปโตร เอ้ย ให้ลุกขึ้น ฆ่ากินเด้อ”

กิจการ 11:8 แต่ข้อยตอบว่า “บ่ได้ดอกพระผู้เป็นเจ้า เจ้าข้า แนวสามัญกับมลทินบ่เคยเข้าปากของผู้ข้าจักเทื่อเลย” 

กิจการ 11:9 แต่เสียงฮั้นได้เว้าจากฟ้าเป็นเทื่อที่สองว่า “แนวที่พระเจ้าได้ซำระให้สะอาดบริสุทธิ์แล้วฮั้น บ่ให้ว่าเป็นของมลทินเด้อ”

กิจการ 11:10 ได้เป็นจั่งซั้นฮอดสามเทื่อ แล้วแนวหมู่ฮั้นทั้งเมิ้ดกะถืกฮับขึ้นไปเทิงฟ้าอีก

กิจการ 11:11 แล้วนี่แน่ะ ในหว่างฮั้นพอดี ได้มีซายสามคนมายืนอยู่หน้าบ้านที่ข้อยพักอยู่ ถืกใซ้มาจากเมืองซีซารียาให้มาหาข้อยหนิ

กิจการ 11:12 แล้วพระวิญญาณจั่งเซิญให้ข้อยไปนำเขาโดยบ่ต้องลังเลใจสงสัยอีหยังเลย นอกจากฮั้นพวกพี่น้องทั้งหกคนพวกนี้กะได้ไปกับข้อยนำ พวกเฮาจั่งเข้าไปในบ้านของนายร้อยคนฮั้น 

กิจการ 11:13 นายร้อยจั่งได้เว้าให้พวกเฮาฟังว่าได้เห็นเทวทูตองค์หนึ่งได้เข้ามายืนอยู่ในบ้านของเขาบอกว่า “ให้ใซ้คนไปเมืองยัฟฟา ไปเซิญซีโมนที่เอิ้นว่าเปโตรมาเด้อ

กิจการ 11:14 “เปโตรฮั้นสิได้เว้าถ้อยคำให้เจ้าฟัง เถิงทางที่เจ้าทั้งครอบครัวของเจ้าสิได้รอดพ้น”

กิจการ 11:15 แล้วบัดข้อยตั้งต้นพวมเว้าอยู่ฮั้น พอดีพระวิญญาณกะลงมาประทับอยู่กับพวกเขา คือจั่งที่ได้ลงมาอยู่กับพวกเฮาบัดตำอิดฮั่นล่ะ

กิจการ 11:16 แล้วพอดีข้อยคึดซอดเห็นคำเว้าของพระผู้เป็นเจ้าฮั้น ที่เพิ่นได้เว้าไว้ว่า “ยอห์นให้ฮับการจุ่มน้ำกะแม่นอยู่ แต่พวกเจ้าสิฮับการจุ่มด้วยพระวิญญาณ”

กิจการ 11:17 จั่งซั้น คั่นพระเจ้าได้โปรดให้พระวิญญาณเป็นของขวัญให้กับเขา คือจั่งให้กับเฮาฮั่นที่ได้ฮับเซื่อในพระเยซูคริสต์เจ้า บัดนี้ข้อยหนิเป็นผู้ใดที่สิมีสิทธิ์ขัดขืนพระประสงค์ของพระเจ้าได้”

กิจการ 11:18 บัดพวกเขาได้ยินคำแนวหมู่ฮั้นของเปโตรเว้ากะมิดลง แล้วได้สาธุการพระเจ้าว่า “บัดนี้ พระเจ้าได้โปรดให้คนต่างซาติมีสิทธิ์ในการกลับใจใหม่เถิงมีซีวิตรอดพ้นคือจั่งพวกเฮา”

กิจการ 11:19 บัดนี้ ฝ่ายพี่น้องทั้งหลายที่ได้กระจัดกระจายออกไปย้อนการข่มเหงที่เกิดเนื่องจากเรื่องสเทเฟนฮั้น ได้อพยพไปฮอดเมืองฟีนิเซีย เกาะไซปรัส กับเมืองอันทิโอก พวกนี้ได้ป่าวประกาศพระคำต่อพวกยิวแค่พวกเดียว

กิจการ 11:20 แล้วมีผู้ลางคนในพวกอพยพฮั้น เป็นซาวเกาะไซปรัส กับซาวไซรีน บัดฮอดเมืองอันทิโอก กะได้ประกาศข่าวประเสริฐเรื่องพระเยซูคริสต์เจ้าให้ซาวยิว-กรีกนำ

กิจการ 11:21 แล้วมือของพระผู้เป็นเจ้าได้อวยพรการประกาศของเขา จั่งมีคนหลวงหลายได้ฮับเซื่อหันมาหาพระผู้เป็นเจ้า 

กิจการ 11:22 แล้วข่าวนี้ได้แพร่ไปฮอดหูของพี่น้องกลุ่มผู้เซื่อในเมืองเยรูซาเล็ม เขาจั่งว่าสมควรที่สิใซ้บารนาบัสไปเถิงเมืองอันทิโอก

กิจการ 11:23 บัดบารนาบัสมาฮอดฮั้นแล้ว กะเกิดดีอกดีใจหลายบัดได้เห็นผลของพระกรุณาธิคุณของพระเจ้าที่ได้เกิดผลอยู่ฮั่น จั่งได้หนุนน้ำใจคนหมู่ฮั้นให้มีใจตั้งมั่นอยู่กับพระเยซูคริสต์เจ้า 

กิจการ 11:24 คือบารนาบัสนี้เป็นคนดี ประกอบด้วยพระวิญญาณกับความเซื่อ แล้วจำนวนผู้ที่ฮับเซื่อเข้าในองค์พระผู้เป็นเจ้ากะเพิ่มขึ้นหลวงหลาย

กิจการ 11:25 แล้วหลังจากฮั้นบารนาบัสได้ไปเมืองทาร์ซัสเพื่อตามหาเซาโล

กิจการ 11:26 บัดได้พ้อลาวแล้ว จั่งพากันกลับมาเมืองอันทิโอก แล้วกะอยู่ฮั้นตลอดหนึ่งปี ได้ฮ่วมกันกับกลุ่มผู้เซื่อ จั่งได้สอนคนหลวงหลายอยู่ฮั้น แล้วคนได้ตั้งซื่อเอิ้นพวกพี่น้องลูกศิษย์ว่าเป็น คริสเตียน เป็นเทื่อตำอิดในเมืองอันทิโอก

กิจการ 11:27 แล้วในยามฮั้น มีพวกผู้เป็นปากเป็นเสียงของพระเจ้าได้ลงมาจากเมืองเยรูซาเล็มไปเมืองอันทิโอก 

กิจการ 11:28 แล้วมีผู้หนึ่งในหมู่พวกผู้เป็นปากเป็นเสียงฯ ฮั้นซื่อว่า อากาบัส ได้ลุกขึ้นกล่าวโดยพระวิญญาณว่า สิเกิดการอดอยากหมากหิวอย่างใหญ่หลวงทั่วแผ่นดินโลก แล้วการฮั้นได้เกิดขึ้นในสมัยที่ คลาวดิอัสซีซาร์ เป็นจักรพรรดิของราชอาณาจักรโรม

กิจการ 11:29 แล้วพวกลูกศิษย์ตัดสินเอาเป็นว่า เขาสิถวายตามกำลังของแต่ละคน ฝากไปซ่อยบรรเทาทุกข์ให้พวกพี่น้องที่อยู่ในแคว้นยูเดีย 

กิจการ 11:30 แล้วเขาได้เฮ็ดตามฮั้น จั่งได้ฝากไปกับบารนาบัสกับเซาโลไปเถิงพวกผู้หลักผู้ใหญ่ของกลุ่มผู้เซื่อที่ขัดสนฮั้น
////////// ////////// //////////