กิจการ – Acts บทที่ 10

กิจการ 10:1 แล้วมีซายคนหนึ่งซื่อ โครเนลิอัส อาศัยอยู่ในเมืองซีซารียา เป็นนายร้อยในกองทหารอิตาเลีย

กิจการ 10:2 โครเนลิอัสนี้เป็นคนมีความเซื่อมั่น กับยำเกรงพระเจ้า พร้อมทั้งครอบครัวของลาว ซึ่งเคยบริจาคซ่อยคนหลาย กับอธิษฐานเว้านำพระเจ้าอยู่เสมอ

กิจการ 10:3 แล้วนายร้อยนี้ได้เห็นนิมิต เป็นเวลาประมาณบ่ายสามโมง ในนิมิตฮั้นลาวเห็นเทวทูตองค์หนึ่งของพระเจ้าเข้ามาหาลาวเว้าว่า “โครเนลิอัส เอ้ย”

กิจการ 10:4 บัดโครเนลิอัสเหลียวเบิ่งเทวทูตองค์ฮั้น ลาวกะเกิดตกใจหย้านจั่งถามว่า “เป็นจั่งใด พระผู้เป็นเจ้า เจ้าข้า” เทวทูตจั่งตอบลาวว่า “คำอธิษฐานกับการบริจาคซ่อยคนอื่นของเจ้าฮั้น ได้ขึ้นไปเป็นที่ระลึกที่ซอบต่อพระเจ้าแล้ว

กิจการ 10:5 “บัดนี้ ให้เจ้าใซ้คนไปเมืองยัฟฟา ไปถามหาคนหนึ่งซื่อว่าซีโมนที่เอิ้นว่าเปโตรเด้อ

กิจการ 10:6 เปโตรพักอยู่กับคนหนึ่งซื่อ ซีโมน เป็นซ่างฟอกหนัง ซึ่งบ้านของเขาอยู่ฮิมฝั่งทะเล เปโตรนี้สิบอกเจ้าเถิงแนวที่เจ้าควรสิเฮ็ด”

กิจการ 10:7 แล้วบัดเทวทูตเว้ากับโครเนลิอัสได้ออกไปแล้ว โครเนลิอัสได้เอิ้นคนใซ้สองคนกับทหารคนหนึ่งที่เป็นคนมีความเซื่อมั่นคือกัน ผู้ที่เคยฮับใซ้ลาวอยู่เป็นประจำ

กิจการ 10:8 บัดโครเนลิอัสได้บอกคู่แนวนี้ให้พวกเขาแล้ว ลาวจั่งใซ้พวกเขาออกไปเมืองยัฟฟา

กิจการ 10:9 แล้วบัดเซ้ามื้อใหม่มา ตอนคนหมู่ฮั้นพวมเดินทางไปใกล้ฮอดเมืองยัฟฟาแล้ว ส่วนเปโตรลาวได้ขึ้นไปอยู่เทิงดาดฟ้า เพื่อสิอธิษฐานเว้านำพระเจ้า เป็นเวลาประมาณเที่ยง

กิจการ 10:10 แล้วลาวเกิดหิวคึดอยากกินข้าวแฮง แต่ตอนเขาพวมจัดแนวกิน ลาวกะเลยเซือบๆ ฝันไป

กิจการ 10:11 แล้วลาวฝันเห็นท้องฟ้าแหวกออกไป แล้วมีแนวหนึ่งคือปานผ้าสี่เหลี่ยมผืนใหญ่ๆ ผูกไว้ทั้งสี่แจถืกหย่อนลงมาวางเทิงแผ่นดินโลก

กิจการ 10:12 แล้วในฮั้นมีสัตว์บกเมิ้ดคู่แนวที่มีอยู่เทิงโลก คือสัตว์สี่ตีน สัตว์ป่า สัตว์เลื้อยคลาน กับนกที่อยู่เทิงฟ้า

กิจการ 10:13 แล้วมีเสียงของผู้มีอำนาจเว้ากับลาวว่า “เปโตร เอ้ย ให้ลุกขึ้นฆ่ากินโลดเด้อ” 

กิจการ 10:14 ส่วนเปโตรจั่งตอบว่า “บ่ได้ดอกพระผู้เป็นเจ้า เจ้าข้า ผู้ข้าบ่เคยกินแนวที่เป็นมลทินแนวต้องห้าม”

กิจการ 10:15 แล้วเสียงฮั้นได้เว้าลาวเป็นเทื่อที่สองว่า “แนวที่พระเจ้าได้ซำระให้สะอาดบริสุทธิ์แล้ว บ่ให้ว่าเป็นมลทินเด้อ”

กิจการ 10:16 ได้เฮ็ดจั่งซั้นเถิงสามเทื่อ แล้วผืนฮั่นกะถืกฮับขึ้นไปอีกในท้องฟ้า

กิจการ 10:17 บัดเปโตรพวมคึดสงสัยในใจเถิงนิมิตที่ลาวได้เห็นฮั้น ว่ามีความหมายจั่งใด นี่แน่ะ คนหมู่ฮั้นที่นายร้อยโครเนลิอัสได้ใซ้ไปฮั้น ถามหาบ้านพักของซีโมนจั่งได้ยืนอยู่หน้าฝักตูฮั้ว 

กิจการ 10:18 แล้วจั่งฮ้องเอิ้นถามขึ้นเถิงว่าซีโมนที่เอิ้นว่าเปโตรได้พักอยู่ฮั้น

กิจการ 10:19 บัดเปโตรคึดทบทวนเรื่องนิมิตที่ลาวฝันฮั้น พระวิญญาณได้เว้ากับลาวว่า “นี่แน่ะ มีซายสามคนพวมตามหาเจ้าอยู่

กิจการ 10:20 “จั่งซั้น ให้ลุกขึ้นลงไปซั้นล่าง แล้วกะไปกับพวกเขาเด้อ อย่าลังเลคึดสงสัยอีหยังเลย ย้อนว่าเฮาได้ใซ้เขามา”

กิจการ 10:21 บัดนี้ เปโตรจั่งลงไปหาคนหมู่ฮั้นที่โครเนลิอัสใซ้มาแล้วเว้าว่า “เอ้อ นี่แน่ะ ข้อยหนิล่ะ เป็นคนที่พวกเจ้ามาหา พวกเจ้ามาเรื่องหยัง”

กิจการ 10:22 แล้วพวกเขาตอบว่า “นายร้อยโครเนลิอัส ซึ่งลาวเป็นคนยุติธรรมยำเกรงพระเจ้า กับมีซื่อเสียงดีในหมู่คนซาวยิว ลาวได้ฮับคำสั่งจากพระเจ้าโดยผ่านทางเทวทูตบริสุทธิ์ของเพิ่น ให้มาเซิญเจ้าไปบ้านลาว กะเพื่อสิได้ฮับฟังถ้อยคำของเจ้า”

กิจการ 10:23 บัดนี้ เปโตรจั่งเซิญพวกเขาเข้ามาพักแรมอยู่ฮั่น แล้วบัดฮอดมื้ออื่นเซ้า เปโตรได้ไปนำพวกเขา พร้อมทั้งมีหมู่พี่น้องผู้ลางคนอยู่เมืองยัฟฟาได้ไปนำ

กิจการ 10:24 แล้วบัดฮอดมื้อใหม่หลังจากพวกเขาได้ไปฮอดเมืองซีซารียา หว่างฮั้นนายร้อยโครเนลิอัส ซึ่งพวมคอยถ้าฮับอยู่ฮั่น กะได้เซิญญาติพี่น้องกับหมู่พวกสนิทของลาวให้มาฮ่วมกันนำ

กิจการ 10:25 พอแต่เปโตรเข้าไปฮั่น โครเนลิอัสกะต้อนฮับอย่างดี หมอบลงกราบไหว้ต่อหน้าลาว

กิจการ 10:26 ส่วนเปโตรเลยจับโตลาวโซมขึ้นแล้วเว้าว่า “ยืนขึ้นท้อน โตข้อยหนิกะเป็นแค่คนคือกัน”

กิจการ 10:27 แล้วบัดเปโตรพวมเว้ากับนายร้อย ลาวกะเข้าไปพ้อคนหลวงหลายมาโฮมกันอยู่ฮั่น

กิจการ 10:28 ลาวจั่งเว้ากับหมู่คนอยู่ฮั่นว่า “พวกเจ้ากะฮู้ดีอยู่แล้วว่า กฎบัญญัติห้ามไว้บ่ให้คนซาติยิวคือเฮา คบกันหรือเข้าเยี่ยมยามกันกับคนต่างซาติ แต่พระเจ้าได้สำแดงให้ข้อยเข้าใจซัดดีแล้วว่า ข้อยบ่ควรเอิ้นผู้ใดผู้หนึ่งว่า สามัญหรือมลทินที่ต้องห้ามเลย

กิจการ 10:29 จั่งซั้น บัดนายร้อยใซ้คนไปเอิ้น ข้อยมาโลดบ่ได้ต่อต้านเลย แล้วบัดนี้ข้อยขอถามว่า พวกเจ้าเอิ้นข้อยมาย้อนเรื่องหยัง”

กิจการ 10:30 นายร้อยโครเนลิอัสจั่งตอบว่า “สี่มื้อมาแล้วหนิ ข้อยพวมถือการอดอาหารอยู่จนฮอดยามนี้ แล้วประมาณเวลาบ่ายสามโมงข้อยกะอยู่ในบ้านของข้อยเอง พวมอธิษฐานวอนขออยู่ แล้ว นี่แน่ะ มีซายคนหนึ่งใส่เสื้อขาวออกแสงจ้า ยืนอยู่ตรงหน้าข้อย

กิจการ 10:31 แล้วได้เว้าว่า “โครเนลิอัส เอ้ย พระเจ้าได้ยินได้ฟังคำอธิษฐานของเจ้าแล้ว กับการบริจาคซ่อยคนที่เจ้าได้เฮ็ดฮั้น กะเป็นที่ระลึกอันที่ซอบในสายตาของพระเจ้า

กิจการ 10:32 ‘จั่งซั้น ให้ใซ้คนไปเมืองยัฟฟาเด้อ แล้วให้พวกเขาเซิญซีโมนที่เอิ้นว่าเปโตรมา ผู้ฮั้นพักอาศัยอยู่ในบ้านของซีโมน ซ่างฟอกหนัง ซึ่งงอยู่บ้านติดฝั่งทะเล พอบัดเปโตรผู้มาฮอดนี้แล้ว ลาวสิเว้ากล่าวให้เจ้าฟัง’

กิจการ 10:33 “แล้วในหว่างฮั้นพอดี ข้อยจั่งใซ้คนไปเซิญเจ้ามา แล้วที่เจ้ามากะเป็นการดี บัดนี้ พวกข้อยกะพร้อมกันอยู่นี้ต่อหน้าพระเจ้า เพื่ออยากฮับฟังเมิ้ดคู่แนวที่พระเจ้าได้บอกสอนเจ้าฮั่น”

กิจการ 10:34 ส่วนเปโตรได้เปิดปากเว้าว่า “ข้อยฮู้แจ้งเห็นจริงมาแล้ว ว่า พระเจ้าบ่ได้ลำเอียงเข้าข้างผู้ใดเลย

กิจการ 10:35 แต่ว่า ผู้ใดกะตาม บ่ว่าซาติใด ที่ยำเกรงพระเจ้า กับได้เฮ็ดแนวถืกแนวแม่น ซึ่งเป็นที่ซอบเป็นที่ยอมฮับของเพิ่น

กิจการ 10:36 แม่นพระคำที่พระเจ้าได้มอบให้กับซนซาติอิสราเอลฮั้น คือการประกาศสันติภาพโดยทางพระเยซูคริสต์ (ว่าเพิ่นเป็นพระผู้เป็นเจ้าของคนเมิ้ดทั้งปวงเลย)

กิจการ 10:37 พระคำตอนฮั้นซึ่งพวกเจ้ากะฮู้จักแล้ว ที่ได้ประกาศฮอดทั่วแคว้นยูเดีย จากแคว้นกาลิลีออกไป หลังจากโยฮันได้เริ่มประกาศการฮับจุ่มน้ำฮั่น

กิจการ 10:38 คือพระเจ้าได้แต่งตั้งเจิมพระเยซูซาวนาซาเร็ธฮั้นเองโดยพระวิญญาณกับโดยฤทธานุภาพ แม่นผู้ที่ออกไปเฮ็ดแต่แนวดีแนวงาม กับได้ปัวคนที่ถืกผีมารซาตานเบียดเบียนให้เซาเป็นดี ย้อนว่าพระเจ้าสถิตอยู่นำเพิ่น

กิจการ 10:39 แล้วพวกเฮาได้เป็นหลักฐานพยานเถิงกิจการทั้งเมิ้ดนี้ ที่เพิ่นได้เฮ็ด ทั้งในแผ่นดินของซนซาติยิวกับในเมืองเยรูซาเล็ม แล้วในที่สุดเพิ่นถืกเขาฆ่าโดยห้อยไว้เทิงหลักไม้

กิจการ 10:40 แต่ว่าพระเจ้าได้โปรดให้เพิ่นมีซีวิตเป็นขึ้นมาจากตายในมื้อที่สาม แล้วให้คนเห็นเพิ่นอย่างเปิดเผย

กิจการ 10:41 แต่บ่แม่นต่อคนทั่วไป แต่ต่อผู้เป็นพยานตามที่พระเจ้าได้เลือกสรรไว้แต่ก่อน คือต่อพวกเฮาผู้ที่เคยได้กินได้ดื่มกับเพิ่น หลังจากเพิ่นได้มีซีวิตเป็นขึ้นมาจากตายแล้ว 

กิจการ 10:42 แล้วเพิ่นได้สั่งพวกเฮาไว้ ให้ออกไปประกาศ เป็นพยานเถิงเรื่องเพิ่นต่อคนทั้งหลายว่า เพิ่นได้ฮับมอบการแต่งตั้งไว้จากพระเจ้าให้เป็นผู้ตัดสินพิพากษาทั้งคนเป็นคนตาย

กิจการ 10:43 แล้วผู้เป็นปากเป็นเสียงของพระเจ้าทั้งหลายได้เป็นพยานเถิงเพิ่นว่า โดยในพระนามของเพิ่นฮั้น สิได้ฮับการให้อภัยโทษความผิดบาปทั้งสิ้นของเขา”

กิจการ 10:44 บัดเปโตรยังเว้าความฮั้นอยู่ พระวิญญาณกะลงมาประทับอยู่กับเมิ้ดคู่คนที่ฟังพระคำฮั้น 

กิจการ 10:45 แล้วฝ่ายผู้ที่ถือสุหนัต(ซาวยิว)ที่ได้ฮับเซื่อ ซึ่งได้มานำเปโตรฮั้น กะแปลกใจเป็นตางึด ย้อนว่าพวกคนต่างชาติฮั้นได้ฮับการทุ่มเทพระวิญญาณให้เป็นของขวัญคือกัน

กิจการ 10:46 คือพวกยิวอยู่ฮั่นได้ยินคนต่างซาติหมู่ฮั้น เว้าเป็นภาษาต่างๆ ยกย่องสรรเสริญพระเจ้าอยู่ฮั้น แล้วเปโตรจั่งถามคืนว่า

กิจการ 10:47 “มีใผแหน่สิห้ามคนหมู่นี้ บ่ให้เขาฮับการจุ่มน้ำได้ ซึ่งเขาได้ฮับพระวิญญาณคือจั่งพวกเฮาแล้ว” 

กิจการ 10:48 แล้วเปโตรจั่งสั่งให้พวกเขาฮับการจุ่มน้ำในพระนามของพระผู้เป็นเจ้า แล้วพวกเขาได้ขอเปโตร ให้พักอยู่นำเขาอีกจักสองสามมื้อ
////////// ////////// //////////