ยอห์น – John บทที่ 20

ยอห์น 20:1 อยู่ต่อมา ในมื้อแรกของสัปดาห์ (คือวันอาทิตย์) นางมารีย์ซาวมักดาลาได้ออกไปหาถ้ำเมี้ยนศพฮั่น เป็นเวลาตอนเซ้ามืด แล้วนางเห็นว่าแผ่นหินที่ปิดปากถ้ำฮั่น ได้ถืกยกออกไปไว้ข้างถ้ำแล้ว

ยอห์น 20:2 พอเห็นแล้วนางกะฟ้าวแล่นไปหาซีโมนเปโตรกับลูกศิษย์ผู้อื่นฮั้นที่พระเยซูฮักแพง แล้วเว้าให้ฟังว่า “เขาได้เอาศพของพระเยซูออกจากถ้ำไปแล้ว แล้วพวกข้อยบ่ฮู้จักว่าเขาเอาศพเพิ่นไปวางไว้ใส”

ยอห์น 20:3 บัดนี้ เปโตรกับลูกศิษย์ผู้อื่นฮั้น กะฟ้าวแล่นออกไปหาถ้ำ

ยอห์น 20:4 พวกเขาเลยพากันแล่นอยู่ฮั่น แต่ลูกศิษย์ผู้อื่นฮั้นได้แล่นไวกว่าเปโตรจั่งไปฮอดถ้ำก่อน

ยอห์น 20:5 แล้วเขาได้ก้มลงส่องเบิ่งเข้าไป เห็นแต่ผ้าป่านฮั้นได้วางอยู่ แต่ว่าเขาบ่ได้เข้าไป

ยอห์น 20:6 บัดนี้ เปโตรผู้แล่นมานำหลัง กะได้เข้าไปในถ้ำ จั่งเห็นผ้าป่านวางอยู่ฮั้น

ยอห์น 20:7 กับได้เห็นผ้าผืนฮั้นที่เคยปกหัวของศพพระเยซู ซึ่งบ่ได้วางอยู่กับผ้าป่านฮั้น แต่ได้ถืกพับไว้อยู่ข้างๆ ต่างหาก

ยอห์น 20:8 แล้วลูกศิษย์ผู้อื่นฮั้น ผู้ที่มาเถิงก่อน กะได้เข้าไปในถ้ำคือกัน พอเขาเห็นแล้วกะเลยเซื่อ

ยอห์น 20:9 คือตอนฮั้นพวกเขายังบ่ทันเข้าใจในพระคำที่ว่า เพิ่นต้องเป็นขึ้นมาจากตาย

ยอห์น 20:10 แล้วลูกศิษย์สองคนฮั่น กะพากันกลับคืนเมือเฮือนของใผของมัน

ยอห์น 20:11 แต่ส่วนมารีย์ฮั่น ยืนฮ้องไห้อยู่นอกถ้ำ แล้วพวมฮ้องไห้อยู่ฮั่น กะได้ก้มส่องเบิ่งเข้าไปในถ้ำ

ยอห์น 20:12 แล้วเขาได้เห็นเทวทูตสององค์ใส่เสื้อขาวประกอบด้วยแสง นั่งอยู่หม่องที่ศพพระเยซูเคยวางอยู่ฮั่น องค์หนึ่งนั่งอยู่ทางหัว แล้วอีกองค์หนึ่งนั่งอยู่ทางปลายเท้า

ยอห์น 20:13 บัดนี้ หมู่เทวทูตฮั่นได้ถามมารีย์ว่า “นางเอ้ย เจ้าฮ้องไห้ย้อนอีหยัง” นางตอบหมู่เทวทูตฮั่นว่า “ย้อนว่า เขาได้เอาศพของนายผู้ข้าไปแล้ว แล้วผู้ข้าบ่ฮู้จักว่าเขาเอาศพเพิ่นไปไว้ใส”

ยอห์น 20:14 บัดพอเว้าจั่งซั้นแล้ว นางกะเหลียวหลังไป เลยเห็นพระเยซูยืนอยู่ฮั่น แต่ว่านางบ่ฮู้จักว่าเป็นโตพระเยซู

ยอห์น 20:15 พระเยซูกะถามนางว่า “นางเอ้ย เจ้าฮ้องไห้ย้อนอีหยัง นางมาหาใผ” คือนางเข้าใจผิดว่าพระเยซูเพิ่นเป็นนายสวน กะเลยเว้าว่า “นายเอ้ย คั่นนายได้นำเอาศพของพระเยซูไปใส ซ่อยบอกข้อยแหน่ ว่านายเอาไปเมี้ยนไว้อยู่ใส แล้วข้อยจั่งสิไปเอาศพของเพิ่น”

ยอห์น 20:16 ส่วนพระเยซูเอ่ยซื่อนางว่า “มารีย์เอ้ย” นางได้หันไปกับเว้าขึ้นเป็นภาษาฮีบรูว่า “รับโบนีเอ้ย” (แปลว่าอาจารย์)

ยอห์น 20:17 พระเยซูสั่งว่า “อย่าฟ้าวมาจับมาต้องเฮาเด้อ ย้อนว่า เฮายังบ่ทันได้ขึ้นไปหาพระเจ้าผู้เป็นพ่อของเฮา แต่ว่า ให้กลับไปบอกพี่น้องเฮาแหน่ว่า ‘เฮาพวมสิขึ้นไปหาพ่อเฮากับพ่อของพวกเจ้า ซึ่งเป็นพระเจ้าของเฮากับเป็นพระเจ้าของพวกเจ้านำ'”

ยอห์น 20:18 จั่งซั้น มารีย์ซาวมักดาลาฮั่นกะได้กลับมาบอกให้พวกลูกศิษย์ฟัง เถิงเรื่องที่นางได้ไปเห็นโตพระเยซู กับเถิงแนวที่พระเยซูได้เว้ากับเขา

ยอห์น 20:19 พอฮอดค่ำของมื้อฮั่น คือมื้อแรกของสัปดาห์ พวกลูกศิษย์กะมาซุมกันในห้อง พอปิดประตูเอาไลคัดไว้ ย้อนหย้านพวกหัวหน้าของพวกยิว พระเยซูได้เข้ามายืนอยู่หว่างกลางพวกเขา แล้วเว้ากับพวกเขาว่า “ขอให้ความสงบสุขมีอยู่กับพวกเจ้าเด้อ”

ยอห์น 20:20 พอพระเยซูเว้าแล้ว เพิ่นเลยให้พวกเขาเบิ่งมือกับส้วงของเพิ่น แล้วพวกลูกศิษย์ได้ดีอกดีใจขนาดที่ได้เห็นพระเยซู นายซีวิตของพวกเขา

ยอห์น 20:21 พระเยซูเลยเว้ากับเขาอีกว่า “ขอให้ความสงบสุขมีอยู่กับพวกเจ้าเด้อ พระเจ้าผู้เป็นพ่อได้ใซ้เฮามาแนวใด เฮากะสิใซ้พวกเจ้าออกไปแนวฮั้น”

ยอห์น 20:22 พอพระเยซูเว้าจั่งซั้นแล้ว เพิ่นได้ระบายลมปราณออกเป่าใส่พวกเขา แล้วได้เว้ากับพวกเขาอีกว่า “ให้ฮับเอาพระวิญญาณบริสุทธิ์ซะเด้อ”

ยอห์น 20:23 คั่นพวกเจ้าให้อภัยบาปให้คนใด บาปของคนฮั้นกะสิได้ฮับการอภัย แต่คั่นบ่ให้อภัย บาปของเขากะยังอยู่

ยอห์น 20:24 บัดนี้ มีลูกศิษย์คนหนึ่งในกลุ่มสิบสองคนฮั้นซื่อว่าโธมัส (ที่คนเอิ้นกันว่า แฝด) ส่วนโธมัสหนิ ลาวกะบ่ได้อยู่กับหมู่ลูกศิษย์ตอนที่พระเยซูมาหาพวกเขา

ยอห์น 20:25 ส่วนพวกลูกศิษย์คนอื่นๆ กะได้เว้าให้เขาฟังว่า “เฮาได้เห็นพระเยซูแล้ว” แต่โธมัสปฏิเสธว่า “คั่นข้อยบ่เห็นฮอยตะปูในมือของเพิ่น กับบ่ได้เอานิ้วข้อยแย่เข้าในฮอยตะปูฮั้น กับบ่ได้เอามือข้อยจกเข้าในส้วงของเพิ่นแล้ว ข้อยกะบ่ยอมเซื่อ”

ยอห์น 20:26 อยู่มาอีกแปดมื้อ พวกลูกศิษย์กะมาซุมกันอยู่ในห้องฮั้นอีก บัดนี้โธมัสกะอยู่ฮั่นนำ พระเยซูได้มายืนอยู่หว่างกลางพวกเขาทั้งๆ ที่ประตูยังใส่ไลไว้อยู่ พระเยซูกะเว้ากับพวกเขาว่า “ขอให้ความสงบสุขมีอยู่กับพวกเจ้าเด้อ”

ยอห์น 20:27 หว่างฮั้น พระเยซูเว้ากับโธมัสว่า “นี่แน่ะ ให้เอานิ้วเจ้ามาแย่เบิ่งมือเฮาดู้ กับยื่นมือเจ้ามาจกเข้าในส้วงเฮา อย่าสงสัยเลย แต่ให้เซื่อเด้อ”

ยอห์น 20:28 บัดนี้ โธมัสตอบพระเยซูว่า “โอ้ ผู้เป็นนายซีวิต กับเป็นพระเจ้าของผู้ข้าเอ้ย”

ยอห์น 20:29 แล้วพระเยซูบอกเขาว่า “โธมัสเอ้ย เจ้าได้เกิดความเซื่อกะย้อนว่าเจ้าได้เห็นกับตา ส่วนผู้ที่บ่ได้เห็นเฮาคือจั่งเจ้า แต่ยังฮับเซื่อ เขาสิได้พรเป็นสุข

ยอห์น 20:30 แท้จริงแล้ว พระเยซูได้เฮ็ดเครื่องหมายอันสำคัญหลายอันหลายแนวต่อหน้าต่อตาพวกลูกศิษย์ ซึ่งบ่ได้บันทึกลงในหนังสือเล่มนี้

ยอห์น 20:31 แต่แนวที่บันทึกลงมาหนิ กะเพื่อพวกเจ้าสิได้ฮับเซื่อในพระเยซูว่า เป็นพระคริสต์พระผู้โปรดโลก ซึ่งเป็นพระบุตรของพระเจ้า แล้วบัดพอเซื่อ เจ้ากะสิได้ฮับซีวิตนิรันดร์ในพระนามของเพิ่น
////////// ////////// //////////