ยอห์น – John บทที่ 16

ยอห์น 16:1 เฮาได้บอกแนวหมู่นี้ให้พวกเจ้าแล้ว เพื่อบ่ให้พวกเจ้าสะดุดใจ

ยอห์น 16:2 เขาสิไล่พวกเจ้าออกจากศาลาธรรม เอ้อ แล้วสิมียามหนึ่งมาฮอด คนผู้ที่ฆ่าพวกเจ้า เขาสิคึดว่าเป็นการปรนนิบัติพระเจ้า

ยอห์น 16:3 แล้วพวกเขากะสิเฮ็ดจั่งซั้น ย้อนว่าเขาบ่เคยฮู้จักพระเจ้าผู้เป็นพ่อเลย กับบ่ฮู้จักเฮานำ

ยอห์น 16:4 บัดนี้ เฮาบอกพวกเจ้าไว้ก่อน เพื่อบัดฮอดยามฮั้นเจ้าสิได้จื่อแนวที่เฮาเคยบอกเถิงพวกเขาแล้ว เหตุที่เฮาบ่ได้บอกพวกเจ้ามาก่อน กะย้อนว่าหว่างฮั้นเฮายังอยู่กับพวกเจ้า

ยอห์น 16:5 แต่บัดนี้ เฮาสิไปหาพระเจ้าผู้เพิ่นที่ใซ้เฮามาฮั่น กะยังบ่มีใผได้ถามเฮาว่า ‘นายสิไปใส’

ยอห์น 16:6 แต่ย้อนว่าเฮาได้เว้าแนวนี้ พวกเจ้ากะยังเสียใจหลาย

ยอห์น 16:7 จั่งใดกะตาม เฮาสิบอกพวกเจ้าตามซื่อนี้ล่ะ คือที่เฮาสิไปจากพวกเจ้ากะเป็นประโยชน์ให้พวกเจ้า คือคั่นเฮาบ่ไป เพิ่นผู้ซ่อยปลอบโยนฮั้น สิบ่ได้มาหาเจ้าดอก แต่คั่นเฮาไปแล้ว เฮากะสิใซ้ผู้ซ่อยปลอบโยนฮั้นมาหาเจ้า

ยอห์น 16:8 บัดเพิ่นลงมาแล้ว เพิ่นสิมาเฮ็ดให้ซาวโลกสำนึกโตในเรื่องความผิดบาป ในเรื่องความชอบธรรม กับในเรื่องการตัดสินลงโทษ

ยอห์น 16:9 ในเรื่องความผิดบาปย้อนว่าเขาบ่ยอมเซื่อวางใจในเฮา

ยอห์น 16:10 ในเรื่องความชอบธรรมย้อนว่าเฮาสิไปหาพระเจ้าผู้เป็นพ่อของเฮา แล้วพวกเจ้าสิบ่เห็นเฮาอีกต่อไป

ยอห์น 16:11 แล้วในเรื่องการตัดสินลงโทษย้อนว่าเทพเจ้าผู้ครอบครองเหนือโลกนี้ ได้ถืกการตัดสินลงโทษแล้ว

ยอห์น 16:12 เฮายังมีอีกหลายอันหลายแนวที่สิบอกกับพวกเจ้า แต่พวกเจ้ากะยังฮับบ่ได้

ยอห์น 16:13 จั่งใดกะตาม บัดพอพระวิญญาณแห่งความจริงลงมาแล้ว เพิ่นกะสินำพวกเจ้าไปสู่ความเป็นจริงทั้งเมิ้ด คือเพิ่นสิบ่ได้เว้าตามแนวของเพิ่นเอง แต่สิเว้าเถิงคู่แนวที่เพิ่นได้ยินมา กับเพิ่นสิบอกให้พวกเจ้าฮู้จักเถิงแนวที่สิเป็นไปในภายหน้า

ยอห์น 16:14 แล้วเพิ่นกะสิถวายเกียรติให้เฮา โดยว่าเพิ่นสินำเอาแนวต่างๆ ของเฮาฮั่นมาเปิด เผยให้พวกเจ้า

ยอห์น 16:15 คู่อย่างที่เป็นของพระเจ้าผู้เป็นพ่อกะเป็นของเฮานำ จั่งซั้นเฮาได้บอกกับพวกเจ้าว่า พระวิญญาณสินำเอาแนวของเฮาฮั่น มาเปิดเผยให้พวกเจ้า

ยอห์น 16:16 อีกจักหน่อย พวกเจ้าสิบ่ได้เห็นเฮา แล้วหลังจากฮั่นจักหน่อยสิได้เห็นเฮาอีก ย้อนว่าเฮาไปหาพระเจ้าผู้เป็นพ่อ

ยอห์น 16:17 บัดนี้ ลูกศิษย์ผู้ลางคนถามกันว่า “หมายความว่าจั่งใดที่นายผู้ข้าเว้ากับพวกเฮาว่า ‘จักหน่อยพวกเจ้าสิบ่ได้เห็นเฮา แล้วหลังจากฮั้นอีกจักหน่อยสิได้เห็นเฮาอีก’ แล้วยังเว้าว่า ‘เฮาสิไปหาพระเจ้าผู้เป็นพ่อ'”

ยอห์น 16:18 แล้วพวกเขาถามกันอีกว่า “คำที่เพิ่นเว้าว่า ‘หลังจากฮั่นจักหน่อย’ มันหมายความว่าแนวใด พวกเฮาบ่เข้าใจในความเว้าของเพิ่นเลย”

ยอห์น 16:19 บัดนี้ พระเยซูฮู้เถิงแนวที่เขาถามเพิ่น เพิ่นเลยเว้าว่า “พวกเจ้าถามกันเถิงความหมายในเรื่องที่เฮาเว้าว่า ‘อีกจักหน่อยพวกเจ้าสิบ่ได้เห็นเฮา แล้วอีกจักหน่อยกะสิได้เห็นเฮาอีก’

ยอห์น 16:20 “เฮาสิบอกพวกเจ้าตามซื่อนี้ล่ะ ว่าพวกเจ้าสิฮ้องไห้เป็นทุกข์ แต่คนทั้งโลกสิซื่นซมยินดี แล้วการที่พวกเจ้าสิเป็นทุกข์ ความทุกข์ฮั่น สิกลายเป็นความซื่นซมยินดี

ยอห์น 16:21 “คือปานแม่ญิงยามสิเจ็บท้องออกลูก กะสิมีความทุกข์หลาย แต่บัดเขาออกลูกแล้วเขาบ่คึดเถิงความเจ็บปวดฮั่นอีก ย้อนว่าดีใจหลายที่มีลูกน้อยเกิดมาในโลก

ยอห์น 16:22 “จั่งซั้น ในตอนนี้พวกเจ้าทุกข์ใจหลาย แต่ว่าเฮาสิเห็นพวกเจ้าอีก แล้วในยามฮั้นใจของพวกเจ้าสิมีความปิติยินดี แล้วความปิติยินดีฮั้น บ่มีใผสิเอาจากเจ้าไปได้เลย

ยอห์น 16:23 “แล้วในมื้อฮั้น พวกเจ้าสิบ่ขออีหยังนำเฮาอีก คือเฮาสิบอกพวกเจ้าตามซื่อนี้ล่ะ ว่าอีหยังที่พวกเจ้าขอ กะให้ขอนำพระเจ้าผู้เป็นพ่อโดยในนามของเฮา แล้วเพิ่นกะสิโปรดให้แนวฮั้นกับพวกเจ้า

ยอห์น 16:24 “เถิงบัดนี้ พวกเจ้ากะยังบ่ได้ขออีหยังในนามของเฮาเลย ให้ขอเด้อ แล้วสิได้ เพื่อความซื่นซมยินดีของพวกเจ้าสิได้เต็มเปี่ยม

ยอห์น 16:25 “แนวหมู่นี้เฮาได้เว้ากับพวกเจ้าเป็นการเปรียบเทียบ แต่ว่ามียามที่สิมาที่เฮาสิบ่เว้านำเจ้าเป็นการเปรียบเทียบอีก แต่เฮาสิเว้าเรื่องพระเจ้าผู้เป็นพ่อให้เจ้าอย่างเปิดเผย

ยอห์น 16:26 “บัดฮอดมื้อฮั้นแล้ว พวกเจ้าสิขออีหยังในนามของเฮา แล้วเฮาสิบ่ได้บอกพวกเจ้าว่า เฮาสิขอจากพระเจ้าผู้เป็นพ่อเพื่อพวกเจ้า

ยอห์น 16:27 “ย้อนว่าพระเจ้าผู้เป็นพ่อฮักแพงพวกเจ้า ย้อนพวกเจ้าฮักแพงเฮา แล้วเซื่อว่าเฮาได้มาจากเพิ่น

ยอห์น 16:28 “คือเฮาได้มาจากพระเจ้าผู้เป็นพ่อ แล้วได้เข้ามาในโลก แล้วบัดนี้เฮาสิออกจากโลกนี้กลับไปหาพระเจ้าผู้เป็นพ่ออีก”

ยอห์น 16:29 พวกลูกศิษย์เลยเว้านำพระเยซูว่า “เอ้อ นายผู้ข้าพวมเว้าซัดเจนแล้วบัดหนิ บ่ได้เว้าเป็นความเปรียบเทียบเลย

ยอห์น 16:30 “บัดนี้ พวกผู้ข้ามั่นใจแล้ว ว่านายผู้ข้ากะฮู้จักคู่อันคู่แนว แล้วบ่ต้องถามอีหยังอีก โดยว่าพวกผู้ข้าเซื่อมั่นแล้ว ว่า นายผู้ข้าได้มาจากพระเจ้า”

ยอห์น 16:31 พระเยซูเลยถามเขาว่า “บัดนี้พวกเจ้าเซื่ออีหลีบ้อ

ยอห์น 16:32 นี่แน่ะ ยามฮั้นสิมาเถิง แล้วได้มาฮอดแล้วบัดหนิ ที่ว่าพวกเจ้าสิแตกกระจัดกระจายกันไปของใผของมัน ปะเฮาไว้อยู่ผู้เดียว แต่ที่จริงเฮาสิบ่ได้อยู่ผู้เดียว ย้อนว่าพระเจ้าผู้เป็นพ่อ เพิ่นกะยังสถิตอยู่นำเฮา

ยอห์น 16:33 “แนวหมู่นี้ เฮาได้บอกพวกเจ้าไว้ เพื่อพวกเจ้าสิมีความสงบสุข คือในโลกนี้พวกเจ้าสิได้ฮับความยากลำบาก แต่ว่าให้มีความยินดีไว้เด้อ ย้อนว่าเฮาซนะโลกได้แล้ว
////////// ////////// //////////