ยอห์น – John บทที่ 15

ยอห์น 15:1 เฮาคือเครือองุ่นอันแท้จริง แล้วพระเจ้าผู้เป็นพ่อของเฮากะเป็นนายสวน

ยอห์น 15:2 ส่วนง่าใดๆ อยู่ในเฮาที่บ่เกิดผล เพิ่นกะเอาขึ้น แล้วส่วนง่าใดๆ ที่เกิดผล เพิ่นกะซำระให้สะอาดงามเพื่อให้เกิดผลหลายขึ้น

ยอห์น 15:3 ส่วนพวกเจ้าฮั่น ได้ฮับการซำระให้สะอาดโดยถ้อยคำที่เฮาได้เว้านำพวกเจ้าอยู่แล้ว

ยอห์น 15:4 ให้คงอยู่ในเฮา แล้วเฮาคงอยู่ในเจ้า คือง่าบ่สามารถเกิดผลได้นอกจากคงอยู่ในเครือของมัน พวกเจ้าเกิดผลบ่ได้คือกัน นอกจากคงอยู่ในเฮา

ยอห์น 15:5 เฮาเป็นเครือองุ่นฮั้น แล้วพวกเจ้ากะเป็นง่า ผู้ที่คงอยู่ในเฮา แล้วเฮาคงอยู่ในเขา ผู้ฮั้นเกิดผลอย่างหลาย โดยว่านอกจากคงอยู่ในเฮาแล้ว เจ้าเฮ็ดหยังบ่ได้เลย

ยอห์น 15:6 ส่วนผู้ที่บ่ได้คงอยู่ในเฮาเลย ผู้ฮั้นกะเหี่ยวแห้งลงปานง่าตาย ง่าแนวฮั้นมีแต่สิถืกโยนออกไป เก็บเอาไปเผา (ให้ดู 1 โครินธ์ 3:11-15)

ยอห์น 15:7 แต่คั่นเจ้าคงอยู่ในเฮา แล้วถ้อยคำของเฮาคงอยู่ในเจ้า เจ้าสิขอแนวใดกะได้ตามที่ปรารถนา แล้วเฮาสิเฮ็ดแนวฮั้นให้เจ้า

ยอห์น 15:8 โดยนี้ล่ะ พระเจ้าผู้เป็นพ่อของเฮา สิได้ฮับพระเกียรติ ที่ว่าพวกเจ้าเกิดผลหลาย พวกเจ้าจั่งสิเป็นลูกศิษย์ของเฮา

ยอห์น 15:9 แล้วพระเจ้าผู้เป็นพ่อฮักแพงเฮาส่ำใด เฮากะฮักแพงพวกเจ้าส่ำฮั้น จั่งซั้นให้คงอยู่ในความฮักของเฮาเด้อ

ยอห์น 15:10 คือคั่นพวกเจ้าฮักษาหลักคำสั่งของเฮาไว้ พวกเจ้าสิได้คงอยู่ในความฮักของเฮา คือจั่งที่เฮาได้ฮักษาหลักคำสั่งของพระเจ้าผู้เป็นพ่อไว้ แล้วคงอยู่ในความฮักของเพิ่น

ยอห์น 15:11 เฮาได้เว้าจั่งซี้ให้พวกเจ้า กะเพื่อว่า ความซื่นซมยินดีของเฮาสิได้คงอยู่ในพวกเจ้า แล้วเพื่อว่า ความซื่นซมยินดีของพวกเจ้าฮั้นสิได้เต็มเปี่ยม

ยอห์น 15:12 แล้วหลักคำสั่งของเฮากะคือ ให้ฮักแพงกันและกัน คือจั่งที่เฮาฮักแพงพวกเจ้า

ยอห์น 15:13 บ่เคยมีใผมีความฮักหลายกว่านี้ ที่ว่าได้วางซีวิตลงเพื่อหมู่

ยอห์น 15:14 แล้วพวกเจ้าเป็นหมู่ของเฮา คั่นเจ้าได้เฮ็ดตามแนวที่เฮาสั่งไว้ฮั่น

ยอห์น 15:15 คือเฮาบ่ได้เอิ้นพวกเจ้าว่าทาสใซ้อีกต่อไป ย้อนว่าทาสใซ้บ่ฮู้จักในการงานของนายโตเองเฮ็ด แต่เฮาเอิ้นเจ้าว่าเป็นหมู่ของเฮา โดยว่าเมิ้ดคู่อันคู่แนวที่เฮาได้ยินจากพระเจ้าผู้เป็นพ่อของเฮา เฮากะให้พวกเจ้าฮู้จักนำเมิ้ด

ยอห์น 15:16 พวกเจ้าบ่ได้เลือกเฮาดอก แต่ว่าเฮาได้เลือกพวกเจ้า แต่งตั้งพวกเจ้าไว้ เพื่อให้พวกเจ้าออกไปเกิดผล แล้วผลของพวกเจ้าฮั้นคงอยู่อย่างถาวร แล้วพวกเจ้าสิขออีหยังจากพระเจ้าผู้เป็นพ่อโดยในนามของเฮา เพิ่นกะสิโปรดแนวฮั้นให้เจ้า

ยอห์น 15:17 แล้วเฮาสั่งแนวหมู่นี้ไว้ให้พวกเจ้า กะเพื่อให้ฮักแพงกันและกัน

ยอห์น 15:18 คั่นโลกซังพวกเจ้ากะให้ฮู้ไว้ว่า โลกเคยซังเฮามาก่อนที่มันซังเจ้า

ยอห์น 15:19 คั่นพวกเจ้าอยู่ฝ่ายโลก โลกนี้กะสิฮักแพงพวกเจ้า แต่บัดนี้พวกเจ้าบ่ได้อยู่ฝ่ายโลก คือเฮาได้เลือกเจ้าออกจากโลกแล้ว จั่งซั้นโลกจั่งเกลียดซังพวกเจ้า

ยอห์น 15:20 ให้จื่อไว้เด้อคำที่เฮาเคยบอกแล้วว่า บ่มีทาสใซ้คนใดใหญ่กว่านายเจ้าของ คือคั่นพวกเขาเคยข่มเหงเฮา เขากะสิข่มเหงพวกเจ้าคือกัน แล้วคั่นเขาเคยฮักษาคำของเฮา เขากะสิฮักษาคำของเจ้าคือกัน

ยอห์น 15:21 แต่ว่า พวกเขากะสิเฮ็ดแนวหมู่นี้ใส่พวกเจ้าย้อนนามของเฮา โดยว่าพวกเขาบ่ฮู้จักผู้ฮั้นที่ได้ใซ้เฮามา

ยอห์น 15:22 แล้วคั่นเฮาบ่ได้มาหา มาบอกพวกเขา พวกเขาสิบ่เป็นบาปดอก แต่เดี๋ยวนี้พวกเขาบ่มีข้อแก้โตเลย ในเรื่องความผิดบาปของโตเขาเอง

ยอห์น 15:23 คือผู้ที่ซังเฮากะซังพระเจ้าผู้เป็นพ่อของเฮานำ

ยอห์น 15:24 คั่นเฮาบ่ได้มาเฮ็ดการงานแนวที่บ่เคยมีใผเคยเฮ็ดต่อหน้าพวกเขามาก่อน พวกเขาสิบ่เป็นบาปดอก แต่เดี๋ยวนี้เขาได้ฮู้เห็นกับได้ซังเฮา พร้อมทั้งพระเจ้าผู้เป็นพ่อของเฮานำ

ยอห์น 15:25 แต่ว่านี้ได้เป็นไปแล้ว คือจั่งมีคำเขียนไว้ในกฎบัญญัติของพวกเขาสิได้สำเร็จ ว่า “เขาได้ซังเฮาโดยบ่มีเหตุผลอีหยังเลย”

ยอห์น 15:26 แต่บัดผู้ซ่อยปลอบโยนมาแล้วฮั่น แม่นองค์พระวิญญาณแห่งความจริง ผู้ที่เฮาสิใซ้มาจากพระเจ้าผู้เป็นพ่อ ผู้ฮั้นล่ะสิเป็นพยานเถิงเฮา

ยอห์น 15:27 แล้วพวกเจ้ากะสิเป็นพยานเถิงเฮาคือกัน ย้อนว่าพวกเจ้าเคยอยู่นำเฮาแต่ตำอิดมาแล้ว
////////// ////////// //////////