ยอห์น – John บทที่ 14
ยอห์น 14:1 พระเยซูเลยบอกว่า “อย่าสู่อุกอั่งหนักใจหลายเด้อ เจ้าเซื่อนำพระเจ้าแล้ว กะให้เซื่อวางใจในเฮานำ
ยอห์น 14:2 “คือในพระนิเวศของพระเจ้าผู้เป็นพ่อเฮา มีวังให้อยู่หลายวัง คั่นบ่แม่น เฮาคือสิได้บอกเจ้าแล้ว แล้วบัดนี้เฮาสิไปจัดเตรียมหม่องพักอาศัยไว้ให้เจ้า
ยอห์น 14:3 “แล้วคั่นเฮาสิไปจัดเตรียมหม่องพักอาศัยไว้ให้เจ้า เฮากะสิกลับมาฮับเอาเจ้าให้ไปอยู่นำเฮา เพื่อว่าเฮาอยู่ใสเจ้ากะสิอยู่ฮั่นนำ
ยอห์น 14:4 “แล้วหม่องที่เฮาสิไปอยู่ฮั่น พวกเจ้ากะฮู้อยู่แล้ว แล้วฮู้จักทางฮั่นนำ”
ยอห์น 14:5 บัดนี้ โธมัสถามพระเยซูว่า “นายผู้ข้าเอ้ย พวกผู้ข้าบ่ฮู้จักว่านายสิไปอยู่ใส สิฮู้จักทางได้แนวใด”
ยอห์น 14:6 พระเยซูเลยบอกเขาว่า “เฮาหนิล่ะคือทางฮั้น เป็นหลักความจริง กับเป็นแหล่งซีวิต บ่มีใผไปหาไปฮอดพระเจ้าผู้เป็นพ่อได้เลย นอกจากมาทางเฮา
ยอห์น 14:7 “คั่นเจ้าได้ฮู้จักเฮาอีหลี เจ้าสิต้องฮู้จักพระเจ้าผู้เป็นพ่อของเฮานำ แล้วแต่นี้ไป เจ้าฮู้จักเพิ่น กับเห็นเพิ่นอยู่แล้ว”
ยอห์น 14:8 บัดนี้ฟีลิปบอกพระเยซูว่า “นายผู้ข้าเอ้ย ขอให้พวกผู้ข้าเห็นพระเจ้าผู้เป็นพ่อแหน่ พวกผู้ข้ากะสิเพียงพอแล้ว”
ยอห์น 14:9 พระเยซูเลยเว้าว่า “เฮาอยู่กับเจ้ามาแต่โดนแล้ว แล้วเจ้ายังบ่ฮู้จักเฮาอยู่บ้อ ฟีลิปเอ้ย คือผู้ที่เห็นเฮากะได้เห็นพระเจ้าอยู่แล้ว แล้วเป็นหยังเจ้าจั่งเว้าว่า ‘ขอให้เห็นพระเจ้าผู้เป็นพ่อ’ จั่งซั่น
ยอห์น 14:10 “เจ้าบ่เซื่อบ้อ ว่าเฮาเป็นอันหนึ่งอันเดียวกันกับพระเจ้าผู้เป็นพ่อฮั่น คือถ้อยคำที่เฮาเว้าหนิ บ่แม่นเฮาเว้าเอาเอง แต่ว่าพระเจ้าผู้เป็นพ่อ ผู้เพิ่นที่สถิตอยู่ในเฮา ได้เฮ็ดการงานของเพิ่น
ยอห์น 14:11 “เซื่อเฮาได้โลด ว่าเฮาเป็นอันหนึ่งอันเดียวกันกับพระเจ้าผู้เป็นพ่อ แล้วว่าเพิ่นเป็นอันหนึ่งอันเดียวกันกับเฮา หรือบ่ซั้น ให้เซื่อในเฮาย้อนเห็นแก่การงานแนวที่เฮาได้เฮ็ดหนิ
ยอห์น 14:12 “คือเฮาสิบอกพวกเจ้าตามซื่อนี้ล่ะ ว่าผู้ใดที่เซื่อในเฮา การงานที่เฮาเฮ็ดหนิ ผู้ฮั้นสิได้เฮ็ดการงานที่ใหญ่โตยิ่งกว่านี้อีก ย้อนว่าเฮาสิกลับไปอยู่กับพระเจ้าผู้เป็นพ่อของเฮา
ยอห์น 14:13 “จั่งซั้น พวกเจ้าสิขออีหยังนำเพิ่น ให้ขอโดยในนามของเฮา แล้วเฮาสิเฮ็ดแนวฮั้นให้ เพื่อพระเจ้าผู้เป็นพ่อสิได้รับพระเกียรติโดยทางเฮาผู้เป็นพระบุตรหนิ
ยอห์น 14:14 “คือ คั่นพวกเจ้าสิขอแนวใดกะตาม กะให้ขอโดยในนามของเฮา เฮาสิเฮ็ดแนวฮั้นให้”
ยอห์น 14:15 “คั่นพวกเจ้าฮักแพงเฮาอีหลี กะให้ฮักษาหลักคำสั่งของเฮาไว้นำ
ยอห์น 14:16 “แล้วเฮาสิขอจากพระเจ้าผู้เป็นพ่อ แล้วเพิ่นสิใซ้อีกผู้หนึ่งมาอยู่นำเจ้า เป็นผู้ซ่อยปลอบโยนใจพวกเจ้า แล้วเพิ่นผู้ฮั้นกะสิสถิตอยู่นำตลอดไปเป็นนิจ
ยอห์น 14:17 “คือองค์พระวิญญาณแห่งความจริงฮั่นล่ะ ซึ่งเพิ่นเป็นผู้ที่ซาวโลกบ่สามารถที่สิฮับเอาได้ ย้อนว่าพวกเขาบ่ฮู้บ่เห็นเพิ่น แต่ว่าพวกเจ้าได้ฮู้จักเพิ่นแล้ว ย้อนว่าเพิ่นได้อยู่นำพวกเจ้า แล้วอีกจักหน่อยเพิ่นกะสิสถิตอยู่ในพวกเจ้า
ยอห์น 14:18 “เฮาสิบ่ปะบ่ถิ่มพวกเจ้าไว้คือจั่งลูกกำพร้าดอก แต่ว่าเฮาสิกลับมาหาเจ้าอีก
ยอห์น 14:19 อีกจักหน่อย ซาวโลกสิบ่เห็นเฮาอีก แต่พวกเจ้าเห็นเฮาอยู่ แล้วย้อนเหตุว่าเฮาดำรงอยู่ พวกเจ้ากะสิดำรงอยู่คือกัน
ยอห์น 14:20 แล้วในมื้อฮั้น พวกเจ้าสิฮู้ว่าเฮาเป็นอันหนึ่งอันเดียวกันในพระเจ้าผู้เป็นพ่อของเฮา แล้วพวกเจ้ากะอยู่ในเฮา กับเฮากะอยู่ในเจ้า
ยอห์น 14:21 แล้วผู้ใดที่มีหลักคำสั่งของเฮา กับได้ฮักษามันไว้ เขาผู้ฮั้นเป็นคนที่ฮักแพงเฮา แล้วส่วนผู้ที่ฮักแพงเฮาฮั้น พระเจ้าผู้เป็นพ่อของเฮา กะสิฮักแพงคนผู้ฮั้น แล้วเฮากะสิฮักแพงเขาคือกัน กับสิสำแดงให้เขาฮู้ว่าเฮาอยู่นำ”
ยอห์น 14:22 บัดนี้ยูดาส (บ่แม่นยูดาสอิสคาริโอท) ได้ถามว่า “นายผู้ข้า เอ้ย สิเฮ็ดจั่งใดหน้อ เถิงสิสำแดงนายเองให้พวกผู้ข้า แล้วบ่ได้สำแดงให้ซาวโลก”
ยอห์น 14:23 พระเยซูเลยตอบเขาว่า “คั่นผู้ใดฮักแพงเฮา เขากะสิเฮ็ดนำคำของเฮา แล้วพระเจ้าผู้เป็นพ่อของเฮากะสิฮักแพงเขา แล้วเพิ่นกับเฮากะสิมาหาเขา มาสถิตอยู่นำเขาผู้ฮั้น
ยอห์น 14:24 “บัดนี้ ส่วนผู้ใดที่บ่ฮักแพงเฮา ผู้ฮั้นบ่ได้ฮักษาถ้อยคำของเฮา แล้วถ้อยคำที่พวกเจ้าพวมได้ยินอยู่หนิ มันบ่แม่นคำของเฮาเอง แต่มาจากพระเจ้าผู้เป็นพ่อ ผู้เพิ่นที่ใซ้เฮามา
ยอห์น 14:25 “แนวหมู่นี้ เฮาได้เว้าตอนเฮายังอยู่นำพวกเจ้า
ยอห์น 14:26 “แต่ว่า บัดผู้ซ่อยปลอบโยนมาแล้วฮั่น คือองค์พระวิญญญาณที่พระเจ้าผู้เป็นพ่อสิใซ้มาในนามของเฮา เพิ่นสิสอนพวกเจ้าเมิ้ดคู่อันคู่แนว แล้วสิซ่อยให้พวกเจ้าคึดออกได้ในเมิ้ดคู่อันคู่แนวที่เฮาเคยเว้าปันฟังฮั้น
ยอห์น 14:27 เฮาสิให้ความสงบสุขของเฮาไว้กับเจ้า แล้วความสงบสุขที่เฮาให้ฮั้น บ่คือความสงบสุขที่โลกให้ จั่งซั้น อย่าอุกอั่งหนักใจหลาย กับบ่ให้ตกใจหย้านเลย
ยอห์น 14:28 “พวกเจ้าเคยได้ยินเฮาเว้าว่า ‘เฮาสิออกจากนี้ไป แล้วสิได้กลับมาหาพวกเจ้าอีก’ คั่นพวกเจ้าฮักแพงเฮาอีหลี พวกเจ้าคือสิดีใจนำเฮา ที่ว่า ‘เฮาสิไปหาพระเจ้าผู้เป็นพ่อ’ ย้อนว่าพระเจ้าผู้เป็นพ่อของเฮาฮั่น กะแฮงยิ่งใหญ่กว่าเฮาอีก
ยอห์น 14:29 แล้วเฮาได้บอกพวกเจ้าไว้ ก่อนที่มันสิเป็นไป เพื่อว่าบัดมันเป็นไปแล้ว พวกเจ้าจั่งสิมีความเซื่อมั่น
ยอห์น 14:30 “แล้วแต่นี้ไป เฮาสิบ่ได้เว้านำพวกเจ้าหลาย ย้อนว่าเทพเจ้าผู้ครอบครองเหนือโลกนี้พวมสิมา แต่กะอย่ามัน มันบ่มีอำนาจอีหยังเหนือเฮาดอก
ยอห์น 14:31 “แต่เพื่อว่าซาวโลกทั้งหลายสิได้ฮู้ว่าเฮาฮักแพงพระเจ้าผู้เป็นพ่ออีหลี เฮาจั่งเฮ็ดคู่อันคู่แนว ตามที่เพิ่นสั่งไว้ ให้ลุกซะ บัดนี้ ให้พวกเฮาพากันไปจากหม่องนี้เถอะ”
////////// ////////// //////////
