ยอห์น – John บทที่ 9

ยอห์น 9:1 ตอนพระเยซูพวมย่างผ่านพวกเขาไปฮั่น เพิ่นได้เห็นผู้ซายคนหนึ่ง ที่ตาบอดมาแต่เกิด

ยอห์น 9:2 บัดนี้ลูกศิษย์ถามพระเยซูว่า อาจารย์ แม่นบาปของใผแหน่ ที่เฮ็ดให้ซายผู้นี้ตาบอดมาแต่เกิด แม่นบาปของเขาบ้อ หรือบาปของพ่อแม่เขา

ยอห์น 9:3 พระเยซูตอบว่า ผู้นี้กับพ่อแม่ของเขาบ่ได้เฮ็ดบาปกรรมอีหยังที่เป็นเหตุดอก แต่เพื่อให้การงานอันยิ่งใหญ่ของพระเจ้าปรากฎผ่านทางโตของซายผู้นี้

ยอห์น 9:4 แล้วเฮาสิต้องเฮ็ดการงานของพระเจ้า ผู้ที่ใซ้เฮามาให้สำเร็จในยามแจ้ง ย้อนยามมืดพวมสิมา ที่สิบ่มีใผเฮ็ดการเฮ็ดงานได้เลย

ยอห์น 9:5 บัดยามเฮายังอยู่ในโลก เฮาเป็นความสว่างของซาวโลก

ยอห์น 9:6 พอเว้าแล้วพระเยซูกะถ่มน้ำลายลงดิน เฮ็ดพอเป็นก้อนดินเหนียว แล้วกะเอาน้ำลายผสมดินฮั้น ทาใส่ตาของซายผู้ฮั่น

ยอห์น 9:7 แล้วบอกเขาว่า ให้ไปล้างตาในสระสีโลอัมเด้อ(“สระสีโลอัม”แปลว่า ซึ่งถืกใซ้ไป) เขาจั่งไปล้างออก แล้วกลับมาเห็นฮุ่งได้แล้ว

ยอห์น 9:8 บัดนี้ ไทบ้านกับคนอื่นๆ ที่เคยเห็นคนตาบอดผู้นี้มาก่อน จั่งถามกันว่า “เอ้า ผู้นี้บ่แม่นคนตาบอดฮั่นซั่นบ้อ ที่เคยนั่งขอทาน”

ยอห์น 9:9 ผู้ลางคนกะว่า “เออ แม่นผู้นี้ล่ะ” อีกผู้ลางคนกะว่า “ผู้นี้หน้าตาคือกันซื่อๆ” แต่ซายผู้ฮั้นบอกว่า “ข้อยหนิ แม่นผู้ฮั้นล่ะ”

ยอห์น 9:10 บัดนี้ พวกเขาสอบถามคนฮั้นว่า “เฮ็ดจั่งใดตาเจ้าจั่งเซาบอดเห็นฮุ่งได้”

ยอห์น 9:11 คนตาบอดเลยบอกว่า “มีคนซื่อว่าเยซูได้เอาดินเหนียวมาทาตาข้อย แล้วกะบอกข้อยว่า ‘ให้ไปล้างตาในสระสีโลอัม’ ข้อยเลยไปล้างออก แล้วจั่งเห็นฮุ่งได้”

ยอห์น 9:12 พวกคนฮั้นกะถามว่า “เพิ่นอยู่ใส” ซายผู้ฮั้นตอบว่า “ข้อยกะบ่ฮู้จัก”

ยอห์น 9:13 พวกเขาได้พาซายผู้ที่เคยตาบอดฮั่นไปหาพวกคณะฟาริสี

ยอห์น 9:14 มื้อที่พระเยซูได้เฮ็ดดินเหนียวปัวคนตาบอดฮั่น พอดีแม่นวันสะบาโต มื้อหยุดพักงานของพวกยิว

ยอห์น 9:15 บัดนี้ พวกคณะฟาริสีได้ถามซายผู้ฮั่นซ้ำอีก เถิงเหตุที่ตาของเขาเซาบอดเห็นฮุ่งได้ ซายผู้ฮั้นเลยเว้าให้เขาฟังว่า “เพิ่นกะเอาดินเหนียวมาทาตาข้อย พอข้อยไปล้างออกแล้ว ข้อยกะเห็นฮุ่งโลด”

ยอห์น 9:16 แล้วฟาริสีผู้ลางคนกะเลยเว้าว่า “ผู้ฮั้นบ่ได้มาจากพระเจ้าดอก ย้อนว่าเขาบ่ฮักษาวันสะบาโต มื้อหยุดพักงานของเฮาไว้” อีกผู้ลางคนกะคัดค้านว่า “คนบาปสิสามารถเฮ็ดเครื่องหมายอันสำคัญขนาดนี้ได้จั่งใด” กะเลยเกิดการขัดแย้งกันระหว่างพวกคณะฟาริสีในเรื่องนี้

ยอห์น 9:17 พวกเขากะเลยถามซายผู้ที่เคยตาบอดฮั้นว่า “เจ้าว่าจั่งใด เรื่องผู้ฮั้น ที่ว่าเขาปัวตาของเจ้าเซาบอดเห็นฮุ่งได้” ซายผู้ฮั้นกะตอบว่า “เพิ่นต้องเป็นผู้เป็นปากเป็นเสียงของพระเจ้า”

ยอห์น 9:18 แต่ว่าบัดนี้พวกหัวหน้ายิวบ่ยอมเซื่อซายผู้ฮั้น ที่ว่าเคยตาบอดมาแต่เกิดแล้วกลับมาเห็นฮุ่งได้ พวกเขากะเลยเอิ้นพ่อแม่ของซายผู้ที่เคยตาบอดแล้วเห็นฮุ่งได้ฮั้นมา

ยอห์น 9:19 แล้วพวกเขาจั่งถามพ่อแม่ฮั้นว่า “แม่นผู้นี้บ้อ ลูกซายของเจ้าฮั่น ที่เจ้าว่าตาบอดมาแต่เกิด บัดนี้เขาเห็นฮุ่งได้แนวใดซั่น”

ยอห์น 9:20 พ่อแม่ของซายผู้ฮั้นกะเลยตอบพวกเขาว่า “เอ้อ แม่นผู้นี้ล่ะ ลูกซายของผู้ข้า แล้วผู้ข้ากะฮู้อยู่ว่า เขาตาบอดมาแต่เกิดอีหลี”

ยอห์น 9:21 “แต่ว่าการที่เขาเห็นฮุ่งได้แล้วฮั้น ผู้ข้ากะบ่ฮู้ว่ามันเป็นไปได้แนวใด กับบ่ฮู้จักว่า แม่นใผปัวตาของเขาให้เห็นฮุ่งได้ เขากะเป็นผู้ใหญ่แล้ว ให้ถามเขาเบิ่งดู เขาสิบอกเอง”

ยอห์น 9:22 พ่อแม่ของเขาได้เว้าไว้จั่งซั้น ย้อนว่าหย้านพวกหัวหน้าคนยิว ที่ว่าพวกยิวฮั่นได้ตกลงกันไว้แล้วว่า คั่นผู้ใดฮับปากว่าพระเยซูเป็นพระคริสต์พระผู้โปรดฮั่น กะสิถืกตัดออกจากสโมสรศาลาธรรม

ยอห์น 9:23 เป็นย้อนเหตุนี้ล่ะ ที่พ่อแม่จั่งได้เว้าว่า “เขาเป็นผู้ใหญ่แล้ว ให้ถามเขาเอาเอง”

ยอห์น 9:24 บัดนี้ พวกหัวหน้าคนยิวกะเลยเอิ้นให้ซายผู้ที่เคยตาบอดให้มาอีก แล้วบอกเขาว่า “เจ้าต้องให้เกียรติพระเจ้าเด้อ แต่ส่วนผู้ฮั้น เฮาฮู้จักว่าเขาเป็นคนบาปซื่อๆ”

ยอห์น 9:25 ซายผู้ฮั้นกะเลยตอบว่า “เพิ่นผู้นี้เป็นบาปหรือบ่เป็น ข้อยกะบ่จักนำเขา แต่ข้อยฮู้จักว่า ข้อยเคยตาบอดมาก่อน แล้วบัดนี้ข้อยเห็นฮุ่งได้แล้ว”

ยอห์น 9:26 แล้วพวกหัวหน้ายิวได้ถามเขาซ้ำอีกว่า “ผู้ฮั้นได้เฮ็ดหยังให้เจ้าแหน่ เขาปัวตาเจ้าได้แนวใดเถิงเห็นฮุ่งได้”

ยอห์น 9:27 คนฮั้นตอบว่า “เอ้า ข้อยได้บอกพวกเจ้ามาแล้ว กะยังบ่ฟัง เป็นหยังคืออยากฟังอีก พวกเจ้าคึดอยากสิเข้าเป็นลูกศิษย์ของเพิ่นนำซั่นบ้อ”

ยอห์น 9:28 บัดนี้ พวกหัวหน้ายิวจั่งเว้าใส่ซายฮั้นว่า “เจ้าหนิล่ะ เป็นลูกศิษย์ของเขา ฝ่ายพวกเฮากะเป็นลูกศิษย์ของโมเสส”

ยอห์น 9:29 ส่วนโมเสสหนิ พวกเฮากะฮู้ดีว่า พระเจ้าได้เว้ากับลาวอีหลี แต่ฝ่ายคนฮั้น เฮาบ่ฮู้จักว่า เขามาแต่ใส”

ยอห์น 9:30 ซายผู้ฮั้นกะเลยตอบพวกเขาว่า “เอ้า แปลกใจเป็นตางึดแท้ ที่ว่าพวกเจ้ายังบ่ฮับฮู้ในเพิ่น ว่าเพิ่นมาแต่ใส ขนาดตาของข้อยเพิ่นกะยังปัวให้เห็นฮุ่งได้

ยอห์น 9:31 “คนเฮาฮู้กันดีว่า พระเจ้าบ่ได้ฮับฟังคนบาปดอก แต่ส่วนผู้ใดที่เคารพยำเกรงกับเฮ็ดตามจุดประสงค์ของพระเจ้า เพิ่นกะสิฮับฟังเขา

ยอห์น 9:32 คือ ตั้งแต่เริ่มแรกของโลกมา บ่เคยได้ยินว่ามีใผสามารถปัวคนที่ตาบอดมาแต่เกิด ให้เห็นฮุ่งได้

ยอห์น 9:33 คั่นแม่นคนผู้นี้บ่ได้มาจากพระเจ้า คือสิบ่สามารถเฮ็ดหยังได้ดอก

ยอห์น 9:34 แล้วพวกหัวหน้ายิวกะเว้าใส่ซายผู้ฮั้นว่า “ฮ่วย ขนาดมึงหนิเป็นคนขี้บาปมาแต่เกิด บัดนี้สิมาสอนพวกอาจารย์เฮาหนิซั่นบ้อ” พอเว้าแล้วพวกหัวหน้ายิวกะเลยไล่เขา ตัดออกจากสมาซิกศาลาธรรม

ยอห์น 9:35 พอพระเยซูได้ยินว่า พวกหัวหน้ายิวได้ไล่ซายผู้ฮั้นออกจากสมาซิกศาลาธรรม เพิ่นกะเลยไปหาเขา แล้วถามว่า “เจ้าเซื่อในเรื่องพระบุตรของพระเจ้าบ่”

ยอห์น 9:36 ซายผู้ฮั้นกะเว้าว่า “เอ้อ ผู้ฮั้นแม่นใผ ซ่อยบอกมานายเจ้าข้าเอ้ย เพื่อข้อยสิได้ฮับเซื่อในเพิ่นนำ”

ยอห์น 9:37 พระเยซูกะเลยบอกเขาว่า “เจ้าเคยเห็นผู้ฮั้นแล้ว คือแม่นผู้ฮั้นล่ะ ที่พวมเว้านำเจ้าอยู่เดี๋ยวหนิ”

ยอห์น 9:38 ซายผู้ฮั้นเว้าว่า “นายผู้ข้าเอ้ย ผู้ข้าเซื่อ” แล้วเขาได้คุกเข่าลงกราบนมัสการพระเยซู

ยอห์น 9:39 แล้วพระเยซูเว้าว่า “ส่วนเฮาได้มาในโลกนี้ ย้อนการพิพากษาตัดสิน เพื่อคนที่บ่ฮู้บ่เห็น สิได้เห็น กับเพื่อคนที่ได้ฮู้ได้เห็น สิกลับเป็นคนตาบอด”

ยอห์น 9:40 บัดนี้ พวกคณะฟาริสีผู้ลางคนที่อยู่กับพระเยซูฮั่น พอได้ยินเพิ่นเว้าถ้อยคำฮั้น กะถามเพิ่นว่า “เอ้า หมายความว่า พวกเฮากะตาบอดคือกันซั่นบ้อ”

ยอห์น 9:41 พระเยซูตอบเขาว่า “คั่นพวกเจ้าตาบอดอีหลี เจ้ากะบ่เป็นบาปดอก แต่บัดพวกเจ้าเว้าว่า ‘พวกเฮาเห็นฮู้เรื่องดีแล้ว’ จั่งซั้นบาปของพวกเจ้ากะยังคงอยู่”
////////// ////////// //////////