ยอห์น – John บทที่ 8

ยอห์น 8:1 แต่ส่วนพระเยซู เพิ่นได้ขึ้นไปอยู่เทิงภูเขาหมากกอกเทศ

ยอห์น 8:2 พอฮอดตอนเซ้า เพิ่นได้กลับมาเข้าวิหารฮั่นอีก แล้วพวกประซาซนกะพากันมาหาเพิ่น เพิ่นเลยนั่งลงแล้วสอนพวกเขา

ยอห์น 8:3 บัดนี้ พวกเสมียนคัดลอกฯ กับพวกคณะฟาริสี ได้จับแม่ญิงผู้หนึ่งพวมเล่นซู้ล่วงประเวณีอยู่ แล้วได้นำเอานางฮั้นมาอยู่ต่อหน้าพวกประซาซน

ยอห์น 8:4 แล้วพวกเขาบอกพระเยซูว่า “อาจารย์ แม่ญิงคนนี้ถืกพวกเฮาจับตอนพวมเล่นซู้ล่วงประเวณีอยู่

ยอห์น 8:5 “บัดนี้ โมเสสได้สั่งไว้ในกฎบัญญัติว่า ให้ดึกก้อนหินใส่ประหารซีวิตคนแนวนี้ อาจารย์ว่าจั่งใด”

ยอห์น 8:6 คือ พวกเขาลองล่อถามพระเยซูแนวนี้ เพื่อสิมีแนวจับผิดหาเรื่องใส่เพิ่น ส่วนพระเยซูนั่งก้มหน้าลง เอานิ้วมือเขียนใส่ขี้ดิน ทำท่าบ่ได้ยินเขาเว้า

ยอห์น 8:7 แล้วบัดพวกเขาส่อถามเพิ่นหลายเข้า พระเยซูเลยยืนขึ้นเว้าว่า “ในพวกเจ้าผู้ใดบ่มีบาปกะให้เอาก้อนหินดึกใส่นางนี้ก่อนหมู่โลด

ยอห์น 8:8 เว้าแล้ว พระเยซูนั่งก้มลง เขียนใส่ขี้ดินต่ออีก

ยอห์น 8:9 บัดพอได้ยินเพิ่นเว้า กะแทงใจดำของพวกเขา เขาเลยค่อยหลบหนีออกไป เทื่อละคนๆ ผู้มีอายุไปก่อน ลงมาจนฮอดเมิ้ดคู่คน เหลือแต่พระเยซูกับแม่ญิงที่ยืนอยู่ต่อหน้าประซาซนฮั่น

ยอห์น 8:10 บัดพอพระเยซูได้ยืนขึ้น เห็นว่าคนพวกฮั่นได้หนีไปเมิ้ดแล้ว เลยเว้ากับแม่ญิงฮั่นว่า นางเอ้ย พวกผู้กล่าวหาใส่เจ้าฮั่นไปใสเมิ้ด บ่มีใผสิให้โทษเจ้าบ้อ

ยอห์น 8:11 แม่ญิงฮั่นเว้าว่า บ่มีแล้ว นายเจ้าข้าเอ้ย พระเยซูบอกนางว่า คั่นจั่งซั้น เฮากะบ่มีโทษให้เจ้าคือกัน ไปซะ แล้วอย่าซุมาเฮ็ดผิดบาปต่อไปอีกเด้อ

ยอห์น 8:12 แล้วพระเยซูกะได้สอนพวกประซาซนต่ออีก เว้าว่า “เฮาเป็นแสงสว่างให้ซาวโลก ผู้ที่ไปนำเฮาสิบ่ได้หลงอยู่ในความมืด แต่สิมีแสงสว่างในซีวิต” (ให้ดู ยอห์น 1:9)

ยอห์น 8:13 บัดนี้พวกคณะฟาริสีเว้าขึ้นว่า บัดเจ้ามาเว้าเป็นพยานเถิงโตเจ้าเอง จั่งซั่นคำพยานของเจ้าใซ้บ่ได้

ยอห์น 8:14 พระเยซูเลยบอกเขาว่า แม้นว่าเฮาสิเว้าเป็นพยานเถิงโตเฮาเอง คำพยานของเฮากะเป็นความสัตย์จริง ย้อนเฮาฮู้จักว่าเฮามาจากใสแล้วสิไปใส

ยอห์น 8:15 ส่วนพวกเจ้าหนิ มักสิตัดสินตามฝ่ายเนื้อหนัง แต่ส่วนเฮากะบ่ได้ตัดสินผู้ใด

ยอห์น 8:16 แล้วคั่นแม่นว่าเฮาสิให้การตัดสิน การตัดสินของเฮาฮั้นกะถืกต้อง ย้อนว่าเฮาบ่ได้อยู่ผู้เดียว แต่เฮาอยู่นำพระเจ้าผู้เป็นพ่อ ผู้ที่สถิตอยู่นำเฮา คือเพิ่นผู้ที่ได้ใซ้เฮามาฮั้น

ยอห์น 8:17 แล้วในกฎบัญญัติมีเขียนไว้อีกว่า คั่นมีสองคนให้การ คำพยานของเขาสองคนฮั้นกะให้ถือว่าเป็นความจริงแล้ว

ยอห์น 8:18 ที่ว่าเฮาเป็นพยานอ้างเถิงโตเจ้าของกะแม่น แล้วพระเจ้าผู้เป็นพ่อผู้ที่ใซ้เฮามาฮั่น เพิ่นกะเป็นพยานให้การกับเฮานำ

ยอห์น 8:19 บัดนี้พวกเขาได้ถามพระเยซูว่า “อยู่ใสล่ะ พ่อเจ้าฮั่น” พระเยซูตอบว่า “พวกเจ้าบ่ฮู้จักเฮาดอก กับบ่ฮู้จักพระเจ้าผู้เป็นพ่อของเฮา คั่นแม่นพวกเจ้าได้ฮู้จักเฮาอีหลี เจ้าต้องฮู้จักพระเจ้าผู้เป็นพ่อเฮาคือกัน”

ยอห์น 8:20 พระเยซูได้เว้าถ้อยคำแนวหมู่นี้ตอบพวกเขา อยู่แถวคลังเงินตอนที่เพิ่นพวมสอนในวิหารฮั้น แต่บ่มีใผจับกุมเพิ่นเลย ย้อนว่ายังบ่ทันเถิงเวลาของเพิ่นที่กำหนดไว้ฮั้น

ยอห์น 8:21 บัดนี้ พระเยซูเว้ากับพวกเขาซ้ำอีกว่า เฮาสิออกจากนี้ไป แล้วพวกเจ้าสิซอกหาเฮาอยู่ แต่สิตายไปในการบาปของโตเอง ส่วนหม่องที่เฮาสิไปฮั่น พวกเจ้าไปบ่ได้เป็นอันขาด (ให้ดู ยอห์น 7:34)

ยอห์น 8:22 บัดนี้พวกผู้นำของคนยิวเลยเว้ากันว่า “เอ้า เขาสิไปฆ่าโตเองตายซั่นบ้อ คือเห็นเขาเว้าว่า ‘หม่องที่เขาสิไปฮั่น พวกเจ้าไปบ่ได้เป็นอันขาด'”

ยอห์น 8:23 พระเยซูเลยเว้ากับพวกเขาต่ออีกว่า “ฝ่ายพวกเจ้ามาจากข้างล่างนี้ แต่เฮามาจากเบื้องบน แล้วพวกเจ้าอยู่ฝ่ายโลกนี้ แต่เฮาบ่ได้อยู่ฝ่ายโลกนี้”

ยอห์น 8:24 “จั่งซั้น เฮาได้บอกพวกเจ้าว่า พวกเจ้าสิตายไปในการบาปของโตเอง คั่นบ่ฮับเซื่อในเฮา ว่าเป็นผู้ที่พระเจ้าใซ้มาฮั้น พวกเจ้าสิตายไปในการบาปของโตเอง

ยอห์น 8:25 แล้วพวกเขาถามพระเยซูว่า “เจ้าเด แม่นผู้ใดซั่น” พระเยซูเลยตอบว่า “กะแม่นผู้ฮั้นแล้ว ตามที่เฮาได้เว้ามาแต่ตำอิดฮั่นล่ะ”

ยอห์น 8:26 “เฮามีหลายแนวที่สิเว้าอยู่ แล้วมีการตัดสินเถิงพวกเจ้านำ จั่งใดกะตาม ส่วนผู้เพิ่นที่ใซ้เฮามาหนิ เพิ่นเป็นผู้เที่ยงธรรมสัตย์จริง แล้วแนวที่เฮากล่าวให้ซาวโลกหนิ เป็นแนวที่เฮาได้ยินจากเพิ่น

ยอห์น 8:27 บัดนี้พวกเขาบ่เข้าใจว่า พระเยซูพวมเว้าเถิงพระเจ้าผู้เป็นพ่อ

ยอห์น 8:28 พระเยซูเลยเว้าอีกว่า บัดพอพวกเจ้ายกเฮาผู้เป็นบุตรมนุษย์ขึ้นไว้ฮั่น บัดฮั้นล่ะ พวกเจ้าสิฮู้เมื่อว่า เฮาหนิแม่นผู้ฮั้นอีหลีที่พระเจ้าได้ใซ้มา แล้วพวกเจ้าสิฮู้กันว่า เฮาบ่ได้เฮ็ดอีหยังตามใจมัก แต่เฮาได้เว้าตามแนวที่พระเจ้าผู้เป็นพ่อได้บอกได้สอนเฮามาฮั่น

ยอห์น 8:29 แล้วพระเจ้าผู้เพิ่นที่ได้ใซ้เฮามาฮั่น เพิ่นสถิตอยู่นำเฮา คือพระเจ้าผู้เป็นพ่อบ่ได้ปะได้ถิ้มเฮาให้อยู่ผู้เดียว คือเฮาเฮ็ดตามแนวที่เพิ่นพอใจอยู่ตลอด

ยอห์น 8:30 ตอนที่พระเยซูพวมเว้าถ้อยคำอยู่หนิ ได้มีหลายคนที่ได้ฮับเซื่อวางใจในเพิ่น

ยอห์น 8:31 บัดนี้ พระเยซูได้เว้ากับพวกยิวที่ฮับเซื่อในเพิ่นฮั่นว่า คั่นพวกเจ้าดำรงอยู่ในถ้อยคำของเฮาหนิ พวกเจ้าได้เป็นลูกศิษย์ของเฮาอีหลี

ยอห์น 8:32 แล้วพวกเจ้าสิฮู้จักความเป็นจริง แล้วความจริงนี้ สิปลดปล่อยพวกเจ้าให้มีเสรีภาพเป็นไทแท้

ยอห์น 8:33 พวกเขาคัดค้านว่า “พวกเฮาหนิได้เป็นลูกหลานของอับราฮัมพ่อตระกูลของเฮาอยู่ดีๆ แล้วบ่เคยเป็นทาสใซ้ของใผจักเทื่อ แล้วเป็นหยังจั่งเว้าว่าสิปลดปล่อยพวกเฮาให้มีเสรีภาพเป็นไทแท้”

ยอห์น 8:34 พระเยซูตอบเขาว่า เฮาสิบอกพวกเจ้าตามซื่อนี้ล่ะ ว่าคู่คนที่เฮ็ดความผิดบาป กะตกเป็นทาสของบาปฮั้น

ยอห์น 8:35 ตามหลักแล้ว ทาสกะบ่ได้พักอาศัยอยู่ในวังของนายตลอด มีแต่ลูกนายฮั่นล่ะที่มีสิทธิ์ ให้อยู่ในวังของนายตลอด

ยอห์น 8:36 จั่งซั้น คั่นพระบุตรปลดปล่อยพวกเจ้า ผู้เป็นทาส ให้มีเสรีภาพ พวกเจ้าสิมีเสรีภาพอีหลี

ยอห์น 8:37 เฮาฮู้จักว่าพวกเจ้าเป็นลูกหลานตามเซื้อสายของอับราฮัมอยู่ดี แต่พวกเจ้าพยายามที่สิฆ่าเฮาย้อนว่า คำของเฮาบ่มีที่สถิตอยู่ในพวกเจ้าเลย

ยอห์น 8:38 ส่วนเฮาหนิ ได้เว้าตามแต่แนวที่เฮาได้เห็นจากพระเจ้าผู้เป็นพ่อของเฮา แล้วพวกเจ้าพากันเลียนแบบตามแนวที่เห็นพ่อของพวกเจ้าเฮ็ด

ยอห์น 8:39 พวกเขาตอบพระเยซูว่า “พ่อของพวกเฮาหนิกะคืออับราฮัมฮั่นล่ะ” แต่พระเยซูเว้าว่า “คั่นพวกเจ้าเป็นลูกหลานของอับราฮัมอีหลี พวกเจ้าคือสิเฮ็ดตามการงาน แนวที่อับราฮัมได้พาเฮ็ด”

ยอห์น 8:40 แต่ว่า บัดนี้พวกเจ้าหาโอกาสฆ่าเฮา ผู้ที่นำความจริงจากพระเจ้ามาบอกให้พวกเจ้าฟัง ส่วนอับราฮัมฮั่น ลาวกะบ่เคยเฮ็ดแบบนี้

ยอห์น 8:41 “แต่พวกเจ้า กะเฮ็ดนำแนวที่พ่อของเจ้าพาเฮ็ดต่างหาก” แล้วพวกยิวฮั่นเว้าประซดใส่เพิ่นว่า “พวกเฮาบ่ได้เกิดจากการล่วงประเวณีคือเจ้าดอก แล้วพวกเฮามีพ่ออยู่ผู้เดียว แม่นพระเจ้าฮั่นล่ะ”

ยอห์น 8:42 พระเยซูเลยบอกพวกเขาว่า “คั่นพระเจ้าได้เป็นพ่อของพวกเจ้าอีหลี พวกเจ้าสิต้องฮักแพงเฮา ย้อนว่าเฮาได้มาจากพระเจ้าผู้เพิ่นที่ใซ้เฮามาหนิ แล้วเฮาบ่ได้มาตามใจมักของเฮา

ยอห์น 8:43 “มันเป็นหยัง พวกเจ้าบ่เข้าใจสำเนียงเว้าของเฮาบ้อ หรือว่าใจพวกเจ้าบ่สามารถฮับฟังถ้อยคำของเฮาได้

ยอห์น 8:44 คือพวกเจ้ามาจากมารฮ้าย ผู้เป็นพ่อของพวกเจ้า แล้วพวกเจ้ามักเฮ็ดตามใจมักของพ่อเจ้าฮั่น ที่ว่ามันเป็นฆาตกรแต่ดั้งเดิมมา แล้วมันบ่เคยยืนอยู่ในความจริงเลย ย้อนว่ามันบ่มีความสัตย์จริงในโตมันเอง บัดมันเว้าแนวขี้ตัวะออกมา มันเว้าจากคลังของมันเอง ย้อนว่ามันเป็นเจ้าขี้ตัวะ กับเป็นพ่อของความขี้ตัวะทั้งเมิ้ด

ยอห์น 8:45 แล้วที่ว่าเฮาเว้าความจริงให้พวกเจ้า เป็นเหตุที่พวกเจ้าจั่งบ่ยอมเซื่อเฮา

ยอห์น 8:46 มีผู้ใดแหน่ ในพวกเจ้าที่สามารถซี้ได้ว่าเฮามีบาปในโตเอง แล้วคั่นเฮาบอกแต่แนวเป็นจริง เป็นหยังพวกเจ้าจั่งบ่ยอมเซื่อเฮา

ยอห์น 8:47 คือ ผู้ที่อยู่ฝ่ายพระเจ้า กะฮับฟังถ้อยคำของพระเจ้าฮั่น จั่งซั้นที่พวกเจ้าบ่ยอมฟังเฮาหนิ กะแสดงว่าพวกเจ้าบ่ได้อยู่ฝ่ายพระเจ้าเลย

ยอห์น 8:48 บัดนี้ พวกผู้นำของคนยิวตอบประชดใส่พระเยซูอีกว่า “ที่พวกเฮาว่าเจ้าเป็นคนสะมาเรีย กับว่ามีผีสิงอยู่กะถืกแล้ว แม่นบ่ล่ะ”

ยอห์น 8:49 พระเยซูเลยตอบเขาว่า “เฮาบ่มีผีสิงดอก แต่ว่าเฮาให้เกียรติพระเจ้าผู้เป็นพ่อของเฮา แล้วพวกเจ้าลบหลู่เกียรติของเฮา

ยอห์น 8:50 “แล้วเฮาบ่ซอกหาเกียรติให้โตเองดอก แต่ว่ามีอีกผู้หนึ่งที่หาเกียรติให้ แล้วตัดสินด้วยความยุติธรรม

ยอห์น 8:51 เฮาสิบอกพวกเจ้าตามซื่อนี้ล่ะ ว่า “ผู้ใดที่ยึดมั่น ฮักษาคำของเฮาไว้ ผู้ฮั้นสิบ่พ้อความตายจักเทื่อ”

ยอห์น 8:52 แล้วพวกผู้นำของคนยิวกะเว้าอีกว่า “เว้าส่ำนี้เฮากะฮู้ว่าเจ้ามีผีสิงแล้ว คืออับราฮามกับผู้เป็นปากเป็นเสียงกะตายไปแล้ว แล้วเจ้ากะยังมาหาว่า คนที่ยึดมั่นในคำของเจ้าสิบ่ฮู้จักรสซาติของความตายจักเทื่อ

ยอห์น 8:53 “ส่ำเจ้าหนิ ใหญ่กว่าปู่อับราฮัมอีกบ้อ คือลาวได้ตายไปแล้ว แล้วพวกผู้เป็นปากเป็นเสียงของพระเจ้ากะได้ตายไปเมิ้ดแล้วคือกัน เจ้าคึดว่าเจ้าเป็นผู้ดีเด่นมาแต่ใส”

ยอห์น 8:54 พระเยซูเลยตอบว่า “คั่นเฮาหาเกียรติให้โตเอง เกียรติแนวฮั้นบ่มีประโยชน์หยัง แม่นพระเจ้าผู้เป็นพ่อของเฮานี้ล่ะ ที่ให้เกียรติเฮาต่างหาก แม่นผู้ฮั้นล่ะที่พวกเจ้าหาว่าเป็นพระเจ้า ของพวกเจ้าเอง

ยอห์น 8:55 พวกเจ้าบ่ฮู้จักเพิ่นดอก แต่ว่าเฮาหนิฮู้จักกับเพิ่น แล้วคั่นเฮาสิปฏิเสธว่าเฮาบ่ฮู้จักกับเพิ่น เฮากะเป็นคนขี้ตัวะคือจั่งพวกเจ้าหนิ แต่ว่าเฮาฮู้จักเพิ่นอีหลี แล้วกะยึดมั่นฮักษาคำของเพิ่นนำ

ยอห์น 8:56 ปู่ทวดอับราฮามของพวกเจ้ามีความยินดีที่สิเห็นมื้อของเฮา ลาวได้ฮู้ได้เห็นแล้ว จั่งดีอกดีใจหลาย (ให้ดู ปฐมกาล 12:1-3)

ยอห์น 8:57 บัดนี้ พวกผู้นำของคนยิวกะเยาะเย้ยพระเยซูว่า “อายุเจ้ายังบ่ทันได้ฮอดห้าสิบปีซ้ำ แล้วเจ้าเคยเห็นอับราฮัมอยู่ใส”

ยอห์น 8:58 พระเยซูเลยเว้าว่า “เฮาสิบอกพวกเจ้าตามซื่อนี้ล่ะ ว่าก่อนที่อับราฮัมบ่ทันเกิดพู้น เฮาดำรงอยู่แล้ว

ยอห์น 8:59 บัดนี้พวกยิวฮั้นกะพากันจับก้อนหินขึ้นมา แล้วว่าสิดึกใส่พระเยซู แต่ว่าเพิ่นหลบโตจากพวกเขาย่างผ่านพวกเขาออกไป
////////// ////////// //////////