ยอห์น – John บทที่ 13
ยอห์น 13:1 บัดนี้ ก่อนลงกินเลี้ยงฉลองมื้อพระเจ้ากู้ซาติฮั่น พอพระเยซูฮู้ว่าสิฮอดเวลาแล้วที่เพิ่นสิออกจากโลกกลับไปหาพระเจ้าผู้เป็นพ่อ เพิ่นกะฮักแพงคนของเพิ่นผู้อยู่ในโลกนี้ ได้ฮักแพงเขาจนเถิงที่สุด
ยอห์น 13:2 พอกินเลี้ยงฉลองกันแล้ว ซึ่งก่อนหน้าฮั้น พญามารได้เอาความคึดเสียบไว้ในใจของยูดาสอิสคาริโอทแล้ว ผู้เป็นลูกซายของซีโมนฮั่น ให้เขามีใจอยากทรยศใส่พระเยซู
ยอห์น 13:3 ส่วนพระเยซู เพิ่นฮู้จักว่า พระเจ้าได้มอบสิทธิ์คู่อันคู่แนวไว้ในมือของเพิ่นอยู่แล้ว กับฮู้อยู่ว่าโตเพิ่นเองได้มาจากพระเจ้า แล้วสิได้กลับไปหาพระเจ้าอีก
ยอห์น 13:4 กินแล้ว พระเยซูกะเลยลุกไปถอดเสื้อคลุมของเพิ่นออกวางไว้ แล้วเอาผ้าเซ็ดโตมาคาดแอวไว้
ยอห์น 13:5หลังฮั้นมา เพิ่นได้เทน้ำใส่ซาม แล้วจั่งล้างตีนให้ลูกศิษย์ แล้วกะเอาผ้าที่คาดแอวฮั่นเซ็ดตีนให้พวกเขานำ
ยอห์น 13:6 พอมาฮอดเปโตร เปโตรกะถามว่า “นายผู้ข้าสิล้างตีนให้ผู้ข้าซั่นบ้อ”
ยอห์น 13:7 พระเยซูตอบว่า “เจ้าบ่เข้าใจดอก ว่าเฮาพวมเฮ็ดหยังอยู่เดี๋ยวหนิ แต่หลังจากนี้ไปเจ้าคือสิได้ฮู้จัก”
ยอห์น 13:8 เปโตรเว้าว่า “นายผู้ข้าสิบ่ได้ล้างตีนผู้ข้าจักเทื่อเลย” พระเยซูบอกว่า “คั่นเฮาบ่ล้างให้ เจ้าบ่มีสิทธิ์มีส่วนฮ่วมกับเฮาเลย”
ยอห์น 13:9 ซีโมนเปโตรเลยขอร้องว่า “นายผู้ข้าเอ้ย ขออย่าล้างตีนของผู้ข้าแต่แนวเดียว ให้ล้างมือล้างหัวให้ผู้ข้านำแหน่”
ยอห์น 13:10 พระเยซูเลยบอกเขาต่ออีกว่า “ผู้ที่อาบน้ำกะสะอาดแล้ว ต้องการที่สิล้างให้แต่ตีนท่อฮั้น คือพวกเจ้าสะอาดเมิ้ดแล้ว แต่บ่แม่นคู่คน”
ยอห์น 13:11 คือพระเยซูฮู้ว่า ใผสิทรยศใส่เพิ่น เพิ่นจั่งเว้าว่า “พวกเจ้าสะอาดเมิ้ดแล้ว แต่บ่แม่นคู่คน”
ยอห์น 13:12 บัดนี้ พอพระเยซูได้ล้างตีนให้ลูกศิษย์เมิ้ดแล้ว เพิ่นได้ใส่เสื้อคลุมของเพิ่นอีก แล้วกลับไปนั่งลงคือเก่า แล้วจั่งถามลูกศิษย์ว่า “พวกเจ้าพอเข้าใจบ้อ แนวที่เฮาเฮ็ดให้พวกเจ้าหนิ
ยอห์น 13:13 คือ พวกเจ้าเอิ้นเฮาว่า อาจารย์กับว่า นายซีวิต ที่ได้เอิ้นจั่งซี้กะดีแล้ว ย้อนว่าเฮาแม่นอยู่แล้ว
ยอห์น 13:14 คั่นว่า ขนาดเฮาผู้เป็นนายซีวิต กับเป็นอาจารย์ของพวกเจ้า ยังล้างตีนให้พวกเจ้าผู้เป็นลูกศิษย์ พวกเจ้าควรสิล้างตีนให้กันและกันนำเด้อ
ยอห์น 13:15 คือเฮาได้เฮ็ดไว้เป็นโตอย่างให้พวกเจ้า เพื่อให้พวกเจ้าเฮ็ดตามอย่างที่เฮาได้เฮ็ดให้พวกเจ้าแล้วฮั้น
ยอห์น 13:16 เฮาสิบอกพวกเจ้าตามซื่อนี้ล่ะ ว่าทาสใซ้สิบ่ได้เป็นใหญ่ลื่นนายโตเองดอก แล้วผู้เป็นทูต สิบ่เป็นใหญ่กว่าผู้ที่ใซ้เขามา
ยอห์น 13:17 คั่นพวกเจ้าเข้าใจในเรื่องนี้แล้ว เจ้ากะสิได้พรเป็นสุขคั่นได้เฮ็ดตาม
ยอห์น 13:18 “ที่เฮาเว้าหนิ กะบ่ได้หมายเถิงเมิ้ดคู่คนในพวกเจ้าดอก คือเฮาฮู้อยู่แล้วผู้ที่เฮาได้เลือกไว้ฮั่น เพื่อสิได้เป็นไปตามข้อที่พระคำกล่าวไว้ว่า “ผู้ที่กินข้าวนำเฮาได้ยกส้นตีนใส่เฮา”
ยอห์น 13:19 บัดนี้ เฮาบอกพวกเจ้าไว้ก่อนมันสิเกิดขึ้น เพื่อว่าพอเกิดขึ้นแล้ว พวกเจ้าสิได้มีความเซื่อมั่นว่า เฮาแม่นผู้ฮั้นอีหลีที่พระเจ้าใซ้มา
ยอห์น 13:20 เฮาสิบอกพวกเจ้าตามซื่อนี้ล่ะ ว่าผู้ที่ต้อนฮับคนที่เฮาใซ้ไป กะส่ำต้อนฮับเฮาเอง แล้วผู้ที่ต้อนฮับเฮาฮั่น กะส่ำกับต้อนฮับพระเจ้า ผู้เพิ่นที่ใซ้เฮามาหนิ
ยอห์น 13:21 หลังจากพระเยซูได้เว้าจั่งซี้แล้ว เพิ่นกะอุกอั่งหนักใจหลาย จั่งเว้าว่า “เฮาสิบอกพวกเจ้าตามซื่อนี้ล่ะ คือมีคนหนึ่งในพวกเจ้าที่สิทรยศใส่เฮา”
ยอห์น 13:22 บัดนี้ พวกลูกศิษย์พากันเบิ่งหน้ากันเป็นตางึดว่า ที่พระเยซูเว้าฮั่น หมายเถิงใผ
ยอห์น 13:23 บัดนี้ มีลูกศิษย์ผู้หนึ่ง ที่นั่งโต๊ะใกล้พระเยซู แม่นลูกศิษย์ผู้ที่พระเยซูฮักแพงฮั่น
ยอห์น 13:24 ซีโมนเปโตรเลยเฮ็ดไม้เฮ็ดมือยิกหน้า ส่งสัญญาณให้ลูกศิษย์ผู้ฮั้นถามพระเยซูเถิงผู้ที่เพิ่นเว้าฮั่น
ยอห์น 13:25 ลูกศิษย์ฮั่น ได้เอนโตไปถามพระเยซูว่า นายผู้ข้าเอ้ย “แม่นผู้ใดแหน่ที่สิทรยศใส่นาย”
ยอห์น 13:26 พระเยซูตอบว่า “แม่นผู้ที่เฮาสิให้ขนมปังหลังจากเฮาจ้ำลงฮั่นล่ะ” พอเว้าแล้วพระเยซูกะหยิบขนมปังจ้ำลง แล้วกะยื่นให้ยูดาสอิสคาริโอท ลูกซายของซีโมนฮั่น
ยอห์น 13:27 หลังจากฮับเอาขนมปังฮั่นแล้ว มารซาตานได้เข้าในโตเขา แล้วพระเยซูเลยบอกเขาว่า “แนวที่เจ้าสิเฮ็ดฮั่น กะเฮ็ดให้มันไวๆ เด้อ”
ยอห์น 13:28 ส่วนพวกลูกศิษย์ที่ฮ่วมโต๊ะนำกันฮั่น บ่มีใผฮู้เถิงแนวที่พระเยซูเว้ากับยูดาส
ยอห์น 13:29 ผู้ลางคนคึดว่า ย้อนยูดาสเป็นผู้ถือกะเป๋าเงินฮั่น พระเยซูบอกให้เขาไปซื้อของจำเป็นในการเลี้ยงฉลอง หรือว่าสิให้เอาอีหยังไปบริจาคให้คนทุกข์คนยาก
ยอห์น 13:30 พอยูดาสได้ฮับเอาขนมปังฮั่นแล้ว เขากะออกไปเลย ตอนฮั้นกะค่ำแล้ว
ยอห์น 13:31 พอยูดาสออกไปแล้ว พระเยซูได้เว้าว่า “บัดนี้ ได้ฮอดยามมันแล้ว ที่เฮาผู้เป็นบุตรมนุษย์ สิได้เข้าสู่พระสิริอันรุ่งโรจน์ แล้วพระเจ้าสิได้ฮับพระเกียรติทางเฮานำ
ยอห์น 13:32 “จั่งซั้น คั่นว่าพระเจ้าสิได้ฮับพระเกียรติทางเฮาผู้เป็นบุตรมนุษย์ พระเจ้ากะสิให้บุตรมนุษย์เฮาฮับพระเกียรติในโตเฮาเองนำ แล้วเพิ่นกะสิเริ่มเฮ็ดแนวฮั้นให้เฮาอยู่เดี๋ยวนี้เลย
ยอห์น 13:33 “ลูกศิษย์เอ้ย เวลาที่เฮาสิอยู่กับพวกเจ้ากะยังเหลือน้อย แล้วพวกเจ้าสิซอกหาเฮา คือจั่งที่เฮาได้บอกพวกยิวฮั่นแล้วว่า ‘หม่องที่เฮาสิไปฮั่น พวกเจ้าไปบ่ได้’ บัดนี้ เฮากะเว้าแนวเดียวกันกับพวกเจ้า
ยอห์น 13:34 “แต่ว่าเฮาสิให้หลักคำสั่งใหม่ไว้ให้กับพวกเจ้าว่าจั่งซี้ คือให้พวกเจ้าฮักแพงกันและกันเด้อ คือที่เฮาเคยฮักแพงต่อพวกเจ้าจั่งใด กะให้พวกเจ้าฮักแพงกันจั่งซั้น
ยอห์น 13:35 โดยเหตุนี้ล่ะ คู่คนกะสิฮู้กันว่า พวกเจ้าเป็นลูกศิษย์ของเฮา คั่นว่าพวกเจ้าแสดงความฮักแบบของพระเจ้าต่อกันและกัน”
ยอห์น 13:36 ซีโมนเปโตรถามพระเยซูว่า “นายผู้ข้าสิไปใส” พระเยซูตอบว่า “หม่องที่เฮาสิไปฮั่น เจ้าสิตามเฮาไปเดี๋ยวนี้บ่ได้ดอก แต่ว่าเจ้าสิตามเฮาไปตอนหลัง”
ยอห์น 13:37 บัดนี้เปโตรถามพระเยซูว่า “นายผู้ข้าเอ้ย เป็นหยังผู้ข้าจั่งสิไปนำบ่ได้ คือผู้ข้าพร้อมที่สิวางซีวิตลงโดยเห็นแก่นายผู้ข้าอยู่แล้ว”
ยอห์น 13:38 พระเยซูตอบเขาว่า “ที่เจ้าว่าสิวางซีวิตลงเพื่อเฮาฮั้นแม่นอยู่บ้อ เฮาสิบอกเจ้าตามซื่อนี้ล่ะ ว่าก่อนไก่สิขันฮั่น เจ้าสิปฏิเสธว่า บ่ฮู้จักกับเฮาสามเทื่อ”
////////// ////////// //////////
