ลูกา – Luke บทที่ 24

ลูกา 24:1 บัดนี้ ข่อนสิแจ้งในมื้อแรกของสัปดาห์ แม่ญิงพวกฮั่นกะพากันออกไปหาอุโมงค์ เอาเครื่องหอมแนวต่างๆ ที่ได้เตรียมไว้ฮั่นไปนำ

ลูกา 24:2 พอไปฮอดแล้ว เขาเห็นว่า แผ่นหินใหญ่ที่ปิดปากอุโมงค์ฮั่น ได้ถืกกลิ้งออกไปแล้ว

ลูกา 24:3 พอบัดเขาเข้าไปบ่ได้พ้อได้เห็นศพของพระเยซู

ลูกา 24:4 แล้วมันเป็นไปที่ว่า บัดพอพวมยืนงงกันอยู่ฮั่น นี่แน่ะ ได้มีซายสองคนใส่เสื้อผ้าเหลื้อมๆ ยืนอยู่ทางข้างเขา

ลูกา 24:5 พวกแม่ญิงกะตกใจหย้าน พากันก้มหน้าลงดิน ซายสองคนฮั่นเว้าว่า “เป็นหยังคือมาหาผู้มีซีวิตอยู่ในหม่องเก็บคนตาย

ลูกา 24:6 เพิ่นบ่อยู่นี่ดอก ย้อนเป็นขึ้นมาจากตายแล้ว จื่อบ่ได้บ้อ ที่เพิ่นเคยบอกพวกเจ้าตอนยังอยู่เมืองกาลิลีฮั้น

ลูกา 24:7 ว่า “เฮาผู้เป็นบุตรมนุษย์สิถืกมอบไว้ในมือของคนบาป แล้วถืกตรึงไว้ ซึ่งในมื้อที่สามเฮาสิเป็นขึ้นมาอีก”

ลูกา 24:8 บัดนี้ พวกเขาเลยคึดซวดในความเว้าของเพิ่น

ลูกา 24:9 พวกเขากะเลยหลบเมือไปเล่าเมิ้ดคู่แนวให้ทูตพิเศษสิบเอ็ดคนฮั้นฟัง กับคนอื่นๆ อยู่ฮั่นนำ

ลูกา 24:10 ในพวกแม่ญิงที่ไปบอกทูตพิเศษฮั้น มี มารีย์ไทเมืองมักดาลา กับโยอันนา กับมารีย์ แม่ของยากอบ กับแม่ญิงอีกผู้ลางคนนำ

ลูกา 24:11 แต่ความเว้าของพวกแม่ญิงฮั้น สำหรับทูตพิเศษฟังแล้วคือปานนิทานซื่อๆ เลยบ่เซื่อเขา

ลูกา 24:12 แต่ฝ่ายเปโตรกะลุกแล่นไปอุโมงค์ ก้มลงส่องเห็นแต่ผ้าห่อศพวางอยู่ เลยหลบเมือเฮือน พวมงึดในใจเถิงแนวที่เป็นไป

ลูกา 24:13 แล้ว นี่แน่ะ ในมื้อเดียวกันฮั้น มีลูกศิษย์สองคน พวมไปบ้านเอมมาอูส ห่างจากเมืองเยรูซาเล็มประมาณสิบเอ็ดกิโล

ลูกา 24:14 แล้วเขาพวมซุมกันเถิงคู่แนวที่เป็นไป

ลูกา 24:15 พวมซุมพิจารณากันอยู่ฮั่น พอดีพระเยซูได้เข้าไปข้างๆ ย่างไปนำเขา

ลูกา 24:16 แต่ว่าตาของเขาถืกรัดไว้ เลยเบิ่งบ่ออก บ่ฮู้ว่าเป็นพระเยซู

ลูกา 24:17 พระเยซูเลยถามเขาว่า “คือย่างไปแบบเศร้าสร้อยแท้ ซุมกันเรื่องหยังอยู่เดียวหนิ” เขากะหยุดยืนหน้าเศร้าๆ

ลูกา 24:18 แล้วคนหนึ่งซื่อว่า เคลโอปัส เว้ากับเพิ่นว่า “ฮ้วย เจ้าเป็นแขกผู้เดียวในเมืองเยรูซาเล็มหนิบ้อ ที่บ่ฮู้จักเรื่องราวที่เกิดขึ้นหว่างสองสามมื้อหนิ”

ลูกา 24:19 เพิ่นเลยถามว่า “แม่นเรื่องอีหยัง” เขาตอบว่า “กะเรื่องพระเยซูไทบ้านนาซาเร็ธฮั่นเด้ ซึ่งเป็นปากเป็นเสียงของพระเจ้าผู้มีพลังอำนาจอันใหญ่ยิ่งในความเว้ากับการเฮ็ดต่อพระเจ้า กับต่อพวกประซาซนนำ”

ลูกา 24:20 แต่พวกหัวหน้านำเครื่องถวายกับพวกผู้นำของบ้านเมือง ได้พากันก่อคดีมอบเพิ่นไว้ให้เจ้าหน้าที่ตรึงใส่หลักประหาร

ลูกา 24:21 คือพวกเฮาหวังว่าเพิ่นสิเป็นผู้กู้ซาติอิสราเอลเฮา แต่ว่ามื้อนี้เป็นมื้อที่สามแล้วตั้งแต่เหตุการณ์ฮั้นมา

ลูกา 24:22 แต่เฮาแปลกใจอยู่อย่างหนึ่ง คือมื้อเซ้านี้ แม่ญิงไทพวกเฮาผู้ลางคน ได้เตรียมโตไปฮดน้ำศพอยู่อุโมงค์

ลูกา 24:23 แล้วบัดเขาบ่พ้อศพของเพิ่น เขาเลยหลบมาเว้าให้หมู่ฟังว่า เขาได้เห็นเทวทูต ที่บอกเขาว่าเพิ่นได้คืนมามีซีวิตแล้ว

ลูกา 24:24 แล้วพวกเฮาลางคนไปเบิ่ง เห็นแต่อุโมงค์เปล่าๆ บ่เห็นศพคือแม่ญิงเว้าอีหลี

ลูกา 24:25 แล้วพระเยซูเลยเว้าให้เขาว่า “โอ้ คือปึกคือหนาแท้ ซ้าหลายที่สิเซื่อคำทำนายของผู้เป็นปากเป็นเสียงของพระเจ้า

ลูกา 24:26 พระคริสต์ฮั่น มันสมควรอยู่บ้อ ที่เพิ่นสิผ่านการทนทุกข์ทรมาน ถืกเหยียดหยามแนวนี้ โดยเปล่าประโยชน์ กว่าสิเข้าสู่ศักดิ์ศรีของเพิ่น”

ลูกา 24:27 แล้วตั้งแต่หนังสือปฐมกาลของโมเสส ไปจนฮอดพวกหนังสือของผู้เป็นปากเป็นเสียงฮั้น พระเยซูได้บรรยายให้เขาฟังเมิ้ดคู่แนวที่เล็งเถิงเพิ่น

ลูกา 24:28 บัดพวกเขาไปใกล้สิฮอดบ้านเอมมาอูสแล้ว หม่องที่เขาสิมุ่งไปฮั้น พระเยซูเลยทำท่าว่าสิเลยไปอีก

ลูกา 24:29 แต่ว่าเขาดึงเพิ่นไว้ ซักซวนเพิ่น ว่า “ให้มาแวะค้างคืนนำเฮาอยู่นี้ซะก่อน ย้อนมันสิค่ำแล้ว” แล้วเพิ่นกะเลยเข้าไปพักอยู่นำเขา

ลูกา 24:30 แล้วบัดนี้ มันเป็นไปที่ว่า พอเพิ่นนั่งโต๊ะนำเขา เพิ่นกะเลยหยิบขนมปังขึ้นมาขอบคุณพระเจ้า แล้วบิยื่นให้เขา

ลูกา 24:31 พอดี ตาของเขาถืกเปิดออก ฮู้เมื่อว่าเป็นพระเยซู พอฮู้เมื่อแล้วเพิ่นกะหายไป

ลูกา 24:32 เขาเลยเว้ากันว่า “สมพอแล้วเนาะ โตเฮาฮู้สึกร้อนรนใจ ตอนที่เพิ่นเปิดบรรยายข้อพระคำให้เฮาฟังอยู่นำทาง”

ลูกา 24:33 แล้วในยามฮั้น เขากะพากันลุกขึ้นหลบเมือเมืองเยรูซาเล็มโลด ไปพ้อกันกับสิบเอ็ดคนฮั้น ตอนพวมฮ่วมกันกับคนอื่นๆ ที่อยู่ฮั้นนำ

ลูกา 24:34 แล้วพวกเขาเว้าว่า “พระเยซูได้คืนมาแต่ตายอีหลี ย้อนว่าเพิ่นได้ปรากฎให้เปโตรเห็นแล้ว”

ลูกา 24:35 แล้วสองคนฮั่นได้เว้าเรื่องปันเขาฟัง แนวที่เป็นไปนำทาง กับบัดเขาฮู้เมื่อว่าเป็นพระเยซูตอนเพิ่นบิขนมปัง

ลูกา 24:36 พวมเว้าอยู่ฮั่น พระเยซูมายืนอยู่กลางพวกเขา เว้าว่า “ขอให้สันติภาพสถิตอยู่นำพวกเจ้าเด้อ”

ลูกา 24:37 แต่ว่า พวกเขาทั้งตกใจ ทั้งหย้าน คึดว่าเห็นผี

ลูกา 24:38 พระเยซูกะเลยปลอบใจเขาว่า “เป็นหยังจั่งอุกอั่งใจ คึดสงสัยแท้

ลูกา 24:39 นี่แน่ะ มือกับเท้าของเฮาหนิแม่นเฮาอีหลี แล้วจับเบิ่งดู ตนโตของเฮาหนิ ผีบ่เคยมีเนื้อมีดูกคือจั่งพวกเจ้าเห็นโตเฮาดอก”

ลูกา 24:40 พอเว้าแล้วพระเยซูกะยื่นมือยื่นเท้าให้เขาเบิ่ง

ลูกา 24:41 แล้วขนาดเขาทั้งยังว่า เหลือซื่อ ทั้งดีใจ ทั้งเป็นตางึดอยู่ฮั้น พระเยซูเว้ากับเขาว่า “พวกเจ้ามีแนวสิกินอยู่นี้บ้อ”

ลูกา 24:42 เขาเลยเอาปลาปิ้งต่อนหนึ่ง กับรังผึ้งมาให้เพิ่น

ลูกา 24:43 แล้วเพิ่นกะกินต่อหน้าให้พวกเขาเห็นโลด

ลูกา 24:44 แล้วพระเยซูบอกเขาว่า “ถ้อยคำแนวหมู่นี้ เฮาเคยบอกพวกเจ้าอยู่แล้ว ว่า คู่แนวต้องสำเร็จเมิ้ด ตามข้อที่มีเขียนไว้ในหนังสือกฎบัญญัติของโมเสส กับหนังสือพวกผู้เป็นปากเป็นเสียง กับหนังสือสดุดี อันที่เล็งเถิงโตเฮาเมิ้ดคู่ข้อ”

ลูกา 24:45 เว้าแล้วพระเยซูเปิดจิตใจของพวกเขา ให้เข้าใจลึกซึ้งดีในพระคำของพระเจ้า

ลูกา 24:46 แล้วเพิ่นบอกเขาว่า “มีการเขียนไว้ว่าจั่งซี้ จำเป็นแล้ว เฮาผู้เป็นพระคริสต์ (พระผู้โปรดฮั่น) ต้องถืกการทรมาน แล้วเป็นขึ้นมาจากตายในมื้อที่สาม

ลูกา 24:47 แล้วว่า การกลับใจใหม่ กับการให้อภัยบาป ต้องประกาศในนามของเฮา เริ่มในเมืองเยรูซาเล็มจนออกไปฮอดทั่วคู่ประเทศซาติ

ลูกา 24:48 แล้วพวกเจ้าหนิ เป็นพยานหลักฐานเถิงเรื่องแนวหมู่นี้

ลูกา 24:49 นี่แน่ะ เฮาสิส่งแนวที่พระเจ้า ผู้เป็นพ่อเฮา ได้สัญญาไว้ฮั่น ลงมาอยู่นำพวกเจ้า แต่ให้คอยถ้าในเมืองเยรูซาเล็มนี้ก่อน จนกว่าพวกเจ้าได้ฮับพลังอำนาจจากเบื้องบน”

ลูกา 24:50 เว้าแล้ว พระเยซูได้พาพวกเขาออกไปฮอดหมู่บ้านเบธานี แล้วเพิ่นยกมือขึ้นอวยพรเขา

ลูกา 24:51 บัดนี้ มันเป็นไปที่ว่า พอพระเยซูพวมอวยพรเขาอยู่ฮั่น เพิ่นได้ถืกฮับขึ้นไปเข้าสู่สวรรค์

ลูกา 24:52 แล้วพวกเขาได้นมัสการเพิ่น จั่งสิหลบเมือเยรูซาเล็มด้วยความดีอกดีใจอย่างหลาย

ลูกา 24:53 แล้วพวกเขาได้เข้าไปในพระวิหารอยู่เรื่อยๆ ยกย่องสรรเสริญพระเจ้าอยู่ฮั่น ฮาเมน