ลูกา – Luke บทที่ 22

ลูกา 22:1 ตอนฮั้น ใกล้สิฮอดงานเทศกาล เลี้ยงกินขนมปังที่บ่ใส่เซื้อ ฉลองครบรอบมื้อที่พระเจ้าได้กู้ซาติให้พ้นการเป็นทาสในประเทศอียิปต์

ลูกา 22:2 บัดนี้ พวกหัวหน้านำเครื่องถวายกับพวกเสมียนฯ ยังฮ่วมหัวกันหาทางสิจัดการฆ่าพระเยซูเป็นทางอ้อมย้อนว่า เขาหย้านประซาซน

ลูกา 22:3 ตอนนี้ล่ะ มารซาตานได้เข้าในใจของยูดาสไทอิสคาริโอท ผู้ที่นับว่าเป็นลูกศิษย์คนหนึ่งของพระเยซูในพวกสิบสองคนฮั่น

ลูกา 22:4 พอเข้าในใจแล้ว ยูดาสกะไปหาพวกหัวหน้านำเครื่องถวายกับพวกหัวหน้ายามเบิ่งแยงพระวิหาร หาทางทรยศมอบพระเยซูไว้ในกำมือของเขา

ลูกา 22:5 บัดนี้ พวกเขากะดีใจอย่างใหญ่เลยตกลงว่าสิเอาเงินจ้างเขา

ลูกา 22:6 พอยูดาสตกลงสัญญากันไว้แล้วกะหาโอกาสทรยศมอบพระเยซูให้เขาในยามว่าง มีคนบ่หลาย

ลูกา 22:7 พอฮอดมื้อแรกของงานเลี้ยงฉลองกู้ซาติ เป็นยามที่แกะน้อยสิต้องถืกฆ่าถวาย

ลูกา 22:8 แล้วในมื้อฮั้นพระเยซูได้บอกเปโตรกับยอห์นว่า “ให้ไปจัดเตรียมแนวกินไว้ให้พวกเฮากินฉลองกันเด้อ”

ลูกา 22:9 เขาถามเพิ่นว่า “อาจารย์สิให้จัดอยู่ใส”

ลูกา 22:10 พระเยซูเลยบอกเขาว่า “นี่แน่ะ บัดพวกเจ้าเข้าไปในเมือง สิพ้อซายผู้หนึ่งถือไหน้ำมา ให้เจ้าไปนำลาวเด้อ ลาวไปเฮือนใดกะให้ไปนำลาวโลด

ลูกา 22:11 แล้วให้เจ้าเว้ากับเจ้าของเฮือนฮั่นว่า ‘อาจารย์ของเฮาให้มาถามเจ้าว่า ห้องพักแขกที่เพิ่นสิกินเลี้ยงฉลองมื้อกู้ซาติกับลูกศิษย์ของเพิ่นอยู่ใส’

ลูกา 22:12 แล้วเขาสิพาพวกเจ้าขึ้นไปเบิ่งห้องใหญ่อยู่ซั้นเทิง ที่ตกแต่งไว้แล้ว ให้พวกเจ้าจัดเตรียมไว้อยู่ฮั้นเด้อ”

ลูกา 22:13 แล้วพอพวกเขาเข้าไปในเมือง เขาได้พ้อตามความเว้าที่พระเยซูบอกไว้ฮั้น แล้วเขากะเลยจัดเตรียมไว้เพื่อเลี้ยงฉลองมื้อกู้ซาติในห้องฮั่น

ลูกา 22:14 พอฮอดยามฉลองแล้ว พระเยซูได้นั่งฮ่วมโต๊ะกินกับพวกทูตพิเศษสิบสองคนฮั่น

ลูกา 22:15 แล้วเพิ่นเว้ากับเขาว่า “เฮาหนิร้อนรนใจหลายที่สิฮ่วมโต๊ะกินฉลองกันกับพวกเจ้าในมื้อนี้ ก่อนเฮาสิถืกทรมาน

ลูกา 22:16 “คือ เฮาบอกพวกเจ้าว่า เฮาสิบ่ได้กินฉลองนี้อีกจนกว่าสิสำเร็จผลอยู่ในแผ่นดินของพระเจ้าพู้น”

ลูกา 22:17 พอเว้าแล้ว พระเยซูได้ฮับจอกไว้ ขอบคุณพระเจ้าแล้วจั่งยื่นให้ลูกศิษย์ บอกว่า “ฮับเอาซะ ปันกันดื่มเด้อ”

ลูกา 22:18 คือเฮาบอกพวกเจ้าว่า เฮาสิบ่ได้ดื่มน้ำอง่นุนี้อีกจนกว่าแผ่นดินของพระเจ้าสิมาตั้ง”

ลูกา 22:19 เว้าแล้วพระเยซูกะฮับก้อนขนมปังขึ้นมา ขอบคุณพระเจ้าแล้วจั่งหักเป็นเปี่ยง ยื่นให้พวกลูกศิษย์ แล้วบอกเขาว่า “นี้เล็งเถิงโตของเฮา ให้กินเป็นที่ระลึกเถิงเฮาเด้อ

ลูกา 22:20 แล้วในทำนองเดียวกัน พระเยซูได้ฮับเอาจอกขึ้นมา ขอบคุณพระเจ้าแล้วยื่นให้ลูกศิษย์ เว้าว่า “จอกน้ำองุ่นนี้ เล็งเถิงคำสัญญาใหม่ซึ่งเป็นเลือดของเฮาที่สิไหลออกเพื่อพวกเจ้า

ลูกา 22:21 แต่ นี่แน่ะ มือของผู้ที่สิทรยศเฮาฮั่นพวมวางลงใส่โต๊ะเดียวกันกับเฮาอยู่เดียวหนิ

ลูกา 22:22 แท้จริงแล้ว เฮาผู้เป็นบุตรมนุษย์ต้องเสียซีวิตไปตามแผนงานที่พระเจ้ามีไว้อยู่แล้ว แต่ระวังพินาศเด้อ ผู้ที่สิทรยศเฮา”

ลูกา 22:23 บัดนี้ พวกลูกศิษย์เริ่มถามกันเถิงว่า ผู้ใดในพวกเขาสิเฮ็ดจั่งซั้น

ลูกา 22:24 แล้วหว่างฮั้น ได้เกิดการโต้เถียงระหว่างกันว่า ผู้ใดในพวกเขาสิเป็นใหญ่เป็นโต

ลูกา 22:25 พระเยซูเลยบอกเขาว่า แท้จริงแล้ว พวกกษัตริย์ใซ้อำนาจเหนือประซาซน แล้วผู้ที่ถืออำนาจเหนือเขาฮั้นเอิ้นว่า ผู้บุญนายคุณ

ลูกา 22:26 แต่สำหรับพวกเจ้าหนิ มันสิบ่เป็นแนวฮั้นเลย คือผู้ที่สิเป็นใหญ่เป็นโตในพวกเจ้า กะให้เขาถ่อมโตเป็นผู้เล็กน้อย แล้วผู้ที่สิเป็นผู้นำต้องเป็นผู้ฮับใซ้หมู่

ลูกา 22:27 เฮาถาม ใผสิเป็นใหญ่ว่ากัน ผู้นั่งโต๊ะหรือผู้เดินโต๊ะ ตามธรรมดาเป็นผู้นั่งโต๊ะแม่นบ่ แต่ส่วนเฮาที่มานำพวกเจ้าอยู่หนิ เป็นผู้เดินโต๊ะ

ลูกา 22:28 แล้วพวกเจ้าหนิกะเป็นหมู่ฮ่วมทุกข์ฮ่วมสุขในการทดลองกับเฮามาตลอด

ลูกา 22:29 แล้วเฮาสิมอบแผ่นดินฮั้นไว้กับพวกเจ้า คือจั่งพระเจ้า ผู้เป็นพ่อเฮา ได้มอบไว้ให้เฮา

ลูกา 22:30 เพื่อเจ้าสิได้ฮ่วมโต๊ะเดียวกันกินดื่มกับเฮาอยู่แผ่นดินฮั่น กับนั่งบัลลังก์พิพากษาพวกอิสราเอลสิบสองเผ่า

ลูกา 22:31 แล้วพระเยซูเว้าว่า “ซีโมนเปโตรเอ้ย สำหรับเจ้าหนิ มารซาตานได้ขออนุญาตอยากทดลองเจ้าปานฝัดข้าวฮ่อนไปฮ่อนมาอยู่ฮั้น

ลูกา 22:32 แต่ว่าเฮาได้วอนขอต่อพระเจ้าแล้ว เพื่อความเซื่อของเจ้าสิบ่ล้มเหลวไป แล้วบัดเจ้าหันมาหาเฮาอีก กะให้เจ้าซ่อยซูกำลังพี่น้องเด้อ”

ลูกา 22:33 แต่เขาเลยเว้ากับพระเยซูยืนยันว่า “โอ้ยอาจารย์เอ้ย ผู้ข้าพร้อมที่สิเข้าคุกนำ ตายกะสิยอมตายนำ”

ลูกา 22:34 แต่พระเยซูเว้าว่า “เปโตรเอ้ย เฮาสิบอกเจ้า ก่อนไก่ขันข้อนสิแจ้ง เจ้าสิปฏิเสธสามเทื่อว่าบ่ฮู้จักเฮาเลย”

ลูกา 22:35 แล้วพระเยซูได้ถามพวกลูกศิษย์เบิ่งว่า “ตอนที่เฮาได้ส่งพวกเจ้าออกไปมือเปล่าฮั่น พวกเจ้าได้ขาดอีหยังบ้อ” พวกลูกศิษย์ตอบว่า “บ่ได้ขาดอีหยังเลย”

ลูกา 22:36 แล้วพระเยซูบอกเขาว่า “เทื่อนี้ผู้ใดมีเงินมีหยังกะให้ห่อไปนำโลด กับคั่นใผบ่มีดาบกะให้ขายเสื้อคลุมไปซื้อเอาเด้อ

ลูกา 22:37 คือเฮาบอกพวกเจ้าว่า คู่อันคู่แนวที่มีเขียนไว้ในพระคำที่เล็งเถิงเฮาฮั้นกะต้องสำเร็จให้เมิ้ด แล้วมีแนวหนึ่งที่มีเขียนไว้ที่ยังบ่ทันเป็นไป คือ ‘ผู้ฮั้นนับว่าเป็นผู้ผิดกฎหมาย'”

ลูกา 22:38 แล้วลูกศิษย์เว้าว่า “นี้เด อาจารย์เอ้ย มีดาบอยู่สองเล่ม” พระเยซูบอกว่า “นี้กะพอแล้ว”

ลูกา 22:39 แล้วพระเยซูออกจากหม่องฮั้น ขึ้นไปภูมะกอกเทศหม่องเคยไป แล้วพวกลูกศิษย์กะตามเพิ่นไป

ลูกา 22:40 พอไปฮอดแล้วพระเยซูเตือนพวกลูกศิษย์ว่า “ให้วอนขอต่อพระเจ้าไว้เด้อ เพื่อสิบ่เข้าสู่การทดลอง”

ลูกา 22:41 แล้วพระเยซูกะย่างออกจากเขาไปประมาณระยะขว้างหินตก นั่งคุกเข่าลงเว้านำพระเจ้าอยู่ฮั้น

ลูกา 22:42 ว่า “พ่อเอ้ย คั่นมีทางอื่นที่เป็นไปได้ตามจุดประสงค์ของพ่อ ลูกขอให้พ่อเอาจอกนี้ออกจากลูกไป จั่งใดกะตาม คั่นบ่ได้ ขอให้เป็นไปตามจุดประสงค์ของพ่อ บ่แม่นจุดประสงค์ของลูก”

ลูกา 22:43 บัดนี้ มีเทวทูตองค์หนึ่งลงมาอยู่นำพระเยซู ซ่อยซูกำลังให้เพิ่น

ลูกา 22:44 แล้วตอนพระเยซูพวมไหว้วอนอยู่ฮัน เพิ่นอุกอั่งทุกข์ฮ้อนในใจหลายจนเฮื่อไหลหยาดลงใส่ดินปานเลือด

ลูกา 22:45 แล้วบัดพระเยซูลุกขึ้นจากการไหว้วอน พอไปฮอดลูกศิษย์ เห็นว่าเขานอนหลับอยู่ย้อนเขามีความเศร้าโศกหลาย

ลูกา 22:46 เพิ่นเลยบอกพวกเขาว่า “เป็นหยังพวกเจ้านอนหลับอยู่ ลุกขึ้นไหว้วอนต่อพระเจ้าเพื่อสิบ่เข้าในการทดลอง”

ลูกา 22:47 แล้วพอพระเยซูเว้ายังบ่ทันขาดคำซ้ำ มีพวกคนแห่กันมา แล้วผู้ที่นำหน้าพวกเขาคือ ยูดาส เป็นผู้หนึ่งในลูกศิษย์สิบสองคนฮั้น พอมาเถิงพระเยซู ยูดาสกะเข้าไปจุบแก้มของเพิ่น

ลูกา 22:48 แต่พระเยซูถามเขาว่า “ยูดาสเอ้ย เจ้ามาทรยศเฮาผู้เป็นบุตรมนุษย์ด้วยการจุบแก้มซั้นบ้อ”

ลูกา 22:49 บัดพอพวกลูกศิษย์อยู่ฮั่นเห็นท่าบ่ดีที่สิเกิดขึ้นฮั้น เขาถามเพิ่นว่า “อาจารย์เอ้ย สิให้พวกผู้ข้าใซ้ดาบฟันบ้อ”

ลูกา 22:50 บัดนี้ลูกศิษย์ผู้หนึ่งกะซักดาบออกมาฟันใส่พวกคนที่มาจับพระเยซู ถืกหูขวาคนใซ้ของเจ้าคณะนำเครื่องถวายให้ขาดไป

ลูกา 22:51 พระเยซูเลยบอกว่า “ขอซักอย่างเดียว” แล้วกะยื่นมือแตะหูฮั้น มันเลยเซาเป็นดีคือเก่า

ลูกา 22:52 แล้วพระเยซูเว้ากับพวกหัวหน้านำเครื่องถวาย กับพวกหัวหน้ากองเวรรักษาพระวิหาร กับพวกผู้นำของบ้านเมือง ที่พากันมาจับเพิ่น ว่า “พวกเจ้าคึดว่าสิมาจับโจรผู้ร้ายบ้อ คือถือดาบถือค้อนมา

ลูกา 22:53 “ตอนเฮาเคยอยู่กับพวกเจ้าในพระวิหารอยู่คู่มื้อฮั่น เป็นหยังพวกเจ้าคือบ่ได้หาจับเฮาตอนฮั้น แต่โมงนี้เป็นโมงของพวกเจ้า กับโมงของอำนาจแห่งความมืดนำ”

ลูกา 22:54 พอพวกเขาจับพระเยซูแล้วกะนำเพิ่นไปเฮือนของเจ้าคณะนำเครื่องถวาย ส่วนเปโตรกะได้ตามไปห่างๆ

ลูกา 22:55 พอพวกเขาได้ดังไฟอยู่บริเวณเดิ่นเฮือน แล้วนั่งฝิงไฟนำกัน เปโตรกะเลยไปฝิงนำเขา

ลูกา 22:56 แล้วมีสาวใซ้ผู้หนึ่ง พอเห็นเปโตรนั่งฝิงไฟ เว้าขึ้นว่า “ผู้นี้ล่ะเคยอยู่นำพระเยซู”

ลูกา 22:57 แต่เปโตรปฏิเสธว่า “ญิงเอ้ย ข้อยบ่ฮู้จักเขา”

ลูกา 22:58 อยู่มาอีกจักหน่อย มีซายผู้หนึ่งท้วงเปโตรว่า “เจ้าเป็นพวกพระเยซูคือกัน” แต่เปโตรปฏิเสธว่า “บ่แม่น อ้ายเอ้ย”

ลูกา 22:59 อยู่อีกประมาณซั่วโมงหนึ่ง มีซายผู้หนึ่งเว้าขึ้นมาอย่างมั่นใจว่า “แต่แท้แล้ว คนนี้เคยได้อยู่กับผู้ฮั้น ย้อนว่าเขาเป็นคนกาลิลี”

ลูกา 22:60 แต่เปโตรได้ปฏิเสธอีกว่า “นายเอ้ย ข้อยบ่ฮู้เรื่องที่เจ้าเว้าหนิ” เปโตรเว้ายังบ่ขาดคำซ้ำ ไก่กะขันโลด

ลูกา 22:61 แล้วพระเยซูกะเหลียวเบิ่งเปโตร พอเบิ่งแล้วเปโตรเลยคึดซวดคำเว้าของเพิ่น ตามที่เคยบอกเขาว่า “ก่อนไก่สิขันฮั่น เจ้าสิปฏิเสธว่าบ่ฮู้จักเฮาสามเทื่อ”

ลูกา 22:62 แล้วเปโตรเลยออกไปฮ้องไห้เสียใจอย่างแฮง

ลูกา 22:63 บัดนี้พวกคนที่คุมโตพระเยซูไว้ ได้พากันเว้าเหยียดหยามเฆี่ยนตีเพิ่นอยู่ฮั่น

ลูกา 22:64 แล้วพอเอาผ้าปิดตาพระเยซูไว้แล้ว เขาถามเพิ่นว่า “ให้ทายมาโลด ว่าใผเป็นผู้ตีเจ้า”

ลูกา 22:65 กับพวกเขาได้เว้าลบหลู่ดูหมิ่นเพิ่นเป็นหลายอันหลายแนว

ลูกา 22:66 พอแจ้งขึ้นมาแล้ว พวกผู้นำของบ้านเมือง กับพวกหัวหน้านำเครื่องถวาย กับพวกเสมียนฯ ได้มาฮ่วมกันเป็นคณะกรรมการศาล จั่งเว้าว่า

ลูกา 22:67 “คั่นเจ้าเป็นพระคริสต์ฮั้น ให้บอกมาแหม้” แต่พระเยซูตอบเขาว่า “คั่นว่าเฮาบอกพวกเจ้า พวกเจ้าสิบ่ยอมเซื่อเด็ดขาด

ลูกา 22:68 “แล้วคั่นเฮาถามพวกเจ้า พวกเจ้าคือสิบ่ยอมตอบ หรือปล่อยเฮาไป

ลูกา 22:69 “แต่ให้ฮู้ว่า ตั้งแต่นี้ไปเฮาผู้เป็นบุตรมนุษย์ สินั่งอยู่ทางขวาของพระเจ้าฮับมอบอำนาจจากเพิ่น”

ลูกา 22:70 แล้วพวกเขาถามว่า “คั่นจั่งซั่น เจ้าเป็นพระบุตรของพระเจ้าแม่นบ้อ” พระเยซูตอบว่า “แม่นแล้ว เฮาได้เป็นตามที่เจ้าเว้าฮั้น”

ลูกา 22:71 บัดนี้พวกเขาเว้ากันว่า “พวกเฮาต้องการคำพยานหยังอีกบ้อ คือพวกเฮาเองได้ยินเขาฮับปากพอแฮงแล้ว”
////////// ////////// //////////