ลูกา – Luke บทที่ 21

ลูกา 21:1 พวมเว้าอยู่ฮั่น พระเยซูเหลียวเห็นพวกคนฮั่งมีพวมพากันเอาทรัพย์มาใส่หีบถวาย

ลูกา 21:2 กับได้เห็นแม่ม่ายทุกข์ยากผู้หนึ่ง เอาเงินสตางค์สองเหรียญอันสุดท้ายที่เขามีอยู่ มาถวายคือกัน

ลูกา 21:3 พระเยซูเลยเว้าขึ้นว่า “เฮาสิเว้าตามซื่อนี้ล่ะ แม่ม่ายคนทุกข์ยากหนิ ได้ถวายหลายกว่าเมิ้ดคู่คนอยู่หนิ

ลูกา 21:4 ย้อนว่าพวกเขาฮั้นมีแต่ถวายเงินเหลือใซ้ซื่อๆ แต่แม่ม่ายผู้ทุกข์ยากนี้ ลาวได้ถวายเงินจนเมิ้ดที่ลาวมีไว้เพื่อเลี้ยงโตเอง”

ลูกา 21:5 บัดนี้ มีผู้ลางคนพวมซมความงามของพระวิหารฮั่น ที่ตกแต่งด้วยหินงามกับของถวายต่างๆ อย่างดี พระเยซูเลยเว้าว่า

ลูกา 21:6 “ของแนวหมู่นี้ที่พวกเจ้าเบิ่งว่างาม มันสิมีมื้อมาที่มันกะสิถืกพังทลายลง ก้อนหินนี้สิบ่เหลือจักก้อนที่เทินซ้อนกัน”

ลูกา 21:7 พวกเขาเลยถามพระเยซูว่า “อาจารย์ครับ อีกโดนปานใดจั่งสิเกิดขึ้น สิมีหมายสำคัญอีหยังบ้อ ที่สิบ่งบอกไว้ก่อน”

ลูกา 21:8 พระเยซูเลยบอกเขาว่า “ระวังให้ดีเด้อ อย่าหลงกลผู้ใดเลย ย้อนว่าสิมีหลายคนมาในนามของเฮา อ้างว่า ‘เฮาหนิเป็นพระผู้โปรดฮั้น’ กับสิอ้างว่า ‘ยามฮั้นใกล้สิมาฮอดแล้ว’ จั่งซั้น อย่าติดตามเขาไปเด้อ

ลูกา 21:9 แล้วบัดพวกเจ้าได้ยินว่ามันเกิดสงครามวุ่นวายอยู่หม่องฮั้นหม่องนี้ บ่ให้ตกใจหย้านเด้อ ย้อนว่าแนวหมู่นี้สิต้องเป็นไปอยู่แล้ว แต่ยังสิบ่ทันฮอดปลายยุคปลายสมัยฮั่น

ลูกา 21:10 แล้วเพิ่นว่า คือสิเกิดประเทศฮั้นประเทศนี้ แผ่นดินฮั้นแผ่นดินนี้ ลุกขึ้นต่อสู้กัน

ลูกา 21:11 กับสิเกิดแผ่นดินไหวหลายหม่อง กับสิเกิดการอึดอยากหมากหิว กับโรคห่าต่างๆ กับสิมีลางร้ายอันเป็นตาหย้านเฮ็ดให้เห็นมาแต่เทิงฟ้า

ลูกา 21:12 แต่ว่าก่อนสิฮอดยามฮั้น สิมีคนมาจับมาข่มเหงเฮ็ดใส่พวกเจ้า สิมอบพวกเจ้าให้คนในธรรมศาลา กับเอาไปขังคุกไว้ กับนำพวกเจ้าไปอยู่ต่อหน้ากษัตริย์ กับต่อหน้าเจ้านายบ้านเมือง ย้อนเจ้าเห็นแก่นามของเฮา

ลูกา 21:13 แต่จั่งใดกะตาม มันสิกลายเป็นโอกาสดีให้พวกเจ้าเป็นพยานเถิงเฮา

ลูกา 21:14 จั่งซั้น ให้พวกเจ้าทำใจไว้ให้นิ่งก่อน บ่ต้องคึดหลายว่าสิตอบคำถามของเขาแบบใด

ลูกา 21:15 ย้อนว่าเฮาสิดลใจให้เจ้ามีปัญญาตอบได้ แล้วพวกฝ่ายตรงข้ามเจ้าฮั่นสิจนปัญญา เมิ้ดทางสิต่อต้านตอบโต้เจ้า

ลูกา 21:16 แม้นแต่พ่อแม่พี่น้องกับหมู่พวกสิทรยศใส่เจ้า จนผู้ลางคนในพวกเจ้าสิถืกเขามอบไว้ให้ฆ่า

ลูกา 21:17 แล้วเมิ้ดคู่คนกะสิพากันเคียดซังเจ้า ย้อนเห็นแก่นามของเฮา

ลูกา 21:18 เถิงขนาดฮั้น แม้นแต่เส้นผมของเจ้าเส้นเดียวกะสิบ่เสียหาย

ลูกา 21:19 แล้วซีวิตของพวกเจ้าสิปลอดภัยไว้ย้อนความอดทนอันมั่นคงของเจ้า

ลูกา 21:20 แต่ว่าบัดยามเจ้าเห็นพวกกองทัพทหารมาอ้อมเมืองเยรูซาเล็มนี้อยู่รอบๆ กะให้ฮู้กันว่า มันใกล้สิถืกทำลายแล้ว

ลูกา 21:21 บัดฮอดยามฮั้น ให้ผู้ที่อยู่เมืองยูเดียหนีไปลี้อยู่ภูเขา แล้วผู้ที่อยู่ในเมืองนี้กะให้หนีออกไปเด้อ แล้วผู้ที่อยู่นอกเมืองกะอย่าคึดสิเข้ามาเลย

ลูกา 21:22 คือมื้อที่เฮาเว้าเถิงฮั่น สิเป็นมื้อล้างแค้นลงโทษของพระเจ้า โดยว่าเมิ้ดคู่อย่างสิต้องเป็นไปตามซึ่งมีเขียนไว้ในพระคำฮั้น

ลูกา 21:23 ยามฮั้น ระวังพินาศเด้อ พวกแม่ญิงที่ถือภามีท้อง กับผู้เป็นแม่ลูกอ่อน ย้อนสิเกิดโกลาหลเดือดฮ้อนในแผ่นดิน ย้อนเป็นยามที่แผ่นดินนี้สิถืกพิโรธอันฮ้ายแฮงของพระเจ้า

ลูกา 21:24 แล้วหลายคนสิล้มลงย้อนคมดาบ แล้วผู้ที่ยังอยู่สิถืกนำออกไปเป็นเชลยของคู่ประเทศ แล้วเมืองเยรูซาเล็มสิถืกเหยียบย่ำตกอยู่ใต้อำนาจของคนต่างซาติ จนกว่าสิเมิ้ดยุคการปกครองของเขาที่กำหนดไว้

ลูกา 21:25 แล้วมันสิมีลางร้ายเฮ็ดให้เห็นในดวงตะเว็น ดวงเดือน กับพวกดวงดาว แล้วในโลกนี้คู่ประเทศกะสิมีความโกลาหลวุ่นวาย ปานคลื่นทะเลซัดไปซัดมาดังสนั่นหวั่นไหว

ลูกา 21:26 แล้วคนสิเป็นลม จนหัวใจสิวายย้อนแนวที่สิมาเกิดขึ้นเทิงแผ่นดินโลก คืออำนาจเมิ้ดคู่แนวเทิงท้องฟ้ากะสิถืกการยับย้ายสะเทือนสะท้านไป’

ลูกา 21:27 บัดฮอดยามฮั้นล่ะ ซาวโลกทั้งปวงสิเห็นเฮาผู้เป็นบุตรมนุษย์ เสด็จลงมาในเมฆ ประกอบ ด้วยฤทธานุภาพ กับพระสิริอันยิ่งใหญ่

ลูกา 21:28 จั่งซั่น อย่าท้อใจเด้อบัดแนวหมู่นี้เริ่มสิเป็นมา แต่ให้เหลียวเบิ่งท้องฟ้าโลดเด้อ ย้อนมันใกล้สิฮอดยามฮั้น ที่เฮาสิมาโปรดพวกเจ้าแล้ว”

ลูกา 21:29 แล้วพระเยซูเว้าเรื่องเปรียบเทียบให้เขาฟังว่า “เบิ่งกกหมากเดื่อดู้ กับกกไม้อื่นๆ คู่แนวนำ

ลูกา 21:30 บัดฮอดยามมันสิแตกใบป่งใหม่ พวกเจ้ายังเบิ่งออกได้ว่า ใกล้สิฮอดยามฮ้อนแล้ว

ลูกา 21:31 คือกันนี้ล่ะ บัดยามเจ้าเห็นแนววุ่นวายฮั่นเริ่มสิเกิดขึ้น ให้ฮู้ไว้ว่าแผ่นดินของพระเจ้ามาใกล้สิฮอดแล้ว

ลูกา 21:32 เฮาสิเว้าความจริงตามซื่อนี้ล่ะ ยุคที่สิมาฮั้น สิบ่ได้ผ่านพ้นไปจนกว่าแนวหมู่นี้สิเกิดขึ้นเมิ้ด

ลูกา 21:33 คือแม้นแต่ท้องฟ้ากับแผ่นดินโลกสิมีมื้อสูญหายไป ถ้อยคำของเฮาหนิสิยั่งยืนอยู่ตลอดไป

ลูกา 21:34 จั่งซั่น ให้พวกเจ้าระวังไว้ให้ดีเด้อ อย่าให้ซีวิตจิตใจของเจ้าหน่วงไว้ด้วยการโฮเฮมัวเมา กับภาระต่างๆ ทางโลกนี้เด้อ บ่ซั่นมื้อที่เฮาสิมาฮั่น สิมาไวอย่างบ่คาดคึดเลย

ลูกา 21:35 แล้วมื้อฮั้นสิมาปานกับดัก ลั่นใส่คนเมิ้ดทั่วแผ่นดินโลก

ลูกา 21:36 จั่งซั้น ให้เบิ่งไว้เด้อ อธิษฐานเว้านำพระเจ้าอยู่คู่ยามเวลา ว่าเจ้าสิสมควรเป็นผู้ที่สิพ้นเหตุการณ์แนวที่สิเป็นมาฮั้น กับมีสิทธิ์ยืนอยู่ต่อหน้าเฮาผู้เป็นบุตรมนุษย์”

ลูกา 21:37 ในตอนกลางเว็น พระเยซูได้ไปสั่งสอนประซาซนในพระวิหารเป็นประจำ แต่ในยามกลางคืน เพิ่นกะขึ้นไปอยู่เทิงภูเขาที่คนเอิ้นกันว่าภูเขาหมากกอกเทศ

ลูกา 21:38 แล้วพอฮอดยามเซ้ามืด คนหลวงหลายกะพากันมาถ้าฟังคำสอนของเพิ่นอยู่พระวิหาร
////////// ////////// //////////