ยอห์น – John บทที่ 3

ยอห์น 3:1 บัดนี้ มีซายผู้หนึ่งในพวกคณะฟาริสี ซื่อว่า นิโคเดมัส มีตำแหน่งเป็นผู้นำของคนยิว

ยอห์น 3:2 ซายผู้นี้ได้มาหาพระเยซูเป็นยามกลางคืน แล้วเว้ากับเพิ่นว่า อาจารย์ พวกผู้ข้าฮู้จักดีว่าอาจารย์ต้องเป็นผู้สอนมาจากพระเจ้า ย้อนว่าบ่มีใผสามารถเฮ็ดเครื่องหมายอันสำคัญแนวนี้ได้ นอกจากพระเจ้าสถิตอยู่นำเขา

ยอห์น 3:3 พระเยซูตอบเขาว่า เฮาสิบอกเจ้าตามซื่อนี้ล่ะ นอกจากคนใดคนหนึ่งเกิดใหม่จากเบื้องบน เขาบ่มีสิทธิ์เห็นแผ่นดินของพระเจ้าเลย

ยอห์น 3:4 นิโคเดมัสเว้าว่า “โอ้ย คนสิเกิดใหม่ได้แนวใดบัดเฒ่าแล้ว เขาสิเข้าไปในท้องแม่อีกเทื่อที่สอง แล้วเกิดอีกได้บ้อ”

ยอห์น 3:5 พระเยซูตอบว่า “เฮาสิบอกเจ้าอีกตามซื่อนี้ล่ะ ว่า นอกจากคนใดคนหนึ่งสิเกิดใหม่โดยน้ำ กับโดยพระวิญญาณ เขาสิบ่มีสิทธิ์เข้าในแผ่นดินของพระเจ้าเลย

ยอห์น 3:6 คือการเกิดมาจากเลือดเนื้อเซื้อไข กะเป็นแต่เลือดเนื้อเซื้อไข แต่ว่าการเกิดใหม่จากพระวิญญาณ กะเป็นจิตวิญญาณ

ยอห์น 3:7 บ่ต้องแปลกใจ ที่เฮาได้บอกเจ้ามาแล้วว่า ‘เจ้าต้องเกิดใหม่’

ยอห์น 3:8 คือส่วนลมหนิ มันกะพัดไปมาตามกระแสของมัน แล้วเจ้ากะได้ยินเสียงมันอยู่ แต่บ่สามารถบอกได้ว่ามันพัดมาจากใสแล้วไปใส ส่วนผู้ที่เกิดใหม่ฝ่ายวิญญาณกะคือกันฮั้นล่ะ”

ยอห์น 3:9 นิโคเดมัสกะเลยถามอีกว่า “แนวหมู่นี้สิเป็นไปได้จั่งใด”

ยอห์น 3:10 พระเยซูตอบลาวว่า “ขนาดเจ้าผู้เป็นอาจารย์สอนพวกอิสราเอลแล้ว เจ้ากะยังบ่เข้าใจในเรื่องนี้อยู่บ้อ

ยอห์น 3:11 “เฮาสิบอกเจ้าตามซื่อนี้ล่ะ คือเฮาได้เว้าเป็นพยานเถิงแนวที่เฮาได้ฮู้ได้เห็นมาแล้ว แต่ว่าพวกเจ้ากะยังบ่ยอมฮับในคำพยานของเฮาเลย

ยอห์น 3:12 “คั่นเฮาบอกเจ้าในเรื่องทางธรรมดาของโลกนี้ แล้วเจ้ายังบ่เซื่อ บัดเฮาสินำเอาเรื่องทางสวรรค์มาเว้า เจ้าสิเซื่อได้จั่งใด

ยอห์น 3:13 “คือบ่เคยมีใผขึ้นไปสวรรค์เลย มีแต่เฮาผู้เป็นบุตรมนุษย์ซึ่งสถิตอยู่เทิงสวรรค์ ที่ได้เสด็จลงมา

ยอห์น 3:14 “แล้วการที่โมเสสได้ยกงูทองแดงขึ้นในถิ่นแห้งแล้งฮั้น บุตรมนุษย์เฮาหนิ สิต้องถืกยกขึ้นคือกัน (ให้ดู กันดารวิถี 21:4-9)

ยอห์น 3:15 “เพื่อว่าผู้ใดที่เซื่อวางใจในเฮา ผู้ฮั้นสิบ่ได้พินาศ แต่มีซีวิตตลอดชั่วนิรันดร์

ยอห์น 3:16 “โดยว่า พระเจ้าได้เมตตาฮักซาวโลกหลายส่ำใด จั่งได้อุทิศพระบุตร ลูกโทนของเพิ่น เพื่อผู้ที่เซื่อวางใจในเพิ่นผู้ฮั้น สิบ่ได้พินาศ แต่มีซีวิตตลอดกาลเป็นนิจ

ยอห์น 3:17 “ย้อนว่า พระเจ้าบ่ได้ใซ้พระบุตรของเพิ่นเข้ามาในโลกเพื่อสิตัดสินลงโทษโลก แต่มาเพื่อโลกสิรอดพ้นโดยทางพระบุตรฮั้น

ยอห์น 3:18 “จั่งซั้น ส่วนผู้ที่เซื่อวางใจในพระบุตรฮั้น สิบ่ได้อยู่ใต้การตัดสินลงโทษ แต่ส่วนผู้ใดที่บ่เซื่อวางใจในพระบุตร ผู้ฮั้นสิต้องถืกการตัดสินลงโทษอยู่แล้ว ย้อนว่าเขาบ่ได้วางใจในพระบุตร ผู้เป็นลูกโทนของพระเจ้า

ยอห์น 3:19 “แล้วหลักของการตัดสินลงโทษเป็นแนวนี้ คือ แสงสว่างได้เข้ามาในโลกแล้ว แต่โลกฮักความมืดหลายกว่าฮักความสว่าง ย้อนว่าพฤติการของเขาซั่ว

ยอห์น 3:20 “คือคู่คนที่เฮ็ดซั่วมักสิเกลียดซังความสว่าง แล้วเขาหลีกจากความสว่างฮั้น หย้านว่าความซั่วของเขาฮั้นสิถืกเปิดเผยออก

ยอห์น 3:21 แต่ว่าผู้ที่มักเฮ็ดตามความจริงกะสิมาหาความสว่างฮั้นโลด เพื่อการดีของเขาสิปรากฏออกอย่างซัดแจ้ง ย้อนว่าเขาได้เฮ็ดโดยพึงอาศัยในพระเจ้า”

ยอห์น 3:22 ต่อจากฮั่นมา พระเยซูกับลูกศิษย์ของเพิ่นได้เดินทางไปแคว้นยูเดีย แล้วเพิ่นได้อยู่กับพวกประซาซน กับได้เฮ็ดการฮับจุ่มน้ำให้เขา

ยอห์น 3:23 ในยามเดียวกันฮั่น โยฮันพวมเฮ็ดการฮับจุ่มน้ำให้ประซาซน อยู่เมืองอายโนนใกล้เมืองสาลิม ย้อนว่ามีน้ำหลายอยู่หม่องฮั่น แล้วพวกประซาซนกะเลยพากันมาหาลาวเพื่อฮับการจุ่มน้ำ

ยอห์น 3:24 ตอนฮั้นโยฮันยังบ่ทันถืกเจ้าเมืองเฮโรดสั่งจับไปขังคุก (ให้ดู ลูกา 3:18-20)

ยอห์น 3:25 บัดนี้ เริ่มเกิดมีการโต้เถียงกันระหว่างลูกศิษย์ของโยฮันผู้ลางคน กับพวกคนยิว เถิงเรื่องการซำระล้างมลทินของเขา

ยอห์น 3:26 แล้วพวกลูกศิษย์ของโยฮันเลยพากันไปหาลาว บอกว่า อาจารย์เอ้ย คนผู้ฮั้นที่เคยอยู่กับอาจารย์อยู่ฟากแม่น้ำจอร์แดนพู้น คือผู้ที่อาจารย์เคยเว้าเถิงอยู่ นี่แน่ะ เขาพวมให้การจุ่มน้ำอยู่เดี๋ยวหนิ แล้วคู่คนพวมหลั่งไหลไปหาเขาอยู่

ยอห์น 3:27 โยฮันตอบพวกเขาว่า คนใดคนหนึ่งสิบ่ได้ฮับอีหยังเลย คั่นเพิ่นผู้อยู่เทิงสวรรค์ฮั้น สิบ่ได้ให้เขาก่อน

ยอห์น 3:28 แล้วพวกเจ้าเอง เป็นพยานที่ได้ยินเฮาเคยเว้าว่า ‘โตเฮาเองบ่แม่นพระคริสต์ พระผู้โปรดฮั้น’ แต่เฮาได้บอกว่า ‘เฮาถืกใซ้มาก่อนเพิ่น’

ยอห์น 3:29 คือผู้ที่มีสิทธิ์กับเจ้าสาวคือเจ้าบ่าว แล้วหมู่เจ้าบ่าวได้ยืนถ้าฟังเสียงของเจ้าบ่าวสิมา มีความปลื้มใจหลายบัดได้ยินเสียงเจ้าบ่าวฮั้น จั่งซั้นความปลื้มใจของโตเฮากะเต็มเปี่ยมแล้วอยู่เดี๋ยวหนิ

ยอห์น 3:30 แล้วความสำคัญของเพิ่นฮั่น กะต้องเพิ่มหลายขึ้น แต่ความสำคัญของเฮาหนิกะต้องน้อยลง

ยอห์น 3:31 คือผู้เพิ่นที่ลงมาจากเบื้องบน กะเป็นใหญ่เหนือเมิ้ด ส่วนผู้ที่มาจากโลกนี้ กะเป็นของธรรมดาโลกซื่อๆ เว้าแต่แนวทางโลกนี้ แต่ส่วนผู้ที่ลงมาจากสวรรค์ฮั้น เพิ่นเป็นใหญ่เหนือเมิ้ดคู่อันคู่แนว

ยอห์น 3:32 แล้วเพิ่นผู้ฮั้นกะเว้ายืนยันเถิงแนวที่เพิ่นได้เห็นได้ยินมา แต่บ่มีใผยอมฮับในคำพยานของเพิ่น

ยอห์น 3:33 แต่ส่วนผู้ที่ฮับคำพยานของเพิ่น ผู้ฮั้นยืนยันได้ว่าพระเจ้าเป็นผู้สัตย์จริง

ยอห์น 3:34 คือผู้ที่พระเจ้าใซ้มาฮั่น เว้าแต่ถ้อยคำของพระเจ้า โดยว่าพระเจ้าให้พระวิญญาณโดยบ่จำกัดเลย

ยอห์น 3:35 คือพระเจ้าผู้เป็นพ่อกะฮักแพงพระบุตรของเพิ่น แล้วได้มอบเมิ้ดคู่อันคู่แนวไว้ในมือของเพิ่นอยู่แล้ว

ยอห์น 3:36 แล้วส่วนผู้ที่เซื่อวางใจในพระบุตร เขามีซีวิตนิรันดร์อยู่แล้ว แต่ส่วนผู้ที่บ่ได้เซื่อพระบุตรฮั้น เขาสิบ่ได้เห็นซีวิตเลย แต่ความกริ้วโกรธอันฮ้ายแฮงของพระเจ้าได้ตกอยู่กับเขา
////////// ////////// //////////