ยอห์น – John บทที่ 1

ยอห์น 1:1 แต่กกแต่เค้าแต่ดั้งเดิมพู้น องค์อมตะธรรม ดำรงอยู่แล้ว แล้วองค์อมตะธรรมสถิตอยู่กับพระเจ้า แล้วองค์อมตะธรรมฮั่นเองเป็นพระเจ้า

ยอห์น 1:2 เพิ่นอยู่กับพระเจ้าในดั้งเดิมพู้น

ยอห์น 1:3 แล้วเมิ้ดคู่อันคู่แนวที่มีอยู่ ได้เนรมิตสร้างโดยเพิ่น แล้วนอกจากเพิ่น บ่มีหยังจักแนวที่เป็นมาโดยเพิ่นบ่ได้สร้าง

ยอห์น 1:4 ในเพิ่นนี้ล่ะ เป็นแหล่งซีวิต แล้วซีวิตฮั้นเป็นแสงสว่างให้ผู้คนทั้งหลาย

ยอห์น 1:5 แล้วแสงสว่างนี้ได้ส่องเข้ามาในความมืด แล้วความมืดบ่สามารถที่สิมีซัยต่อแสงสว่างฮั้นได้

ยอห์น 1:6 แล้วมีซายผู้หนึ่งที่พระเจ้าได้ใซ้มา ผู้ฮั่นซื่อว่า โยฮัน

ยอห์น 1:7 โยฮันหนิได้ถืกใซ้มา มีหน้าที่เป็นพยานอ้างเถิงแสงสว่าง เพื่อว่าเมิ้ดคู่คนสิได้ฮับเซื่อในแสงสว่างฮั่น โดยคำพยานของลาว

ยอห์น 1:8 คือโตลาวเองบ่แม่นแสงสว่างฮั้น แต่ว่าลาวถืกใซ้มาเพื่อเป็นพยานเถิงแสงสว่างฮั้นเอง

ยอห์น 1:9 อันนี้ล่ะ เป็นแสงสว่างที่แท้จริงที่ได้ส่องแสงให้คู่คนที่เกิดมาในโลก

ยอห์น 1:10 เพิ่นเข้ามาในโลก โลกที่ถืกเนรมิตสร้างโดยเพิ่นเอง แต่ว่าโลกบ่ยอมฮับฮู้ในเพิ่นเลย

ยอห์น 1:11 เพิ่นมาหาซนซาติของเพิ่น แต่พวกเขาบ่ยอมต้อนฮับเพิ่นเลย

ยอห์น 1:12 แต่สำหรับผู้ที่ต้อนฮับเพิ่น ๆ มอบสิทธิ์พิเศษให้เขาเป็นลูกๆ ของพระเจ้า คือผู้ที่เซื่อวางใจในพระนามของเพิ่น

ยอห์น 1:13 เป็นผู้ที่เกิดใหม่ บ่แม่นเกิดตามเลือดเนื้อเซื้อสาย หรือตามจุดประสงค์ของคน แต่ได้เกิดใหม่ตามจุดประสงค์ของพระเจ้า

ยอห์น 1:14 ส่วนองค์อมตะธรรมฮั้น ได้ลงมาฮับสภาพเป็นโตคน แล้วได้อาศัยอยู่นำคนเฮา แล้วพวกเฮาได้เห็นพระสิริอันรุ่งโรจน์ของเพิ่น เป็นพระสิริสมกับเป็นพระบุตรองค์เดียวของพระเจ้า ซึ่งเต็มบริบูรณ์ด้วยพระกรุณาธิคุณ กับความสัตย์จริง

ยอห์น 1:15 ส่วนโยฮัน ลาวได้เว้าเป็นพยานเถิงเพิ่นผู้ฮั้นว่า “แม่นผู้นี้ล่ะที่เฮาเคยเว้าเถิง ว่า ‘เพิ่นผู้ที่เกิดนำหลังเฮา กะยิ่งใหญ่สำคัญกว่าเฮา ย้อนว่าเพิ่นเป็นอยู่ก่อนเฮา'”

ยอห์น 1:16 แล้วเฮาเมิ้ดคู่คนได้ฮับพระกรุณาธิคุณจากเพิ่น เป็นพระคุณซ้อนพระคุณ จากความเต็มบริบูรณ์ของเพิ่นฮั่น

ยอห์น 1:17 คือกฎบัญญัติได้มาทางโมเสส แต่ส่วนพระกรุณาธิคุณกับความสัตย์จริงนี้ ได้มาทางพระเยซูคริสต์

ยอห์น 1:18 บ่มีใผเคยเห็นพระเจ้าจักเทื่อ มีแต่พระบุตรองค์เดียว ผู้ที่เคยสถิตอยู่ในอ้อมกอดของพระเจ้าผู้เป็นพ่อ พระบุตรฮั้นเองได้ประกาศเถิงเพิ่นอย่างเปิดเผย

ยอห์น 1:19 แล้วคำพยานของโยฮันเป็นแนวนี้ ว่า ตอนพวกผู้นำของคนยิวในเมืองเยรูซาเล็มได้ ใซ้พวกผู้นำเครื่องถวาย กับพวกเลวีผู้ลางคน ไปถามโยฮันว่า “เจ้าเป็นใผ”

ยอห์น 1:20 โยฮันกะบ่ได้อำไว้แต่ได้ฮับปากว่า “โตเฮาบ่แม่นพระคริสต์ดอก”

ยอห์น 1:21 แล้วพวกเขาถามลาวว่า คั่นจั่งซั้น เจ้าแม่นเอลียาห์ซั้นบ้อ” โยฮันตอบว่า “เฮาบ่แม่น” แล้วเขาถามอีก “เจ้าแม่นผู้เป็นปากเป็นเสียงฮั้นที่เฮาคอยถ้าบ้อ” โยฮันกะตอบว่า “บ่แม่น”

ยอห์น 1:22 แล้วพวกเขาถามอีกว่า “เจ้าเป็นใผซั่น ซ่อยตอบมาแหน่ เพื่อพวกเฮาสิมีคำตอบให้ผู้ที่ใซ้เฮามา เจ้าไปจั่งใดมาจั่งใดแหน่”

ยอห์น 1:23 บัดนี้ ลาวตอบพวกเขา ว่า “เฮาเพียงแต่เป็นเสียงฮ้องของคนหนึ่งในถิ่นแห้งแล้ง ว่า ‘ให้เตรียมทางของพระผู้เป็นเจ้าให้มันซื่อตรงเด้อ’ ตามคำทำนายของเอลียาห์ฮั้นเอง ผู้เป็นปากเป็นเสียงของพระเจ้า”

ยอห์น 1:24 บัดนี้ ผู้ลางคนที่ถืกใซ้มาหาโยฮันฮั่น ได้มาจากพวกคณะฟาริสี

ยอห์น 1:25 บัดนี้ พวกเขาจั่งซักถามโยฮันว่า คั่นว่าเจ้าบ่แม่นพระคริสต์ฮั้น กับว่าบ่แม่นเอลียาห์ กับบ่แม่นผู้เป็นปากเป็นเสียงที่พวกเฮาคอยถ้าอยู่ฮั่น แล้วเป็นหยังเจ้าจั่งให้คนมาฮับการจุ่มน้ำซั่น

ยอห์น 1:26 แล้วโยฮันตอบพวกเขาว่า “เฮาได้ให้คนมาฮับการจุ่มน้ำกะแม่น แต่ว่าได้มีผู้หนึ่งอยู่นำพวกเฮาที่พวกเจ้ายังบ่ฮู้จัก

ยอห์น 1:27 “แม่นเพิ่นผู้ฮั้นล่ะ ผู้ที่มาตามหลังเฮา เป็นผู้ยิ่งใหญ่สำคัญกว่าเฮา ซึ่งโตเฮาเองยังบ่ดีพอที่สิแก้สายเกิบให้เพิ่นเลย”

ยอห์น 1:28 เหตุการณ์นี้ ได้เกิดในหมู่บ้านเบธานี อยู่ฟากฝั่งตะเว็นออกของแม่น้ำจอร์แดน ตอนโยฮันพวมให้คนฮับการจุ่มน้ำฮั้น

ยอห์น 1:29 มื้อต่อมา โยฮันเห็นพระเยซูพวมย่างเข้ามาหาลาว เลยเว้าขึ้นว่า “นี้แน่ะ แกะน้อยของพระเจ้า ผู้นำเอาบาปของซาวโลกทั้งหลายออกไป

ยอห์น 1:30 แม่นผู้นี้ล่ะที่เฮาได้เว้าเถิงแล้วว่า ‘ผู้ที่มาสิตามหลังเฮาเป็นผู้ยิ่งใหญ่สำคัญกว่าเฮา ย้อนว่าเพิ่นอยู่ก่อนเฮา’

ยอห์น 1:31 ส่วนเฮาหนิบ่ฮู้จักกับเพิ่นดอก มีแต่ฮู้ว่าเพิ่นสิต้องฮับการเปิดเผยให้ซาวอิสราเอลได้ฮู้ได้เห็นโตจริง จั่งเป็นเหตุที่เฮามาประกาศให้คนฮับการจุ่มน้ำ กลับใจใหม่ไว้ก่อน”

ยอห์น 1:32 แล้วโยฮันได้เป็นพยานยืนยันว่า เฮาเห็นพระวิญญาณเสด็จลงมา มีลักษณะเป็นคือจั่งฮูปฮ่างนกพิราบ ลงมาสถิตอยู่นำเพิ่น

ยอห์น 1:33 ส่วนเฮาบ่ฮู้จักกับเพิ่นดอก แต่ว่าผู้เพิ่นที่ใซ้เฮามาประกาศให้คนฮับการจุ่มน้ำหนิ เพิ่นบอกเฮาว่า ‘ผู้ที่เจ้าสิเห็นพระวิญญาณลงมาสถิตอยู่นำฮั้น แม่นผู้ฮั่นล่ะ เป็นผู้ที่สิจุ่มคนด้วยพระวิญญาณ’ (ให้ดู 1 โครินธ์ 12:13)

ยอห์น 1:34 แล้วเฮาหนิได้เห็นผู้ฮั้นแล้ว จั่งยืนยันว่า ผู้นี้ล่ะ แม่นพระบุตรของพระเจ้าอีหลี”

ยอห์น 1:35 แล้วมื้อต่อมา โยฮันกะยืนอยู่กับลูกศิษย์ของลาวสองคน

ยอห์น 1:36 แล้วพอลาวเห็นพระเยซูย่างมา โยฮันเลยเว้าว่า เบิ่งเด้อ นี้แน่ะ แม่นแกะน้อยของพระเจ้าใซ้มา

ยอห์น 1:37 พอลูกศิษย์สองคนฮั้นได้ยินโยฮันเว้าจั่งซั้น เขาเลยพากันติดตามพระเยซูไป

ยอห์น 1:38 บัดนี้พระเยซูเหลียวมาเห็นพวกเขาติดตามเลยถามว่า “พวกเจ้ามาซอกหาหยัง” เขาตอบเพิ่นว่า “รับบีเอ้ย” (แปลว่าอาจารย์) “ท่านพักอยู่ใส”

ยอห์น 1:39 พระเยซูตอบเขาว่า “มาเบิ่งเอาเองโลด เขากะเลยพากันไปเบิ่งหม่องพระเยซูพัก แล้วกะได้อยู่นำพระเยซูมื้อฮั้น (ตอนฮั้นประมาณสี่โมงแลงแล้ว)

ยอห์น 1:40 ผู้หนึ่งในสองคนฮั้นที่ได้ยินโยฮันเว้าแล้วได้ติดตามพระเยซูคือ อันดรูว์ น้องซายของ ซีโมนเปโตร

ยอห์น 1:41 แต่ก่อนที่ติดตามเพิ่น อันดรูว์กะได้ไปหาซีโมนผู้เป็นอ้าย บอกอ้ายว่า “เฮาได้พ้อพระมาซีฮาแล้ว” (ซึ่งแปลเป็นภาษากรีกว่า พระคริสต์)

ยอห์น 1:42 แล้วอันดรูว์กะเลยพาอ้ายไปหาพระเยซู พอพระเยซูเหลียวเบิ่งซีโมนแล้วกะเว้าว่า “ซีโมน ลูกของโยนาห์เอ้ย แต่นี้ไปสิเอิ้นกันว่า เคฟาส” (ซึ่งแปลว่า ‘ก้อนหิน’)

ยอห์น 1:43 มื้อต่อมา พระเยซูมุ่งไปแคว้นกาลิลี แล้วเพิ่นได้พ้อฟีลิป จั่งบอกเขาว่า “ให้ตามเฮามาเถอะ”

ยอห์น 1:44 ฟีลิปหนิ เป็นไทเมือง เบธไซดา อยู่เมืองเดียวกันกับ อันดรูว์ กับเปโตร

ยอห์น 1:45 ฟีลิปได้ไปหาคนที่ซื่อว่า นาธานาเอล แล้วบอกเขาว่า “พวกเฮาได้พ้อผู้ฮั้นแล้ว ที่โมเสสได้เขียนเถิงในหนังสือบทบัญญัติ กับพวกผู้เป็นปากเป็นเสียงได้เขียนเถิงนำ คือ เยซู ไทเมืองนาซาเร็ธ ลูกซายของโยเซฟ”

ยอห์น 1:46 แล้วนาธานาเอลถามฟีลิปว่า “เป็นไปได้บ้อ ที่สิมีแนวดีออกมาจากเมืองนาซาเร็ธฮั่น” ฟีลิปตอบว่า “ให้มาเบิ่งเอาเองโลด”

ยอห์น 1:47 พระเยซูพอเห็น นาธานาเอล เข้ามาหา เลยเว้าขึ้นว่า นี้แน่ะ คือซาวอิสราเอลผู้เที่ยงธรรมอีหลี ที่บ่มีเล่ห์เหลี่ยมเลย

ยอห์น 1:48 บัดนี้ นาธานาเอล ถามเพิ่นว่า ท่านฮู้จักข้อยได้แนวใด พระเยซูตอบว่า “ก่อนที่ฟีลิปไปเอิ้นเจ้าฮั่น เฮาได้เห็นเจ้าแล้ว ตอนเจ้าอยู่ใต้ต้นหมากเดื่อพู้น”

ยอห์น 1:49 นาธานาเอลตอบว่า “อาจารย์เอ้ย ท่านต้องเป็นพระบุตรของพระเจ้าฮั้นอีหลี แล้วกะเป็นประมุขเป็นกษัตริย์ของซาวอิสราเอลโดยแท้”

ยอห์น 1:50 พระเยซูตอบว่า “เจ้าได้เซื่อย้อนเฮาบอกเจ้าว่า ‘เฮาเห็นเจ้าอยู่ใต้ต้นหมากเดื่อ’ ฮั้นบ้อ ต่อไปนี้เจ้าสิได้เห็นหลายอันหลายแนวที่ยิ่งใหญ่กว่านี้อีก”

ยอห์น 1:51 แล้วพระเยซูบอกเขาอีกว่า เฮาสิบอกเจ้าตามซื่อนี้ล่ะ ว่าต่อไปนี้เจ้าสิได้เห็นฟ้าสวรรค์เปิดออก มีเทวทูตของพระเจ้าขึ้นๆ ลงๆ อยู่ฮั้น ลงมานำบุตรมนุษย์เฮาหนิ
////////// ////////// //////////