ลูกา – Luke บทที่ 9
ลูกา 9:1 อยู่มา พระเยซูได้เอิ้นพวกลูกศิษย์สิบสองคนฮั่นมาฮ่วมกัน แล้วมอบให้เขามีสิทธิ์อำนาจเหนือผี พร้อมทั้งปัวโรคได้
ลูกา 9:2 แล้วเพิ่นกะได้ส่งพวกเขาออกไปป่าวประกาศเรื่องแผ่นดินของพระเจ้าให้คนฮู้จัก กับปัวโรคคนนำ
ลูกา 9:3 แล้วเพิ่นบอกเขาว่า “บ่ให้เอาอีหยังไปนำเด้อ บ่ว่าสิเป็นไม้ค้อนเท้า หรือย่าม หรือแนวกิน หรือเงิน หรือเสื้อผ้าหน้าแพร
ลูกา 9:4 “ไปแวะเฮือนใดคั่นเขาต้อนฮับกะให้พักอยู่ฮั่นเด้อ จนกว่าสิลาจากไป
ลูกา 9:5 “บ้านใดเมืองใดที่บ่ต้อนฮับ กะให้ออกมาโลด แล้วสะบัดขี้ฝุ่นออกจากตีนเป็นพยานฟ้องเตือนเขาว่าเจ้าบ่เกี่ยวเลย”
ลูกา 9:6 แล้วพวกลูกศิษย์ฮั่นกะได้พากันออกไปทั่วคู่บ้านคู่เมือง เว้าข่าวดีเรื่องแผ่นดินฮั้นให้คนฮู้จัก กับได้ปัวโรคให้เขานำในคู่หม่อง
ลูกา 9:7 บัดนี้ เรื่องต่างๆ ที่พระเยซูได้เฮ็ดฮั่นกะได้ยินไปฮอดหูเจ้าเมืองเฮโรด ลาวเลยงึดหลาย ย้อนผู้ลางคนหาว่าผู้ที่พวมเฮ็ดฮั้นเป็นโยฮันผู้ให้จุ่มน้ำฮั่น ได้เป็นคืนมาแต่ตายแล้ว
ลูกา 9:8 แล้วผู้ลางคนกะยังหาว่าเป็นเอลียาห์ หรือผู้เป็นปากเป็นเสียงของพระเจ้าผู้อื่นๆ จากสมัยแต่กี้ได้เป็นคืนมาแต่ตาย
ลูกา 9:9 เฮโรดเลยเว้าว่า “โยฮันฮั้น เฮาเองได้สั่งตัดคอเขาแล้ว แต่ผู้นี้แม่นใผที่เฮาได้ยินเถิงฮั้น” แล้วแต่ฮั้นมา เฮโรดพยายามที่สิพ้อกับพระเยซู
ลูกา 9:10 บัดนี้ พอพวกลูกศิษย์ได้หลบมาหาพระเยซูแล้ว ได้เว้าแนวที่ได้เฮ็ดมาปันเพิ่นฟัง แล้วพระเยซูพาพวกเขาออกเดินทางไปหม่องเปลี่ยวที่บ่มีคนอยู่ ของเขตเทศบาลเมืองเบธไซดา
ลูกา 9:11 แต่พอพวกประซาซนฮู้จั่งซั่น กะเลยพากันติดตามไปหาเพิ่นอยู่ฮั่น แล้วพระเยซูกะได้ต้อนฮับเขา แล้วกะเว้าเรื่องแผ่นดินของพระเจ้าให้เขาฟัง แล้วผู้ใดเป็นโรคหยัง เพิ่นกะปัวให้เซาเป็นดี
ลูกา 9:12 พอใกล้สิค่ำแล้ว ลูกศิษย์สิบสองคนฮั่นกะได้มาเว้ากับพระเยซูว่า “หม่องนี้มันเปลี่ยว ให้พวกประซาซนออกไปซื้อแนวอยู่แนวกิน หาหม่องหลับหม่องนอนนำบ้านแถวนี้เป็นหยัง”
ลูกา 9:13 แต่พระเยซูบอกพวกเขาว่า “ให้พวกเจ้าเอาแนวกินให้เขาเด้อ” ลูกศิษย์ตอบว่า “แนวกินอยู่นี่มีแต่ขนมปังห้าก้อนกับปลาสองโตท่อฮั้น คนหลายปานนี้มันบ่พอดอกคั่นบ่ได้ออกไปซื้อมาตื่มอีก”
ลูกา 9:14 ขนาดนับแต่ผู้ซายกะยังได้ประมาณห้าพันคน แล้วพระเยซูบอกลูกศิษย์ว่า “บอกให้เขานั่งลงเป็นกลุ่มๆ กลุ่มละห้าสิบคนเด้อ”
ลูกา 9:15 แล้วพวกลูกศิษย์กะเลยบอกให้พวกคนอยู่ฮั้นนั่งลง
ลูกา 9:16 แล้วพระเยซูกะจับขนมปังห้าก้อนกับปลาสองโตฮั่นขึ้นมา แล้วเหลียวหน้าขึ้นทางสวรรค์ ขอบคุณพระเจ้าซะก่อน แล้วกะบิยื่นให้ลูกศิษย์ไปแจกให้พวกคนอยู่ฮั้นกิน
ลูกา 9:17 แล้วเมิ้ดคู่คนกะได้กินจนอิ่มหนำ แล้วซิ้นส่วนที่เหลือเขากะเก็บได้สิบสองกระบุง
ลูกา 9:18 แล้วอยู่ต่อมา ตอนพระเยซูพวมอธิษฐานเว้านำพระเจ้าอยู่ผู้เดียว พวกลูกศิษย์กะมาอยู่นำ พระเยซูเลยถามเขาเบิ่งว่า “พวกประซาซนฮั้น เขาเข้าใจว่าเฮาเป็นใผ”
ลูกา 9:19 เขาเลยตอบว่า “ผู้ลางคนว่า เจ้าเป็นโยอันผู้ให้จุ่มน้ำฮั่น ผู้ลางคนกะว่า เอลียาห์ แล้วอีกผู้ลางคนกะว่าเป็นผู้เป็นปากเป็นเสียงของพระเจ้าผู้อื่นๆ จากสมัยแต่กี้ได้เป็นคืนมาแต่ตาย”
ลูกา 9:20 แล้วพระเยซูเลยถามลูกศิษย์ว่า “พวกเจ้าเด เข้าใจว่าเฮาเป็นใผซั่น” เปโตรตอบว่า “เจ้าเป็นพระคริสต์เป็นพระผู้โปรดที่มาจากพระเจ้า”
ลูกา 9:21 พระเยซูเลยสั่งห้ามลูกศิษย์ไว้ อย่าพึ่งบอกแนวนี้ให้ผู้ใด
ลูกา 9:22 แล้วบอกอีกว่า “เฮาผู้เป็นบุตรมนุษย์สิต้องถืกทรมานหลายอันหลายแนว กับพวกผู้หลักผู้ใหญ่ พวกหัวหน้านำเครื่องถวาย พร้อมทั้งพวกครูบาอาจารย์ฯ สิบ่ยอมฮับในโตเฮา แล้วเขากะสิจัดการฆ่าเฮาถิ้ม แต่ในมื้อที่สามเฮาสิเป็นคืนมาอีก”
ลูกา 9:23 พระเยซูเว้าต่อไปว่า “คั่นผู้ใดอยากเป็นลูกศิษย์ของเฮาอีหลีกะให้ปฏิเสธโตเองเด้อ แล้วแบกเอาหลักประหารของโต จั่งตามเฮามา
ลูกา 9:24 “โดยว่าผู้ใดอยากเอาโตรอดเป็นยอดดีฮั่น ในที่สุดกะสิเสียซีวิตไป แต่ผู้ที่เสียสละซีวิตของโตย้อนเห็นแก่เฮา ผู้ฮั้นล่ะสิได้ซีวิตรอดอีหลี
ลูกา 9:25 “คั่นแม่นว่าผู้ใดได้ของทั้งเมิ้ดทางโลกนี้ แต่ในที่สุดซีวิตของเขาต้องหลงหายพินาศไป มันสิได้ประโยชน์อีหยัง
ลูกา 9:26 “ผู้ใดมีความละอายย้อนเฮา กับถ้อยคำของเฮา เฮาผู้เป็นบุตรมนุษย์กะสิมีความละอายในโตผู้ฮั้นคือกัน บัดเฮาลงมาในพระสิริของเฮา กับพระสิริของพระเจ้า กับของเทวทูตอันบริสุทธิ์ฮั้นนำ
ลูกา 9:27 “เฮาสิเว้าตามซื่อนี้แล่ะ คือมีผู้ลางคนที่พวมยืนอยู่หนิ สิบ่ซิมความตายจนกว่าเขาสิเห็นแผ่นดินของพระเจ้า”
ลูกา 9:28 แล้วมันเป็นไปที่ว่า อยู่มาประมาณแปดมื้อหลังจากพระเยซูเว้าถ้อยคำหนิ เพิ่นได้พาเปโตร ยอห์น กับยากอบ ขึ้นไปเทิงภูเขาเพื่ออธิษฐานเว้านำพระเจ้า
ลูกา 9:29 ตอนพวมอธิษฐานเว้านำพระเจ้าอยู่ฮั่น หน้าตาของเพิ่นกะเปลี่ยนสภาพใหม่ เสื้อผ้าของเพิ่นกะขาวจัวะเหลื้อมมาบๆ
ลูกา 9:30 แล้ว นี่แน่ะ มีสองคนได้มาเว้านำเพิ่น คือโมเสสกับเอลียาห์ ผู้เป็นปากเป็นเสียงในสมัยก่อน
ลูกา 9:31 โตเขากะอยู่ในสภาพพระสิริคือกัน พวมเว้ากับพระเยซูเรื่องการตายของเพิ่นที่ใกล้สิเป็นไปอยู่ในเมืองเยรูซาเล็มฮั่น
ลูกา 9:32 ตอนฮั้นเปโตรกับหมู่ลูกศิษย์กะง่วงนอนหลาย พอสร่างนอนเต็มตาแล้วเขากะเหลียวเห็นพระเยซูอยู่ในสภาพพระสิริของเพิ่น ยืนอยู่กับสองคนฮั่น
ลูกา 9:33 พอสองคนฮั่นพวมลาเพิ่นไป เปโตรกะเว้าขึ้นมากับพระเยซูว่า “พวกผู้ข้าดีใจหลายที่ได้มีโอกาสดีแนวนี้ ให้พวกผู้ข้าเฮ็ดเพิงอยู่นี้สามหลัง ให้อาจารย์หนึ่งหลัง โมเสสหนึ่งหลัง เอลียาห์หนึ่งหลัง” เปโตรเว้าส่งเดชจั่งซี้ย้อนว่าลาวฮู้เท่าบ่เถิงการ
ลูกา 9:34 เปโตรเว้าบ่ทันขาดคำ กะได้มีก้อนเมฆไหลมาหุ้มเขาไว้ พวมไหลหุ้มอยู่ฮั่นเขากะตกใจหย้าน
ลูกา 9:35 แล้วกะมีเสียงเว้าออกมาจากเมฆฮั่นว่า “ผู้นี้เป็นลูกที่ฮักแพงของเฮา ที่เฮาได้ส่งมา ให้ฟังเพิ่นเอาเด้อ”
ลูกา 9:36 พอเมิ้ดเสียงเว้า ก้อนเมฆกะไหลออกไป เหลือแต่พระเยซู แล้วลูกศิษย์ฮั้นบ่ได้เว้าปันใผฟังแนวที่เขาเห็นฮั้น
ลูกา 9:37 แล้ว มื้อใหม่มาพระเยซูได้พาลูกศิษย์สามคนฮั่นลงมาจากภูเขาฮั้นแล้ว ได้มีประซาซนหลวงหลายได้มาพ้อเพิ่น
ลูกา 9:38 แล้วนี่แน่ะ มีซายผู้หนึ่งได้ขอร้องพระเยซูว่า “อาจารย์เอ้ย ซ่อยลูกซายผู้ข้าแหน่ท้อน ผู้ข้ามีลูกผู้เดียวท่อนี้
ลูกา 9:39 “นี่แน่ะ เขาได้ถืกผีเข้าคอบงำ จักหน่อยกะพาฮ้องไห้ จักหน่อยกะพาซักดิ้นไปดิ้นมาจนน้ำลายฟูมปาก แล้วมันกะออกยาก นอกจากขยี้ให้เจ็บซ้ำก่อน
ลูกา 9:40 “ผู้ข้าได้ขอให้ลูกศิษย์ของอาจารย์ขับไล่มันออก แต่เขาบ่สามารถเฮ็ดได้”
ลูกา 9:41 พระเยซูเลยเว้า ตอบขึ้นว่า “โอ้ซาติอัปรีย์สีกะดานขาดความเซื่อแท้ เฮาสิต้องทนอยู่นำพวกเจ้าโดนปานใดน้อ นำลูกเจ้ามานี้สา”
ลูกา 9:42 ตอนลาวพวมนำลูกมา ผีกะเหวี่ยงเด็กน้อยฮั่นลงซักดิ้นซักงอ แล้วพระเยซูเลยสั่งห้ามผี พอปัวให้เซาเป็นดีแล้วพระเยซูกะส่งเด็กน้อยฮั่นคืนให้พ่อเขา
ลูกา 9:43 บัดหนิ เมิ้ดคู่คนกะพากันแปลกใจงึดในความยิ่งใหญ่ของพระเจ้า ตอนเขาพวมงึดอยู่ฮั่น พระเยซูกะเว้ากับลูกศิษย์ว่า
ลูกา 9:44 “ให้พวกเจ้าจื่อคำนี้ไว้ในใจคักๆ เด้อ คือจักหน่อยเฮาผู้เป็นบุตรมนุษย์สิถืกทรยศ มอบไว้ในมือของคนเฮ็ดตามใจมักของเขา”
ลูกา 9:45 แต่พวกลูกศิษย์บ่เข้าใจเลย ย้อนว่าความเว้าฮั่นยังถืกปิดบังไว้บ่ให้เข้าใจ แต่ว่าเขาบ่กล้าถามเพิ่นในเรื่องนี้
ลูกา 9:46 แล้วพวกลูกศิษย์กะเกิดเถียงกันว่า (บัดตั้งแผ่นดินของพระเจ้าแล้ว) ในพวกเขาหนิใผสิเป็นใหญ่สำคัญกว่าหมู่
ลูกา 9:47 แต่พระเยซูกะฮู้จักความคึดในใจของพวกเขา เลยเอิ้นเด็กน้อยผู้หนึ่งมาอยู่ข้างๆ เพิ่น
ลูกา 9:48 แล้วได้บอกลูกศิษย์ว่า “ผู้ใดยอมฮับเอาเด็กน้อยนี้ในนามของเฮากะท่อกันกับยอมฮับเฮาเอง แล้วผู้ที่ยอมฮับเฮากะท่อกันกับฮับผู้ที่ใซ้เฮามาฮั้น คือผู้ใดยอมเป็นผู้เล็กน้อยในพวกเจ้าหนิ ผู้ฮั้นล่ะ สิเป็นใหญ่กว่าหมู่”
ลูกา 9:49 บัดนี้ ลูกศิษย์ซื่อยอห์นได้บอกพระเยซูว่า “อาจารย์เอ้ย พวกผู้ข้าเห็นผู้หนึ่งขับไล่ผีออกในนามของอาจารย์ แล้วพวกผู้ข้าพยายามห้ามเขาไว้ ย้อนเขาบ่ได้ติดตามไปนำเฮา”
ลูกา 9:50 แต่พระเยซูบอกว่า “อย่าห้ามเขาเด้อ ย้อนว่าผู้ที่บ่ขัดขวางต่อต้านพวกเฮา ผู้ฮั้นกะอยู่ฝ่ายเดียวกันกับพวกเฮาแล้ว”
ลูกา 9:51 แล้วอยู่มา พอใกล้สิฮอดยามที่พระเยซูสิถืกฮับขึ้นเมือสวรรค์แล้ว เพิ่นกะได้ตั้งหน้าไปเมืองเยรูซาเล็ม
ลูกา 9:52 แล้วได้ส่งลูกศิษย์ผู้ลางคนออกไปก่อน พวมไปอยู่ฮั้น เขาได้เข้าไปในหมู่บ้านหม่องหนึ่งของพวกสะมาเรีย เพื่อจัดหม่องไว้ให้เพิ่น
ลูกา 9:53 แต่ว่าไทบ้านเขาบ่ได้ต้อนฮับย้อนเขาฮู้ว่าพระเยซูตั้งหน้าสิไปเมืองเยรูซาเล็ม
ลูกา 9:54 แล้วพอลูกศิษย์ยากอบกับยอห์นเห็นว่าเขาบ่ต้อนฮับ เขาไปเว้ากับพระเยซูว่า “สิให้ผู้ข้าสั่งไฟลงมาจากสวรรค์เผาไหม้พวกเขาให้เมิ้ดไปคือปานเอลียาห์เคยเฮ็ดฮั้นบ้อ”
ลูกา 9:55 แต่พระเยซูเหลียวไปตักเตือนเขาว่า “พวกเจ้าบ่ฮู้บ้อว่า จิตใจของเจ้าพวมอยู่ฝ่ายใดหนิ
ลูกา 9:56 เฮาผู้เป็นบุตรมนุษย์บ่ได้มาเพื่อสั่งให้คนพินาศ แต่มาเพื่อให้คนรอดพ้นจากบาปกรรมเวร” แล้วพระเยซูกับลูกศิษย์กะเลยออกไปพักอยู่หมู่บ้านอื่น
ลูกา 9:57 แล้วมันเป็นไปที่ว่า พวมไปนำทางอยู่ฮั่น ได้มีซายผู้หนึ่งออกมาขอนำพระเยซูว่า “ผู้ข้าขอติดตามอาจารย์แหน่ อาจารย์สิพาไปใสผู้ข้ากะสิไปนำ”
ลูกา 9:58 แต่พระเยซูบอกเขาว่า “จิ้งจอกมีโพรงในดิน นกกะมีฮัง แต่ว่าเฮาผู้เป็นบุตรมนุษย์บ่มีฮอดหม่องสิวางหัว”
ลูกา 9:59 แล้วพระเยซูได้ซวนอีกคนหนึ่งว่า “ให้ตามเฮามาเด้อ” แต่คนฮั้นบอกว่า “อาจารย์เจ้าข้า ขออนุญาตให้ผู้ข้าเมือฝังศพของพ่อก่อน”
ลูกา 9:60 แต่พระเยซูบอกเขาว่า “ปล่อยให้พวกคนอยู่ในสภาพตายฝังคนตายของเขาเอง แต่ส่วนเจ้าหนิ ให้ออกไปบอกเรื่องแผ่นดินของพระเจ้าเด้อ”
ลูกา 9:61 แล้วมีอีกคนหนึ่งได้เว้านำพระเยซูว่า “อาจารย์เอ้ย ผู้ข้ากะสิติดตามอาจารย์ไป แต่ผู้ข้าขออนุญาตเมือสั่งลาพี่น้องในเฮือนก่อน”
ลูกา 9:62 แต่พระเยซูบอกเขาว่า “บ่เคยมีใผที่วางมือลงจับหางไถ แล้วเหลียวเบิ่งทางหลังอีก จั่งเป็นผู้สมควรมีส่วนในแผ่นดินของพระเจ้าเลย”
////////// ////////// //////////
