ลูกา – Luke บทที่ 6

ลูกา 6:1 อยู่มา มันเป็นไปที่ว่า มื้อพักงานของพวกยิวมื้อหนึ่ง พระเยซูพาพวกลูกศิษย์ย่างผ่านท่งนาไป ลูกศิษย์เพิ่นกะได้เด็ดฮวงข้าวขยี้เกล็ดกิน

ลูกา 6:2 บัดนี้ ผู้ลางคนในพวกคณะฟาริสีเลยท้วงพวกลูกศิษย์พระเยซูว่า “เป็นหยังคือเฮ็ดแนวที่บทบัญญัติห้ามไว้ในมื้อพักงานจั่งซี้”

ลูกา 6:3 พระเยซูเลยตอบพวกเขาว่า “บ่เคยอ่านเรื่องกษัตริย์ดาวิดในพระคำบ้อ มียามหนึ่งตอนลาวยังเป็นนายทหารอยู่ ดาวิดกับทหารของเพิ่นหิวข้าวหลาย

ลูกา 6:4 ที่ว่าเดวิดได้เข้าไปเอาขนมปังอันเป็นที่ศักดิ์สิทธิ์อยู่ในเต็นท์วิหารฮั่น แล้วเอามาปันกันกินกับหมู่ทหารเพิ่น ซึ่งตามจริงแล้วบ่มีใผมีสิทธิ์กินได้ นอกจากพวกนำเครื่องถวายบูซาท่อฮั้น”

ลูกา 6:5 แล้วพระเยซูบอกเขาอีกว่า “เฮาผู้เป็นบุตรมนุษย์ได้เป็นนายของมื้อพักงานนี้อยู่แล้ว”

ลูกา 6:6 แล้วอยู่มา ฮอดมื้อพักงานของพวกยิวอีกมื้อหนึ่ง พระเยซูกะได้ไปสอนในธรรมศาลาของพวกยิวอีก มื้อฮั้นมีซายผู้หนึ่งมือขวาลีบได้เข้าไปฟังนำ

ลูกา 6:7 บัดนี้ พวกคณะฟาริสีกับพวกครูบาอาจารย์ฯ กะซอมเบิ่งพระเยซูอยู่ฮั่น ว่าเพิ่นสิฮักษาคนมือลีบในมื้อพักงานหรือบ่ เพื่อสิมีข้อคดีจับผิดพระเยซูได้

ลูกา 6:8 แต่ว่าพระเยซูฮู้จักความคึดของเขาแล้ว เพิ่นเลยบอกคนมือลีบฮั่นว่า “ให้ออกมายืนอยู่ทางนี้เด้อ” แล้วคนมือลีบกะเลยออกมายืนอยู่

ลูกา 6:9 แล้วพระเยซูกะเว้ากับพวกคณะฟาริสีกับครูบาอาจารย์ฯ อยู่ฮั่นว่า “เฮาสิถามพวกเจ้าเด้อ ในบทบัญญัติสอนว่าแนวใด ในมื้อพักงานหนิควรสิเฮ็ดดีซ่อยคนหรือว่าควรสิเฮ็ดซั่วทำลายคน”

ลูกา 6:10 เว้าแล้วพระเยซูกะเหลียวเบิ่งหน้าเมิ้ดคู่คนถ้าฟังคำตอบของพวกเขา แล้วเพิ่นกะบอกคนมือลีบฮั่นว่า “เหยียดมือของเจ้าออกมา” พอเหยียดมือออกกะเซาลีบดีคือมือซ้าย

ลูกา 6:11 บัดหนิ พวกคณะฟาริสีกับครูบาอาจารย์ฯ แฮงฮ้ายอย่างเต็มที่ พวกเขาเลยปรึกษาหารือกันว่าสิจัดการแนวใดกับพระเยซู

ลูกา 6:12 ในตอนฮั้น พระเยซูได้ออกไปขึ้นภูเขาเพื่ออธิษฐานเว้านำพระเจ้า ได้เว้ากับพระเจ้าอยู่ฮั่นเมิ้ดคืนจนซอดแจ้ง

ลูกา 6:13 พอฮอดยามมื้อเซ้ามา พระเยซูได้เอิ้นพวกลูกศิษย์ที่อยู่ฮั่นมาฮ่วมกัน แล้วเลือกเอาสิบสองคน ตั้งไว้เป็นทูตพิเศษของเพิ่น

ลูกา 6:14 คือ ซีโมน (ที่พระเยซูตั้งอีกซื่อว่าเปโตร) อันดรูว์ (น้องซายลาวฮั่น) ยากอบ ยอห์น ฟิลิป บารโธโลมิว

ลูกา 6:15 มัทธิว โธมัส ยากอบ (ลูกของอัลเฟอัส) ซีโมน (ผู้คลั่งเรื่องการเมือง)

ลูกา 6:16 ยูดาส (ลูกซายของยากอบ) แล้วกะ ยูดาส-อิสคาริโอท (ซึ่งผู้นี้ล่ะ ที่ทรยศพระเยซู)

ลูกา 6:17 พอตั้งทูตพิเศษแล้ว พระเยซูกะพากันลงมา แวะหม่องฮาบหม่องหนึ่ง หม่องฮั้นมีลูกศิษย์อีกหลายคน กับพวกคนอีกหลวงหลายที่มาจากทั่วเขตยูเดีย กับเมืองเยรูซาเล็ม กับมาจากเมืองที่ติตฝั่งทะเล คือเมืองไทระกับไซดอน คนพวกนี้มาเพื่อฟังพระเยซูกับเพื่อให้เพิ่นปัวโรคต่างๆ ของเขา

ลูกา 6:18 แล้วมีคนที่เป็นทุกข์เป็นฮ้อน ย้อนถืกผีโสมมเฮ็ดใส่ พวกนี้ได้ฮับการปัวจากพระเยซูคือกัน

ลูกา 6:19 แล้วคนหลวงหลายคู่คนอยู่ฮั่นกะพยายามเข้าไปแตะไปต้องพระเยซู ย้อนว่ามีฤทธิ์ออกจากโตเพิ่น ปัวเขาให้เซาเป็นดีเมิ้ดคู่คน

ลูกา 6:20 แล้วพระเยซูได้เหลียวเบิ่งลูกศิษย์ของเพิ่น บอกเขาว่า “ผู้ใดในพวกเจ้า ทุกข์ยากลำบากย้อนเห็นแก่เฮา กะได้พรเป็นสุข ย้อนว่าแผ่นดินของพระเจ้าเป็นของเจ้าแล้ว

ลูกา 6:21 แล้วผู้ใดในพวกเจ้าพวมอึดอยากหมากหิวในปัจจุบัน ย้อนเห็นแก่เฮา กะได้พรเป็นสุข ย้อนว่าเจ้าสิได้อิ่มหนำสำราญ กับว่าผู้ใดในพวกเจ้าที่อุกอั่งฮ้องไห้ในปัจจุบัน ย้อนเห็นแก่เฮา กะได้พรเป็นสุข ย้อนว่าเจ้าสิยิ้มแยมแจ่มใสหัวเราะได้

ลูกา 6:22 แล้วผู้ใดในพวกเจ้าที่ถืกคนเคียดซัง บ่อให้คบหา ขับไล่ใสหนี ทำลายซื่อเสียง ว่าเจ้าเป็นคนซั่วย้อนเห็นแก่เฮาผู้เป็นบุตรมนุษย์ กะได้พรเป็นสุข

ลูกา 6:23 กะให้เจ้าดีใจเต้นสะโยงไว้โลดในมื้อฮั้น ย้อนว่าบำเหน็จของเจ้าในสวรรค์กะหลายอีหลี คือในสมัยก่อนพ่อแม่ของพวกนี้เคยเฮ็ดใส่พวกผู้เป็นปากเป็นเสียงของพระเจ้าคือกัน

ลูกา 6:24 แต่ว่าระวังพินาศเด้อ พวกเจ้าผู้ฮั่งมีในปัจจุบันเอ้ย ความสุขสบายของเจ้ากะสิเมิ้ดท่อนี้แล้ว

ลูกา 6:25 ระวังพินาศเด้อ พวกเจ้าผู้ที่อิ่มท้องอิ่มไส้ ย้อนว่าพวกเจ้าสิอึดอยากหมากหิว แล้วระวังพินาศเด้อ พวกเจ้าผู้ที่ยิ้มที่หัวเราะได้ในปัจจุบัน ย้อนว่าพวกเจ้าสิโศกเศร้าอุกอั่งฮ้องไห้

ลูกา 6:26 ระวังพินาศเด้อ บัดคนยกย่องเว้าดีนำเจ้า คือในสมัยก่อนพ่อแม่ของพวกนี้เคยเฮ็ดดียกย่องผู้พยากรณ์เท็จคือกัน

ลูกา 6:27 แต่เฮาบอกพวกเจ้าที่ได้ยินหนิ ให้ฮักศัตรูของเจ้าเด้อ แล้วเฮ็ดดีนำผู้ที่ซังเจ้า

ลูกา 6:28 กับให้อวยพรคนที่ป้อยด่าเจ้าเด้อ แล้วอธิษฐานเผื่อคนที่ดูถูกเอารัดเอาเปรียบเจ้า

ลูกา 6:29 คั่นใผตบแก้มของเจ้า กะให้หันอีกข้างหนึ่งให้เขานำ แล้วคั่นใผมาริบเอาเสื้อของเจ้าไปเป็นของโต อย่าปฏิเสธเขาคั่นมาเอาส้งของเจ้าไปนำ

ลูกา 6:30 แล้วคั่นใผมาขออีหยังนำเจ้ากะให้เขาสา กับคั่นใผมายึดมาริบเอาของๆ เจ้าไปกะอย่าทวงคืนเด้อ

ลูกา 6:31 แล้วคั่นเจ้าอยากให้คนเฮ็ดดีนำเจ้าแนวใด กะให้เจ้าเฮ็ดดีนำเขาแนวฮั้นคือกัน

ลูกา 6:32 แล้วคั่นเจ้าฮักแพงแต่คนที่ฮักแพงเจ้าท่อฮั้น มันสิมีคุณค่าอีหยังสำหรับเจ้า พวกคนขี้บาปที่บ่ฮู้จักพระเจ้ากะฮักแพงกันแนวฮั้นอยู่แล้ว

ลูกา 6:33 แล้วคั่นเจ้าเฮ็ดดีนำแต่คนที่เฮ็ดดีนำเจ้าท่อฮั้น มันสิมีคุณค่าอีหยังสำหรับเจ้า พวกคนขี้บาปที่บ่ฮู้จักพระเจ้ากะเฮ็ดแนวฮั้นอยู่แล้ว

ลูกา 6:34 แล้วคั่นเจ้าให้ยืมแต่คนที่เจ้าหวังสิได้คืนท่อฮั้น มันสิมีคุณค่าอีหยังสำหรับเจ้า พวกคนขี้บาปที่บ่ฮู้จักพระเจ้ากะเฮ็ดแนวฮั้นอยู่แล้ว

ลูกา 6:35 แต่ว่า ให้เจ้าฮักศัตรูของเจ้าเด้อ เฮ็ดดีนำเขา กับให้ยืมของเจ้าไปโดยบ่หวังสิเอาคืนคั่นเจ้าเฮ็ดจั่งซั้นรางวัลที่พระเจ้าสิตอบสนองเจ้าสิหลายขนาด แล้วมันจั่งสมกับว่าเจ้าเป็นลูกของพระเจ้าผู้สูงสุด ย้อนว่าพระเจ้ามีใจเมตตาปราณีต่อคนซั่วกับคนที่เนรคุณเพิ่น

ลูกา 6:36 จั่งซั้น ให้เจ้ามีใจเมตตาปราณีคือจั่งพระเจ้าผู้เป็นพ่อของเจ้าฮั่นเด้อ

ลูกา 6:37 อย่าตัดสินประเมินค่าคนอื่นเด้อ แล้วเจ้าจั่งสิบ่ถืกคนอื่นตัดสินประเมินค่าเจ้า อย่ากล่าวหาใส่โทษคนอื่นเด้อ แล้วเจ้าจั่งสิบ่ถืกคนอื่นกล่าวหาใส่โทษเจ้า ให้เจ้าให้อภัยยกโทษคนอื่นเด้อ แล้วเจ้าจั่งสิได้รับการให้อภัยยกโทษคือกัน

ลูกา 6:38 บัดเจ้าให้อีหยังเขา กะให้ด้วยความเต็มใจเด้อ แล้วเจ้ากะสิได้ฮับมาอย่างยัดสั่นแน่นพูน อย่างเต็มเหลือล้น ทุ่มเทคืนมาให้เจ้า คือตวงที่เจ้าให้เขาฮั่นสิน้อยใหญ่ส่ำใด เจ้าสิได้ฮับคืนโดยตวงน้อยใหญ่ส่ำฮั้น”

ลูกา 6:39 พอเว้าแล้วพระเยซูกะได้ยกเรื่องข้อคึดให้เขาฟังว่า “เป็นไปได้บ้อที่คนตาบอดสิจูงคนตาบอดไปให้ถืกทาง เขาทั้งสองสิพากันหลงทางตกฮ่องตกคลองบ่แม่นบ้อ

ลูกา 6:40 บ่มีลูกศิษย์คนใดที่สิใหญ่กว่าครูเจ้าของดอก แต่คั่นฝึกโตอบรมอย่างเต็มที่อาจสิส่ำครูกะได้

ลูกา 6:41 แล้วเป็นหยังที่เจ้ามักจ้องเบิ่งขี้เหยื่อเม็ดน้อยๆ ในตาพี่น้อง แต่บ่ได้สังเกตท่อนไม้ในตาเจ้าของ

ลูกา 6:42 หรือเป็นหยังที่เจ้าเว้ากับพี่น้องเจ้าว่า พี่น้องเอ้ยข้อยขอซ่อยเอาขี้เหยื่อเม็ดน้อยๆ ออกจากตาให้เจ้าเด้อ แต่เจ้าบ่ฮู้เมือโตว่าตาของเจ้ามีท่อนไม้ใหญ่ขวางอยู่ในตาของเจ้า ไอ้ผู้หน้าซื่อใจคดเอ้ย ให้เจ้าถอนเอาท่อนไม้ใหญ่ฮั่นออกจากตาของโตซะก่อน แล้วเจ้าจั่งสิเห็นซัดพอที่สิซ่อยเอาขี้เหยื่อเม็ดน้อยๆ ฮั้น ออกจากตาพี่น้องได้

ลูกา 6:43 แล้วบ่เคยมีกกไม้พันธุ์ดีๆ ที่ออกหมากมาเป็นพันธุ์บ่ดีดอก กับบ่เคยมีกกไม้พันธุ์บ่ดีที่ออกหมากมาเป็นพันธุ์ดีๆ ได้

ลูกา 6:44 ย้อนว่า สิฮู้จักกกไม้คู่กก เบิ่งออกได้ด้วยหมากของมัน คือบ่เคยมีใผปิดเอาหมากเดื่อจากกอหนาม หรือหมากองุ่นจากพุ่มไม้มีหนาม

ลูกา 6:45 คือว่า คนดีมักสิเอาแต่แนวดีออกมาจากคลังหัวใจอันดีของเขา แล้วคนซั่วสิเอาแต่แนวซั่วออกมาจากคลังใจอันซั่วของเขา สรุปแล้ว คลังใจของแต่ละคนเต็มล้นไปทางใดกะสิคายออกจากปากของเขาโลด

ลูกา 6:46 แล้วเป็นหยังพวกเจ้าคือเอิ้นเฮาว่า นายซีวิตผู้ข้าๆ แต่บ่ยอมเฮ็ดตามแนวที่เฮาบอกฮั่น

ลูกา 6:47 คือผู้ใดก็ตามที่มาหาเฮา แล้วฮับฟัง แล้วยอมเฮ็ดตามถ้อยคำของเฮาฮั้น เฮากะสิเปรียบ เทียบเขาแนวนี้

ลูกา 6:48 ว่า เขาเปรียบปานคนที่สร้างเฮือน ซึ่งเขาได้ขุดลงไปตั้งฐานรากเทิงพะลานหินไว้ก่อน แล้วบัดเกิดพายุแฮงน้ำท่วม กระแสน้ำไหลซัดมาใส่ เฮือนฮั่นกะสิบ่เป็นหยัง ย้อนว่าเจ้าของเฮือนได้ตั้งเทิงพะลานหิน

ลูกา 6:49 “แต่ว่าคนที่ได้ฮับฟังถ้อยคำของเฮาแต่บ่เฮ็ดตาม ผู้ฮั้นเปรียบปานคนที่สร้างเฮือน ตั้งไว้เทิงดินทรายซื่อๆ ซึ่งบ่มีฐานรากอีหยัง แล้วบัดกระแสน้ำไหลซัดมาใส่ เฮือนหลังฮั้น มันกะพังทลายล้มลงเมิ้ดโลด”
////////// ////////// //////////