ลูกา – Luke บทที่ 5

ลูกา 5:1 อยู่มามันเป็นไปที่ว่า พวกประซาซนได้เข้ามาเบียดอ้อมแอ้มเพื่อฟังพระเยซูสอนพระคำของพระเจ้า ที่เพิ่นกะยืนอยู่ฮิมทะเลเยนเนซาเรท

ลูกา 5:2 พระเยซูเลยเหลียวเห็นเฮือสองลำจอดไว้อยู่ฮิมน้ำ แล้วไทเฮือพวมล้างอวนอยู่ใกล้ๆ ฮั่น

ลูกา 5:3 พระเยซูเลยไปนั่งเทิงเฮือลำหนึ่ง เป็นเฮือของซีโมนเปโตร แล้วได้บอกให้ลาวถอยเฮือออกไปให้จักหน่อย แล้วพระเยซูกะได้นั่งลงสอนประซาซนจากเฮือฮั่น

ลูกา 5:4 บัดสอนแล้วพระเยซูได้ซวนซีโมนเปโตรว่า “ให้ออกไปหย่อนอวนลงเอาปลาอยู่หม่องเลิกๆ เถาะ”

ลูกา 5:5 แต่ซีโมนเปโตรบอกเพิ่นว่า “นายเอ้ย พวกผู้ข้าได้พากันเฮ็ดเมิ้ดคืนจนซอดแจ้ง แต่บ่ได้ปลาจักโต กะตามผู้ข้าสิไปหย่อนอวนอีกตามที่นายบอก”

ลูกา 5:6 พอเฮ็ดแล้ว พวกเขากะได้ปลาหลายขนาด จนอวนสิขาด

ลูกา 5:7 เขาเลยกวักมือเอิ้นหมู่ผู้ฮ่วมงานให้เอาเฮือมาซ่อยเอาปลา พวกเขาได้ปลาหลายขนาดจนเฮือสิจมทั้งสองลำ

ลูกา 5:8 พอซีโมนเปโตรได้เห็นจั่งซั้นกะกราบต่อหน้าพระเยซูโลดแล้วเว้าว่า “นายเอ้ย ผู้ข้าเป็นคนบาปหลาย ขออย่ามาใกล้ผู้ข้าท้อน”

ลูกา 5:9 ซีโมนเปโตรเว้าจั่งซี้ย้อนว่าลาวตกใจงึดหลายที่ได้ปลาหลายปานนี้

ลูกา 5:10 แล้วหมู่พวกที่หาปลานำลาวฮั่น คือยากอบกับยอห์น(ลูกซายของเศเบดี) กะตกใจงึดคือกัน แล้วพระเยซูบอกซีโมนเปโตรว่า “อย่าสู่หย้านเด้อ เจ้าเคยหาปลาให้โตเอง แต่นี้ไปเจ้าสิหาคนให้พระเจ้า”

ลูกา 5:11 พอฮอดตะฝั่งแล้ว พวกเขาได้พากันปะเฮือถิ้มไว้ฮั่น พร้อมกับของแนวอื่นๆ ไว้ทั้งเมิ้ด แล้วไปกับพระเยซูเป็นลูกศิษย์ของเพิ่น

ลูกา 5:12 อยู่มาตอนพระเยซูอยู่ในเมืองหนึ่ง นี่แน่ะ ได้มีซายผู้หนึ่งเป็นขี้ทูตเต็มโต พอเห็นพระเยซูกะได้มาก้มกราบหน้าลงฮอดดิน อ้อนวอนพระเยซูว่า “นายเอ้ย คั่นมีน้ำใจสิซ่อยให้ผู้ข้าเมิ้ดมลทินเซาเป็นดี ผู้ข้ามั่นใจว่านายเฮ็ดได้”

ลูกา 5:13 พระเยซูเลยยื่นมือแตะใส่ซายผู้ฮั้นแล้วเว้าว่า “เฮามีน้ำใจสิซ่อยอยู่แล้ว ให้เมิ้ดมลทินเซาเป็นดีซะเด้อ” พอเพิ่นเว้าแล้วซายฮั่นกะเมิ้ดขี้ทูตเซาเป็นดีกับหม่องโลด

ลูกา 5:14 แล้วพระเยซูกะสั่งซายฮั่นไว้ว่า “อย่าสู่ฟ้าวบอกใผเด้อ แต่ให้จัดเอาเครื่องบูซาเมิ้ดมลทินโรคขี้ทูต แล้วให้นำไปหาพวกนำเครื่องถวายโลด เพื่อเป็นหลักฐานพยานให้เขาตามที่บทบัญญัติหนังสือโมเสสบอกไว้ฮั่น”

ลูกา 5:15 จั่งใดกะตาม ซื่อเสียงของพระเยซูแฮงส่าลือไปหน้า จั่งมีคนหลวงหลายหลั่งไหลมาฟังพระเยซู กับให้เพิ่นปัวโรคให้นำ

ลูกา 5:16 พระเยซูเพิ่นเคยออกไปในถิ่นแห้งแล้งเป็นประจำ เพื่อสิอธิษฐานเว้านำพระเจ้าอยู่ผู้เดียว

ลูกา 5:17 อยู่มามื้อหนึ่ง ตอนพระเยซูพวมสั่งสอนประซาซนอยู่ ได้มีพวกคณะฟาริสีกับครูบาอาจารย์ฯ ผู้ลางคนจากคู่บ้านในเขตกาลิลี เขตยูเดีย กับเมืองเยรูซาเล็มกะมานั่งอยู่นำ แล้วฤทธิ์อำนาจของพระผู้เป็นเจ้าที่สิปัวคนป่วยกะอยู่นำพระเยซู

ลูกา 5:18 บัดหนิ นี่แน่ะ ได้มีคนหล่อยผู้หนึ่งหมู่หามใส่ที่นอนมา พวกเขาพยายามหาทางสิเข้าไปวางลงต่อหน้าพระเยซู

ลูกา 5:19 แต่พอเห็นว่าบ่มีทางว่างที่สินำเอาเข้ามาย้อนมีคนหลวงหลาย พวกเขากะเลยขึ้นไปเทิงหลังคาบ้าน แล้วกะเปิดป่องออก หย่อนทั้งคนป่วยทั้งที่นอน ลงไปวางลงต่อหน้าพระเยซูอยู่หว่างกลางพวกคนอยู่ฮั้น

ลูกา 5:20 พอพระเยซูเห็นความเซื่อหมู่ของคนหล่อย เพิ่นเลยเว้ากับคนหล่อยว่า “ซายเอ้ย บาปกรรมเวรของเจ้าฮั่นเฮายกโทษให้เมิ้ดแล้ว”

ลูกา 5:21 บัดนี้ พอพวกคณะฟาริสีกับครูบาอาจารย์ฯ ได้ยินพระเยซูเว้าจั่งซั่น กะพากันคึดในใจว่า “แม่นใผผู้หนิ คือยกโตเว้าหมิ่นประมาทลบหลู่พระเจ้าแท้ บ่มีใผสิยกโทษบาปกรรมเวรให้นอกจากพระเจ้าผู้เดียวท่อฮั้น”

ลูกา 5:22 แต่ว่า พระเยซูฮู้จักความคึดในใจของพวกเขา เลยเว้ากับเขาว่า “เป็นหยังคือพากันคึดจั่งซี้

ลูกา 5:23 “แนวใดสิเว้าง่ายกว่ากัน ‘เฮายกโทษบาปกรรมเวรให้แล้ว’ หรือสิเว้าว่า ‘ให้ลุกขึ้นย่างไปโลดเด้อ’

ลูกา 5:24 แต่เฮาได้เว้าจั่งซั่นเพื่อพวกเจ้าสิฮู้ว่า เฮาผู้เป็นบุตรมนุษย์ฮั้น มีสิทธิ์อำนาจยกโทษบาปกรรมเวรให้คนได้” เว้าแล้วพระเยซูเหลียวมาเว้ากับคนหล่อยอีกว่า “ลุกขึ้นเก็บเอาที่นอนย่างเมือบ้านเจ้าสา”

ลูกา 5:25 แล้วคนหล่อยฮั้น กะลุกขึ้นกับหม่องต่อหน้าพวกเขา แล้วกะเก็บเอาสาดเอาเสื่อย่างเมือบ้าน แล้วจั่งขอบคุณสรรเสริญพระเจ้าอยู่เรื่อย

ลูกา 5:26 พวกคนอยู่ฮั่นกะแปลกใจเป็นตางึด ทั้งยกย่องพระเจ้าทั้งพากันหย้านนำ แล้วกะเว้ากันว่า “มื้อนี้ล่ะเฮาได้เห็นแนวเหลือเซื่อแล้ว”

ลูกา 5:27 หลังจากแนวหมู่นี้เกิดขึ้น พระเยซูกะได้ออกไป แล้วสังเกตเห็นคนเก็บภาษีผู้หนึ่งซื่อว่า เลวี นั่งอยู่ด่านเก็บภาษี พระเยซูเลยซวนเลวีว่า “ให้ตามมาเป็นลูกศิษย์เฮาเถาะ”

ลูกา 5:28 แล้วเลวีกะลุกขึ้นติดตามเป็นลูกศิษย์ของเพิ่น

ลูกา 5:29 แล้วเลวีกะได้จัดงานเลี้ยงใหญ่อยู่เฮือนโตเอง เพื่อเป็นเกียรติให้พระเยซู มีหมู่พวกเก็บภาษีกับอีกหลายคนได้มาฮ่วมโต๊ะกินนำกัน

ลูกา 5:30 บัดนี้พวกคณะฟาริสีกับครูบาอาจารย์ฯ ได้เว้าโจมตีพวกลูกศิษย์ของพระเยซู เขาเลยเว้าใส่ว่า “เป็นหยังพวกเจ้าจั่งฮ่วมโต๊ะกินกับพวกคนเก็บภาษีกับคนขี้บาปแนวนี้”

ลูกา 5:31 พระเยซูกะเลยบอกพวกเขาว่า “คนสุขภาพดีบ่ต้องการหมอ มีแต่คนเจ็บคนเป็นที่ต้องการหมอ

ลูกา 5:32 “คือเฮาบ่ได้มาเอิ้นคนที่ถือว่าดีแล้ว แต่มาเอิ้นคนขี้บาปให้สำนึกโตกลับใจใหม่”

ลูกา 5:33 แล้วพวกคณะฟาริสีกับครูบาอาจารย์ฯ เว้าใส่พระเยซูว่า “เป็นหยังลูกศิษย์ของโยฮัน กับลูกศิษย์ของพวกคณะฟาริสี เน้นหนักในการถือศีลอดอาหารกับการอธิษฐาน แต่ลูกศิษย์ของเจ้าหนิมีแต่กินกับดื่มแท้”

ลูกา 5:34 พระเยซูได้ตอบเขาว่า “แม่นใผสิบังคับหมู่เจ้าบ่าวถืออดกินยามเจ้าบ่าวยังอยู่นำเขา

ลูกา 5:35 แต่สิมีมื้อมาที่เจ้าบ่าวสิถืกคนเอาจากเขาไป ฮอดยามฮั้นพวกเขาสิถืออดกิน”

ลูกา 5:36 แล้วพระเยซูได้เว้าคำเปรียบเทียบให้เขาฟังว่า “บ่มีใผเคยฉีกเอาซิ้นของเสื้อโตใหม่ฮั้นมาตาบใส่เสื้อโตเก่า คั่นเฮ็ดจั่งซั่นเสื้อโตใหม่เสียถิ้มซื่อๆ แล้วผ้าซิ้นใหม่กับเสื้อโตเก่ามันกะบ่เข้ากัน

ลูกา 5:37 แล้วอีกว่า บ่มีใผเคยเอาน้ำองุ่นที่เฮ็ดออกมาใหม่ๆ มาใส่ถุงหนังเก่าไว้ คั่นเฮ็ดจั่งซั่นน้ำองุ่นใหม่ฮั่นบัดพวมดองมันกะสิขยายออก ดันถุงหนังเก่าจนแตก แล้วน้ำองุ่นใหม่กะสิไหลออกไป พร้อมถุงหนังเก่ากะสิเสียไปนำ

ลูกา 5:38 แต่ว่าน้ำองุ่นที่เฮ็ดออกมาใหม่กะต้องใส่ถุงหนังใหม่มันจั่งแม่น แล้วทั้งสองกะเก็บฮักษาไว้บ่เสียหาย

ลูกา 5:39 กับบ่เคยมีใผดอกที่ได้กินน้ำองุ่นเก่าแล้ว แล้วสิคึดอยากกินน้ำองุ่นใหม่ เขาต้องหาว่าของเก่าดีกว่า แม่นบ่ล่ะ”
////////// ////////// //////////