ลูกา – Luke บทที่ 2

ลูกา 2:1 ในสมัยฮั้น จักรพรรดิซีซาร์ออกัสตัส (ผู้ที่ปกครองราชอาณาจักรโรม) ได้ออกคำสั่งให้ประซาซนทั่วโลก ให้ไปจดทะเบียนสำมะโนครัว

ลูกา 2:2 การจดทะเบียนเป็นเทื่อตำอิดฮั้น เป็นตอน คีรินิอัส ปกครองแผ่นดินซีเรีย

ลูกา 2:3 จั่งซั้น ประซาซนทั้งเมิ้ดกะพากันไปจดทะเบียนอยู่ถิ่นเดิมแต่พ่อแต่แม่ของใผของมัน

ลูกา 2:4 โยเซฟ (คู่หมั้นของนางมารีย์ฮั่น) ได้ออกเดินทางจากเมืองนาซาเร็ธที่อยู่เขตกาลิลีฮั่น ไปยังเมืองของกษัตริย์ดาวิดอยู่เขตยูเดีย ซึ่งเอิ้นว่าเมืองเบธเลเฮม ย้อนว่าโยเซฟลาวเป็นพี่น้องในเซื้อสายของกษัตริย์ดาวิด

ลูกา 2:5 ลาวได้ไปจดทะเบียนอยู่ฮั่นพร้อมกับนางมารีย์คู่หมั้นของลาวที่พวมท้องอยู่

ลูกา 2:6 พอไปอยู่ฮั้นนางมารีย์กะฮอดยามสิออกลูก

ลูกา 2:7 นางเลยออกลูกกกของนางอยู่ในคอกงัวฮั้น แล้วกะได้เอาผ้าอ้อมตุ้มเด็กอ่อน วางนอนไว้ในฮางหญ้า ย้อนว่าโรงแรมกะบ่ว่าง

ลูกา 2:8 บัดนี้ ได้มีพวกเลี้ยงแกะพักอาศัยอยู่กลางท่งในแถวเมืองฮั้น พวมเฝ้าแกะของเขาอยู่เป็นยามกลางคืน

ลูกา 2:9 นี่แน่ะ พอดีมีเทวทูตองค์หนึ่งมายืนอยู่ทางหน้าพวกเขา แล้วแสงรัศมีของพระเจ้าส่องลงมาอ้อมพวกเขา พวกเขากะเลยพากันตกใจหย้านเมิ้ดแฮง

ลูกา 2:10 เทวทูตบอกว่า “อย่าสู่หย้านเด้อ นี่แน่ะ เฮาพวมนำข่าวดีมาบอกพวกเจ้า เป็นข่าวดีที่ให้ความสุขอันยิ่งใหญ่ สำหรับเมิ้ดคู่คนทั่วโลก

ลูกา 2:11 “คือในคืนนี้มีผู้หนึ่งได้ลงมาเกิดแล้วในเมืองของเดวิด เป็นพระผู้โปรด คือพระคริสต์องค์พระผู้เป็นเจ้าฮั้น

ลูกา 2:12 “แล้วสิมีสัญญลักษณ์ที่พวกเจ้าสิฮู้ได้ คือสิพ้อเด็กน้อยที่มีผ้าอ้อมห่อโตไว้ นอนในฮางหญ้าอยู่ในคอกงัว แม่นผู้ฮั้นล่ะ”

ลูกา 2:13 เว้าแล้ว พอดีกะมีกองทัพเทวทูตมาเต็มทั่วท้องฟ้าพร้อมกันสรรเสริญพระเจ้าว่า

ลูกา 2:14 “พระสิริมีแด่พระเจ้าผู้สถิตอยู่หม่องสูงสุด กับสันติภาพมีเทิงแผ่นดินโลก กับความหวังดีต่อผู้คนทั้งปวง”

ลูกา 2:15 พอกองทัพเทวทูตฮั่นกลับเมือสวรรค์แล้ว พวกคนเลี้ยงแกะได้ซวนกันว่า ให้เฮาฟ้าวไปเมืองเบธเลเฮมเถาะ ไปซอกหาแนวฮั้นที่เป็นไปแล้ว ตามที่เทวทูตของพระเจ้าได้บอกเฮาไว้”

ลูกา 2:16 พอฟ้าวไปฮอดแล้ว พวกเขาได้พ้อนางมารีย์ กับ โยเซฟ พร้อมทั้งเด็กอ่อนเยซูฮั่น นอนอยู่ในฮางหญ้าในคอกงัว

ลูกา 2:17 พอพวกเขาเห็นเด็กอ่อนเยซูฮั่นแล้ว พวกเขากะพากันออกไปบอกให้คนอยู่ทั่วฮู้จักนำ ตามแนวที่เทวทูตได้มาบอกเขาเรื่องเด็กอ่อนฮั้น

ลูกา 2:18 แล้วคนทั้งหลายที่ได้ยินกะพากันแปลกใจเป็นตางึดในเรื่องที่พวกเลี้ยงแกะเว้าปันเขาฟัง

ลูกา 2:19 ส่วนนางมารีย์กะได้พิจารณาเก็บเรื่องแนวหมู่นี้ไว้ในใจของนาง

ลูกา 2:20 แล้วพวกเลี้ยงแกะกะได้คืนเมือ พากันสรรเสริญยกย่องพระเจ้าที่ได้ฮู้ได้เห็นตามที่เทวทูตได้บอกพวกเขา

ลูกา 2:21 พอได้แปดมื้อแล้ว พ่อแม่พี่น้องกะพากันเฮ็ดสุหนัตหมายโตให้เด็กอ่อนตามประเพณี แล้วใส่ซื่อว่าเยซูตามที่เทวทูตได้บอกไว้ ก่อนที่เยซูบ่ทันได้อยู่ในท้องของนางมารีย์

ลูกา 2:22 บัดนี้ พอครบกำหนดการเมิ้ดมลทินของแม่ลูกอ่อนมารีย์แล้วตามกฎบัญญัติที่โมเสสได้ฮับมอบไว้ฮั้น โยเซฟกับมารีย์กะนำเอาเด็กน้อยเยซูไปเมืองเยรูซาเล็ม เพื่อถวายเด็กน้อยเยซูให้พระเจ้าอยู่ในพระวิหาร

ลูกา 2:23 (นี้กะเป็นไปตามกฎบัญญัติของพระผู้เป็นเจ้าที่มีเขียนไว้ว่า “ลูกซายกกคู่คนทีเบิกครรภ์ สิเอิ้นว่า เป็นผู้บริสุทธิ์ไว้แด่พระเจ้า”)

ลูกา 2:24 แล้วเขากะถวายเครื่องบูซาต่อพระเจ้า ตามที่กฎบัญญัติของพระผู้เป็นเจ้าได้กำหนดไว้ ว่า “ให้ถวายนกพิราบคู่หนึ่ง หรือว่า นกเขาหนุ่มสองโต”

ลูกา 2:25 แล้ว นี้แน่ะ มีพ่อใหญ่ผู้หนึ่งซื่อสิเมโอนอยู่เมืองเยรูซาเล็ม ลาวเป็นคนเที่ยงธรรมเซื่อมั่นแต่ในพระเจ้า สิเมโอนหนิพวมคอยถ้าแต่พระผู้โปรดของพวกคนอิสราเอลสิมาเกิด แล้วพระวิญญาณของพระเจ้ากะอยู่นำลาวตลอด

ลูกา 2:26 กับพระวิญญาณของพระเจ้าเคยเผยให้ลาวฮู้ว่า สิได้เห็นพระผู้โปรดโลกก่อนที่ลาวสิตาย

ลูกา 2:27 มื้อฮั้นพระวิญญาณของพระเจ้าได้นำพาสิเมโอนเข้าไปในพระวิหาร แล้วพอมารีย์กับโยเซฟพาเด็กน้อยเยซูเข้าไปถวายให้พระเจ้าอยู่พระวิหารตามที่มีกำหนดไว้ในบทบัญญัติ

ลูกา 2:28 พอสิเมโอนเห็น ลาวกะได้อุ้มเด็กน้อยเยซู แล้วได้ยกย่องสรรเสริญพระเจ้าว่า

ลูกา 2:29 “องค์พระผู้เป็นเจ้าเอ้ย บัดนี้พระองค์ให้ผู้ข้าออกไปได้แล้วด้วยความปิติยินดี

ลูกา 2:30 “ย้อนว่า ตาของผู้ข้าได้เห็นพระผู้โปรดของพระองค์ได้แล้ว

ลูกา 2:31 “ซึ่งพระองค์ได้เตรียมไว้ต่อน้าต่อตาเพื่อมวลมนุษย์ทั้งปวง

ลูกา 2:32 “เป็นแสงสว่างที่เปิดเผยข่าวประเสริฐให้ซาวโลกทั้งหลายผู้ยังบ่ทันฮู้จักนำ ซึ่งเป็นพระสิริของซนซาติอิสราเอลของพระองค์”

ลูกา 2:33 แล้วโยเซฟกับมารีย์แม่เด็กน้อยกะแปลกใจหลายในคำเว้าของสิเมโอนเกี่ยวกับเด็กน้อยเยซูฮั้น

ลูกา 2:34 แล้วสิเมโอนได้อวยพรเขา พร้อมกับบอกมารีย์แม่เด็กน้อยว่า “นี่แน่ะ ย้อนเด็กน้อยนี้เองคนอิสราเอลหลายคนสิพินาศลง แล้วอีกหลายคนกะสิมีซีวิตขึ้นมาใหม่ แล้วเด็กน้อยนี้สิเป็นเครื่องหมายสำคัญที่สิโดนหลายคนต่อว่า

ลูกา 2:35 “เอ้อ สำหรับโตเจ้าหนิสิเจ็บใจหลายปานถืกดาบแทงหัวใจ แล้วในที่สุดสภาพจิตใจของหลายคนกะสิถืกเปิดเผยออกมาให้เห็นคักๆ”

ลูกา 2:36 บัดนี้มีแม่ใหญ่ผู้หนึ่งซื่อว่าอันนา เป็นผู้ทำนายคำพยากรณ์ เป็นลูกสาวของ นายฟานูเอล จากพวกตระกูลอาเซอร์ ลาวเฒ่าหลายแล้วเคยมีผัวแต่ยังสาว อยู่นำกันเจ็ดปีจากเป็นสาวบริสุทธิ์ (แล้วผัวกะตายปะลาว)

ลูกา 2:37 บัดนี้ลาวเป็นม่ายมาแปดสิบสี่ปี อยู่แต่ในพระวิหารฮับใซ้พระเจ้าเมิ้ดมื้อเมิ้ดเว็น อธิษฐานเว้านำพระเจ้าอดข้าวอดน้ำอยู่ฮั่น

ลูกา 2:38 แล้วยายอันนากะเข้ามาในหว่างฮั้นพอดี แล้วจั่งขอบคุณสรรเสริญพระเจ้า แล้วยามใดยายได้พ้อใผที่มาซอกหาความรอดในเมืองเยรูซาเล็ม ลาวกะได้เว้าเรื่องพระผู้โปรดฮั้นปันเขาฟัง

ลูกา 2:39 บัดนี้ พอโยเซฟกับมารีย์ได้เฮ็ดตามข้อความในบทบัญญัติของพระเจ้าเมิ้ดคู่แนวแล้ว กะได้พากันกลับเมือเมืองนาซาเร็ธบ้านของเขาอยู่เขตกาลิลี

ลูกา 2:40 อยู่มาเด็กน้อยเยซูกะได้ใหญ่ขึ้นมาเป็นคนเข้มแข็งทางจิตวิญญาณ มีสติปัญญาเพิ่มขึ้นเรื่อยๆ แล้วพระคุณของพระเจ้ากะอยู่นำเพิ่น

ลูกา 2:41 บัดนี้ พอฮอดงานฉลองมื้อที่พระเจ้ากู้ซาติยิวอยู่เมืองเยรูซาเล็ม พ่อแม่ของพระเยซูกะเคยไปฮ่วมงานคู่ปี

ลูกา 2:42 แล้วตอนพระเยซูอายุได้สิบสองปี พ่อแม่กะพาไปนำตามประเพณี

ลูกา 2:43 บัดพองานฉลองจบแล้ว หมู่พวกเขากะตั้งต้นออกเดินทางสิกลับเมือบ้าน แต่ว่าพระเยซูยังอยู่ในเมืองเยรูซาเล็ม ซึ่งพ่อแม่ของพระเยซูบ่ฮู้จักนำ

ลูกา 2:44 พ่อแม่เลยคึดว่าพระเยซูคือสิมากับหมู่พวกเขา เดินทางผ่านไปมื้อหนึ่งเขากะเลยซอกหานำหมู่พวก กับนำพี่น้องที่มานำกัน

ลูกา 2:45 บัดบ่พ้อกะเลยหลบเมือไปหาอยู่เมืองเยรูซาเล็ม

ลูกา 2:46 แล้วโยเซฟกับมารีย์กะได้ซอกอยู่ฮั่นสามมื้อเต็มจั่งมาพ้อพระเยซูอยู่ในพระวิหาร เห็นนั่งซุมกันนำพวกนักปราชญ์ครูบาอาจารย์ทางพระบัญญัติ ทั้งถามทั้งฟังพวกเขา

ลูกา 2:47 แล้วคู่คนที่ได้ยินคำถามคำตอบของพระเยซู เขากะพากันเป็นตางึดในความรอบรู้กับคำตอบของเพิ่น คือว่าเข้าใจคักแท้

ลูกา 2:48 แล้วพอโยเซฟกับมารีย์ได้เห็นพระเยซูนั่งอยู่ฮั่น เขากะแปลกใจ แล้วมารีย์ผู่เป็นแม่ได้เว้าว่า “ลูกเอ้ยเป็นหยังเจ้าเฮ็ดใส่พ่อใส่แม่แนวนี้ พ่อแม่ห่วงใยซอกหาเจ้าพอแฮงแล้ว”

ลูกา 2:49 แต่พระเยซูตอบเขาว่า “เป็นหยังจั่งมาซอกหาข้อย คือบ่ฮู้บ้อว่าข้อยต้องเฮ็ดเวียกเฮ็ดงานของพ่อข้อยอยู่นี้”

ลูกา 2:50 บัดนี้ โยเซฟกับมารีย์กะเลยงง บ่เข้าใจความเว้าที่พระเยซูบอกเขา

ลูกา 2:51 แล้วพระเยซูกะเลยกลับเมือบ้านนาซาเร็ธนำพ่อแม่ แล้วกะได้เซื่อฟังเขา แต่ฝ่ายมารีย์ผู้เป็นแม่กะได้เก็บเรื่องคู่อย่างนี้ไว้ในใจ

ลูกา 2:52 แล้วพระเยซูกะได้เจริญเติบโตขึ้นมา ทางกาย ทางสติปัญญา แล้วเป็นที่พอใจต่อพระเจ้ากับต่อผู้คนนำ
////////// ////////// //////////