มาระโก – Mark บทที่ 9

มาระโก 9:1 แล้วเพิ่นบอกเขาอีกว่า “เฮาสิบอกความจริงให้พวกเจ้าเด้อ ในหมู่พวกเจ้าที่ยืนอยู่หนิ มีผู้ลางคนสิบ่ได้ซิมรสซาติของความตายจนกว่าสิได้เห็นแผ่นดินของพระเจ้าลงมาอันประกอบด้วยฤทธานุภาพ”

มาระโก 9:2 แล้วอยู่มาอีกหกมื้อ พระเยซูได้ซวนเปโตร ยากอบ กับยอห์นขึ้นไปอยู่หม่องเปลี่ยวเทิงภูเขาสูงๆ พอฮอดแล้ว ลักษณะภาพของเพิ่นได้เปลี่ยนไปต่อหน้าต่อตาพวกเขา

มาระโก 9:3 แล้วเสื้อคลุมยาวของเพิ่น เริ่มสิออกแสงเลือมๆ ขาวจัวะคือปานหิมะ ขาวกว่าซ่างฟอกผ้าทั่วโลกสามารถสิเฮ็ดได้ 

มาระโก 9:4 แล้วพอดี เอลียาห์กับโมเสส ได้ปรากฏให้พวกลูกศิษย์เห็น พวมซุมกันกับพระเยซู 

มาระโก 9:5 ฝ่ายเปโตรเสนอกับพระเยซู เว้าว่า “อาจารย์เจ้าข้า ซึ่งพวกผู้ข้าอยู่นำอาจารย์อยู่พี้กะถือว่าเป็นโอกาสดีหลาย ให้พวกผู้ข้าเฮ็ดเพิงสามหลังไว้ ให้ท่านหลังหนึ่ง ให้โมเสสหลังหนึ่ง แล้วให้เอลียาห์อีกหลังหนึ่ง”

มาระโก 9:6 ที่เปโตรเว้าจั่งซี้กะย้อนลาวบ่จักความเว้า คือพวกเขาหย้านขนาด 

มาระโก 9:7 แล้วมีเมฆมาปกคลุมเขาไว้ กับมีเสียงของผู้มีอํานาจออกมาจากเมฆว่า “ท่านผู้นี้เป็นลูกโทนที่ฮักของเฮา ให้ฟังเพิ่นเด้อ” 

มาระโก 9:8 แล้วในหว่างฮั้นพอดี บัดลูกศิษย์เหลียวเบิ่งรอบๆ กะบ่เห็นใผ เห็นแต่พระเยซูอยู่นำเขาท่อฮั้น 

มาระโก 9:9 แล้วบัดพวมลงมาจากภูเขา เพิ่นได้สั่งห้ามพวกลูกศิษย์สามคนฮั้นไว้ บ่ให้นำเอาความใดๆ ที่ได้เห็นอยู่ฮั้นไปบอกผู้ใดเลย จนกว่าผู้เป็นบุตรมนุษย์สิเป็นขึ้นมาจากตาย

มาระโก 9:10 แล้วพวกลูกศิษย์กะเก็บงำแนวที่เป็นไปฮั้นไว้ ซักถามกันว่า การเป็นขึ้นมาจากตายฮั้น สิหมายความว่าจั่งใด 

มาระโก 9:11 แล้วเขาจั่งถามพระเยซูว่า “เป็นหยังพวกเสมียนฯ ฮั้น ได้เว้ากันว่า เอลียาห์สิต้องมาก่อน”

มาระโก 9:12 พระเยซูตอบเขาว่า “เอลียาห์ต้องมาก่อนกะแม่นอยู่ เพื่อสิเฮ็ดให้เมิ้ดคู่แนวคืนสภาพเดิม แล้วตามมีคำเขียนไว้เถิงเฮาผู้เป็นบุตรมนุษย์ฮั้นว่า เพิ่นจำเป็นจั่งต้องทนทุกข์ทรมานหลายอันหลายแนว กับสิโดนคนทั้งหลายดูหมิ่นเพิ่น

มาระโก 9:13 แต่เฮาสิบอกพวกเจ้าว่า เอลียาห์ฮั้นได้มาแล้ว แล้วพวกเขาได้เฮ็ดใส่ลาวตามแนวที่เขาอยากสิเฮ็ด ตามที่มีคำเขียนไว้เถิงลาว”

มาระโก 9:14 แล้วบัดพอพระเยซูมาหาพวกลูกศิษย์เพิ่น เพิ่นกะเหลียวเบิ่งเห็นคนหลวงหลายขนาด พร้อมพวกเสมียนฯ อยู่ฮ้อมล้อมพวกลูกศิษย์เพิ่น พวมซักถามลูกศิษย์อยู่ฮั้น

มาระโก 9:15 ในยามฮั้นพอดี บัดพวกคนทั้งหลายอยู่ฮั้นเห็นพระเยซูเขากะดีใจหลาย จั่งแล่นเข้ามาต้อนฮับเคารพเพิ่น 

มาระโก 9:16 แล้วเพิ่นจั่งถามพวกเสมียนฯ ฮั้นว่า “เจ้าซักถามพวกเขาเรื่องหยัง” 

มาระโก 9:17 แล้วในหว่างฮั้นมีคนหนึ่งในพวกคนหลวงหลายอยู่ฮั้นตอบขึ้นมาว่า “อาจารย์เจ้าข้า ผู้ข้าได้พาลูกซายของผู้ข้ามาหาท่านย้อนผีใบ้เข้าสิง

มาระโก 9:18 แล้วผีฮั้นพาลูกผู้ข้าไปหม่องใด มันกะเฮ็ดให้ล้มซักดิ้นอยู่ฮั้น มีอาการน้ำลายฟูมปากกับกัดแข้ว แล้วโตเขากะเหี่ยวแห้งลงไปนำ ผู้ข้าได้ขอพวกลูกศิษย์ของท่านให้ขับผีฮั้นออก แต่เขาเฮ็ดบ่ได้เลย”

มาระโก 9:19 พระเยซูจั่งตอบคนฮั้นว่า “โอ้ พวกคนยุคที่ขาดความเซื่อวางใจแท้เนาะ เฮาสิต้องทนเอาอยู่นำพวกเจ้าโดนซำใดเฮ้ย ให้พาเด็กฮั้นมาหาเฮาเด้อ”

มาระโก 9:20 แล้วเขาได้พาเด็กฮั้นมาหาพระเยซู แล้วบัดพอเห็นเพิ่น ผีจั่งเฮ็ดให้เด็กซักดิ้นล้มลงดิน กับมีน้ำลายฟูมปาก กลิ้งไปกลิ้งมาอยู่ฮั้น

มาระโก 9:21 พระเยซูจั่งถามพ่อเด็กฮั้นว่า “เป็นแนวนี้มาโดนปานใด” พ่อเด็กตอบว่า “คือเป็นมาแต่น้อย

มาระโก 9:22 แล้วหลายเทื่อ ผีสิโยนลงในไฟ กับโยนลงในน้ำ ย้อนอยากสิทำร้ายเขา แต่คั่นท่านผู้ข้าสามารถเฮ็ดได้ ขอโปรดซ่อยเมตตาพวกผู้ข้าท้อน” 

มาระโก 9:23 พระเยซูเลยบอกพ่อฮั้นว่า “คั่นเจ้าเซื่อวางใจได้ เมิ้ดคู่แนวเป็นไปได้สำหรับผู้ที่เซื่อ” 

มาระโก 9:24 หว่างฮั้นพอดี พ่อของเด็กฮั้นกะฮ้องขอด้วยน้ำตาไหลว่า “ท่านเจ้าข้า ผู้ข้าเซื่อวางใจอยู่แล้ว ขอซ่อยความบ่เซื่อของผู้ขาแหน่ท้อน”

มาระโก 9:25 บัดพระเยซูเหลียวเบิ่ง ได้เห็นพวกประซาซนอยู่ฮั้นพวมแล่นเข้ามา เพิ่นจั่งสั่งผีโสมมฮั้นว่า “อ้ายผีใบ้หูหนวก เฮาสั่งมึงให้ออกมาจากเขาเดี๋ยวนี้เด้อ แล้วอย่าสู่กลับเข้าสิงเขาอีกจักเทื่อเลย”

มาระโก 9:26 ผีฮั้นฮ้องเสียงดัง แล้วเฮ็ดให้เด็กฮั้นซักดิ้นหลายขนาด แล้วจั่งออกมา เด็กฮั้นกะนอนนิ่งคือปานคนตาย จนมีหลายคนกล่าวว่า “ตายแล้วๆ”

มาระโก 9:27 แต่พระเยซูได้จับมือซ่อยพยุงเด็กฮั้น แล้วเด็กกะยืนขึ้น

มาระโก 9:28 แล้วบัดเพิ่นเข้าเฮือนฮั้นแล้ว พวกลูกศิษย์ของเพิ่นจั่งถามเพิ่นเป็นส่วนโตว่า “เป็นหยังพวกผู้ข้าจั่งบ่สามารถขับผีฮั้นออกให้ได้”

มาระโก 9:29 แล้วเพิ่นตอบเขาว่า “ผีแนวนี้สิออกบ่ได้เลย นอกจากโดยการอธิษฐานเว้านำพระเจ้า กับถือการอดอาหารนำ”

มาระโก 9:30 แล้วพระเยซูกับพวกลูกศิษย์ได้ออกจากหม่องฮั้น ย่างผ่านแคว้นกาลิลีไป แต่เพิ่นบ่อยากให้ผู้ใดฮู้เถิงเรื่องขับผีแนวที่เป็นไปฮั้น

มาระโก 9:31 คือเพิ่นเคยบอกสอนลูกศิษย์ของเพิ่นว่า “เฮาผู้เป็นบุตรมนุษย์สิต้องถืกมอบไว้ในมือของผู้คนทั้งหลาย แล้วพวกเขาสิประหารเพิ่น พอบัดประหารแล้ว เพิ่นสิเป็นขึ้นมาจากตายในมื้อที่สาม”

มาระโก 9:32 แต่พวกลูกศิษย์บ่เข้าใจถ้อยคำนี้ บัดคึดอยากสิถามเพิ่นกะเกรงใจ

มาระโก 9:33 แล้วพระเยซูไปเมืองคาเปอรนาอุม พอเข้าไปในเฮือนแล้ว เพิ่นเลยถามพวกลูกศิษย์ว่า “ตอนมาตามทางฮั้น พวกเจ้าได้โต้แย้งกันเรื่องหยัง”

มาระโก 9:34 พวกลูกศิษย์กะมิดอยู่ ย้อนตอนมาตามทางฮั้นเขาได้เถียงกันว่า ใผสิเป็นใหญ่กว่ากัน

มาระโก 9:35 เพิ่นเลยนั่งลง แล้วเอิ้นลูกศิษย์สิบสองคนฮั้นมา เว้ากับเขาว่า “คั่นผู้ใดอยากเป็นใหญ่เป็นโต ผู้ฮั้นสิเป็นผู้เล็กน้อย กับสิเป็นคนใซ้ของเมิ้ดคู่คนนำ”

มาระโก 9:36 แล้วเพิ่นได้นำเอาเด็กน้อยคนหนึ่งให้มายืนอยู่หว่างกลางหมู่พวกลูกศิษย์ แล้วเพิ่นอุ้มเด็กฮั้นไว้ เว้ากับพวกลูกศิษย์ว่า

มาระโก 9:37 “แม่นผู้ใดกะตาม ที่สิต้อนฮับเอาเด็กน้อยคือเด็กผู้นี้ ในนามของเฮา กะท่อกับได้ต้อนฮับเฮา แล้วผู้ใดที่ได้ต้อนฮับเฮา กะบ่ได้ต้อนฮับเฮาแต่ผู้เดียวซื่อๆ แต่ได้ต้อนฮับผู้ที่ใซ้เฮามาพร้อมนำ”

มาระโก 9:38 แล้วยอห์นจั่งเว้ากับเพิ่น ว่า “อาจารย์เจ้าข้า พวกผู้ข้าได้เห็นคนหนึ่งขับไล่ผีออกโดยในพระนามของท่าน ซึ่งคนฮั้นบ่ได้ติดตามหมู่พวกเฮา พวกผู้ข้าเลยห้ามเขาบ่ให้เฮ็ด ย้อนเขาบ่ได้ติดตามหมู่พวกเฮา”

มาระโก 9:39 แต่พระเยซูบอกว่า “อย่าสู่ห้ามเขาเลย คือบ่มีใผสิเฮ็ดการอัศจรรย์ในนามของเฮา แล้วหันกลับมาเว้าใส่ร้ายเฮาดอก

มาระโก 9:40 คือว่าผู้ใดที่บ่ได้ต่อต้านเฮา ผู้ฮั้นกะอยู่ฝ่ายเฮา

มาระโก 9:41 คือว่า ผู้ใดกะตามที่สิเอาน้ำให้เจ้ากินในนามของเฮา ย้อนว่าเจ้าเป็นคนของเฮาผู้เป็นพระคริสต์ เฮาสิบอกความจริงให้พวกเจ้าเด้อ ผู้ฮั้นสิบ่ได้ขาดบำเหน็จเลย

มาระโก 9:42 แล้วผู้ใดกะตามที่สิเฮ็ดให้ผู้เล็กน้อยแนวหมู่นี้ที่เซื่อในเฮาสะดุดหลงทางไป คั่นสิเอาหินโม่ผูกแขวนคอผู้ฮั้นไว้ แล้วถิ้มถ่วงลงในทะเล กะสิเบากว่าโทษที่เขาสิต้องถืกฮั้น 

มาระโก 9:43 แล้วคั่นมือของเจ้าพาเจ้าหลงผิดไป ให้ตัดมันถิ้มซะเด้อ คือการเข้าสู่ซีวิตด้วยมือด้วนกะยังดีกว่ามีมือสองข้าง แล้วตกลงในบึงไฟนรก เป็นหม่องที่ไฟบ่ฮู้จักมอด

มาระโก 9:44 เป็นหม่องที่โตหนอนของเขาบ่ตาย แล้วไฟบ่ฮู้จักมอดเลย 

มาระโก 9:45 แล้วคั่นว่า เท้าของเจ้าพาเจ้าหลงผิด ให้ตัดมันถิ้มซะเด้อ คือการเข้าสู่ซีวิตด้วยเท้าด้วน กะยังดีกว่ามีเท้าสองข้าง แล้วถืกถิ้มลงในบึงไฟนรก คือเข้าในไฟที่บ่ฮู้จักมอด

มาระโก 9:46 เป็นหม่องที่โตหนอนของเขาบ่ตาย แล้วไฟบ่ฮู้จักมอดเลย

มาระโก 9:47 แล้วคั่นตาของเจ้าพาเจ้าหลงผิด ให้ควักออกถิ้มซะเด้อ คือการเข้าในแผ่นดินของพระเจ้าด้วยตาข้างเดียว กะยังดีกว่ามีตาสองหน่วย แล้วจั่งถืกถิ้มลงในบึงไฟนรก 

มาระโก 9:48 เป็นหม่องที่โตหนอนของเขาบ่ตาย แล้วไฟบ่ฮู้จักมอดเลย

มาระโก 9:49 คือว่าเมิ้ดคู่คนสิต้องถืกซำระล้างด้วยไฟ กับเครื่องบูซาทุกอย่างสิต้องถืกซำระล้างด้วยเกลือ

มาระโก 9:50 คือเกลือเป็นแนวที่ดี แต่คั่นเกลือจืดจางลงเมิ้ดความเค็มแล้ว สิเฮ็ดให้มันคืนมามีรสซาติเค็มอีกคือเก่าได้จั่งใด ส่วนพวกเจ้า กะให้มีรสซาติซีวิตดีเด่นคือเกลือเค็มๆ ฮั้นล่ะ แล้วให้อยู่นำกันอย่างอยู่เย็นเป็นสุขเด้อ
////////// ////////// //////////