มาระโก – Mark บทที่ 8
มาระโก 8:1 ในยามฮั้น กะมีคนหลวงหลายขนาด (แล้วพวกเขาฮั้นกะบ่มีแนวกิน) พระเยซูจั่งได้เอิ้นพวกลูกศิษย์ของเพิ่นมาบอกเขาว่า
มาระโก 8:2 “เฮาอิตนคนหลวงหลายพวกนี้ ย้อนเขาค้างอยู่กับเฮาได้สามมื้อแล้ว แล้วพวกเขากะบ่มีแนวสิกินเลย
มาระโก 8:3 คั่นเฮาสิให้เขากลับเมือบ้านโดยยังบ่ได้กินข้าว เขาสิหิวโหยเมิ้ดแฮงตามทาง ย้อนว่าผู้ลางคนเดินทางมาแต่ไกล”
มาระโก 8:4 แล้วพวกลูกศิษย์ของเพิ่นจั่งตอบเพิ่นว่า “ในถิ่นแห้งแล้งนี้สิหาเอาแนวกินมาแต่ใส ให้คนพวกนี้กินให้มันอิ่มได้”
มาระโก 8:5 แล้วเพิ่นจั่งถามพวกเขาว่า “พวกเจ้ามีขนมปังจักก้อน” เขาเว้าว่า “มีอยู่เจ็ดก้อน”
มาระโก 8:6 แล้วพระเยซูจั่งสั่งพวกประซาซนอยู่ฮั้นให้นั่งลงพื้นดิน แล้วเพิ่นได้ฮับเอาขนมปังเจ็ดก้อนฮั้น แล้วขอบพระคุณ แล้วจั่งบิให้พวกลูกศิษย์แจกออกไปให้พวกคนทั้งหลายอยู่ฮั้น
มาระโก 8:7 แล้วพวกเขากะมีปลาโตน้อยๆ อยู่บ่หลาย พระเยซูจั่งขอบพระคุณ แล้วบอกให้เอาปลาฮั้นแจกออกไปนำ
มาระโก 8:8 จั่งซั้น เมิ้ดคู่คนได้กินอิ่มหนำแล้ว ส่วนที่เหลือฮั้นเขาเก็บได้เจ็ดกระบุง
มาระโก 8:9 แล้วคนที่กินกะมีประมาณ 4,000 คน ได้กินแล้วเพิ่นได้ส่งพวกเขาทั้งหลายออกไป
มาระโก 8:10 แล้วในหว่างฮั้น พระเยซูได้ลงเฮือฮวมกับพวกลูกศิษย์ของเพิ่น ไปเข้าเขตเมืองดาลมานูธา
มาระโก 8:11 บัดนี้ พวกฟาริสีออกมา แล้วตั้งต้นเริ่มโต้เถียงกับพระเยซู อยากให้เพิ่นแสดงเครื่องหมายสำคัญจากฟ้าสวรรค์ เพื่อสิทดลองเพิ่น
มาระโก 8:12 แล้วเพิ่นได้หันใจยาวลึกๆ จากใจ แล้วเว้าว่า “คนยุคนี้แสวงหาเครื่องหมายสำคัญย้อนหยัง เฮาสิบอกความจริงให้พวกเจ้าเด้อ สิบ่มีเครื่องหมายสำคัญที่สิให้คนยุคนี้ดอก”
มาระโก 8:13 แล้วเพิ่นได้ไปจากพวกเขา ลงเฮือข้ามฟากไปอีก
มาระโก 8:14 ฝ่ายพวกลูกศิษย์กะลืมเอาขนมปังไป แล้วในเฮือฮั้นเขากะบ่มี มีแต่ขนมปังอยู่ก้อนเดียวท่อฮั้น
มาระโก 8:15 แล้วพระเยซูบอกพวกลูกศิษย์ไว้ว่า “นี่แน่ะ คอยเบิ่งเอา ให้ระวังเซื้อฟูอันซั่วของพวกฟาริสี กับเซื้อฟูอันซั่วของเฮโรดให้ดีเด้อ”
มาระโก 8:16 แล้วพวกลูกศิษย์จั่งปรึกษากันว่า “แม่นย้อนเหตุที่เฮาบ่มีขนมปังบ้อ ที่เพิ่นเว้าแนวนี้”
มาระโก 8:17 แล้วบัดพระเยซูฮู้ทัน เพิ่นจั่งเว้ากับเขาว่า “เป็นหยังพวกเจ้าจั่งปรึกษาหาลือกันเถิงเรื่องบ่มีขนมปัง พวกเจ้ายังบ่ฮู้เมื่อบ้อ กับยังบ่เข้าใจบ้อ คือใจของพวกเจ้ายังอุดตันอยู่บ้อ
มาระโก 8:18 มีตาแล้วยังบ่เห็นบ้อ มีหูแล้วยังบ่ได้ยินบ้อ พวกเจ้าจื่อบ่ได้บ้อ
มาระโก 8:19 ตอนเฮาบิขนมปังห้าก้อนให้คน 5,000 คนฮั้น พวกเจ้าได้เก็บแนวที่เหลือฮั้นได้จักกระบุง” เขาตอบเพิ่นว่า “ได้ 12 กระบุงพอดี”
มาระโก 8:20 “แล้วบัดได้แจกขนมปังเจ็ดก้อนให้คน 4,000 คนฮั้น พวกเจ้าเก็บแนวที่เหลือฮั้นได้จักกระบุง” เขาตอบว่า “ได้ 7 กระบุง”
มาระโก 8:21 แล้วเพิ่นจั่งเว้ากับเขาว่า “แล้วเป็นหยังพวกเจ้ายังบ่ทันเข้าใจ”
มาระโก 8:22 เว้าแล้วพระเยซูกะไปยังเมืองเบธไซดา แล้วไทเมืองฮั้นได้จูงเอาซายตาบอดคนหนึ่งมาหา ขอให้เพิ่นแปะมือใส่ซายตาบอดฮั้น
มาระโก 8:23 เพิ่นจั่งได้จูงมือคนตาบอด นำออกไปนอกเมือง บัดได้เอาน้ำลายลงใส่ตาคนฮั้น กับวางมือเทิงเขาแล้ว เพิ่นจั่งถามซายฮั้นว่า เจ้าเห็นฮุ่งหรือบ้อ
มาระโก 8:24 คนฮั้นเงยหน้าขึ้นแล้วเว้าว่า “ผู้ข้าเห็นคนคือปานกกไม้ย่างไปย่างมา”
มาระโก 8:25 แล้วพระเยซูจั่งวางมือเทิงตาเขาอีก แล้วให้เขาเงยหน้าขึ้น บัดนี้ตาของซายฮั้นกะเซาเป็นดี เห็นคู่คนได้ชัดเจน
มาระโก 8:26 แล้วเพิ่นจั่งส่งเขาให้เมือเฮือนของเขา บ่ให้แวะใส บอกว่า “อย่าเข้าไปในเมือง หรือเว้าให้ใผในเมืองฮั้นฟังเลย”
มาระโก 8:27 แล้วพระเยซูได้ออกไปกับพวกลูกศิษย์ของเพิ่น เข้าเมืองต่างๆ ในซีซารียา กับฟีลิปปี แล้วบัดเพิ่นพวมย่างตามทางอยู่ฮั้น เพิ่นเลยถามพวกลูกศิษย์ว่า “ผู้คนเว้ากันว่าเฮาเป็นใผ”
มาระโก 8:28 แล้วเขาตอบว่า “ผู้ลางคนว่าเป็นโยฮันผู้ให้ฮับพิธีจุ่มน้ำ แต่ผู้ลางคนว่าผู้เป็นปากเป็นเสียงเอลียาห์ แล้วคนอื่นกะยังว่าผู้เป็นปากเป็นเสียงอีกคนหนึ่ง”
มาระโก 8:29 แล้วเพิ่นจั่งถามเขาว่า “ฝ่ายพวกเจ้าเด๋ ว่าเฮาเป็นผู้ใด” เปโตรเลยตอบเพิ่นว่า ท่านเป็นพระคริสต์ฮั้นล่ะ”
มาระโก 8:30 แล้วพระเยซูสั่งห้ามพวกลูกศิษย์ไว้ บ่ให้บอกผู้ใดว่าเพิ่นเป็นใผ
มาระโก 8:31 แล้วเพิ่นจั่งได้ตั้งต้นเริ่มสอนลูกศิษย์ว่า “เฮาผู้เป็นบุตรมนุษย์จำเป็นสิต้องทนทุกข์ทรมานหลายแนว แล้วพวกผู้หลักผู้ใหญ่ พวกหัวหน้าผู้นำเครื่องถวาย กับพวกเสมียนฯ กะสิปฏิเสธบ่ยอมฮับในโตเฮา แล้วเฮาสิต้องถืกประหารซีวิต แต่ในมื้อที่สามเฮาสิได้เป็นขึ้นมาจากตาย”
มาระโก 8:32 แล้วพระเยซูได้เว้าคำแนวหมู่นี้อย่างแจ่มแจ้ง พอฟังแล้วเปโตรจั่งนำเพิ่นออกไปจักหน่อย แล้วได้เริ่มสั่งห้ามเพิ่นไว้
มาระโก 8:33 แต่พอพระเยซูได้เหลียวเบิ่งพวกลูกศิษย์ของเพิ่นแล้ว กะได้ติเตียนเปโตรว่า “อ้ายผีมารซาตาน ให้ถอยออกไปข้างหลังเฮาแม่ะ ย้อนแนวความคึดของเจ้าบ่ได้ตามพระประสงค์ของพระเจ้าเลย แต่เป็นแนวความคึดตามค่านิยมของคนซื่อๆ”
มาระโก 8:34 แล้วบัดเพิ่นได้เอิ้นเอาพวกประซาซนอยู่ฮั้นมาหา ฮวมทั้งพวกลูกศิษย์ของเพิ่น เพิ่นจั่งเว้ากับเขาทั้งหลายว่า “คั่นผู้ใดอยากตามเฮามา กะให้ผู้ฮั้นปฏิเสธความปรารถนาของโตเอง แล้วฮับแบกเอาหลักประหารของโต แล้วจั่งตามเฮามา
มาระโก 8:35 คือว่า ผู้ใดคึดอยากเอาซีวิตรอด ซีวิตของผู้ฮั้นสิไปบ่รอด แต่ผู้ใดที่อุทิศซีวิตของโตย้อนเห็นแก่เฮา ผู้ฮั้นกะสิได้ซีวิตรอด
มาระโก 8:36 คือคั่นผู้ใดสิได้สิ่งของเมิ้ดทั้งโลก แต่ในที่สุดจิตวิญญาณของโตเองสิต้องพินาศไป มันสิเป็นประโยชน์อีหยังต่อเขา
มาระโก 8:37 หรือว่า ผู้ใดสิเอาอีหยังมาแลกเอาเพื่อจิตวิญญาณของโต
มาระโก 8:38 จั่งซั้น คั่นผู้ใดกะตามที่มีความละอายในเฮากับในถ้อยคำของเฮาต่อหน้าคนในยุคเล่นซู้คู่แนวนี้ ซึ่งเต็มไปด้วยบาป บัดยามที่เฮาผู้เป็นบุตรมนุษย์ลงมาประกอบด้วยพระสิริของพระเจ้าผู้เป็นพ่อ พร้อมหมู่เทวทูตอันบริสุทธิ์ของเพิ่น ในตอนฮั้นเฮากะสิเสียใจในผู้ฮั้นย้อนเขามีความละอายในเฮา”
////////// ////////// //////////
