มาระโก – Mark บทที่ 14

มาระโก 14:1 ยังอีกสองมื้อสิเถิงเทศกาลฉลองมื้อที่พระเจ้ากู้ซาติยิว กับเทศกาลกินขนมปังบ่มีเซื้อฟู พวกหัวหน้าผู้นำเครื่องถวายกับเสมียนฯ กะหาช่องที่สิจับพระเยซูด้วยกลอุบาย ย้อนตั้งใจสิฆ่าเพิ่น 

มาระโก 14:2 แต่พวกเขาเว้ากันว่า “อย่าเพิ่งเฮ็ดในมื้อเลี้ยงฉลองฮั้นเลย หย้านว่าพวกประซาซนสิเกิดการ สาละวนวุ่นวาย” 

มาระโก 14:3 แล้วในยามที่พระเยซูอยู่เฮือนของซีโมน ผู้เป็นโรคขี้ทูต อยู่ที่หมู่บ้านเบธานี บัดยามเพิ่นพวมกินอยู่พอดี มีญิงผู้หนึ่งถือกระปุกหินขาวอ่อนใส่น้ำมันหอมนาระดาอันประเสริฐล้ำค่า มากราบมาเฝ้าเพิ่น แล้วนางกะทุบกระปุกฮั้นแตก แล้วกะรินน้ำมันหอมฮั้นลงใส่หัวของเพิ่น

มาระโก 14:4 แล้วมีผู้ลางคนอยู่ฮั้นบ่พอใจเว้ากันว่า “เป็นหยังจั่งเทน้ำมันหอมนี้ถิ้มซื่อๆ

มาระโก 14:5 คือว่าน้ำมันหอมนี้ คั่นขายกะคงได้เงินกว่าสามร้อยเหรียญเดนาริอัน แล้วสิแจกให้คนจนกะได้” แล้วเขาเลยจ่มใส่แม่ญิงฮั้น 

มาระโก 14:6 ฝ่ายพระเยซูเว้าว่า “อย่าว่านางเลย กวนใจนางย้อนหยัง นางได้เฮ็ดการดีกับเฮา 

มาระโก 14:7 คือว่าคนยากจนฮั้นกะมีอยู่นำเจ้าอยู่เสมอ แล้วพวกเจ้าสิเฮ็ดการดีซ่อยเขายามใดกะได้ แต่ส่วนเฮาหนิสิบ่ได้อยู่นำพวกเจ้าเสมอไป 

มาระโก 14:8 คือนางได้เฮ็ดตามที่นางสามารถเฮ็ดได้ คือนางมาชโลมโตของเฮาไว้ก่อนเพื่องานศพของเฮา 

มาระโก 14:9 เฮาสิบอกความจริงให้พวกเจ้าเด้อ หม่องใดๆ ทั่วโลกซึ่งข่าวประเสริฐนี้สิได้ฮับการประกาศไป แนวที่นางได้เฮ็ดให้เฮากะสิลือไปเป็นอนุสรณ์เถิงนางพร้อมนำ” 

มาระโก 14:10 แล้วฝ่ายยูดาสอิสคาริโอท เป็นคนหนึ่งในพวกลูกศิษย์สิบสองคน ได้ออกไปหาพวกหัวหน้าผู้นำเครื่องถวาย เพื่อสิทรยศมอบพระเยซูไว้ให้เขา 

มาระโก 14:11 แล้วบัดพวกเขาได้ยินจั่งซั้นกะดีใจ กับได้สัญญาว่าสิให้เงินยูดาส แล้วยูดาสกะเลยหาช่องทางที่สิทรยศมอบเพิ่นให้เขา 

มาระโก 14:12 บัดมื้อตำอิดของเทศกาลกินขนมปังบ่มีเซื้อฟู ซึ่งเป็นมื้อสิฆ่าแกะน้อยสำหรับการถวายฉลองมื้อกู้ซาติยิวฮั้น พวกลูกศิษย์ของพระเยซูมาถามเพิ่นว่า “ท่านอยากให้พวกผู้ข้าจัดเตรียมการฉลองกินมื้อกู้ซาติยิวให้กินฉลองอยู่ใส” 

มาระโก 14:13 พระเยซูได้ใซ้ลูกศิษย์สองคนไป สั่งเขาว่า “ให้เข้าไปในเมือง แล้วสิมีซายคนหนึ่ง เอาหม้อดินใส่น้ำมาหาเจ้า ให้ตามคนฮั้นไปเด้อ 

มาระโก 14:14 แล้วเขาสิเข้าไปเฮือนใด ให้พวกเจ้าบอกเจ้าของเฮือนฮั้นว่า พระอาจารย์ของพวกเฮาให้ถามว่า ‘ห้องพักแขกที่เฮาสิกินฉลองมื้อกู้ซาติยิวฮวมกับลูกศิษย์มีอยู่ใส’ 

มาระโก 14:15 แล้วเจ้าของเฮือนสิพาเจ้าขึ้นไปเบิ่งห้องใหญ่ที่ตกแต่งไว้อย่างดีแล้วอยู่ซั้นเทิง หอ้งฮั้นล่ะ ให้พวกเจ้าจัดเตรียมการไว้สำหรับพวกเฮาเด้อ” 

มาระโก 14:16 แล้วลูกศิษย์สองคนฮั้นจั่งออกย่างเข้าไปในเมือง แล้วเห็นว่าได้เป็นไปคือจั่งเพิ่นได้เว้ากับเขา เขาจั่งจัดเตรียมห้องฮั้นไว้เรียบร้อยให้ฉลองเทศกาลมื้อกู้ซาติยิว 

มาระโก 14:17 บัดฮอดค่ำแล้ว พระเยซูได้มากับลูกศิษย์สิบสองคนฮั้น 

มาระโก 14:18 แล้วบัดพวมกินฉลองอยู่กับลูกศิษย์ พระเยซูเว้าว่า “เฮาสิบอกความจริงให้พวกเจ้าเด้อ มีคนหนึ่งในพวกเจ้าที่พวมกินอาหารอยู่กับเฮานี่ ผู้ฮั้นล่ะสิทรยศใส่เฮา” 

มาระโก 14:19 แล้วฝ่ายพวกลูกศิษย์กะเกิดเป็นทุกข์แล้วบัดหนิ ต่างจั่งถามเพิ่นแต่ละคนว่า “แม่นผู้ข้าบ้อ” แล้วอีกคนหนึ่งถามว่า “แม่นผู้ข้าซะบ้อ” 

มาระโก 14:20 แล้วพระเยซูได้ตอบเขาว่า “มันเป็นผู้หนึ่งในลูกศิษย์สิบสองคนนี้ คือเป็นผู้จิ้มในจานเดียวกันกับเฮานี่ล่ะ 

มาระโก 14:21 คือ สำหรับเฮาผู้เป็นบุตรมนุษย์ฮั้น มันสิต้องเป็นไปตามคำที่เขียนไว้อยู่แล้ว แต่ให้ระวังพินาศเด้อ ผู้ที่ทรยศเฮาผู้เป็นบุตรมนุษย์ คือคั่นผู้ฮั้นบ่ได้เกิดมาเลย กะสิดีกว่าสำหรับเขา” 

มาระโก 14:22 แล้วหว่างพวกเขาพวมกินฉลองฮั้น พระเยซูกะหยิบเอาขนมปังขึ้นมา แล้วขอบพระคุณ แล้วจั่งบิให้พวกลูกศิษย์เว้าว่า “ให้ฮับกินเด้อ อันนี่เป็นคือกายของเฮา” 

มาระโก 14:23 แล้วเพิ่นจั่งหยิบถ้วย ขอบพระคุณ แล้วให้เขา เขากะฮับไปดื่มคู่คน 

มาระโก 14:24 แล้วเพิ่นเว้ากับเขาอีกว่า “ให้ฮับดื่มเด้อ อันนี่เป็นคือเลือดของเฮา ที่เป็นพันธสัญญาใหม่ ซึ่งต้องหลั่งไหลออกเพื่อคนหลวงหลาย 

มาระโก 14:25 เฮาสิบอกความจริงให้พวกเจ้าเด้อ เฮาสิบ่ได้ดื่มน้ำหมากเถาองุ่นนี้ต่อไปอีก จนฮอดมื้อฮั้นอยู่ข้างหน้าพู้น คือมื้อที่เฮาสิดื่มใหม่ในแผ่นดินของพระเจ้าฮั้น” 

มาระโก 14:26 บัดร้องเพลงสรรเสริญแล้ว พระเยซูกับพวกลูกศิษย์กะพากันออกไปยังภูเขาหมากกอกเทศ 

มาระโก 14:27 แล้วพระเยซูเว้ากับพวกลูกศิษย์ว่า “พวกเจ้าสิสะดุดใจย้อนเฮาในคืนนี้เอง ตามที่มีคำเขียนไว้ว่า ‘เฮาสิฟาดสิตีผู้เลี้ยงแกะให้แหลก แล้วแกะฝูงฮั้นสิกระจัดกระจายออกไป’ 

มาระโก 14:28 แต่บัดเฮาเป็นขึ้นมาจากตายแล้ว เฮาสิไปยังแคว้นกาลิลีก่อนเจ้า” 

มาระโก 14:29 บัดนี้ เปโตรบอกเพิ่นว่า “แม้นแต่เมิ้ดคู่คนสิสะดุดใจหลงไป ผู้ข้าสิบ่สะดุดเลย” 

มาระโก 14:30 แล้วพระเยซูจั่งเว้ากับเขาว่า “เฮาสิบอกความจริงให้พวกเจ้าเด้อ ในมื้อนี้ คือคืนนี้เอง ก่อนไก่สิขันสองเทื่อ เจ้าสิปฏิเสธเฮาสามเทื่อ” 

มาระโก 14:31 แต่เปโตรเลยสาบานอย่างฮ้ายแฮงเข้าไปอีกว่า “เถิงแม้นผู้ข้าสิต้องตายกับท่าน ผู้ข้ากะสิบ่ปฏิเสธท่านเลย” พวกลูกศิษย์กะเว้าคือกันเมิ้ดคู่คน 

มาระโก 14:32 แล้วพระเยซูกับพวกลูกศิษย์มายังหม่องหนึ่งชื่อเกทเสมนี แล้วเพิ่นเว้ากับลูกศิษย์ของเพิ่นว่า “ให้นั่งอยู่นี้ไว้เด้อ บัดยามเฮาออกไปอธิษฐานเว้านำพระเจ้า” 

มาระโก 14:33 แล้วเพิ่นกะพาเปโตร ยากอบ กับยอห์นไปนำ ฮอดแล้วเพิ่นกะเกิดการปั่นป่วนหนักใจหลายขนาด 

มาระโก 14:34 จั่งเว้ากับพวกลูกศิษย์ว่า “ใจเฮาเป็นทุกข์เกือบสิตาย ให้ถ้าคอยเฝ้าเบิ่งอยู่นี้เด้อ” 

มาระโก 14:35 แล้วเพิ่นได้ย่างออกไปอีกหน่อยหนึ่ง ซบลงที่ดินอธิษฐานเว้านำพระเจ้า แล้วเพิ่นได้ขอว่า คั่นเป็นไปขอให้โมงที่สิฮอดผ่านพ้นไปจากเพิ่น 

มาระโก 14:36 แล้วเพิ่นได้เว้าอีกว่า “อับบาๆ พระเจ้าผู้เป็นพ่อเจ้าข้าเอ้ย พ่อสามารถเฮ็ดเมิ้ดคู่แนวได้ ขอเอาจอกนี้ออกจากผู้ข้าไปเถิด แต่ว่าอย่าให้เป็นตามใจของผู้ข้า แต่ให้เป็นไปตามพระประสงค์ของพ่อเลย” 

มาระโก 14:37 แล้วบัดพระเยซูกลับมา ได้พ้อพวกลูกศิษย์นอนหลับอยู่ เลยเว้ากับเปโตรว่า “ซีโมนเปโตรเอ้ย พวกเจ้าคือนอนหลับกันตี้ สิคอยถ้าเฝ้าอยู่โมงเดียวบ่ได้บ้อ 

มาระโก 14:38 ให้พวกเจ้าพึงระวัง อธิษฐานเว้านำพระเจ้าซะเด้อ เพื่อเจ้าสิบ่เข้าสู่การทดลองเด้อ จิตใจพร้อมแล้วกะแม่นอยู่ แต่ฝ่ายเนื้อหนังกะอ่อนกำลัง” 

มาระโก 14:39 แล้วเพิ่นจั่งออกไปอธิษฐานเว้านำพระเจ้าอีกเทื่อหนึ่ง ได้เว้าเป็นคำเก่าอีก 

มาระโก 14:40 แล้วบัดเพิ่นกลับมา ได้พ้อลูกศิษย์นอนหลับอยู่คือเก่า (ย้อนว่าหนังตาเขาหนักจั่งมืนบ่ขึ้น) ฝ่ายพวกเขาบ่ฮู้จักความสิตอบเพิ่น 

มาระโก 14:41 แล้วบัดเพิ่นกลับไปเทื่อที่สาม จั่งเว้ากับเขาว่า “เดี๋ยวนี้ ให้พวกเจ้านอนต่อไปให้มันหายเหนื่อยซะ นี่แน่ะ พอแล้ว คือโมงฮั้นได้มาฮอดมาเถิงแล้ว ซึ่งเฮาผู้เป็นบุตรมนุษย์สิต้องถืกทรยศให้ตกอยู่ในมือของคนบาป 

มาระโก 14:42 ลุกขึ้นไปกันเถอะ นี่แน่ะ ผู้ที่สิทรยศเฮาฮั้นใกล้สิมาฮอดแล้ว” 

มาระโก 14:43 แล้วหว่างฮั้น พระเยซูเว้ายังบ่ทันขาดคำ พอดียูดาสซึ่งเป็นคนหนึ่งในพวกลูกศิษย์สิบสองคนฮั้น กับมีคนหลวงหลายขนาดถือดาบถือไม้ตะบอง ได้มาจากพวกหัวหน้าผู้นำเครื่องถวาย กับเสมียนฯ พร้อมพวกผู้หลักผู้ใหญ่ 

มาระโก 14:44 แล้วผู้ที่สิทรยศเพิ่นฮั้น ได้ตกลงกับพวกฮั้นมาก่อนแล้วสิให้สัญญาณว่า “ผู้ใดที่เฮาจุบแก้ม แม่นผู้ฮั้นล่ะ ให้จับกุมเขาไว้ให้ดีๆ แล้วจั่งนำออกไปเลย” 

มาระโก 14:45 แล้วพอยูดาสมาเถิง เขาย่างตรงเข้ามาหาพระเยซู เว้าว่า “อาจารย์เจ้าข้าๆ” แล้วจั่งจุบแก้มเพิ่น 

มาระโก 14:46 แล้วคนพวกฮั้นได้จับกุมเพิ่นเอาออกไป 

มาระโก 14:47 แล้วมีลูกศิษย์คนหนึ่งที่ยืนอยู่ใกล้ๆ ได้ซักดาบออก ฟันถืกหูของผู้ฮับใซ้ของผู้นำเครื่องถวายผู้สูงสุด ขาดออก 

มาระโก 14:48 แล้วพระเยซูจั่งถามพวกมาฮั้นว่า “พวกเจ้าเบิ่งเฮาว่าเป็นโจรบ้อ จั่งถือดาบ ถือตะบองออกมาจับเฮา 

มาระโก 14:49 เฮาได้สอนอยู่ในพระวิหารคู่มื้อตอนพวกเจ้าอยู่ แต่หว่างฮั้นพวกเจ้าบ่ได้จับเฮา แต่มันสิต้องสำเร็จตามพระคำ” 

มาระโก 14:50 แล้วลูกศิษย์เมิ้ดคู่คนได้ปะเพิ่นไว้กับพวกฮั้น แล้วพากันหนีไป 

มาระโก 14:51 แล้วมีซายหนุ่มคนหนึ่ง บ่ใส่เสื้อผ้า มีแต่ห่มผ้าป่านคลุมโตไว้ ติดตามพระเยซูไป แล้วพวกหนุ่มๆ ได้จับดึงเขาไว้ 

มาระโก 14:52 แต่เขาได้ปะผ้าป่านผืนฮั้น เหลือแต่โตหนีออกไป 

มาระโก 14:53 บัดนี้พวกฮั้นได้นำพระเยซูไปหาผู้นำเครื่องถวายผู้สูงสุด แล้วมีพวกหัวหน้าผู้นำเครื่องถวาย พวกผู้หลักผู้ใหญ่ กับเสมียนฯ พวมตุ้มโฮมกันอยู่ฮั้น 

มาระโก 14:54 แล้วฝ่ายเปโตร กะได้ติดตามพระเยซูไปอยู่ห่างๆ จนเข้าไปเถิงวังของผู้นำเครื่องถวายผู้สูงสุด แล้วได้นั่งผิงไฟอยู่กับพวกคนใซ้ 

มาระโก 14:55 แล้วพวกหัวหน้าผู้นำเครื่องถวาย กับพวกสมาชิกสภา ได้หาข้อพยานหลักฐานตู่ใส่พระเยซูเพื่อจับผิดประหารเพิ่นได้ แต่หาหลักฐานบ่ได้เลย 

มาระโก 14:56 คือว่ามีหลายคนได้เว้าเป็นพยานเท็จใส่เพิ่น แต่คำเว้าของเขาฮั้นบ่ตรงกัน 

มาระโก 14:57 แล้วจั่งมีผู้ลางคนยืนขึ้น เว้าเป็นความเท็จกล่าวหาเพิ่นว่า 

มาระโก 14:58 “พวกเฮาได้ยินคนนี้ว่า ‘เฮาสิทำลายพระวิหารนี้ที่สร้างไว้ด้วยมือคน แล้วในมื้อที่สาม เฮาสิสร้างอีกวิหารหนึ่งขึ้น ซึ่งบ่ได้สร้างด้วยมือของคนเลย'” 

มาระโก 14:59 แต่คำพยานของคนพวกฮั้น กะยังแตกต่างบ่ตรงกัน 

มาระโก 14:60 แล้วบัดนี้ ผู้นำเครื่องถวายผู้สูงสุดจั่งลุกขึ้นยืนในหมู่พวกที่ชุมนุมถามพระเยซูว่า “เจ้าคือบ่ตอบอีหยังแหน่บ้อ แม่นอีหยังที่พวกนี้ได้กล่าวหาเจ้า” 

มาระโก 14:61 แต่เพิ่นนิ่งอยู่ บ่ได้ตอบโต้อีหยังเลย แล้วอีกเทื่อหนึ่ง ผู้นำเครื่องถวายผู้สูงสุดจั่งถามพระเยซูว่า “แม่นตี้ ที่เจ้าเป็นพระคริสต์พระบุตรของพระเจ้าผู้บรมสุขฮั้นบ้อ” 

มาระโก 14:62 แล้วพระเยซูตอบว่า “เฮาได้เป็น แล้วพวกเจ้าสิได้เห็นเฮาผู้เป็นบุตรมนุษย์ฮั้น นั่งทางขวาของผู้เพิ่นมีฤทธานุภาพ กับมาในเมฆจากฟ้าสวรรค์” 

มาระโก 14:63 บัดนี้ ผู้นำเครื่องถวายผู้สูงสุด จั่งฉีกเสื้อของโต แล้วเว้าว่า “เฮาคือสิบ่ต้องการพยานหลักฐานอีหยังอีกแล้วเนาะ 

มาระโก 14:64 พวกเจ้าได้ยินเขาเว้าหมิ่นประมาทพระเจ้าแล้ว พวกเจ้าคึดเห็นจั่งใด” แล้วเมิ้ดคู่คนกะเห็นนำกันว่า ควรสิมีโทษเถิงตาย 

มาระโก 14:65 แล้วผู้ลางคนกะถ่มน้ำลายใส่เพิ่น เอาผ้ามัดปิดตาเพิ่น ฟาดตีเพิ่น แล้วเว้าใส่เพิ่นว่า “ให้พยากรณ์เบิ่งดู” แล้วพวกคนใซ้เอาฝ่ามือตบเพิ่น 

มาระโก 14:66 แล้วฝ่ายเปโตรฮั้น ลาวกะอยู่ในลานนอกของวังอยู่ทางล่างฮั้น มีแม่ญิงคนหนึ่งในพวกคนใซ้ของผู้นำเครื่องถวายผู้สูงสุดได้ย่างมา 

มาระโก 14:67 บัดเห็นเปโตรผิงไฟอยู่เขาจ้องเบิ่ง แล้วเว้าว่า “แม่นเจ้าหนิเนาะ ได้อยู่กับเยซูซาวนาซาเร็ธฮั้น” 

มาระโก 14:68 แต่เปโตรปฏิเสธว่า “ที่เจ้าว่าฮั้นเฮาบ่ฮู้เรื่อง กับบ่เข้าใจ” แล้วเปโตรจั่งออกไปเข้ามุขหน้าของวัง แล้วไก่กะขันพอดี 

มาระโก 14:69 แล้วอีกเทื่อหนึ่งคนใซ้อีกคนหนึ่งได้เห็นเปโตร บอกกับคนที่ยืนอยู่ฮั้นว่า “คนนี้ล่ะ เป็นผู้หนึ่งในพวกเขา” 

มาระโก 14:70 แล้วเปโตรกะปฏิเสธอีก แล้วอยู่มาอีกจักน้อย พวกคนที่ยืนอยู่ฮั้นได้เว้ากับเปโตรว่า “เจ้าฮั้นแล้ว เป็นคนหนึ่งในพวกเขาคักแน่ คือว่าเจ้าเป็นชาวกาลิลี แล้วสำเนียงเว้าของเจ้ากะส่อไปทางเดียวกันนำ” 

มาระโก 14:71 แต่เปโตรสบถสาบาน ด่าเขาว่า “คนที่เจ้าว่าฮั้น กูบ่ฮู้จักมันดอก” 

มาระโก 14:72 แล้วพอดีไก่กะขันเป็นเทื่อสอง เปโตรจั่งคึดซวดเถิงคำที่พระเยซูเว้าไว้กับเขาว่า “ก่อนไก่ขันสองเทื่อ เจ้าสิปฏิเสธเฮาสามเทื่อ” บัดเปโตรหวนคึดขึ้นได้กะฮ้องไห้อย่างใหญ่
////////// ////////// //////////