มัทธิว – Matthew บทที่ 9

มัทธิว 9:1 แล้วพระเยซูกะลงเฮืออีก ข้ามฟากไปยังเมืองของเพิ่น

มัทธิว 9:2 แล้วนี่แน่ะ พวกคนอยู่ฮั้นได้หามคนเป็นอัมพาตผู้หนึ่งซึ่งนอนแคร่มาหาพระเยซู บัดเพิ่นเหลียวเบิ่งเห็นความเซื่อของพวกเขา จั่งเว้ากับคนอัมพาตว่า “ลูกเอ้ย ให้ชื่นใจเด้อ บาปของเจ้าได้ฮับการอภัยแล้ว”

มัทธิว 9:3 แล้วนี่แน่ะ มีเสมียนฯ ผู้ลางคนอยู่ฮั้นคึดในใจว่า “คนนี้ได้เว้าแนวหมิ่นประมาทพระเจ้าแล้ว”

มัทธิว 9:4 ส่วนพระเยซูได้ฮู้จักแนวความคึดของเขาจั่งถามว่า “เป็นหยังพวกเจ้าจั่งคึดซั่วอยู่ในใจ

มัทธิว 9:5 แบบใดสิง่ายกว่ากัน ที่สิว่า ‘บาปของเจ้าได้ฮับการอภัยแล้ว’ หรือว่า ‘ให้ลุกขึ้นย่างไปเด้อ’ บอกมาเบิ่งดู 

มัทธิว 9:6 แต่เพื่อพวกเจ้าสิได้ฮู้ว่า เฮาผู้เป็นบุตรมนุษย์มีสิทธิอำนาจในโลกที่สิยกความผิดบาปได้” (เพิ่นจั่งเว้าสั่งคนเป็นอัมพาตว่า) “ให้ลุกขึ้นเอาแคร่เมือบ้านซะเด้อ”

มัทธิว 9:7 แล้วคนฮั้นจั่งลุกขึ้นเมือบ้านของโตเอง

มัทธิว 9:8 บัดพอพวกคนหลวงหลายอยู่ฮั้นได้เห็น เขากะแปลกใจเป็นตางึด แล้วจั่งพากันสรรเสริญยกย่องพระเจ้า ผู้เพิ่นได้มอบสิทธิอำนาจแนวฮั้นให้กับคน

มัทธิว 9:9 แล้วบัดพอพระเยซูพวมผ่านหม่องฮั่นไป กะเหลียวเบิ่งเห็นซายคนหนึ่งชื่อมัทธิว นั่งอยู่ด่านเก็บภาษี จั่งได้บอกเขาว่า “ให้ตามเฮามาเด้อ” แล้วเขากะลุกขึ้นตามเพิ่นไปโลด

มัทธิว 9:10 แล้วต่อมา บัดพอพระเยซูนั่งลงสิกินข้าวอยู่ในเฮือน นี่แน่ะ มีคนเก็บภาษีกับคนบาปอื่นๆ อีกหลายคนได้เข้ามานั่งลง ฮ่วมพาข้าวกับเพิ่นพร้อมพวกลูกศิษย์ของเพิ่นนำ

มัทธิว 9:11 แล้วบัดพอพวกฟาริสีเห็นแล้ว เลยถามพวกลูกศิษย์ของพระเยซูว่า “เป็นหยังอาจารย์ของพวกเจ้าจั่งกินฮ่วมกับคนเก็บภาษีกับคนบาป บอกมาดู้”

มัทธิว 9:12 แต่พอพระเยซูได้ยินมา จั่งเว้ากับพวกฟาริสีฮั้นว่า “คนบ่เป็นหยังบ่ต้องการหมอดอก มีแต่คนเจ็บคนป่วยที่ต้องการหมอ

มัทธิว 9:13 พวกเจ้าหนิ ให้ไปเฮียนฮู้ความหมายของถ้อยคำนี้ว่า ‘เฮาปรารถนาความเมตตา บ่แม่นการบูซา’ คือเฮาบ่ได้มาเพื่อสิเอิ้นคนเที่ยงธรรม แต่มาเพื่อเอิ้นคนบาปให้กลับใจใหม่” 

มัทธิว 9:14 แล้วพวกลูกศิษย์ของโยฮันมาหาถามเพิ่นว่า “เป็นหยังพวกผู้ข้ากับพวกฟาริสีถือการอดอาหารอยู่เป็นประจำ แต่พวกลูกศิษย์ของท่านบ่ได้ถือการอดอาหารเลย”

มัทธิว 9:15 พระเยซูจั่งเว้ากับเขาว่า “หมู่เจ้าบ่าวสิพากันเป็นทุกข์บัดเจ้าบ่าวยังอยู่กับเขาบ้อ แต่มีมื้อที่สิมาเถิงที่เจ้าบ่าวสิต้องออกจากเขาไป แล้วในยามฮั้นเขาสิถือการอดอาหารอยู่

มัทธิว 9:16 คือสิบ่มีใผเคยเอาท่อนผ้าที่ทอใหม่มาตาบเสื้อเก่าดอก ย้อนว่าพอตาบเสื้อเก่าแล้ว ผ้าใหม่ฮั้นสิหดให้อยู่โต จั่งสิเฮ็ดให้เสื้อเก่าขาดออกไปหลายกว่าเก่าอีก

มัทธิว 9:17 กับว่า บ่มีใผเคยเอาน้ำองุ่นใหม่เอาใส่ไว้ในถุงหนังเก่า คั่นเฮ็ดจั่งซั้นถุงหนังเก่าสิขาดสิแตกไป แล้วน้ำองุ่นใหม่ฮั้นสิไหลออกมาเฮี่ยเมิ้ด แล้วถุงหนังเก่ากะสิเสียไปนำ แต่ว่าคนมักสิเอาน้ำองุ่นใหม่ใส่ไว้ในถุงหนังใหม่ แล้วทั้งสองกะสิบ่เป็นหยัง อยู่นำกันได้เลย”

มัทธิว 9:18 บัดพระเยซูพวมเว้าคำแนวพวกนี้ นี่แน่ะ มีขุนนางคนหนึ่งมาเคารพบูซาเพิ่น ได้เว้าว่า “ลูกสาวของผู้ข้าพึ่งตาย ขอท่านไปวางมือเทิงโตเขาแหน่ท้อน แล้วลูกผู้ข้ากะสิมีซีวิตต่ออีก”

มัทธิว 9:19 ส่วนพระเยซูจั่งได้ลุกขึ้นตามขุนนางคนฮั้นไป แล้วพวกลูกศิษย์ของเพิ่นกะตามไปนำ

มัทธิว 9:20 แล้วนี่แน่ะ พวมไปอยู่ฮั้น มีแม่ญิงคนหนึ่งเป็นโรคตกเลือดได้สิบสองปีมาแล้ว ได้แอบเข้าไปทางหลังพระเยซู แล้วได้แตะต้องซายเสื้อคลุมเพิ่น

มัทธิว 9:21 คือนางได้คึดในใจว่า “คั่นเฮาได้เอามือเพียงแต่แตะใส่เสื้อคลุมเพิ่น เฮากะสิเซาเป็นดี”

มัทธิว 9:22 ส่วนพระเยซูได้เหลียวหลังเห็นนางจั่งเว้าว่า “ลูกสาวเอ้ย ให้ชื่นใจซะเด้อ ย้อนความเซื่อของเจ้าได้เฮ็ดให้เจ้าเซาเป็นดีแล้ว” นับตั้งแต่ยามฮั้นมา แม่ญิงฮั้นกะเซาเป็นดีเลย

มัทธิว 9:23 แล้วบัดพอพระเยซูไปฮอด กะได้เข้าไปในเฮือนขุนนางฮั้น ได้เหลียวเห็นพวกเป่าปี่กับหมู่คนหลายๆ พวมชุลมุนวุ่นวายกันอยู่

มัทธิว 9:24 พระเยซูจั่งเว้ากับพวกเขาว่า “ให้ถอยออกไปซะ คือว่าเด็กญิงคนนี้ยังบ่ทันตายดอก เป็นแต่นอนหลับอยู่ซื่อๆ” เว้าแล้วพวกเขากะพากันหัวเราะใส่เพิ่น

มัทธิว 9:25 แต่บัดซวนหมู่คนให้ออกไปแล้ว พระเยซูได้เข้าไปจับมือเด็กญิง แล้วเด็กญิงฮั้นกะลุกขึ้น

มัทธิว 9:26 แล้วซื่อเสียงเรื่องนี้กะเลื่องลือไปฮอดทั่วแคว้นฮั้น

มัทธิว 9:27 แล้วบัดพระเยซูได้ออกจากฮั้นไป กะมีซายตาบอดสองคนตามพระเยซูมาฮ้องว่า “ลูกดาวิดเจ้าข้า ขอเมตตาพวกผู้ข้าท้อน”

มัทธิว 9:28 แล้วบัดพระเยซูได้เข้าไปในเฮือน ซายตาบอดทั้งสองกะตามมาหาเพิ่น แล้วพระเยซูเลยถามเขาว่า “พวกเจ้าเซื่อบ้อว่า เฮาสามารถสิเฮ็ดการนี้ได้” เขาจั่งตอบเพิ่นว่า “เซื่อ ท่านเจ้าข้า”

มัทธิว 9:29 เพิ่นกะเลยเอามือแตะใส่ตาของเขาทั้งสองเว้าว่า “ให้เป็นไปตามความเซื่อของพวกเจ้าเด้อ” 

มัทธิว 9:30 แล้วตาของพวกเขากะถืกมืนออกมาเห็นฮุ่งได้เลย พระเยซูจั่งบอกเขาไว้ว่า “อย่าให้ผู้ใดฮู้จักเลย”

มัทธิว 9:31 แต่บัดเขาออกจากฮั้นไปแล้ว กะเผยแพร่ซื่อเสียงของพระเยซูไปฮอดทั่วแคว้นฮั้น

มัทธิว 9:32 บัดพระเยซูกับพวกลูกศิษย์พวมออกจากหม่องฮั้นไป นี่แน่ะ มีผู้ลางคนได้พาคนใบ้ผู้หนึ่งที่ถืกผีเข้ามาหาเพิ่น

มัทธิว 9:33 บัดเพิ่นขับไล่ผีออกแล้ว คนใบ้ฮั้นกะเว้าได้ หมู่คนกะแปลกใจเป็นตางึดเว้ากันว่า “บ่เคยเห็นการเฮ็ดแนวนี้จักเทื่อในอิสราเอลเลย”

มัทธิว 9:34 แต่พวกฟาริสีหาว่า “คนนี้ขับไล่ผีออกด้วยอำนาจของนายผี”

มัทธิว 9:35 แล้วพระเยซูได้เดินทางไปล้อมรอบตามบ้านตามเมือง สอนในศาลาธรรมของเขา กับประกาศข่าวดีอันประเสริฐเรื่องแผ่นดินของพระเจ้าฮั้น กับได้ปัวโรคภัยไข้เจ็บเมิ้ดคู่แนวของไทบ้านไทเมืองให้เซาเป็นดี

มัทธิว 9:36 แล้วบัดพระเยซูเหลียวเห็นพวกคนหลวงหลายอยู่ฮั้น เพิ่นกะอิตนเขา ว่าเขาอ่อนเพลียเมื่อยหลาย กับถืกกระจัดกระจายไปคือจั่งฝูงแกะบ่มีผู้เลี้ยงเบิ่งแยง

มัทธิว 9:37 แล้วพระเยซูจั่งเว้ากับพวกลูกศิษย์ของเพิ่นว่า “เวียกการเก็บเกี่ยวฮั้นมีหลายขนาด แต่คนงานยังบ่พอเลย

มัทธิว 9:38 จั่งซั้น ให้พวกเจ้าอ้อนวอนเจ้าของงานเก็บเกี่ยวฮั้น ให้ส่งคนงานมาซ่อยในการเก็บเกี่ยวของเพิ่นนำ”
////////// ////////// //////////