มัทธิว – Matthew บทที่ 6

มัทธิว 6:1 “ระวังให้ดีเด้อ พวกเจ้าอย่าเฮ็ดทานของเจ้าต่อหน้าต่อตาผู้คนเพื่อให้เขาเห็น บ่ซั้นเจ้าสิบ่มีการตอบแทนอีหยังจากพระเจ้าเป็นรางวัล ผู้เป็นพ่อของเจ้าผู้เพิ่นสถิตในสวรรค์ 

มัทธิว 6:2 จั่งซั้น บัดเจ้าเฮ็ดทานของเจ้า อย่าเป่าแตรล่วงหน้าไว้คือจั่งพวกคนหน้าซื่อใจคดเฮ็ดในศาลาธรรมกับตามหนทาง เพื่อสิเอาหน้าเอาตาฮับการซมเซยจากหมู่คน เฮาสิบอกความจริงให้พวกเจ้าโลด ว่า พวกเขาฮั้นได้ฮับการตอบแทนเป็นรางวัลของเขาอยู่แล้ว 

มัทธิว 6:3 แต่พวกเจ้าหนิ บัดเฮ็ดทานของเจ้า อย่าให้มือซ้ายฮู้จักแนวที่มือขวาได้เฮ็ดเด้อ

มัทธิว 6:4 เพื่อการเฮ็ดทานของเจ้าฮั้นสิอยู่ในที่ลับ แล้วพระเจ้าผู้เป็นพ่อของเจ้า ผู้สามารถเห็นในที่ลี้ลัจบ เพิ่นสิตอบแทนเจ้าเป็นรางวัลอย่างเปิดเผย 

มัทธิว 6:5 แล้วบัดพวกเจ้าอธิษฐานเว้านำพระเจ้า อย่าเฮ็ดคือคนหน้าซื่อใจคด ย้อนเขามักยืนอธิษฐานเว้านำพระเจ้าในศาลาธรรมกับตามหัวมุมหนทาง เพื่อสิให้ผู้คนเห็น เฮาสิบอกความจริงให้พวกเจ้าโลด ว่า พวกเขาฮั้นได้ฮับการตอบแทนเป็นรางวัลของเขาอยู่แล้ว

มัทธิว 6:6 แต่พวกเจ้า บัดสิอธิษฐานเว้านำพระเจ้า กะให้เข้าห้องส่วนโต บัดอัดประตูแล้ว ให้อธิษฐานเว้านำพระเจ้าผู้เป็นพ่อของเจ้า ผู้เพิ่นสถิตในที่ลี้ลับ แล้วพระเจ้าผู้เป็นพ่อของเจ้า ผู้ซึ่งเห็นในที่ลี้ลับฮั้น เพิ่นสิตอบแทนเจ้าเป็นรางวัลอย่างเปิดเผย

มัทธิว 6:7 แต่บัดเจ้าอธิษฐานเว้านำพระเจ้า อย่าใซ้คำซ้ำซากอันบ่เป็นประโยชน์คือจั่งคนต่างซาติมักเฮ็ด ย้อนเขาคึดว่าเว้าหลายๆ คำ พระเจ้าจั่งสิฮับฟัง 

มัทธิว 6:8 จั่งซั้น เจ้าอย่าเป็นคือพวกเขาเลย ย้อนว่าแนวใดที่เจ้าต้องการฮั้น พระเจ้าผู้เป็นพ่อของเจ้ากะฮู้จักก่อนเจ้าสิขอแล้ว 

มัทธิว 6:9 กะให้พวกเจ้าให้อธิษฐานเว้านำพระเจ้าแนวนี้ ว่า ข้าแต่พระเจ้า ผู้เป็นพ่อของผู้ข้าทั้งหลาย ผู้เพิ่นสถิตในสวรรค์ ขอให้พระนามของพ่อเป็นที่เคารพบูซา 

มัทธิว 6:10 ขอให้แผ่นดินของพ่อมาตั้งอยู่ คือขอให้เป็นไปตามพระประสงค์ของพ่อตามแผ่นดินโลก คือจั่งอยู่ในสวรรค์ 

มัทธิว 6:11 แล้วขอประทานข้าวปลาอาหารประจำมื้อให้พวกผู้ข้านำ 

มัทธิว 6:12 กับขอให้อภัยการล่วงละเมิดของผู้ข้า คือจั่งผู้ข้าให้อภัยการล่วงละเมิดของผู้อื่นๆ 

มัทธิว 6:13 แล้วขออย่านำผู้ข้าเข้าไปสู่การทดลอง แต่ขอซ่อยกอบกู้ผู้ข้าให้พ้นจากความซั่วฮ้ายต่างหาก ย้อนว่าแผ่นดินกับฤทธิ์เดชกับพระสิริเป็นของพ่อสืบๆ ไปเป็นนิตย์ อาเมน 

มัทธิว 6:14 ย้อนว่าคั่นเจ้าให้อภัยความผิดของคนอื่น พระเจ้าผู้เป็นพ่อของเจ้า ผู้อยู่ในสวรรค์ เพิ่นสิให้อภัยความผิดของเจ้านำ 

มัทธิว 6:15 แต่คั่นเจ้าบ่ยอมให้อภัยความผิดของคนอื่น พระเจ้าผู้เป็นพ่อของเจ้า ผู้อยู่ในสวรรค์ เพิ่นสิบ่ยอมให้อภัยความผิดของเจ้าคือกัน 

มัทธิว 6:16 หลายกว่าฮั้นอีก บัดเจ้าถือการอดอาหาร อย่าเฮ็ดหน้าเศร้าหมองคือคนหน้าซื่อใจคดฮั้น คือพวกเขามักเฮ็ดหน้าฮุบหน้าเหี่ยว เพื่อสิให้คนเห็นว่าเขาพวมถือศีลอดอาหาร เฮาสิบอกความจริงให้พวกเจ้าโลด ว่า พวกเขาฮั้นได้ฮับการตอบแทนเป็นรางวัลของเขาอยู่แล้ว

มัทธิว 6:17 แต่ฝ่ายพวกเจ้า บัดถือการอดอาหาร ให้เอาน้ำมันลูบหัวกับส่วยหน้าไว้ 

มัทธิว 6:18 เพื่อเจ้าสิบ่ให้คนเห็นว่าพวมถือศีลอดอาหาร แต่ให้เฮ็ดต่อหน้าต่อตาพระเจ้า ผู้เป็นพ่อของเจ้า ผู้สถิตในที่ลี้ลับ แล้วพ่อของเจ้าผู้ซึ่งเห็นในที่ลี้ลับฮั้น เพิ่นกะสิตอบแทนเจ้าเป็นรางวัลอย่างเปิดเผย

มัทธิว 6:19 แล้วอย่าสะสมทรัพย์สมบัติไว้ให้โตเองในโลกนี้เด้อ แนวที่โตมอดกับขี้สนิมสิกัดกินได้ กับที่พวกขี้ขโมยสิเจาะเอาลักไปได้ 

มัทธิว 6:20 แต่ให้สะสมทรัพย์สมบัติไว้ให้โตเองในสวรรค์เด้อ ที่โตมอดกับขี้สนิมสิบ่สามารถกัดกินได้ กับที่พวกขี้ขโมยสิบ่สามารถเจาะเอาลักไปได้ 

มัทธิว 6:21 ย้อนว่าทรัพย์สมบัติของเจ้าอยู่หม่องใด ใจของเจ้าสิอยู่หม่องฮั้นนำ

มัทธิว 6:22 ตาเป็นความสว่างของร่างกาย จั่งซั้นคั่นตาของเจ้าดี เมิ้ดทั้งโตกะสิเต็มไปด้วยความสว่างนำ 

มัทธิว 6:23 แต่ คั่นตาของเจ้าซั่ว ทั้งโตของเจ้ากะสิเต็มไปด้วยความมืด จั่งซั้นคั่นความสว่างในโตเจ้ามืดไป ความมืดฮั้นสิหนาทึบส่ำใด 

มัทธิว 6:24 บ่มีใผสามารถฮับใซ้นายสองนายได้ ย้อนว่าเขาสิซังนายฝ่ายหนึ่งกับสิฮักแพงนายอีกฝ่ายหนึ่ง หรือสิเข้าข้างนายฝ่ายหนึ่งกับสิดูหมิ่นนายอีกฝ่ายหนึ่ง สรุปแล้วเจ้าสิฮับใซ้พระเจ้ากับฮับใซ้ข้าวของเงินทองพร้อมกันบ่ได้เลย

มัทธิว 6:25 จั่งซั้น เฮาบอกพวกเจ้าว่า อย่าวุ่นวายเถิงซีวิตของโตว่า สิเอาอีหยังกิน หรือสิเอาอีหยังดื่ม กับอย่าวุ่นวายเถิงร่างกายของโตว่า สิเอาอีหยังมานุ่งห่ม คือซีวิตสำคัญหลายกว่าข้าวปลาอาหารบ่แม่นบ้อ กับร่างกายสำคัญหลายกว่าเครื่องนุ่งห่มบ่แม่นบ้อ 

มัทธิว 6:26 ให้ เบิ่งนกในอากาศดู้ มันบ่ได้หว่าน บ่ได้เกี่ยว บ่ได้สะสมไว้ในเล้า แต่พระเจ้าผู้เป็นพ่อของพวกเจ้า ผู้เพิ่นสถิตในสวรรค์ ได้เลี้ยงนกไว้อยู่ พวกเจ้ามีคุณค่าแฮงหลายกว่าพวกนกบ่แม่นบ้อ 

มัทธิว 6:27 มีใผในพวกเจ้าแหน่ อาจต่อความสูงโตเองขึ้นอีกศอกเดียวโดยความวุ่นวายได้บ้อ (บ่มีดอก)

มัทธิว 6:28 คั่นจั่งซั้น พวกเจ้าวุ่นวายแนวนุ่งห่มย้อนหยัง ให้พิจารณาเบิ่งดูดอกไม้ลิลลี่อันขาวงามในท่งนา ว่ามันงอกงามเจริญขึ้นได้จั่งใด มันบ่เฮ็ดงาน บ่ปั่นด้ายทอผ้าเลย 

มัทธิว 6:29 แต่เฮาบอกพวกเจ้าว่า ขนาดกษัตริย์ซาโลมอนบัดแต่งโตเต็มด้วยสง่าราศีของเพิ่น กะบ่ได้งดงามท่อดอกไม้แนวหมู่นี้จักดอกเลย 

มัทธิว 6:30 จั่งซั้น คั่นพระเจ้าได้ตกแต่งหญ้าดอกไม้ที่ท่งนาให้งดงาม ซึ่งเป็นอยู่มื้อนี้ แต่พอมื้ออื่นสิถืกลกโยนเข้าไปในเตาไฟ เพิ่นสิบ่สามารถตกแต่งเจ้าให้งามหลายกว่าดอกไม้ฮั้นบ่แม่นบ้อ โอ้ ผู้มีความเซื่อน้อยเอ้ย

มัทธิว 6:31 จั่งซั้น อย่าวุ่นวายเลย ว่าสิเอาอีหยังกิน หรือสิเอาอีหยังดื่ม หรือสิเอาอีหยังนุ่งห่ม 

มัทธิว 6:32 ย้อนว่าพวกคนต่างซาติที่บ่ฮู้จักพระเจ้ากะยังซอกแต่แนวหมู่นี้ แต่พระเจ้าผู้เป็นพ่อของเจ้า ผู้เพิ่นสถิตในสวรรค์ได้ฮู้จักแล้วว่า เจ้าต้องการแนวหมู่นี้อยู่แล้ว

มัทธิว 6:33 แต่ให้พวกเจ้าแสวงหาแผ่นดินของพระเจ้า กับความเที่ยงธรรมของเพิ่นก่อน แล้วเพิ่นสิได้เพิ่มเติมเมิ้ดคู่อันคู่แนวให้เจ้า

มัทธิว 6:34 จั่งซั้น อย่าคึดแต่มื้ออื่นเลย ย้อนว่ามื้ออื่นกะสิมีการวุ่นวายของมันเอง แต่ละมื้อกะมีความยุ่งยากพออยู่แล้ว”
////////// ////////// //////////