มัทธิว – Matthew บทที่ 3

มัทธิว 3:1 ในยามฮั้น โยฮันผู้ให้ฮับพิธีจุ่มน้ำ มาประกาศในถิ่นแห้งแล้งของแคว้นยูเดีย

มัทธิว 3:2 เว้าว่า “ให้พวกเจ้ากลับใจใหม่เด้อ ย้อนว่าแผ่นดินสวรรค์ใกล้สิมาฮอดแล้ว”

มัทธิว 3:3 คือโยฮันผู้นี้ล่ะ ซึ่ง อิสยาห์ ผู้เป็นปากเป็นเสียงของพระเจ้าเว้าเถิงว่า ‘มีเสียงของผู้หนึ่งฮ้องในถิ่นแห้งแล้ง บอกว่า ให้เตรียมหนทางไว้ให้พระผู้เป็นเจ้าเด้อ แล้วเฮ็ดให้หนทางของเพิ่นฮั้นให้มันซื่อตรงเด้อ’

มัทธิว 3:4 แล้วโยฮันผู้นี้นุ่งเสื้อผ้าเฮ็ดด้วยขนอูฐ คาดแอวด้วยหนังสัตว์ กับแนวกินของลาวคือตั๊กแตนกับน้ำผึ้งป่า

มัทธิว 3:5 ยามฮั้น ซาวเมืองเยรูซาเล็ม กับคนทั่วแคว้นยูเดีย พร้อมทั้งคนทั่วบริเวณล้อมรอบแม่น้ำจอร์แดน กะออกไปหาโยฮัน

มัทธิว 3:6 แล้วต่างคนต่างได้ฮับพิธีจุ่มน้ำจากโยฮันในแม่น้ำจอร์แดน ด้วยการสารภาพความผิดบาปของโต

มัทธิว 3:7 แต่บัดพอโยฮันเห็นพวกฟาริสีกับพวกสะดูสีพากันออกมาหลาย เพื่อฮับพิธีจุ่มน้ำแสดงการกลับใจใหม่นำลาว ลาวจั่งบอกพวกเขาว่า “โอ้ เจ้าซาติงูฮ้าย ใผเตือนเจ้าให้หนีจากโทษอันฮ้ายแฮงที่สิมาฮอดมาเถิงฮั้น

มัทธิว 3:8 จั่งซั้น ให้แสดงผลของการกลับใจเด้อ ซึ่งพิสูจน์ว่าได้กลับใจใหม่อีหลี

มัทธิว 3:9 แต่อย่านึกในใจว่า อับราฮัมเป็นพ่อของพวกเฮา คือเฮาสิบอกพวกเจ้าว่า พระเจ้าสามารถที่สิเฮ็ดให้ก้อนหินแนวหมู่นี้ ขึ้นมาเป็นลูกๆ ของอับราฮัมได้โลด

มัทธิว 3:10 คือ บัดนี้ขวานของพระเจ้าได้วางใส่เหง้าของหมู่กกไม้ฮั้นแล้ว จั่งซั้นคู่กกที่บ่เกิดหมากเกิดผลอันดีสิต้องถืกบักลง โยนถิ้มใส่กองไฟโลด

มัทธิว 3:11 แม่นอยู่ เฮาหนิให้พวกเจ้าฮับจุ่มน้ำให้แสดงการกลับใจใหม่ แต่เพิ่นผู้ฮั้นที่สิมาตามหลังเฮา เพิ่นมีอำนาจหลายกว่าเฮาอีก ซึ่งเฮาเองบ่สมควรแม้นแต่สิถือเกิบให้เพิ่น แล้วเพิ่นกะสิให้การจุ่มโดยพระวิญญาณ กับโดยไฟ

มัทธิว 3:12 ซึ่งมือของเพิ่นถือด้งฝัดข้าว พร้อมแล้วที่สิกวาดล้างลานข้าวของเพิ่นให้เมิ้ด แล้วสิเก็บข้าวของเพิ่นเมี้ยนไว้ในเล้าข้าว แต่เพิ่นกะสิเผาขี้แกลบด้วยไฟที่บ่ฮู้จักมอด”

มัทธิว 3:13 โยฮันเว้าแล้ว พระเยซูออกจากแคว้นกาลิลีมาหาลาวอยู่แม่น้ำจอร์แดน เพื่อสิฮับพิธีจุ่มน้ำนำลาว

มัทธิว 3:14 แต่โยฮันบอกเพิ่นว่า “อย่าเลย ผู้ข้าต้องการสิฮับการจุ่มจากท่านต่างหาก แล้วเป็นหยังท่านออกมาหาผู้ข้าหนิ”

มัทธิว 3:15 แล้วพระเยซูตอบโยฮันว่า “บัดนี้ให้ยอมเฮ็ดให้ซะ ย้อนสมควรที่เฮาสิเฮ็ดตามคู่แนวให้มันถืกต้อง” แล้วลาวกะยอมเฮ็ดตามที่เพิ่นต้องการ

มัทธิว 3:16 แล้วพอพระเยซูได้ฮับพิธีจุ่มน้ำแล้ว พอขึ้นจากน้ำมาพอดี นี่แน่ะ ท้องฟ้ากะแหวกออก แล้วเพิ่นเหลียวเบิ่งเห็นพระวิญญาณของพระเจ้าลงมาคือจั่งนกพิราบ มาอยู่นำเพิ่น

มัทธิว 3:17 แล้วนี่แน่ะ มีเสียงของผู้มีอํานาจเว้าจากฟ้าสวรรค์ว่า “เจ้าผู้นี้เป็นลูกที่ฮักของเฮา ซึ่งเฮาพอใจหลาย”
////////// ////////// //////////