มัทธิว – Matthew บทที่ 28

มัทธิว 28:1 หลังจากมื้อพักงานของซาวยิวจบลง อยู่มาใกล้สิฮอดแจ้งเป็นมื้อตำอิดของอาทิตย์ มารีย์ ซาวมักดาลา กับมารีย์ อีกคนหนึ่ง พวมสิย่างมาเบิ่งอุโมงค์

มัทธิว 28:2 แล้วนี่แน่ะ ได้เกิดแผ่นดินไหวขนาดแฮง เป็นย้อนเทวทูตขององค์พระผู้เป็นเจ้าได้ลงมาจากสวรรค์ มากลิ้งก้อนหินฮั้นออกจากปากอุโมงค์ไป เฮ็ดแล้วกะนั่งอยู่เทิงก้อนหินฮั้น

มัทธิว 28:3 สีหน้าของเทวทูตฮั้นเจิดจ้าคือปานแสงฟ้าเลื่อม แล้วเสื้อของลาวกะขาวปานหิมะ

มัทธิว 28:4 บัดนี้ กองทหารหน่วยกล้าตายอยู่เวรฮั้นได้เกิดหย้านอย่างแฮงย้อนทูตองค์ฮั้น จนโตสั่นหน้าซีดคือปานคนตาย 

มัทธิว 28:5 เทวทูตจั่งบอกญิงสองคนอยู่ฮั้นว่า “อย่าสู่หย้านเลย ย้อนเฮาฮู้ว่าพวกเจ้ามาหาพระเยซูซึ่งถืกขึงประหารฮั้น 

มัทธิว 28:6 พระองค์ท่านบ่ได้อยู่พี่เด้อ คือว่าพระองค์ท่านได้เป็นขึ้นมาจากตายแล้ว ตามที่เพิ่นเคยบอกไว้ฮั้น เซิญมาเบิ่งหม่องที่ศพขององค์พระผู้เป็นเจ้าเคยวางนอนอยู่

มัทธิว 28:7 แล้วให้ฟ้าวไปบอกพวกลูกศิษย์ของพระองค์ท่านเด้อ ว่าเพิ่นเป็นขึ้นมาจากตายแล้วๆ นี่แน่ะ เพิ่นได้ออกไปเข้าแคว้นกาลิลีก่อนพวกเจ้าแล้ว แล้วพวกเจ้าสิได้พ้อได้เห็นเพิ่นอยู่ฮั้น นี่แน่ะ เฮาได้บอกเจ้าแล้ว”

มัทธิว 28:8 พอได้ยินแล้ว ญิงสองคนฮั้นกะออกจากอุโมงค์ ฟ้าวไปโดยมีใจทั้งหย้านทั้งยินดีหลาย แล่นนำเอาข่าวดีไปบอกพวกลูกศิษย์ของเพิ่น

มัทธิว 28:9 แล้วในตอนที่ญิงสองคนฮั้นพวมไปบอกลูกศิษย์ของเพิ่น นี่แน่ะ พระเยซูได้พ้อเขาอยู่กลางทางเว้าว่า “ให้ซื่นซมยินดีเด้อ” แล้วญิงสองคนฮั้นกะเลยก้มกอดแข้งขาเพิ่น กับเคารพบูซาเพิ่น

มัทธิว 28:10 แล้วพระเยซูจั่งบอกเขาว่า “อย่าสู่หย้านเลยเด้อ ให้ไปบอกพวกพี่น้องของเฮา ให้เขาไปแคว้นกาลิลี แล้วเขาสิได้พ้อได้เห็นเฮาอยู่ฮั้น”

มัทธิว 28:11 บัดพอญิงสองคนฮั้นพวมไปอยู่ นี่แน่ะ มีทหารผู้ลางคนในพวกยามได้เข้าไปในเมือง เล่าเรื่องเหตุการณ์คู่แนวที่เป็นไปอยู่ที่อุโมงค์ฮั้น ให้พวกหัวหน้าผู้นำเครื่องถวายฟัง

มัทธิว 28:12 แล้วบัดพวกหัวหน้าผู้นำเครื่องถวาย มาตุ้มโฮมปรึกษากันกับพวกผู้หลักผู้ใหญ่แล้ว กะตกลงเอาเงินจำนวนหลายให้พวกทหาร

มัทธิว 28:13 สั่งว่า “ให้พวกเจ้าเว้าว่า ‘พวกลูกศิษย์ของเขามาลักเอาศพไปในยามกลางคืน ตอนพวกเฮาพวมนอนหลับอยู่’

มัทธิว 28:14 แล้วคั่นความนี้ซอดหูเจ้าเมืองปิลาต เฮาสิแก้ไขนำลาว ให้พวกเจ้าปลอดภัยอยู่ดอก”

มัทธิว 28:15 บัดนี้ พวกทหารจั่งฮับเอาเงินฮั้น กับได้เฮ็ดตามที่เขาบอกมา แล้วเรื่องนี้กะได้เลื่องลือไปในพวกยิวจนฮอดคู่มื้อนี้

มัทธิว 28:16 แล้วลูกศิษย์สิบเอ็ดคนฮั้นกะได้ไปแคว้นกาลิลี ไปภูเขาที่พระเยซูได้บอกเขาไว้ฮั้น

มัทธิว 28:17 แล้วบัดพวกเขาเห็นพระเยซู เขาจั่งกราบลงเคารพบูซาเพิ่น แต่ผู้ลางคนยังสงสัยอยู่

มัทธิว 28:18 แล้วพระเยซูจั่งเข้ามาหา เว้ากับพวกเขาว่า “ฤทธานุภาพทั้งเมิ้ดในสวรรค์กะดี ในแผ่นดินโลกกะดี ได้มอบไว้กับเฮาทั้งเมิ้ดอยู่แล้ว

มัทธิว 28:19 จั่งซั้น ให้ออกไปบอกสอนคนคู่ซนซาติเด้อ แล้วจั่งให้เขาฮับจุ่มน้ำโดยพระนามของพระเจ้าผู้เป็นพ่อ กับพระบุตร พร้อมกับพระวิญญาณ

มัทธิว 28:20 สอนเขาทั้งหลายให้ถือฮักษาเมิ้ดคู่อันคู่แนวที่เฮาได้บอกได้สั่งพวกเจ้าไว้ นี่แน่ะ เฮาสิอยู่นำพวกเจ้าเสมอไป จนกว่าสิสิ้นโลก อาเมน”