มัทธิว – Matthew บทที่ 26

มัทธิว 26:1 แล้วอยู่มา พอพระเยซูได้เว้าถ้อยคำนี้จบแล้ว เพิ่นจั่งบอกพวกลูกศิษย์ของเพิ่นไว้ว่า

มัทธิว 26:2 “พวกเจ้าฮู้อยู่ว่า อยู่มาอีกสองมื้อสิเถิง เทศกาลเลี้ยงฉลองมื้อกู้ซาติ แล้วเป็นยามที่เฮาผู้เป็นบุตรมนุษย์สิถืกทรยศ ฮอดประหารซีวิตเทิงหลักประหาร” 

มัทธิว 26:3 หว่างฮั้นพวกหัวหน้าผู้นำเครื่องถวาย กับเสมียนฯ พร้อมพวกผู้หลักผู้ใหญ่ของประชาชน ได้ไปฮ่วมกันอยู่วังของผู้นำเครื่องถวายสูงสุด ซึ่งคนเอิ้นกันว่า คายาฟาส

มัทธิว 26:4 แล้วจั่งปรึกษากันเถิงแผนการที่สิจับพระเยซูด้วยอุบาย แล้วเอาเพิ่นไปฆ่า

มัทธิว 26:5 แต่พวกเขาเว้าว่า “อย่าพึ่งจับในมื้อเทศกาลเลี้ยงเลย หย้านว่าพวกประซาซนสิเกิดการซุลมุนวุ่นวาย”

มัทธิว 26:6 บัดนี้ ในยามที่พระเยซูอยู่หมู่บ้านเบธานี ในเฮือนของซีโมน ผู้เป็นโรคขี้ทูตฮั้น

มัทธิว 26:7 พอดีมีญิงผู้หนึ่งถือตลับน้ำมันหอมราคาแพงๆ ได้มาหาพระเยซู แล้วจั่งเอาน้ำมันหอมฮั้นรินใส่หัวของเพิ่น 

มัทธิว 26:8 แต่ว่า พอพวกลูกศิษย์ของเพิ่นเห็นแล้วกะบ่พอใจ จั่งว่า “ได้ประโยชน์หยังที่สิเฮ็ดเสียถิ้มแนวนี้ 

มัทธิว 26:9 คือน้ำมันนี้ คั่นขายกะสิได้เงินหลาย แล้วสิไปแจกจ่ายให้คนจนกะได้”

มัทธิว 26:10 พอพระเยซูฮับฮู้ในเรื่องนี้ จั่งบอกเขาว่า “กวนใจญิงย้อนหยัง นางได้เฮ็ดการดีให้เฮาอยู่แล้ว

มัทธิว 26:11 คือคนยากคนจนฮั้น เขากะอยู่นำเจ้าอยู่เสมอ แต่ส่วนเฮาหนิ กะสิบ่ได้อยู่นำเจ้าอยู่เสมอดอก

มัทธิว 26:12 ซึ่งญิงนี้ได้รินน้ำมันหอมใส่โตเฮา ที่นางเฮ็ดกะเป็นการเล็งเถิงการเมี้ยนศพของเฮา

มัทธิว 26:13 เฮาสิบอกความจริงให้พวกเจ้าโลด ว่า หม่องใดๆ ทั่วโลกที่สิประกาศข่าวดีอันประเสริฐนี้ การที่ญิงได้เฮ็ดหนิสิเลื่องลือไปเป็นอนุสรณ์บ่งบอกเถิงนางฮั้นนำ”

มัทธิว 26:14 หว่างฮั้น มีคนหนึ่งในพวกลูกศิษย์สิบสองคนชื่อ ยูดาสอิสคาริโอท ได้ไปหาพวกหัวหน้าผู้นำเครื่องถวาย

มัทธิว 26:15 ถามว่า “คั่นข้อยสิมอบพระเยซูไว้ให้พวกเจ้า พวกเจ้าสิให้อีหยังข้อย” ฝ่ายพวกเขากะฮับปากตกลงกับเขาว่าสิเอาเหรียญเงินให้ยูดาสสามสิบเหรียญ

มัทธิว 26:16 ตั้งแต่ยามฮั้นมายูดาสกะคอยหาโอกาสที่สิทรยศใส่เพิ่น

มัทธิว 26:17 ในมื้อตำอิดเทศกาลกินขนมปังบ่มีเซื้อฟู พวกลูกศิษย์มาถามพระเยซูว่า ท่านอยากสิให้พวกผู้ข้าจัดเตรียมฉลองมื้อกู้ซาติให้ท่านกินอยู่หม่องใด”

มัทธิว 26:18 เพิ่นจั่งสั่งเขาว่า “ให้เข้าไปในเมือง ไปหาผู้หนึ่งแล้วบอกเขาว่า ‘อาจารย์บอกว่า ยามเวลาของเพิ่นใกล้สิมาฮอดแล้ว เพิ่นคึดอยากฉลองมื้อกู้ซาติในเฮือนของเจ้าพร้อมกับพวกลูกศิษย์ของเพิ่นนำ'”

มัทธิว 26:19 ฝ่ายพวกลูกศิษย์ได้เฮ็ดตามที่พระเยซูสั่ง แล้วได้จัดเตรียมเทศกาลเลี้ยงฉลองมื้อกู้ซาติไว้ให้พร้อมอยู่ฮั้น

มัทธิว 26:20 บัดใกล้สิฮอดค่ำแล้ว พระเยซูกะนั่งลงฮ่วมกันกับลูกศิษย์สิบสองคน

มัทธิว 26:21 แล้วบัดพวมกินอยู่ฮั้นเพิ่นจั่งเว้าว่า “เฮาสิบอกความจริงให้พวกเจ้าโลด ว่า มีคนหนึ่งในพวกเจ้าหนิ ซึ่งผู้ฮั้นสิทรยศเฮา”

มัทธิว 26:22 แล้วฝ่ายพวกลูกศิษย์ เขากะเป็นทุกข์หลาย ต่างคนต่างเริ่มถามเพิ่นว่า “ท่านเจ้าข้า แม่นผู้ข้าบ้อ”

มัทธิว 26:23 พระเยซูตอบว่า “ผู้ที่พวมจิ้มลงในชามเดียวกันกับเฮา ผู้ฮั้นล่ะสิทรยศใส่เฮา

มัทธิว 26:24 ส่วนเฮาผู้เป็นบุตรมนุษย์ ดำเนินไปตามซึ่งมีเขียนไว้เถิงเฮาฮั้น แต่ระวังพินาศเด้อ ผู้ที่ทรยศเฮาผู้เป็นบุตรมนุษย์ คั่นผู้ฮั้นบ่ได้เกิดมาเลย กะสิดีกว่าสำหรับเขา”

มัทธิว 26:25 บัดนี้ ยูดาส ผู้ที่สิทรยศพระเยซูได้ถามว่า “อาจารย์เจ้าข้า แม่นผู้ข้าบ้อ” พระเยซูตอบเขาว่า “เจ้าเว้าเองแล้ว”

มัทธิว 26:26 พวมสิกินอยู่ฮั้น พระเยซูได้หยิบขนมปังมา ขอบพระคุณ แล้วบิส่งให้ลูกศิษย์ แล้วจั่งเว้าว่า “ให้ฮับกินเด้อ อันนี่เปรียบเป็นคือกายของเฮาเด้อ”

มัทธิว 26:27 แล้วพระเยซูจั่งหยิบเอาจอกมา ขอบพระคุณ ส่งให้เขา แล้วจั่งเว้าว่า “ให้ฮับดื่มให้เมิ้ดเด้อ” 

มัทธิว 26:28 นี้เปรียบคือเลือดของเฮา ซึ่งเป็นคำมั่นสัญญาใหม่ ซึ่งหลั่งไหลออกเพื่อยกบาปโทษให้ผู้คนทั้งหลาย

มัทธิว 26:29 เฮาบอกพวกเจ้าว่า เฮาสิบ่ดื่มน้ำผลเถาองุ่นต่อไปอีกจนกว่ามื้อฮั้นสิมาเถิง คือมื้อที่เฮาสิดื่มกันอีกฮ่วมกับพวกเจ้าในแผ่นดินของพระเจ้าผู้เป็นพ่อของเฮา”

มัทธิว 26:30 บัดพวกเขาร้องเพลงสรรเสริญแล้ว เขากะพากันออกไปอยู่ภูเขาหมากกอกเทศ 

มัทธิว 26:31 แล้วพระเยซูเว้ากับพวกลูกศิษย์ว่า “ในคืนมื้อนี้เอง พวกเจ้าเมิ้ดคู่คนสิสะดุดใจย้อนเฮา ตามมีคำเขียนไว้ว่า ‘เฮาสิฟาดสิตีผู้เลี้ยงแกะ กับแกะฝูงฮั้นสิกระจัดกระจายไป’

มัทธิว 26:32 แต่บัดเฮาเป็นขึ้นมาใหม่แล้ว เฮาสิออกไปทางแคว้นกาลิลีก่อนพวกเจ้า”

มัทธิว 26:33 ฝ่ายเปโตรตอบเพิ่นว่า “แม้นแต่เมิ้ดคู่คนสิสะดุดใจย้อนท่าน ผู้ข้าหนิสิบ่สะดุดใจจักเทื่อเลย”

มัทธิว 26:34 พระเยซูเลยบอกเปโตรว่า “เฮาสิบอกความจริงให้เจ้าโลด ว่า ในคืนนี้เอง ก่อนไก่ขัน เจ้าสิปฏิเสธเฮาอยู่สามเทื่อเลย”

มัทธิว 26:35 เปโตรเลยตอบเพิ่นว่า “เถิงแม้นผู้ข้าสิต้องตายกับท่าน ผู้ข้าสิบ่ปฏิเสธท่านดอก” พวกลูกศิษย์เลยเว้าแนวเดียวกันฮั้นเมิ้ดคู่คน

มัทธิว 26:36 แล้วพระเยซูได้พาลูกศิษย์ไปหม่องหนึ่งที่เอิ้นกันว่า เกทเสมนี แล้วเว้ากับลูกศิษย์ว่า “บัดนี้ให้พวกเจ้านั่งอยู่นี้ก่อนเด้อ ส่วนเฮากะสิออกไปอธิษฐานเว้านำพระเจ้าอยู่ทางพู้น” 

มัทธิว 26:37 แล้วเพิ่นกะพาเปโตรกับลูกซายทั้งสองของเศเบดีไปนำ ฮอดหม่องแล้วเพิ่นกะเริ่มโศกเศร้าหนักใจหลายขนาด

มัทธิว 26:38 แล้วเพิ่นจั่งเว้ากับเขาว่า “ใจของเฮาเป็นทุกข์แทบสิตายแล้ว ให้อยู่นำเฮาหม่องนี้เฝ้าเบิ่งจักหน่อยเด้อ”

มัทธิว 26:39 แล้วพระเยซูกะย่างออกไปอีกหน่อยหนึ่ง กราบลงหน้าจำดิน แล้วอธิษฐานเว้านำพระเจ้าว่า “โอ้ พระเจ้าผู้เป็นพ่อของผู้ข้าเอ้ย คั่นเป็นได้ขอให้จอกนี้พ้นจากผู้ข้าไปเด้อ แต่จั่งใดกะตาม อย่าให้เป็นไปตามใจปรารถนาของผู้ข้า แต่ให้เป็นไปตามพระประสงค์ของพ่อ”

มัทธิว 26:40 อธิษฐานแล้ว พระเยซูจั่งมาหาลูกศิษย์ของเพิ่นฮั้น เห็นนอนหลับอยู่ เลยเว้ากับเปโตรว่า “เป็นหยัง พวกเจ้าจั่งคอยเฝ้าเบิ่งอยู่กับเฮาจักซั่วโมงเดียวบ่ได้บ้อ

มัทธิว 26:41 ให้พวกเจ้าเฝ้าระวังกับอธิษฐานเว้านำพระเจ้าเด้อ เพื่อสิบ่เข้าสู่การทดลอง จิตใจพร้อมแล้วกะแม่นอยู่ แต่เนื้อหนังยังอ่อนกำลัง” 

มัทธิว 26:42 เว้าแล้ว เพิ่นจั่งออกไปอธิษฐานเว้านำพระเจ้าเป็นเทื่อที่สองว่า “โอ้ ข้าแต่พระเจ้าผู้เป็นพ่อของผู้ข้าเอ้ย คั่นผู้ข้าสิบ่พ้นจากจอกนี้ได้ นอกจากผู้ข้าดื่มก่อน ขอให้เป็นไปตามพระประสงค์ของพ่อกะแล้วกันเด้อ”

มัทธิว 26:43 แล้วบัดเพิ่นหลบมา กะพ้อลูกศิษย์ฮั้นนอนหลับอีก ย้อนหนังตาเขาหนัก มืนตาบ่ขึ้น

มัทธิว 26:44 เพิ่นเลยออกจากพวกเขา ไปอธิษฐานเว้านำพระเจ้าเทื่อที่สาม เป็นคำเก่า

มัทธิว 26:45 อธิษฐานแล้ว พระเยซูมาหาพวกลูกศิษย์ของเพิ่น เว้าว่า “ให้นอนต่อไปให้มันหายเหนื่อยซะ นี่แน่ะ ซั่วโมงฮั้นใกล้สิมาฮอดแล้ว ที่ว่าเฮาผู้เป็นบุตรมนุษย์สิต้องถืกทรยศ มอบไว้ในมือของคนบาป

มัทธิว 26:46 ลุกขึ้นไปกันเถอะ นี่แน่ะ ผู้ที่สิทรยศเฮามาใกล้สิฮอดแล้ว”

มัทธิว 26:47 แล้วบัดพระเยซูเว้ายังบ่ทันขาดคำ นี่แน่ะ ยูดาส ซึ่งเป็นคนหนึ่งในพวกลูกศิษย์สิบสองคนฮั้น ได้เข้ามาพร้อมทั้งคนหลวงหลาย ถือดาบ ถือไม้ตะบอง ได้มาจากพวกหัวหน้าผู้นำเครื่องถวาย กับพวกผู้หลักผู้ใหญ่ของประซาซน

มัทธิว 26:48 บัดนี้ ผู้ฮั้นที่สิทรยศพระเยซู ได้ให้สัญญาณกับพวกฮั้นว่า “เฮาสิจุบแก้มผู้ใด กะเป็นผู้ฮั้นล่ะ ให้จับกุมเขาไว้ให้แน่นหนาเด้อ”

มัทธิว 26:49 ยามฮั้นพอดี ยูดาสย่างเข้ามาหาพระเยซู เว้าว่า “สวัสดี อาจารย์” ทักทายแล้วจั่งจุบแก้มของเพิ่น

มัทธิว 26:50 พระเยซูจั่งถามเขาว่า “หมู่พวกเอ้ย มานี้ย้อนหยัง” พอดีคนพวกฮั้นกะเข้ามาอย่างซุลมุน จับพระเยซูคุมเพิ่นไป

มัทธิว 26:51 แล้วนี่แน่ะ มีผู้หนึ่งที่อยู่กับพระเยซู ซักเอาดาบของโตเองออกมา ฟันผู้ฮับใซ้คนหนึ่งของผู้นำเครื่องถวายสูงสุดถืกหูขาดไป

มัทธิว 26:52 พระเยซูเลยบอกเขาว่า “เอาดาบของเจ้าใส่ฝักไว้ซะ คือผู้ที่ใซ้ดาบสิต้องพินาศย้อนดาบ 

มัทธิว 26:53 เจ้าบ่ได้คึดบ้อ ว่าเฮาสิสามารถอธิษฐาน ขอนำพระเจ้าผู้เป็นพ่อเฮาอยู่เดี๋ยวหนิ แล้วพ่อสิส่งกองทัพเทวทูตกว่าสิบสองกอง มาซ่อยเฮาโลด

มัทธิว 26:54 จำเป็นแล้วมันสิต้องเป็นจั่งซี้” บ่ซั้น พระคำสิเป็นไปให้สำเร็จได้จั่งใด 

มัทธิว 26:55 แล้วในโมงฮั้นเอง พระเยซูเว้ากับหมู่คนอยู่ฮั้นว่า “พวกเจ้าเห็นเฮาเป็นโจรบ้อจั่งสิถือดาบ ถือตะบองออกมาจับเฮา แม่นเฮาหนิเคยได้นั่งกับพวกเจ้าอยู่คู่มื้อ ตอนเฮาสอนในพระวิหาร แล้วเป็นหยังพวกเจ้ามาหาจับเฮาแนวนี้

มัทธิว 26:56 แต่เหตุการณ์ทั้งเมิ้ดที่ได้เกิดขึ้นนี้ กะได้เป็นไปเพื่อสิสำเร็จตามข้อพระคำ ที่พวกผู้เป็นปากเป็นเสียงของพระเจ้าได้เขียนไว้” แล้ววางฮั้นพอดีลูกศิษย์ทั้งเมิ้ดกะได้ปะถิ้มเพิ่นไว้ พากันหนีไป

มัทธิว 26:57 แล้วพวกฮั้นที่จับพระเยซูได้พาเพิ่นไปหา นายคายาฟาส ผู้นำเครื่องถวายสูงสุดฮั้น เป็นหม่องที่เสมียนฯ กับพวกผู้หลักผู้ใหญ่ได้ตุ้มโฮมกันอยู่

มัทธิว 26:58 แล้วส่วนเปโตรกะได้ติดตามพระเยซูไปห่างๆ จนฮอดวังของผู้นำเครื่องถวายสูงสุด แล้วเข้าไปนั่งทางในกับพวกคนใซ้ เพื่อสิเบิ่งว่าเรื่องนี้มันสิจบลงจั่งใด

มัทธิว 26:59 บัดนี้ พวกหัวหน้าผู้นำเครื่องถวาย กับพวกผู้หลักผู้ใหญ่ พร้อมทั้งพวกสมาชิกสภา ได้ซอกหาพยานเท็จมาเพื่อสิฟ้องข้อหา จับผิดพระเยซู ย้อนว่าอยากสิก่อคดีพอสิประหารเพิ่นได้

มัทธิว 26:60 แต่ว่าหาหลักฐานพยานบ่ได้ แม้นแต่มีพยานเท็จหลายๆ คนมาให้การ กะยังหาบ่ได้เลย แล้วในที่สุด มีพยานเท็จอีกสองคนได้เข้ามา

มัทธิว 26:61 แล้วได้อ้างว่า “คนนี้เคยฮับปากว่า ‘เฮาสามารถสิทำลายพระวิหารของพระเจ้า แล้วเฮาสิสร้างขึ้นใหม่ในสามมื้อ'”

มัทธิว 26:62 บัดฟังแล้ว ผู้นำเครื่องถวายสูงสุด จั่งได้ลุกขึ้นถามพระเยซูว่า “เจ้าสิบ่โต้ตอบอีหยังบ้อ เจ้าบ่ฮู้บ้อว่า คนพวกนี้เป็นพยานฟ้องเจ้าเรื่องอีหยัง”

มัทธิว 26:63 แต่พระเยซูกะยังมิดอยู่ แล้วผู้นำเครื่องถวายสูงสุดจั่งบอกเพิ่นว่า “เฮาสั่งให้เจ้าสาบานโดยอ้างพระเจ้าผู้เพิ่นเป็นอยู่ ให้บอกเฮาว่า เจ้าเป็นพระคริสต์ พระบุตรของพระเจ้าฮั้นอีหลีบ้อ”

มัทธิว 26:64 พระเยซูเว้ากับเขาว่า “เจ้าว่าถืกแล้ว แล้วหลายกว่าฮั้นอีก เฮาบอกพวกเจ้าว่า ในอนาคตทางหน้าฮั้น พวกเจ้าสิได้เห็นเฮาผู้เป็นบุตรมนุษย์ประทับอยู่ทางขวาของผู้มีฤทธานุภาพสูงสุด แล้วสิเห็นเฮาลงมาในเมฆเทิงท้องฟ้า”

มัทธิว 26:65 บัดฮั้นพอดี ผู้นำเครื่องถวายสูงสุดจั่งฉีกเสื้อของโต จั่งเว้าว่า “คนนี้ล่ะได้เว้าหมิ่นประมาทพระเจ้าพอแฮงแล้ว เฮาต้องการหลักฐานพยานอีหยังอีก นี่แน่ะ บัดนี้ พวกเจ้าได้ยินคำหมิ่นประมาทของเขาซัดเจนอยู่แล้ว

มัทธิว 26:66 พวกเจ้าคึดเห็นจั่งใด” แล้วเมิ้ดคู่คนเลยตอบว่า “เขามีความผิดเถิงตาย”

มัทธิว 26:67 เว้าแล้ว เขาถ่มน้ำลายใส่หน้าเพิ่น พร้อมกับทุบตีเพิ่น แล้วผู้ลางคนเอาฝ่ามือฟาดใส่เพิ่น 

มัทธิว 26:68 แล้วเว้าว่า “เจ้าผู้ที่ถือว่าเป็นพระคริสต์หนิ ลองทำนายให้เฮาฟังว่า แม่นใผตบเจ้า”

มัทธิว 26:69 ในยามฮั้น เปโตรนั่งอยู่ทางนอกบริเวณวัง แล้วมีสาวใซ้คนหนึ่งมาเว้ากับเขาว่า “เจ้านี้แล้ว เคยอยู่นำเยซูซาวกาลิลี”

มัทธิว 26:70 แต่เปโตรได้ปฏิเสธ ต่อหน้าเมิ้ดคู่คนว่า “ที่เจ้าว่าฮั้น ข้อยบ่ฮู้เรื่องดอก”

มัทธิว 26:71 แล้วบัดพอเปโตรได้ออกไปอยู่ซานอยู่ทางนอก มีสาวใซ้อีกคนหนึ่งเหลียวเห็น จั่งมาเว้าปันคนอยู่ฮั้นฟังว่า “คนนี้ล่ะ เคยอยู่นำกันกับเยซูซาวนาซาเร็ธ”

มัทธิว 26:72 เปโตรจั่งปฏิเสธอีก เว้าคำสาบานว่า “ข้อยหนิ บ่ฮู้จักคนฮั้นเลย”

มัทธิว 26:73 แล้วอยู่มาอีกจักหน่อย หมู่คนที่ยืนอยู่แถวฮั้น กะมายืนยันกับเปโตรว่า “แม่นเจ้าหนิละ เป็นคนหนึ่งในพวกฮั้นคักแน่แล้ว คือสำเนียงเว้าของเจ้าได้ส่อโตเจ้าโลด” 

มัทธิว 26:74 แล้วตอนฮั้น เปโตรกะเริ่มสิเว้าคำหยาบ สบถสาบานว่า “ข้อยบ่ฮู้จักคนฮั้นเด็ดขาดเลย” แล้วในยามฮั้นพอดีไก่กะขันโลด

มัทธิว 26:75 แล้วเปโตรจั่งคึดซวดคำของพระเยซูที่ได้เว้ากับเขาว่า “ก่อนไก่ขัน เจ้าสิปฏิเสธเฮาสามเทื่อ” แล้วเปโตรกะออกไปทางนอก ฮ้องไห้เสียใจอย่างใหญ่
////////// ////////// //////////