มัทธิว – Matthew บทที่ 25

มัทธิว 25:1 “ในยามฮั้น แผ่นดินสวรรค์สิเปรียบคือปานญิงพรหมจารีสิบคน ที่ถือตะเกียงของโตออกไปต้อนฮับเอาเจ้าบ่าว

มัทธิว 25:2 ในพวกนางฮั้น ห้าคนมีปัญญาดี แล้วอีกห้าคนกะเบาปัญญา 

มัทธิว 25:3 พวกที่เบาปัญญาฮั้นกะเอาตะเกียงของโตไป แต่บ่ได้เอาน้ำมันไปนำ

มัทธิว 25:4 แต่คนที่มีปัญญาฮั้นได้เอาน้ำมันใส่ขวดไปพร้อมตะเกียงของเขา

มัทธิว 25:5 บัดเจ้าบ่าวมาช้า พวกนางฮั้นกะพากันง่วงเหงาหาวนอนเลยหลับไป

มัทธิว 25:6 บัดฮอดเที่ยงคืนกะมีการฮ้องประกาศว่า ‘นี่แน่ะ เจ้าบ่าวมาแล้วๆ ให้ออกไปต้อนฮับเอาเพิ่นเด้อ’

มัทธิว 25:7 แล้วพวกญิงพรหมจารีฮั้น ได้ลุกขึ้นตกแต่งไส้ตะเกียงของโตไว้

มัทธิว 25:8 แต่พวกที่เบาปัญญาฮั้นกะเว้ากับพวกที่มีปัญญาว่า ‘ขอแบ่งปันน้ำมันของเจ้าให้พวกเฮาแหน่ ย้อนตะเกียงของเฮามอดไปแล้ว’

มัทธิว 25:9 แต่พวกที่มีปัญญาตอบว่า ‘บ่ได้แล้ว หย้านว่าคั่นแบ่งปันให้พวกเจ้านำ น้ำมันของพวกเฮาสิบ่พอใซ้ ให้ไปหาซื้อเอาเองจากผู้ขายซะ 

มัทธิว 25:10 บัดพวกนางที่เบาปัญญาพวมไปซื้อน้ำมันฮั้น พอดีเจ้าบ่าวมาฮอด พวกนางผู้ที่พร้อมแล้ว จั่งได้เข้าไปฮ่วมในพิธีแต่งงานกับเจ้าบ่าวฮั้น แล้วประตูกะถืกปิดไว้ 

มัทธิว 25:11 อยู่มา พอพวกญิงพรหมจารีอันเบาปัญญาได้หลบมาแล้ว เขากะฮ้องว่า ‘นายเจ้าข้าๆ ขอเปิดประตูให้พวกผู้ข้าแหน่ท้อน’

มัทธิว 25:12 แต่นายตอบว่า ‘เฮาสิบอกความจริงให้พวกเจ้าโลด ว่า เฮาบ่ฮู้จักพวกเจ้าดอก’

มัทธิว 25:13 สรุปแล้วให้พวกเจ้าระวังไว้ให้ดีเด้อ ย้อนว่าพวกเจ้าบ่ฮู้จักมื้อ หรือโมงที่เฮาผู้เป็นบุตรมนุษย์สิได้หลบมา

มัทธิว 25:14 แล้วแผ่นดินสวรรค์ยังเปรียบคือซายผู้หนึ่ง สิออกเดินทางไปยังเมืองไกลๆ จั่งเอิ้นพวกผู้ฮับใซ้ของลาวมา แล้วฝากทรัพย์สมบัติของลาวไว้กับพวกเขา

มัทธิว 25:15 แล้วลาวให้เงินคนหนึ่งห้าเหรียญตะลันต์ อีกคนหนึ่งกะให้สองเหรียญตะลันต์ กับอีกคนหนึ่งกะให้ตะลันต์เดียว ตามความสามารถของแต่ละคน แล้วนายกะออกเดินทางไป 

มัทธิว 25:16 ส่วนผู้ที่ได้ฮับเงินห้าตะลันต์ฮั้น ได้เอาไปค้าขาย จั่งมีกำไรมาอีกห้าตะลันต์

มัทธิว 25:17 ส่วนผู้ที่ได้ฮับเงินสองตะลันต์ กะได้กำไรอีกสองตะลันต์คือกัน

มัทธิว 25:18 แต่ส่วนผู้ที่ได้ฮับเงินตะลันต์เดียว กะได้ออกไปฝังเงินของนายเขาเสื่องไว้

มัทธิว 25:19 อยู่มาโดนนาน นายจั่งหลบมาคึดบัญชีกับผู้ฮับใซ้พวกฮั้น

มัทธิว 25:20 ผู้ที่ได้ฮับเงินห้าตะลันต์กะเอาเงินกำไรอีกห้าตะลันต์มารายงานว่า ‘นายเจ้าข้า นายได้มอบเงินห้าตะลันต์ไว้กับผู้ข้า นี่แน่ะ ผู้ข้าได้กำไรมาอีกห้าตะลันต์’

มัทธิว 25:21 นายจั่งตอบเขาว่า ‘เอ้อ ดีหลายแล้ว เจ้าเป็นผู้ฮับใซ้ที่ดีกับเป็นคนจงรักภักดีเซื่อใจได้ ซึ่งเจ้าเคยสัตย์ซื่อในของเล็กน้อยฮั้น บัดนี้เฮาสิตั้งเจ้าให้เป็นผู้เบิ่งแยง เหนือหลายอันหลายแนว เซิญเข้าฮ่วมในความสุขของนายเจ้าเด้อ’ 

มัทธิว 25:22 คนที่ได้ฮับเงินสองตะลันต์กะได้มารายงานว่า ‘นายเจ้าข้า นายได้มอบเงินสองตะลันต์ไว้กับผู้ข้า นี่แน่ะ ผู้ข้าได้กำไรมาอีกสองตะลันต์’

มัทธิว 25:23 นายจั่งตอบเขาว่า ‘เอ้อ ดีหลายแล้ว เจ้าเป็นผู้ฮับใซ้ดีกับเป็นคนจงรักภักดีเซื่อใจได้ คือเจ้าได้สัตย์ซื่อในของเล็กน้อยฮั้น นายกะสิตั้งเจ้าให้เบิ่งแยง เหนือของหลายอันหลายแนว เซิญเข้าฮ่วมในความสุขของนายเจ้าเด้อ’

มัทธิว 25:24 บัดนี้ ส่วนคนใซ้ที่ได้ฮับเงินตะลันต์เดียวฮั้น ได้มารายงานว่า ‘นายเจ้าข้า ผู้ข้าพอสิฮู้จักใจของนาย ว่าเป็นคนมีระเบียบเข้มงวดกวดขัน เกี่ยวผลในหม่องที่นายบ่ได้หว่าน แล้วเก็บในหม่องที่นายบ่ได้โฮย 

มัทธิว 25:25 ผู้ข้ากะเลยหย้านจั่งเอาเงินตะลันต์เดียวของนายฮั้น ไปฝังดินเสื่องไว้ นี่แน่ะ เงินของนายหนิ เอาคืนซะ’

มัทธิว 25:26 นายจั่งตอบเขาว่า ‘เจ้าผู้ฮับใซ้ซั่วช้าเลวทรามกับขี้คร้าน เจ้าฮู้อยู่ว่านายเจ้าเกี่ยวในหม่องที่นายบ่ได้หว่าน แล้วเก็บในหม่องที่นายบ่ได้โฮย

มัทธิว 25:27 จั่งซั้น อย่างน้อยเจ้าควรเอาเงินของนายไปฝากธนาคารไว้ แล้วบัดหลบมานายสิได้เงินของนายพร้อมดอกเบี้ยนำ

มัทธิว 25:28 จั่งซั้น ให้เอาเงินตะลันต์เดียวจากเขาฮั้น ไปให้คนที่มีเงินสิบตะลันต์เด้อ

มัทธิว 25:29 คือว่า คู่คนที่มีอยู่แล้ว สิเพิ่มเติมให้ผู้ฮั้น ให้เขามีอย่างสมบูรณ์เหลือเฟือ แต่ผู้ที่บ่มี แม่นว่าซึ่งเขามีอยู่กะสิต้องเอาออกจากเขาไป

มัทธิว 25:30 แล้วฝ่ายผู้ฮับใซ้ผู้ที่บ่เกิดผลประโยชน์หยัง กะไปโยนลงในที่มืดอันลึกที่สุดอยู่ทางนอกฮั้น หม่องที่มีการฮ้องไห้กัดแข้วอยู่ตลอด’

มัทธิว 25:31 บัดเฮาผู้เป็นบุตรมนุษย์สิมาในพระสิริของเพิ่น พร้อมกับหมู่เทวทูตอันบริสุทธิ์ทั้งปวงนำ ยามฮั้นเพิ่นสินั่งอยู่บัลลังก์อันฮุ่งเฮืองของเพิ่น

มัทธิว 25:32 แล้วพวกประซาซาติทั้งหลาย สิตุ้มโฮมอยู่ต่อหน้า(บัลลังก์ของ)เพิ่น แล้วเพิ่นสิคัดเลือกให้ออกจากกัน คือปานจั่งผู้เลี้ยงคัดเลือกแกะกับแพะออกจากัน

มัทธิว 25:33 แล้วเพิ่นสิจัดเอาแกะไว้หม่องมีเกียรติอยู่ทางขวาของเพิ่น แต่แพะฮั้นสิจัดให้อยู่ทางซ้าย

มัทธิว 25:34 แล้วในยามฮั้น เพิ่นผู้เป็นกษัตริย์สิบอกพวกผู้อยู่ทางขวาเพิ่นว่า ‘มาซะเด้อ เจ้าผู้ที่ได้ฮับพระพรจากพระเจ้าผู้เป็นพ่อของเฮา มาฮับเอาแผ่นดินซึ่งได้เตรียมไว้เป็นมรดก สำหรับพวกเจ้าตั้งแต่ได้สร้างโลก

มัทธิว 25:35 คือว่า เฮาเคยหิว แล้วเจ้ากะให้เฮากิน เฮาเคยกระหายน้ำ แล้วเจ้ากะให้เฮาดื่ม เฮาเคยเป็นคนแปลกหน้า แล้วเจ้ากะต้อนฮับเฮาเข้ามา

 
มัทธิว 25:36 เฮาเคยขาดแนวนุ่งห่ม แล้วเจ้ากะเอาเสื้อผ้าให้เฮานุ่ง เฮาเคยเจ็บป่วย แล้วเจ้ากะมาเยี่ยมยามเฮา เฮาเคยถืกจำคุก แล้วเจ้ากะมาหาเฮา’

มัทธิว 25:37 แล้วพวกผู้เที่ยงธรรมฮั้นสิถามเพิ่นว่า ‘ท่านเจ้าข้า ผู้ข้าเคยเห็นท่านหิวตอนใด๋ แล้วเคยจัดแนวกินมาให้ท่านตอนใด หรือว่าท่านเคยกระหายน้ำ แล้วผู้ข้าได้เอาน้ำให้ท่านดื่มตอนใด

 
มัทธิว 25:38 แล้วผู้ข้าเคยเห็นท่านเป็นคนแปลกหน้าตอนใด แล้วได้ต้อนฮับท่านเข้ามา หรือเคยขาดแนวนุ่งห่มตอนใด แล้วได้เอาเสื้อผ้าให้ท่านนุ่งตอนใด

 
มัทธิว 25:39 หรือผู้ข้าเคยเห็นท่านเจ็บป่วยตอนใด หรือเคยถืกจำคุก แล้วผู้ข้าได้มาหาท่านตอนใด

มัทธิว 25:40 แล้วเพิ่นผู้เป็นกษัตริย์ฮั้นสิตอบเขาว่า ‘เฮาสิบอกความจริงให้พวกเจ้าโลด ว่า ซึ่งเจ้าได้เฮ็ดได้ซ่อยคนใดคนหนึ่งในพวกพี่น้องของเฮานี้ เถิงแม้นสิเป็นผู้เล็กน้อยที่สุดกะตาม กะคือปานได้เฮ็ดให้เฮา’

มัทธิว 25:41 แล้วเพิ่นสิเว้ากับพวกผู้อยู่ทางซ้ายของเพิ่นว่า ‘ให้ถอยออกจากเฮาไปเด้อ พวกเจ้าผู้สิต้องถืกสาปแซ่งเข้าอยู่ในบึงไฟที่ไหม้อยู่ตลอดกาลเป็นนิตย์ เป็นหม่องที่เฮาได้เตรียมไว้สำหรับผีมารซาตานกับวิญญาณซั่วลูกน้องของมันฮั้น

มัทธิว 25:42 เป็นย้อนว่า เฮาเคยหิว แต่เจ้าบ่ได้เอาหยังมาให้เฮากิน เฮาเคยกระหายน้ำ แต่เจ้าบ่ได้เอาน้ำมาให้เฮาดื่ม

มัทธิว 25:43 เฮาเคยเป็นคนแปลกหน้า แต่เจ้าบ่ได้ต้อนฮับเฮาเข้ามา เฮาเคยขาดแนวนุ่งห่ม แต่เจ้าบ่ได้เอาเสื้อผ้ามาให้เฮานุ่ง เฮาเคยเจ็บป่วย กับเคยถืกจำคุก แต่เจ้าบ่ได้มาเยี่ยมมายามเฮา’

มัทธิว 25:44 แล้วเขาสิถามท่านว่า ท่านเจ้าข้า ที่ผู้ข้าได้เห็นท่านหิวแนวกินหรือหิวกระหายน้ำ หรือเป็นคนแปลกหน้า หรือขาดเสื้อผ้า หรือเจ็บป่วย หรือถืกจำคุก แล้วผู้ข้าบ่ได้ซ่อยท่านซั่นบ้อ’

มัทธิว 25:45 แล้วเพิ่นสิตอบเขาว่า ‘เฮาสิบอกความจริงให้พวกเจ้าโลด ว่า ซึ่งเจ้าบ่ได้เฮ็ดได้ซ่อยแม้นแต่ผู้เล็กน้อยที่สุดในพวกนี้ กะคือปานเจ้าบ่ได้เฮ็ดให้เฮา’

มัทธิว 25:46 แล้วพวกนี้สิต้องออกไป เข้าสู่การฮับโทษอยู่ตลอดกาลเป็นนิตย์ แต่ผู้เที่ยงธรรมฮั้นสิเข้าสู่ซีวิตนิรันดร์”
////////// ////////// //////////