มัทธิว – Matthew บทที่ 24

มัทธิว 24:1 ส่วนพระเยซูได้ออกจากพระวิหาร แล้วพวกลูกศิษย์ของเพิ่นมาชี้พวกตึกของพระวิหารให้เพิ่นเบิ่ง

มัทธิว 24:2 พระเยซูจั่งเว้ากับเขาว่า “เห็นแนะ ตึกแนวหมู่นี้ เฮาสิบอกความจริงให้พวกเจ้าโลด ว่า ศิลาที่ซ้อนทับกันอยู่หนิ มันสิถืกทำลายให้พังกระจายไปเมิ้ด จนกว่าสิบ่มีจักก้อนที่ยังซ้อนทับกันอยู่”

มัทธิว 24:3 บัดพระเยซูพวมนั่งอยู่เทิงภูเขาหมากกอกเทศ พวกลูกศิษย์มาหาเพิ่นเป็นส่วนโตเว้าว่า “ซ่อยบอกพวกผู้ข้าให้ฮู้จักแหน่ ว่าเหตุการณ์แนวหมู่นี้สิเกิดขึ้นยามใด กับสิมีเครื่องหมายสำคัญแบบใดที่สิบ่งบอกเถิงการหลบมาของท่าน กับการจบลงของโลกนี้”

มัทธิว 24:4 พระเยซูตอบเขาว่า “ระวังให้ดีเด้อ อย่าให้ผู้ใดล่อลวงเจ้าให้หลง

มัทธิว 24:5 คือ สิมีหลายคนมาในนามของเฮา หาว่า ‘เฮาหนิเป็นพระคริสต์ฮั้น’ แล้วเขาสิล่อลวงหลายคนให้หลงไป

มัทธิว 24:6 แล้ว บัดพอพวกเจ้าได้ยินข่าวลือเถิงว่ามีสงครามอยู่หม่องฮั้น อยู่หม่องนี้ บ่ให้ตกใจหย้านเลยเด้อ คือว่าแนวหมู่นี้สิต้องเป็นไปก่อน แต่สุดปลายฮั้นยังบ่ทันมาฮอดมาเถิง

มัทธิว 24:7 คือ ประซาซาติสิลุกขึ้นต่อสู้ประซาซาติ แผ่นดินสิต่อสู้แผ่นดิน ทั้งสิเกิดการอดอยากหิวโหย กับสิเกิดโรคระบาดอย่างฮ้ายแฮง กับสิเกิดแผ่นดินไหวในหม่องต่างๆ

มัทธิว 24:8 เหตุการณ์แนวหมู่นี้ทั้งเมิ้ด สิเป็นขั้นตำอิดของยามโศกเศร้าอย่างฮ้ายแฮง

มัทธิว 24:9 แล้วในยามฮั้น พวกเขาสิมอบพวกเจ้าไว้ในขั้นทุกข์ยากลำบาก กับสิฆ่าเจ้า แล้วคู่ประซาซาติสิซังพวกเจ้าย้อนเห็นแก่นามของเฮา

มัทธิว 24:10 แล้วในยามฮั้น คนหลวงหลายสิสะดุดใจ แล้วสิทรยศต่อกัน กับเกียจซังกัน

มัทธิว 24:11 แล้วสิมีผู้ทำนายเท็จหลายคนเกิดขึ้น แล้วเขาสิล่อลวงคนหลายคนให้หลง

มัทธิว 24:12 แล้วความฮักของหลายคนสิจืดจางลง ย้อนความซั่วช้าเลวทรามสิทวีหลายขึ้น

มัทธิว 24:13 แต่ผู้ที่ทนเอาได้จนเถิงที่สุด ผู้ฮั้นสิรอดพ้นได้

มัทธิว 24:14 แล้วข่าวดีอันประเสริฐเรื่องแผ่นดินนี้ สิประกาศไปฮอดทั่วโลกให้เป็นคำพยานเถิงเฮาต่อพวกประซาซาติ แล้วในยามฮั้นล่ะ การจบลงของโลกสิมาฮอดมาเถิง

มัทธิว 24:15 จั่งซั้น บัดพวกเจ้าเห็นผู้ที่เป็นตาซังฮั้นมา ตั้งโตยืนอยู่ในสถานศักดิ์สิทธิ์บริสุทธิ์ของพระเจ้า เป็นผู้ซึ่งเฮ็ดให้โลกเกิดการฮกฮ้างว่างเปล่า” แม่นผู้ฮั้นล่ะที่ดาเนียลผู้เป็นปากเป็นเสียงของพระเจ้าได้กล่าวเถิง (ผู้ใดที่ได้อ่านกะให้ผู้ฮั้นเข้าใจเด้อ)

มัทธิว 24:16 “บัดยามฮั้นมาฮอด ให้ผู้ที่อยู่ในแคว้นยูเดียฟ้าวหนีไปอยู่ภูเขาโลดเด้อ

มัทธิว 24:17 แล้วอย่าให้ผู้ที่อยู่เทิงดาดฟ้าหลังคาเฮือน ลงมาเก็บข้าวของใดๆ ออกจากเฮือนของโตเด้อ

มัทธิว 24:18 แล้วฝ่ายผู้ที่อยู่ตามท่งนา อย่าให้หลบเมือเพื่อเก็บเอาเสื้อผ้าหน้าแพรของโตเด้อ

มัทธิว 24:19 แล้วระวังพินาศในมื้อฮั้นเด้อ ญิงผู้มีท้องกับญิงผู้มีลูกอ่อนกินนมอยู่ 

มัทธิว 24:20 แต่ให้อธิษฐานขอนำพระเจ้าว่า ขออย่าให้มื้อที่เจ้าสิต้องหนีฮั้น เป็นยามหนาว หรือตรงมื้อพักงานของซาวยิว

มัทธิว 24:21 คือในยามฮั้นสิเกิดการทุกข์ยากแสนสาหัสอันใหญ่หลวงขึ้นมา อย่างที่บ่เคยมีมาจักเทื่อ ตั้งแต่ได้สร้างโลกมาจนฮอดมื้อที่สิมาเถิงฮั้น กับสิบ่มีต่อไปอีกเลย

มัทธิว 24:22 แล้วนอกจากมื้อฮั้นยามฮั้นสิย่นสั้นเข้ามา สิบ่มีใผรอดมาได้เลย แต่ย้อนเห็นแก่ผู้ที่อยู่ในขอบเขตการเลือกสรรไว้ฮั้น มวลมื้อฮั้นกะสิย่นสั้นเข้ามา 

มัทธิว 24:23 แล้วตอนฮั้น คั่นมีใผสิบอกพวกเจ้าว่า ‘นี่แน่ะ พระคริสต์อยู่หม่องฮั้นหม่องนี้’ อย่าเซื่อเด็ดขาดเลย

มัทธิว 24:24 ย้อนว่า สิมีพระคริสต์เทียมเท็จ กับผู้ทำนายเทียมเท็จเกิดขึ้นหลายราย กับสิมีเครื่องหมายสำคัญอันใหญ่หลวง กับแนวเป็นตางึดต่างๆ ได้เกิดขึ้น จนกว่าคั่นเป็นไปได้ แม้นแต่หมู่พวกผู้ที่เลือกสรรไว้ฮั้นอาจสิถืกล่อลวงได้นำ

มัทธิว 24:25 นี่แน่ะ เฮาได้บอกพวกเจ้าไว้ก่อนแล้วเด้อ

มัทธิว 24:26 จั่งซั้น คั่นใผสิบอกพวกเจ้าว่า ‘นี่แน่ะ เพิ่นอยู่ในถิ่นแห้งแล้ง’ กะอย่าออกไปหาเด้อ หรือสิว่า ‘นี่แน่ะ เพิ่นอยู่ในห้องลับฮั้น’ กะอย่าเซื่อเลย

มัทธิว 24:27 คือว่า บัดสายฟ้าแลบอยู่ทางตะเว็นออก ได้ส่องแสงจ้าเห็นฮอดตะเว็นตกจั่งใด การหลบมาของเฮา ผู้เป็นบุตรมนุษย์ กะสิเป็นจั่งซั้น

มัทธิว 24:28 คือว่าซากศพสิอยู่หม่องใด ฝูงนกอีแฮ้งกะสิเวิ่นลุมล้อมอยู่หม่องฮั้น

มัทธิว 24:29 แต่พอยามทุกข์ยากแสนสาหัสอันใหญ่หลวงฮั้นจบลงแล้ว ‘ตะเว็นสิมืดไป ดวงเดือนสิบ่ส่องแสง ดวงดาวสิตกลงมาจากฟ้า แล้วอำนาจใดๆ ในฟ้าสวรรค์กะสิถืกสั่นสะเทือนสะท้านอย่างแฮง’

มัทธิว 24:30 ยามฮั้นพอดี เครื่องหมายสำคัญของเฮาผู้เป็นบุตรมนุษย์ สิปรากฏขึ้นอยู่เทิงฟ้าสวรรค์ ‘แล้วผู้คนคู่ตระกูลเมิ้ดทั่วโลกสิโศกเศร้าไว้ทุกข์’ แล้ววางฮั้นเขาสิเห็นเฮาผู้เป็นบุตรมนุษย์ฮั้น ลงมาในเมฆอยู่เทิงท้องฟ้า ประกอบด้วยฤทธานุภาพกับพระสิริอันใหญ่หลวง 

มัทธิว 24:31 แล้วเพิ่นสิใซ้หมู่เทวทูตของเพิ่นมาพร้อมเสียงแตรอันโด่งดัง มาตุ้มโฮมหมู่พวกผู้ที่อยู่ในการเลือกสรรไว้ของเพิ่น ออกจากเข็มทิศทั้งสี่ จากสุดท้องฟ้าฟากนี้จนฮอดสุดท้องฟ้าฟากพู้น 

มัทธิว 24:32 บัดนี้ ให้เฮียนฮู้ในคำเปรียบเทียบเรื่องต้นหมากเดื่อ บัดง่ามันยังอ่อนนิ่ม กับพวมสิแตกใบแล้ว พวกเจ้ากะฮู้กันว่ายามฮ้อนใกล้สิมาฮอดแล้ว

มัทธิว 24:33 ในทำนองเดียวกัน บัดพวกเจ้าเห็นเหตุการณ์แนวหมู่นี้เป็นไปแล้ว ให้ฮู้กันว่าการเสด็จมาฮั้นใกล้สิมาฮอดแล้ว ดีบ่ดีกะอยู่หน้าประตูแล้ว

มัทธิว 24:34 เฮาสิบอกความจริงให้พวกเจ้าโลด ว่า ซั่วอายุของคนที่เฮาเว้าหนิสิบ่ได้ล่วงไปจนกว่าแนวหมู่นี้ทั้งเมิ้ดสิเป็นไปด้วยความสำเร็จ 

มัทธิว 24:35 คือว่า ฟ้าสวรรค์กับแผ่นดินโลกสิล่วงไป แต่ถ้อยคำของเฮาสิบ่ผ่านพ้นล่วงไปจักเทื่อเลย

มัทธิว 24:36 แต่มื้อฮั้น โมงฮั้นที่เฮาสิมา บ่มีใผฮู้จักนำ แม้นแต่พวกเทวทูตในสวรรค์กะบ่ฮู้จัก มีแต่พระเจ้าผู้เป็นพ่อของเฮาที่ฮู้จัก

มัทธิว 24:37 คือสมัยของโนอาห์เป็นจั่งใด บัดเฮาผู้เป็นบุตรมนุษย์หลบมา กะสิเป็นจั่งซั้นคือกัน

มัทธิว 24:38 โดยว่า ก่อนมื้อน้ำท่วมฮั้น คนทั้งหลายมีแต่กินกับดื่มกัน แต่งงานยกให้เป็นผัวเมียกัน จนฮอดมื้อที่โนอาห์เข้าในเฮือใหญ่

มัทธิว 24:39 ในวางฮั้น คนบ่ฮู้เมื่อโตว่าอีหยังสิมา จนกว่าน้ำมาท่วม พัดพาเอาพวกเขาไปเมิ้ด แล้วบัดยามเฮาผู้เป็นบุตรมนุษย์สิมาฮั้น มันกะสิเป็นจั่งซั้นคือกัน

มัทธิว 24:40 แต่ในยามที่สิมาฮั้น สิมีสองคนอยู่ท่งนานำกัน คนหนึ่งสิถืกฮับไป กับอีกคนหนึ่งสิยังอยู่

มัทธิว 24:41 แล้วสิมีญิงสองคน พวมสิโม่แป้งอยู่ที่โรงโม่ คนหนึ่งสิถืกฮับไป กับอีกคนหนึ่งสิยังอยู่

มัทธิว 24:42 จั่งซั้น ให้ระวังอยู่เด้อ ย้อนพวกเจ้าบ่ฮู้ว่าองค์พระผู้เป็นเจ้าของเจ้าสิมาในยามใด

มัทธิว 24:43 แต่ให้ฮู้กันไว้เด้อ คั่นว่าเจ้าของเฮือนฮู้ไว้ล่วงหน้าว่า ขโมยสิมายามใด เขากะสิระวังไว้ดีๆ บ่ยอมให้เฮือนลาวถืกบุกลุกเขาไปปล้นได้

มัทธิว 24:44 จั่งซั้น พวกเจ้าให้เตรียมโตไว้ให้พร้อมคือกัน ย้อนในโมงที่เจ้าบ่คึดบ่ฝันฮั้น เฮาผู้เป็นบุตรมนุษย์สิมาโลด

มัทธิว 24:45 บัดนี้ ใผเป็นผู้ฮับใซ้ที่จงรักภักดีกับมีสติปัญญา ที่นายได้ตั้งไว้เบิ่งแยงคนในคัวเฮือนของนาย แล้วกะเลี้ยงอาหารการกินให้เขาตามเวลา

มัทธิว 24:46 ผู้ฮับใซ้ผู้ฮั้นกะสิได้พรเป็นสุข บัดยามนายของเขามาพ้อมาเห็นว่าเขาพวมเฮ็ดจั่งซั้น 

มัทธิว 24:47 เฮาสิบอกความจริงให้พวกเจ้าโลด ว่า นายฮั้นสิตั้งคนใซ้ผู้ฮั้นไว้ให้เบิ่งแยงพวกข้าวของเครื่องใซ้ของลาวเมิ้ดคู่แนว

มัทธิว 24:48 แต่คั่นว่า ผู้ฮับใซ้ซั่วสิคึดในใจว่า ‘นายของข้าคือสิบ่ได้มาง่ายดอก’

มัทธิว 24:49 แล้วสิตั้งต้นเริ่มเฆี่ยนตีหมู่ผู้ฮับใซ้ กับสิกินดื่มมั่วสุมอยู่กับพวกขี้เมา

มัทธิว 24:50 นายของผู้ฮับใซ้ผู้ฮั้นสิมาในมื้อที่เขาบ่คาดคึด แล้วในโมงที่เขาบ่ฮู้เมื่อ

มัทธิว 24:51 พอฮอดแล้ว นายกะสิลงโทษเขาอย่างฮ้ายแฮง แล้วให้เขามีหุ้นส่วนกับพวกหน้าซื่อใจคด ซึ่งในหม่องฮั้นมีแต่การฮ้องไห้กัดแข้วอยู่ตลอด”
////////// ////////// //////////