มัทธิว – Matthew บทที่ 19

มัทธิว 19:1 แล้วต่อมา บัดพระเยซูเว้าถ้อยคำพวกนี้เมิ้ดแล้ว เพิ่นได้ออกจากแคว้นกาลิลี เข้าไปในเขตแดนแคว้นยูเดียฟากแม่น้ำจอร์แดนข้างพู้น

มัทธิว 19:2 แล้วมีหมู่คนหลายขนาดได้ตามพระเยซูไป แล้วเพิ่นได้ปัวโรคภัยไข้เจ็บของพวกเขาให้เซาเป็นดีเมิ้ดคู่คนอยู่หม่องฮั้น

มัทธิว 19:3 แล้วพวกฟาริสีมาลองใจพระเยซูจั่งถามเพิ่นเป็นปัญหาว่า “ผู้ซายสิหย่าเมียของโตย้อนสาเหตุหยังกะตาม มันสิถืกตามกฎบัญญัติสั่นบ้อ”

มัทธิว 19:4 พระเยซูจั่งตอบเขาว่า “พวกเจ้าบ่ได้อ่านบ้อ ว่าพระเจ้าผู้เพิ่นสร้างโตคนแต่ตำอิดฮั้น ‘ได้สร้างเขาให้เป็นซายกับญิง’

มัทธิว 19:5 กับเพิ่นได้เว้าว่า ‘ย้อนเหตุนี้ล่ะ ผู้ซายสิออกจากพ่อแม่ของเขา แล้วสิไปผูกพันอยู่กับเมียเขา แล้วเขาทั้งสองสิกลายเป็นเนื้อหนังอันหนึ่งอันเดียวกัน’

มัทธิว 19:6 เขาจั่งบ่เป็นสองอีกต่อไป แต่สิเป็นเนื้อหนังอันหนึ่งอันเดียวกัน จั่งซั้นผู้ที่พระเจ้าให้เป็นอันหนึ่งอันเดียวกันฮั้นแล้ว อย่าให้ผู้ใดเฮ็ดให้เขาแตกแยกกันเลย”

มัทธิว 19:7 แล้วพวกฟาริสีจั่งถามเพิ่นซ้ำอีกว่า “คั่นจั่งซั้น เป็นหยังโมเสสได้สั่งให้ยื่นหนังสือหย่ากันเป็นทางการ ให้หย่าเมียได้”

มัทธิว 19:8 พระเยซูโต้ตอบเขาว่า “โมเสสได้ยอมให้พวกเจ้าหย่าเมียของโต ย้อนเหตุว่าจิตใจของพวกเจ้าแข็งกระด้าง แต่ตำอิดมามันบ่ได้เป็นจั่งซั้น

มัทธิว 19:9 แล้วเฮาบอกพวกเจ้าว่า ผู้ใดหย่าเมียของโต (เว้นแต่เมียเป็นซู้) แล้วไปเอาเมียใหม่กะผิดประเวณี กับว่าซายผู้ใดที่ฮับเอาเมียเดิมที่ถืกหย่าแล้วฮั้น มาเป็นเมียของโต มันกะผิดประเวณีคือกัน”

มัทธิว 19:10 บัดนี้ พวกลูกศิษย์ของพระเยซูจั่งบอกเพิ่นว่า “คั่นเป็นจั่งซั้น เถิงเรื่องซายกับเมียของเขา บ่เอาเมียกะสิดีกว่าเนาะ”

มัทธิว 19:11 แต่เพิ่นตอบเขาว่า “บ่แม่นคู่คนที่สามารถฮับตามถ้อยคำเรื่องการเป็นโสดนี้ได้ มีแต่ผู้ที่พระเจ้าโปรดให้ความสามารถกะสิฮับได้

มัทธิว 19:12 คือมีผู้ลางคนเป็นขันทีเกิดมาแต่ท้องแม่ กับผู้ลางคนที่ถืกคนอื่นเฮ็ดเขาให้เป็นขันทีกะมี แล้วกะมีผู้ลางคนที่บ่แต่ง ซึ่งยกเว้นไว้ย้อนเห็นแก่แผ่นดินสวรรค์ของพระเจ้า ใผที่สามารถฮับเอาการยกเว้นแนวนี้ได้ กะให้เขาฮับเอาซะ”

มัทธิว 19:13 ยามฮั้น มีการพาเด็กน้อยมาหาพระเยซู เพื่อสิให้เพิ่นวางมืออธิษฐานเว้านำพระเจ้าเพื่อเขา แต่พวกลูกศิษย์กะเลยเว้าให้เขา

มัทธิว 19:14 แต่พระเยซูบอกว่า “ปล่อยให้เด็กน้อยเข้ามาหาเฮาโลดเด้อ อย่าห้ามเขาไว้เลยเด้อ ย้อนว่าแผ่นดินสวรรค์เป็นของคนอย่างเด็กน้อยพวกนี้อยู่แล้ว”

มัทธิว 19:15 เว้าแล้วเพิ่นได้วางมือของเพิ่นเทิงเด็กน้อยพวกฮั้น แล้วกะออกจากหม่องฮั้นไป

มัทธิว 19:16 แล้วนี่แน่ะ มีซายคนหนึ่งมาเว้ากับพระเยซูว่า “อาจารย์ผู้ดีเอ้ย ผู้ข้าสิต้องเฮ็ดแนวดีอีหยังจั่งสิได้ซีวิตนิรันดร์”

มัทธิว 19:17 พระเยซูตอบเขาว่า “เจ้าเอิ้นเฮาว่าเป็นผู้ดีย้อนหยัง บ่มีใผเป็นผู้ดีอีหลีนอกจากพระเจ้าแต่ผู้เดียวเพิ่นท่อฮั้น แต่คั่นเจ้าอยากสิเข้าสู่ซีวิตนิรันดร์ กะให้ฮักษากฎบัญญัติไว้เด้อ”

มัทธิว 19:18 ซายคนฮั้นถามพระเยซูว่า “กฎบัญญัติข้อใดแหน่” พระเยซูตอบว่า “อย่าฆ่าคน อย่าเล่นซู้ล่วงประเวณี อย่าลักทรัพย์ของเพิ่น อย่าเป็นพยานเท็จตัวะเขา

มัทธิว 19:19 ให้เกียรติพ่อแม่ของโต กับให้ฮักแพงเพื่อนบ้านคือจั่งฮักโตเอง”

มัทธิว 19:20 คนหนุ่มฮั้นเลยบอกพระเยซูว่า “ข้อแนวหมู่นี้ผู้ข้าได้ถือฮักษาไว้คู่แนวตั้งแต่เป็นเด็กมาอยู่แล้ว ผู้ข้ายังขาดอีหยังบ้อ”

มัทธิว 19:21 พระเยซูจั่งบอกเขาว่า “คั่นเจ้าอยากเป็นผู้ดีครบถ้วน กะให้ไปขายพวกทรัพย์สิ่งของๆ เจ้าเด้อ แล้วแจกจ่ายให้คนยากจนซะ จั่งสิมีทรัพย์สมบัติในสวรรค์ แล้วให้ตามเฮามาเด้อ”

มัทธิว 19:22 บัดคนหนุ่มได้ยินถ้อยคำฮั้น เขากะออกไปอย่างทุกข์ใจหลาย ย้อนเขามีทรัพย์สมบัติหลายขนาด 

มัทธิว 19:23 บัดนี้ พระเยซูเว้ากับพวกลูกศิษย์ของเพิ่นว่า “เฮาสิบอกความจริงให้พวกเจ้าโลด ว่า คนมั่งมีสิเข้าในแผ่นดินสวรรค์กะสิเป็นการยาก

มัทธิว 19:24 แล้วเฮาสิบอกพวกเจ้าอีกว่า โตอูฐสิลอดฮูเข็มกะง่ายกว่าคนมั่งมีสิเข้าในแผ่นดินของพระเจ้าได้”

มัทธิว 19:25 บัดพวกลูกศิษย์ของเพิ่น พอได้ยินแล้วกะแปลกใจเป็นตางึดหลาย จั่งเว้าว่า “คั่นจั่งซั้นใผสิรอดพ้นได้”

มัทธิว 19:26 แต่พระเยซูเหลียวเบิ่งพวกลูกศิษย์ จั่งเว้ากับเขาว่า “สำหรับคน มันกะเป็นไปบ่ได้เลย แต่สำหรับพระเจ้า เมิ้ดคู่แนวกะเป็นไปได้โลด” 

มัทธิว 19:27 แล้วเปโตรได้เว้าขึ้นมาว่า “นี่แน่ะ พวกผู้ข้าได้สละเมิ้ดคู่แนว แล้วได้ติดตามืมาแล้ว (ต่างกับซายหนุ่มผู้ฮั้น) พวกผู้ข้าสิได้อีหยังตอบแทนแหน่”

มัทธิว 19:28 พระเยซูเลยเว้ากับเขาว่า “เฮาสิบอกความจริงให้พวกเจ้าโลด คือพวกเจ้าผู้ที่ติดตามเฮามาหนิ ในยุคที่สิมาบัดเฮาผู้เป็นบุตรมนุษย์ สินั่งบัลลังก์ของเฮา ที่ประกอบด้วยพระสิริอันรุ่งเรืองฮั้น ฝ่ายพวกเจ้ากะสินั่งบัลลังก์สิบสองบัลลังก์ กับสิพิพากษาซนซาติอิสราเอลสิบสองตระกูลฮั้นเลย 

มัทธิว 19:29 แล้วคู่คนที่สละเฮือน พี่น้องซายญิง พ่อแม่ เมีย ลูก ที่ดิน ย้อนเห็นแก่นามของเฮา ผู้ฮั้นสิได้ผลตอบแทนร้อยเท่า กับสิได้ซีวิตนิรันดร์เป็นมรดกนำ

มัทธิว 19:30 แต่มีหลายคนที่มีอันดับสูงกะสิกลายเป็นอันดับต่ำ แล้วผู้ที่มีอันดับต่ำกะสิกลายเป็นอันดับสูง”
////////// ////////// //////////