มัทธิว – Matthew บทที่ 18

มัทธิว 18:1 ในยามฮั้นพอดี พวกลูกศิษย์มาหาพระเยซูเว้าว่า “ซ่อยบอกแหน่ แม่นใผสิเป็นใหญ่ในแผ่นดินสวรรค์ฮั้น”

มัทธิว 18:2 แล้วพระเยซูได้เอิ้นเด็กน้อยมาคนหนึ่ง ให้ไปยืนอยู่ในหมู่พวกลูกศิษย์ 

มัทธิว 18:3 แล้วเว้าว่า “เฮาสิบอกความจริงให้พวกเจ้าโลด ว่า นอกจากพวกเจ้าเปลี่ยนใจใหม่ ถ่อมโตลงคือปานเด็กน้อยหนิ เจ้าสิเข้าในแผ่นดินสวรรค์บ่ได้เลย

มัทธิว 18:4 คือ ผู้ใดกะตามที่ถ่อมใจลงคือเด็กน้อยคนนี้ ผู้ฮั้นสิเป็นใหญ่ในแผ่นดินสวรรค์

มัทธิว 18:5 แล้วผู้ใดสิต้อนฮับเด็กน้อยคนหนึ่งคือเด็กผู้นี้ในนามของเฮา ผู้ฮั้นกะท่อกับต้อนฮับเฮา

มัทธิว 18:6 แต่ผู้ใดที่เป็นอุปสรรคให้ผู้เล็กน้อยคนหนึ่งให้หลงผิดไปในพวกนี้ที่เซื่อในเฮา คั่นสิเอาหินโม่ก้อนใหญ่ผูกคอผู้ฮั้น แล้วถ่วงลงในทะเลหม่องลึกๆ กะสิดีกว่า

มัทธิว 18:7 ระวังพินาศเด้อ คนโลกนี้ ย้อนการก่อเหตุให้คนสะดุดหลงผิด คือจำเป็นที่สิต้องมีการสะดุดให้หลงผิดอยู่แล้ว แต่ระวังพินาศเด้อ ผู้ที่ก่อเหตุฮั้น

มัทธิว 18:8 คือจั่งว่า คั่นมือหรือตีนของเจ้าเป็นอุปสรรคให้เจ้าหลงผิด ให้ตัดออกโยนถิ้มซะเด้อ คือซึ่งเจ้าสิใซ้ซีวิตด้วยมือด้วนตีนด้วน กะสิดีกว่ามีครบสองมือสองตีน แล้วสิถืกถิ้มลงในบึงไฟซึ่งไหม้อยู่ตลอดกาลเป็นนิตย์

มัทธิว 18:9 แล้ว คั่นว่าตาของเจ้าเป็นอุปสรรคให้เจ้าหลงผิด กะให้ควักออกโยนมันถิ้มซะเด้อ คือซึ่งเจ้าสิใซ้ซีวิตด้วยตาข้างเดียวกะยังดีกว่ามีตาครบทั้งสอง แล้วสิถืกถิ้มลงในบึงไฟซึ่งไหม้อยู่ตลอดกาลเป็นนิตย์

มัทธิว 18:10 ให้ระวังให้ดีเด้อ อย่าดูถูกดูหมิ่นผู้เล็กน้อยในพวกนี้แม้นแต่ผู้เดียว คือเฮาสิบอกพวกเจ้าว่า เทวทูตประจำโตของผู้เล็กน้อยอยู่เทิงสวรรค์ฮั้น ได้เห็นหน้าของพระเจ้าอยู่เสมอ ผู้เพิ่นซึ่งเป็นพ่อของเฮาอยู่ในสวรรค์ 

มัทธิว 18:11 คือเฮาผู้เป็นบุตรมนุษย์ได้มาเพื่อซ่อยผู้ซึ่งหลงทางไปฮั้นให้รอดพ้น

มัทธิว 18:12 พวกเจ้าคึดเห็นจั่งใด คั่นผู้หนึ่งมีแกะอยู่ร้อยโต กับโตหนึ่งหลงทางจากฝูงเฮี่ยไป บ่แม่นผู้ฮั้นสิบ่ปะแกะเก้าสิบเก้าโตไว้บ้อ แล้วขึ้นไปเทิงภูเขาซอกหาโตที่เฮี่ยไปฮั้น

มัทธิว 18:13 เฮาสิบอกความจริงให้พวกเจ้าโลด ว่า คั่นเป็นว่าเขาได้พ้อ เขากะสิชื่นชมยินดีในแกะโตฮั้น หลายกว่าแกะเก้าสิบเก้าโตที่บ่ได้หลงเฮี่ยไป

มัทธิว 18:14 ในทำนองเดียวกัน พระเจ้าผู้เป็นพ่อของเจ้า ผู้เพิ่นสถิตในสวรรค์ เพิ่นบ่อยากให้ผู้เล็กน้อยในพวกนี้พินาศไป แม้นแต่คนเดียวเลย

มัทธิว 18:15 หลายกว่าฮั้นอีก คั่นพี่น้องผู้หนึ่งของเจ้าเฮ็ดผิดต่อเจ้า ให้ไปบอกเขาเถิงความผิดฮั่นสองต่อสองท่อฮั้น คั่นเขาฮับฟังเจ้า เจ้าสิได้พี่น้องคืนมา

มัทธิว 18:16 แต่คั่นว่า เขาบ่ยอมฮับฟังเจ้า กะให้นำคนหนึ่งหรือสองคนไปนำ ให้เป็นพยานสองสามปาก เพื่อคู่คำสิเป็นหลักฐานได้

มัทธิว 18:17 แล้วคั่นว่า เขายังบ่ยอมฟังคนพวกฮั้น ให้ไปแจ้งเรื่องความผิดฮั้นต่อหน้ากลุ่มผู้เซื่อ แต่คั่นว่าเขายังบ่ฟังกลุ่มผู้เซื่ออีกกะให้ถือว่า เขาคือปานคนต่างซาติที่บ่ฮู้จักพระเจ้ากับคนเก็บภาษี 

มัทธิว 18:18 เฮาสิบอกความจริงให้พวกเจ้าโลด ว่า แนวใดซึ่งพวกเจ้าตกลงสิผูกมัดไว้ในโลกนี้ กะสิถืกผูกมัดไว้ในสวรรค์นำ กับแนวใดซึ่งเจ้าตกลงสิปลดปล่อยในโลกนี้ กะสิถืกปลดปล่อยในสวรรค์คือกัน 

มัทธิว 18:19 เฮาสิบอกพวกเจ้าซ้ำอีกว่า คั่นสิมีสองคนในพวกเจ้าสิฮ่วมใจตกลงกันข้อใดข้อหนึ่งในโลกนี้ แล้วขอตามแนวฮั้น พระเจ้าผู้เป็นพ่อของเฮาผู้เพิ่นสถิตในสวรรค์กะสิเฮ็ดให้เขาโลด

มัทธิว 18:20 คือว่า หม่องใดที่มีสองสามคนฮ่วมกันในนามของเฮา เฮาสิอยู่นำหมู่พวกเขาอยู่ฮั้น”

มัทธิว 18:21 ยามฮั้น เปโตรมาเว้ากับพระเยซูว่า “ท่านเจ้าข้า พี่น้องของผู้ข้าสิเฮ็ดผิดต่อผู้ข้าจักเทื่อ ผู้ข้าจั่งสิต้องยกความผิดให้เขา ฮอดเจ็ดเทื่อบ้อ”

มัทธิว 18:22 พระเยซูตอบเขาว่า “เฮาบ่ว่าเพียงเจ็ดเทื่อท่อฮั้น แต่ฮอดเจ็ดสิบคูณด้วยเจ็ดเทื่อ 

มัทธิว 18:23 จั่งซั้น แผ่นดินสวรรค์เปรียบคือนายผู้หนึ่ง อยากสิคึดบัญชีผู้ฮับใซ้ของเพิ่น

มัทธิว 18:24 บัดตั้งต้นเริ่มการคึดบัญชีฮั้น ได้มีคนหนึ่งถืกพามา ซึ่งผู้นี้เป็นหนี้กษัตริย์หนึ่งหมื่นตะลันต์

มัทธิว 18:25 ผู้ฮั้นบ่มีเงินสิใซ้หนี้ได้ นายเขาจั่งสั่งให้เขาขายโตเอง ทั้งเมียกับลูกนำ พร้อมทั้งเมิ้ดคู่อันคู่แนวที่เขามีอยู่ฮั้น เอามาใซ้หนี้ให้เมิ้ด

มัทธิว 18:26 ลูกหนี้ผู้ฮั้นจั่งก้มกราบนายว่า ‘ข้าแต่นายท่านเอ้ย ขอโปรดอดทนต่อผู้ข้าแหน่ท้อน แล้วผู้ข้าสิใซ้หนี้นายทั้งเมิ้ด’

มัทธิว 18:27 แล้วนายของผู้ฮับใซ้ผู้ฮั้นมีใจเมตตา เลยปล่อยเขาไป ยกหนี้ให้เขาเมิ้ด 

มัทธิว 18:28 แต่ผู้ฮับใซ้ผู้ฮั้นออกไปพ้อหมู่ผู้ฮับใซ้ผู้หนึ่ง ซึ่งเป็นหนี้เขาอยู่หนึ่งร้อยเดนาริอัน จั่งจับคนฮั้นบีบคอว่า ‘ให้ใซ้หนี้เฮามาเมิ้ดแม่ะ’

มัทธิว 18:29 หมู่ผู้ฮับใซ้ผู้ฮั้นได้กราบลงต่อหน้าอ้อนวอนว่า ‘ขอโปรดอดทนต่อผู้ข้าเถิด แล้วผู้ข้าสิใซ้หนี้ทั้งเมิ้ด’

มัทธิว 18:30 แต่เขาผู้ที่ได้ฮั้บการยกหนี้มาแล้วกะบ่ยอม จั่งนำหมู่ผู้ฮับใซ้ลูกหนี้ฮั้นไปขังคุกไว้ จนกว่าสิใซ้หนี้ฮั้นให้เมิ้ด

มัทธิว 18:31 ฝ่ายหมู่พวกผู้ฮับใซ้บัดเห็นเหตุการณ์แนวฮั้น กะพากันสลดใจอย่างใหญ่ จั่งนำเหตุการณ์ทั้งเมิ้ด ไปบอกนายของพวกเขา

มัทธิว 18:32 แล้วนายของเขาจั่งได้เอิ้นผู้ฮับใซ้ฮั้นมาเว้าว่า ‘โอ้ เจ้าผู้ฮับใซ้ซั่วแท้ เฮาได้ยกหนี้ให้เจ้าเมิ้ดอยู่แล้ว ย้อนเจ้าได้อ้อนวอนขอนำเฮา

มัทธิว 18:33 เจ้าควรสิเมตตาต่อหมู่ผู้ฮับใซ้นำกัน คือจั่งเฮาได้เมตตาเจ้าบ่แม่นบ้อ’

มัทธิว 18:34 แล้วนายของเขากะอยากฮ้ายอย่างใหญ่จั่งมอบคนใซ้ผู้ฮั้นไว้ต่อเจ้าหน้าที่ให้ทรมานจนกว่าสิใซ้หนี้ให้เมิ้ด

มัทธิว 18:35 ในทำนองเดียวกัน พระเจ้าผู้เป็นพ่อของเฮา ผู้เพิ่นสถิตในสวรรค์ กะสิเฮ็ดกับพวกเจ้าคือกัน คั่นว่าเจ้าบ่ยกโทษความผิดให้พี่น้องของเจ้าด้วยใจจริง”
////////// ////////// //////////