มัทธิว – Matthew บทที่ 10

มัทธิว 10:1 แล้วบัดพระเยซูได้เอิ้นลูกศิษย์สิบสองคนของเพิ่นมาแล้ว เพิ่นกะมอบอำนาจให้เขาขับไล่ผีโสมมออกได้ กับให้ปัวโรคภัยไข้เจ็บเมิ้ดคู่แนวให้เซาดีได้

มัทธิว 10:2 บัดนี้ซื่อของทูตพิเศษสิบสองคนฮั้นมีจั่งซี้ คนตำอิดชื่อซีโมนที่เอิ้นว่าเปโตร กับอันดรูว์ น้องซายของเปโตร ยากอบลูกซายเศเบดี กับโยฮันน้องซายของยากอบ

มัทธิว 10:3 ฟีลิป กับบารโธโลมิว โธมัส กับ มัทธิวคนเก็บภาษีฮั้น ยากอบลูกซายของอัลเฟอัส กับเลบเบอัสผู้ที่มีชื่ออีกว่าธัดเดอัส

มัทธิว 10:4 ซีโมนซาวคานาอัน กับยูดาสอิสคาริโอท แม่นผู้นี้ที่ได้ทรยศพระเยซู

มัทธิว 10:5 สิบสองคนนี้พระเยซูได้ใซ้ให้ออกไปกับสั่งเขาว่า “อย่าไปหาพวกต่างซาติ กับอย่าเข้าไปในเมืองของซาวสะมาเรีย

มัทธิว 10:6 แต่ให้ไปหาฝูงแกะที่หลงทางไปฮั้น คือพี่น้องซาวอิสราเอลเด้อ

มัทธิว 10:7 แล้วบัดพวมไปอยู่ฮั้น กะให้ประกาศว่า ‘แผ่นดินสวรรค์ใกล้สิมาฮอดแล้ว’

มัทธิว 10:8 ให้ปัวคนเจ็บไข้ได้ป่วยให้เซา คนโรคขี้ทูตให้เซา สะอาดดีคือเก่า คนตายแล้วให้เป็นขึ้นมาอืก กับให้ขับไล่ผีออก พวกเจ้าได้ฮับความซ่อยเหลือโดยบ่ต้องเสียค่าอีหยัง จั่งให้ซ่อยคนอื่นโดยบ่คึดค่าคือกัน

มัทธิว 10:9 บ่ให้เอาทองคำ หรือเงิน หรือทองแดงใส่เข็มคัดของเจ้าไว้

มัทธิว 10:10 กับบ่ให้เอาย่ามไปนำตามทาง หรือเสื้อคลุมสองโต หรือเกิบ หรือไม้เท้า ย้อนว่าคนงานสมควรที่สิได้ฮับแนวกิน 

มัทธิว 10:11 บัดพวกเจ้ามาเถิงบ้านใดเมืองใด กะให้คอยเบิ่งว่าใผเป็นคนเหมาะดีในหม่องฮั้น แล้วให้ไปอาศัยกับผู้ฮั้นจนกว่าสิจากไป 

มัทธิว 10:12 แล้วบัดยามพวกเจ้าขึ้นเฮือนใด กะให้กล่าวพรให้ครัวเฮือนฮั้น

มัทธิว 10:13 แล้วคั่นแม่นครัวเฮือนใดเหมาะดีที่สิฮับพร กะให้สันติสุขของเจ้าสถิตอยู่กับครัวเฮือนฮั้น แต่คั่นครัวเฮือนใดบ่เหมาะดีที่สิฮับพร กะให้สันติสุขของเจ้ากลับคืนมาอยู่กับเจ้า 

มัทธิว 10:14 แล้วคั่นผู้ใดบ่ต้อนฮับพวกเจ้า กับบ่ฟังคำของเจ้า บัดสิออกจากเฮือนฮั้นเมืองฮั้น กะให้ปัดฝุ่นของเมืองฮั้นที่ติดเกิบเจ้าออกซะเด้อ 

มัทธิว 10:15 เฮาสิบอกความจริงให้พวกเจ้าโลด ว่า ในมื้อพิพากษาที่สิมาฮั้น โทษที่สิลงใส่เมืองโสโดมกับเมืองโกโมราห์ สิเบากว่าโทษของเมืองฮั้น(ที่บ่ต้อนฮับเจ้า)

มัทธิว 10:16 นี่แน่ะ เฮาใซ้พวกเจ้าออกไปคือจั่งแกะอยู่ในฝูงหมาป่า จั่งซั้นให้พวกเจ้าฉลาดคือปานงู กับไร้เดียงสาคือปานนกพิราบ

มัทธิว 10:17 แต่ให้ระวังพวกผู้คนไว้ให้ดีเด้อ ย้อนว่าพวกเขาสิมอบพวกเจ้าไว้กับศาลสภาแซนเฮดริน แล้วพวกเขาสิเฆี่ยนสิตีพวกเจ้าในศาลาธรรมของเขา

มัทธิว 10:18 กับพวกเจ้าสิถืกลากไปอยู่ต่อหน้าพวกเจ้าเมืองกับพวกกษัตริย์ ย้อนเจ้าเห็นแก่เฮา นี่กะเพื่อพวกเจ้าสิได้เป็นพยานต่อเขา กับต่อคนต่างซาติเถิงเฮานำ

มัทธิว 10:19 แต่บัดเขามอบเจ้าไว้ฮั้น อย่าสู่คึดหลายเด้อ ว่าสิเว้าอีหยังหรือจั่งใด ย้อนบัดเถิงยามฮั้นแล้ว คำที่เจ้าสิต้องเว้า พระเจ้ากะสิให้เจ้าโลด

มัทธิว 10:20 ย้อนว่าผู้ที่สิเว้าฮั้น กะบ่แม่นโตเจ้าเอง แต่เป็นพระวิญญาณของพระเจ้าผู้เป็นพ่อของเจ้าต่างหาก เพิ่นสิเป็นผู้บอกความไว้ในใจของเจ้า

มัทธิว 10:21 แล้วอ้ายกะสิมอบน้องไว้ให้ถืกประหาร พ่อสิมอบลูก กับลูกกะสิทรยศต่อพ่อแม่ให้ถืกประหารคือกัน

มัทธิว 10:22 แล้วเมิ้ดคู่คนกะสิซังเจ้าย้อนเจ้าเห็นแก่นามของเฮา แต่ผู้ที่ทนได้เถิงสุดท้าย ผู้ฮั้นกะสิพ้น 

มัทธิว 10:23 แต่บัดเขาข่มเหงเจ้าในเมืองฮั้นเมืองนี้ กะให้หนีไปอยู่อีกเมืองหนึ่ง เฮาสิบอกความจริงให้พวกเจ้าโลด ว่า ก่อนที่เจ้าสิไปฮอดทั่วคู่เมืองในอิสราเอล เฮาผู้เป็นบุตรมนุษย์ฮั้นสิมา

มัทธิว 10:24 คือลูกศิษย์สิบ่ใหญ่กว่าครู กับทาสสิบ่ใหญ่กว่านาย

มัทธิว 10:25 คือคั่นลูกศิษย์สิท่อครูของเขา กับทาสใซ้สิท่อนายกะสิดี แล้วคั่นคนสิเอิ้นใส่เจ้าของเฮือนว่าเป็น เบเอลเซบูล เขากะสิเอิ้นใส่ไทเฮือนว่าเป็นมารคือกันแฮงหลายส่ำใด 

มัทธิว 10:26 จั่งซั้นอย่าสู่หย้านเขาเด้อ ย้อนว่าบ่มีแนวใดปิดบังไว้ที่สิบ่ถืกเปิดเผย หรือเสื่องไว้ที่สิบ่นำออกมาให้ฮู้เห็น

มัทธิว 10:27 คือแนวที่เฮาบอกพวกเจ้าในที่มืด กะให้ออกไปเว้าในที่แจ้งเด้อ กับแนวที่เจ้าได้ยินเข้าหูค่อยๆ กะให้ประกาศจากดาดฟ้าหลังคาบ้านนำเด้อ

มัทธิว 10:28 กับอย่าสู่หย้านผู้ที่สามารถฆ่าเพียงแต่กาย แต่บ่สามารถที่สิฆ่าจิตวิญญาณนำ แต่ว่าให้หย้านผู้เพิ่นมีฤทธิ์อำนาจที่สิทำร้ายทั้งจิตวิญญาณทั้งกายให้พินาศในนรกได้

มัทธิว 10:29 คือนกกระจอกสองโตขายแค่บาทเดียวบ่แม่นบ้อ แล้วแม้นแต่โตเดียวสิตกดินกะบ่ได้นอกจากพระเจ้าผู้เป็นพ่อของเจ้าเพิ่นกะฮู้โลด 

มัทธิว 10:30 แล้วแม้นแต่เส้นผมของพวกเจ้า เพิ่นกะนับไว้แล้วเมิ้ดคู่เส้น

มัทธิว 10:31 จั่งซั้นอย่าสู่หย้านอีหยังเลย พวกเจ้ามีคุณค่าหลายกว่านกกระจอกหลายโตบ่แม่นบ้อ

มัทธิว 10:32 จั่งซั้น ผู้ใดกะตามที่สิฮับปากว่าฮู้จักเฮาต่อหน้าผู้คน เฮากะสิฮับผู้ฮั้นต่อหน้าพระเจ้าผู้เป็นพ่อของเฮา ผู้เพิ่นสถิตในสวรรค์นำ

มัทธิว 10:33 แต่ผู้ใดที่สิปฏิเสธเฮาต่อหน้าผู้คน เฮาสิปฏิเสธผู้ฮั้นต่อหน้าพระเจ้าผู้เป็นพ่อของเฮา ผู้เพิ่นสถิตในสวรรค์คือกัน

มัทธิว 10:34 อย่าสู่คึดว่าเฮามาเพื่อสินำสันติภาพมาสู่โลก เฮาบ่ได้นำสันติภาพมาดอก แต่ได้นำดาบมาต่างหาก

มัทธิว 10:35 คือเฮามาเพื่อสิให้ลูกซายผิดใจกันกับพ่อของโต กับลูกสาวผิดใจกันกับแม่ กับลูกสะใภ้ผิดใจกันกับแม่ผัว

มัทธิว 10:36 คือคนเฮือนเดียวกัน กะสิขัดใจเป็นคู่อาริกันและกัน

มัทธิว 10:37 ผู้ใดที่ฮักพ่อแม่หลายกว่าฮักเฮา ผู้ฮั้นบ่สมควรที่สิไปกับเฮา กับผู้ใดฮักลูกซายญิงหลายกว่าฮักเฮา ผู้ฮั้นบ่สมควรที่สิไปกับเฮา

มัทธิว 10:38 กับผู้ใดที่บ่ฮับเอาหลักประหารของโตแล้วตามเฮาไป ผู้ฮั้นบ่สมควรที่สิไปกับเฮาคือกัน

มัทธิว 10:39 คือว่า ผู้ใดคึดอยากเอาซีวิตรอด ผู้ฮั้นสิเสียซีวิตไป แต่ผู้ใดที่อุทิศซีวิตของโตย้อนเห็นแก่เฮา ผู้ฮั้นกะสิได้ซีวิตรอด

มัทธิว 10:40 แล้วผู้ที่ต้อนฮับพวกเจ้ากะท่อกับต้อนฮับเฮา แล้วผู้ที่ต้อนฮับเฮา กะท่อกับต้อนฮับผู้เพิ่นที่ใซ้เฮามา

มัทธิว 10:42 แล้วผู้ที่ต้อนฮับผู้เป็นปากเป็นเสียงของพระเจ้า ย้อนว่าเป็นผู้เป็นปากเป็นเสียง กะสิได้บำเหน็จรางวัลอย่างผู้เป็นปากเป็นเสียงฮั้นนำ แล้วผู้ที่ต้อนฮับผู้เที่ยงธรรม ย้อนว่าเป็นผู้เที่ยงธรรม กะสิได้บำเหน็จรางวัลอย่างผู้เที่ยงธรรมฮั้นนำ

มัทธิว 10:43 แล้วผู้ที่ต้อนฮับผู้เป็นปากเป็นเสียงของพระเจ้า กะสิได้บำเหน็จรางวัลส่ำเป็นผู้เป็นปากเป็นเสียงคือกัน แล้วผู้ที่ต้อนฮับผู้เที่ยงธรรม กะสิได้บำเหน็จรางวัลส่ำเป็นผู้เที่ยงธรรมคือกัน
มัทธิว 10:44 แล้วผู้ใดสิเอาน้ำเย็นให้ผู้เล็กน้อยส่ำนี้ให้กิน โดยในนามของลูกศิษย์ของเฮา เฮาสิบอกความจริงให้พวกเจ้าโลด ว่า ผู้ฮั้นสิบ่ได้ขาดบำเหน็จรางวัลจักหน่อยเลย”
////////// ////////// //////////